Read berom Malaki 1 Bible Online

Malaki 1 - berom bible

Malaki 1

¹Ha siitit yi na Dagwi a hemo. Rehâ Dagwi Darwey a remo, vɔk na BeIsrayɛl yi na Malaki.

²Dagwi Darwey a yang ɛn, “Ma tɛ̀ yey na yin.” Ko yɛn a toyo a yɛ, ba ye, “E rɛ̌ de hwà ga dura a wot tɛ̂ yey mō mo arɛt?” Dagwi Darwey a hanat a ye, “Esau a sé gwa Yakɔp wɛt a? Mwa ano, ma ga tɛ̀ yey na Yakɔp,

³ko ma kyɛ́ mɛ Esau. Ma ga tɛ̀ be wey na vwel mɛ hê berahwol, ko ba ga kyini hɛ, he tɛ́ ɛ hê nevu-hey.”

⁴Ka sede BeƐdɔm ba ye, “Ba ga wey na bapomo mot, ko mwa ano, wot ê toyo na wot lɔk barin o.” Ko Dagwi Darwey, Dâ Jey Mwa a rɔda ye, “Yɛn ê to lɔk vɛ, ko mê gangas vɛ. Bemat ba rɔda yila hɛ à vwêl neves na yerê bemat jey de Dagwi Darwey a kyini hɛn nesheneshey!”

⁵BeIsrayɛl ba rɔda di pyɛ́ yemo na bayis mɛn, ko bê ye, “Dagwi Darwey a vɔk reto vɔk e vwel de ha ka sé hê BeIsrayɛl wɛt!”

⁶Dagwi Darwey, Dâ Jey Mwa a ye, “Hwey he nɔ̂ng dâ hɛ nerey, ko mwât fwom e nɔ̂ng dalɔ mɛ nerey arɔng. Ka sede ma sé da, ko nerey a nɛ de yin e nɔng mɛ ɛ? Ka sede ma sé dalɔ min, nerey a nɛ de yin e nɔng me ɛ? A sé e yin bepiris de yin e byɛs reza hom, ko yin e rangsal, yin e tɛ̀, ‘E gwɛ̌ gwong de wot e byɛs reza mo ɛ?’

⁷Yin e byɛs me yi na nása pyɛ́ vyes e ra gàgbang rangâs yas vey na me. Ko yin e rangsal yin e tɛ̀, ‘E gwɛ̌ gwong de wot a tɛ̀ o ligis arɛt?’ A sé yi e byɛnɛ̂ng gàgbang rangâs yas hom.

⁸Jeng de yin e vey na yas de ya sé bwok, kɛ ye ro yɛ, kɛ ye yɔmɔng na yin a vey nára a me nɔrɔ̂ yɛ, yin e bare a sé vwes na yin a ra ano wɛt a? Mara nɔng in gwɔmna yere yas yane! Ê vɔk yey pyɛng na yin, kɛ ê ra a yin pyɛ́ de yin e simo a?”

⁹À yin bepiris, mara rangal hin hɛ na a dura a wot nerat. Dagwi Darwey, Dâ Jey Mwa a ye, “Ê sey nɔrɔ hemo yi e vɔ min arɛt?

¹⁰Ma simo ka hwak e ji min a yang wɔ̀ bang ri Gbɔng Duk Re Fongol, na a dul in sana tɛ̀ kyâ zɔng-reng e ra gàgbang rangâs yas hom. Ma vɔk yey pyɛng na yin wɛt; ma rɔda sey nɔrɔ̂ yas yi e vɔ min wɛt.

¹¹Yi e jeng de gwi gwa nusu vɔk e jeng de gwa gaba, be nása a me nɔrɔ̂ pyɛ̂ nesang hyɔɔlɔl mwa na yê pɛngɛ a me yey, yaga reza hom ra sé rey o e ji yére bemât jey. Me Dagwi Darwey, Dâ Jey Mwa ma ye ano.

¹²Ko yin e nɔng me nerey wɛt, jeng de yin e tɛ̀, gàgbang rangâs yas hom wa sé yapyi, na jeng de yin e nása pyɛ̂ re de yin a byɛnɛng yɛ e ra wɛ.

¹³Yin e tē, ‘Wot a ga ruru na râ pyɛ́ yemo!’ Ko yin e tos nenu yin e byɛs me. Yin e vɛ̀sɛ na yas de ba sey ɛ yɛ na yol, kɛ yemo de ye yɔmɔng, kɛ yemo de ye ro yɛ, yaga na yin a nára a me nɔrɔ mo. Yin e bare, mê sey yas yere yemo yi na yin a? Me Dagwi Darwey, Dâ Jey Mwa ma ye ano.

¹⁴Gawey e ra mwât mɔ̂t bemat de e nára a me nɔrɔ̂ yas yere yemo, mwa ano de a vɔk yas ryat e kwara mɛ de a ga kana sira ê nɔng me yɛ! Yaga me ma sé gbɔng gwɔ̀m rwey o, ko yére bemat jey mwa ye wok bengyip hom. Me Dagwi Dâ Jey Mwa ma ye ano.”