Read berom Zɛkarya 9 Bible Online

Zɛkarya 9 - berom bible

Zɛkarya 9

¹Hâ siitit yi na Dagwi Darwey a hemo: Dagwi Darwey e bɛrɛng yére BeIsrayɛl, e bɛrɛng mwa bemasi arɔng. Ko e yɛrɛ a sevwêl Hadrak na gbɔng repomô Damaskus shɔt.

²Shɔt o ya rɔda hwo e ra repomô Hamat de ra sé bagat na Hadrak, ya hwo e ra bagbɔng bapomô Tur na Sidɔn mwa arɔng de bemat mɛn ba vɔk netsitsɛng sizɔng.

³Bemât Tur o ba lɔk a bato mɛn gbɔng kwɔ̂n dal, ko ba tula dyam pyɛng na dyam shinang vit a yere mo, sede bagwɔ̂t fongol!

⁴Ko Darwey a rɔda sey ɛ kayɛ pyɛ de ba vɔk. A rɔda wey na bedwa-nshi mɛn e gworep, ko kya ha rɔda re gbɔng repomo mo buruk.

⁵Bemât bagbɔng bapomô Ashkɛlɔn na Gaza ba rɔda di ano, ko ba rɔda vow na bengyip sizɔng. A rɔda sè tyɛng ano na Ɛkrɔn, yaga pyɛ́ de bemat o ba kana sɛt yey mɛn e ra yɛ ya ga wey. Gbɔng gwɔ̀m Gaza a rɔda wey, ko bê hala Ashkɛlɔn vit a mwat e ji mo.

⁶Bemât yére detidetu ba rɔda wɔ̀ sangal e Ashdot. Dagwi Darwey a ye, “Ma rɔda tɛ̀ BeFilisti vemo de be tos bato mɛn be dyɛng vɛ.

⁷Yɛn ê to re banama na nemi e ji vɛ, kɛ bwang pyɛ̂ re yemo de ya sé kyiri wɛt. Mwa bwang vemo de ba hywit ɛn na neken ba rɔda sè e ji bemat hom, bê sè sede ruhup hwak e ji yerê Yuda. Ma rɔda sey bemât Ɛkrɔn, na be tɛ́ ɛn bak bemat hom, sede remo de ma kana sey BeYebus.

⁸Ma rɔda gyeng Gbɔng Duk Re a me Fongol, ko mê dul bemât como sana hwo e ra wɛ. Ma rɔda nɔ̂ng bemât gap gwong, na be to ngyit bemat hom wɛt, yaga ma ga di yerê rezot de bemat hom ba ga kana sɔ.”

⁹À yin bemât Siyɔn, rɛ̌ hin na nzem yɔkyɔk! À yin bemât Yɛrusalɛm, ra in biibi na yey pyɛng. Di in, gbɔng gwɔ̀m min a sé kyè vey! E kyè vey na kaà wɛng, mwa ano, a dyɛng to mɛ, a laga madung, hwêy madung mwa.

¹⁰A rɔda paa bekyɛkyɛ̂ como yi e Israyɛl, ê hashe bedwa yi e Yɛrusalɛm. Begbang de be tó mɛ como, ê kwɔrɔs vɛ, ê yâng bemât yére dyuk, be sangal tyang. A rɔda re negwɔm yi e yɛnɛ̂ gworep gwomo vɔk e gworo, yi e Gwɔrɔt Ɛifaratɛs vɔk e neyɛnɛ̂ jey.

¹¹Dagwi Darwey a ye, “Yaga ma ga wuna me na sira tanga yin, hemo de ba wuna hɛ na nemî nɔrɔ̂ yas de be yɛt a me, ma rɔda paa bemat min yi e kwɔ̂n sesam, yi e kwɔn de ha sé sede gwovɔng vit a nshi.

¹²To in wɛrin, à yin besam, yin sɛt yey e ra tuk de bê hala hin washak! To in vɔk e kwɔ̂n dal min. Ma sé ha a yin a remo wɔgɔ, ma rɔda tala hin pyɔlɔ min zang ba, yaga rezot de yin a ga kana sɔ.

¹³Ma rɔda ra fwom na BeYuda sede gbang hom, na BeIsrayɛl sede ket o. Mê cɔgɔs bemât Siyɔn e ra BeGirik, ko mê ra fwom na yɛn sede wal como.”

¹⁴Dagwi Darwey a rɔda dura to mɛ e ra bemat mɛ, a rɔda tabas na ket sede gbara de wo tē dɛbɛt. Darwey, Dagwi Darwey ê pɛl durum, a rɔda kyè e ji gwogul rwak yi e bak rwa batin.

¹⁵Dagwi Darwey, Dâ Jey Mwa a rɔda gyep bemat mɛ, ko yɛn a rɔda wey na vê repugu mɛn. Yɛn ê ta rewɔng e de como sede bemât sefeng, ko ba rɔda lusha nemî vê repugu mɛn, nê tele sede nemî yas de be yɛt vɔk na Dagwi, nemo de be lusha e ra gàgbang rangâs yas na shǐ.

¹⁶Jeng de tuk hane hê ba vey, Dagwi Darwey a rɔda ba sey bemat mɛ, sede lwêk vyēl e sey vyēl mɛ yi e dem ves. Yɛn a rɔda lolo e vwel o, sede dyéngere ryat yê kpîn negwɔm.

¹⁷Vwel o ha rɔda sè rat, pyɛ bɛrɛng tyɔng wɛt! Bebôt bemât hɛ bê ras na gap, na pyɛ̂ yeneng tanga nshî anap hɛ.