Read berom Malaki 2 Bible Online

Malaki 2 - berom bible

Malaki 2

¹Ko di, à yin bepiris, redu remo ra sé yaga yin.

²Dagwi Darwey, Dâ Jey Mwa a ye, “Ka sede yin ɛ wet betong na ha hom wɛt, ka sede yin ɛ tɛ̀ yey na yin nɔ̂ng reza hom nerey wɛt, ko ma rɔda tɛ̀ gawey he hwo e ra yin, ko ma rɔda tɛ̀ gawey e ra pyɛ́ de yin e seres yaga na yin a dalas mɛ. Mwin, ma ga kana tɛ̀ gawey e ra yɛ, yaga yin a tē shɔngɔlɔng na redu hom.

³Ko di, ma rɔda gyong yére min, ko mɛ mɔmɔ bayis min na beving yas de yin e nása a me nɔrɔ̂ yɛ, ko ba rɔda lusha hin e gwɔ̂t fongol.

⁴Ano yin ê tɔk, ma ga nɔng in redu remo yaga na wuna-na-sira hom na BeLevi he re nuyel.

⁵“Wuna-na-sira hê neken na yêy dyɛngɛ hom ha sé na yɛn, ko ma nɔng ɛn yêy dyɛngɛ na sangâl netyang o. Pyɛ mo ya tɛ̀ yɛn a sap me, ko yɛn e sap me ding-ding, yɛn a tumal kpɔrɔk e nuyel hom.

⁶Yɛn e basa pyɛ́ de ya sé tyɛng, ko yemo de ya sé buru wɛt. Yɛn e sangal tyang na me. Yɛn e ragas pyɛ́ de ya sé ryat zɔng wɛt, ko yɛn e sɛlsɛ behak pyak na be tik ragas neves.

⁷A sé fwôm bepiris na be basa a bemat tsak tɔk, ko bemat be masa pyɛ de be ra yi na yɛn, yaga yɛn vɛ à betom Dagwi Darwey, Dâ Jey Mwa.

⁸“Ko di, yin bepiris, yin a ga ye rɛng yi e gwong rwat. Yin a ga tɛ̀ bemat pyak be ye bugurɛk yi na basa min. Yin a ga kwɔrɔ wuna-na-sira min na Levi. Me Dagwi Darwey, Dâ Jey Mwa ma ye ano.

⁹Yaga ano, me arɔng ma rɔda tɛ̀ BeIsrayɛl be byɛnɛng hin, yaga yin a gyeng ha hom wɛt, ko yin a dura simô to e ra pyɛ́ de yin e basa a yɛn.”

¹⁰Wot mwa hot, wot a vɔk da gwining wɛt a? E Dagwi gwining de a yong ot mwa wɛt a? Ko yaga sɛ́ de wot e kwɔrɔs sira de wot a ga ra a bemot ɛ? Ko yaga sɛ́ de wot e byɛs wuna-na-sira de Dagwi à kana ra na bedabeda mot ɛ?

¹¹BeYuda ba ga kwɔrɔ sira mɛn na Dagwi, ko yɛn a ga ra pyɛ́ vyes sizɔng e Yɛrusalɛm na e mwa vwel o. Yɛn a ga tɛ̀ Gbɔng Duk Re Fongol de Dagwi Darwey a tɛ̀ yey na wɛ ligis, yi na râ wenêng beha de be re a pyɛ̂ sekwit fongol.

¹²Tik na Dagwi Darwey a pat kawɛ mwat de a ra pyɛ yere yemo yi e bǔk BeIsrayɛl, mwa ano de e vɛ̀sɛ a Dagwi Darwey, Dâ Jey Mwa na nɔrɔ̂ yas.

¹³Pyɛ́ mo cak a yemo de yin e to ra. Yin e silsa gàgbang rangâs yas Dagwi Darwey na nemwishil. Yin e tosho, yin e dak bèkun yaga e to seres na yey pyɛng wɛt nenɔrɔ̂ yas de yin e vɛ̀sɛ nɔngɔs hɛ.

¹⁴Yin e rangsal, “Yaga sɛ́ de e to seres nenɔrɔ̂ yas o wɛt arɛt?” Yaga Dagwi Darwey a sé mwât nuha e tɛ̀ mo na hwâ weneng mo e nebot min, womo de hwà sé sangal na yɛ na tsak o wɛt, mwa ano de a sé sâ sangal mo ko a to sé hwā de yin a wuna hin na sira na yɛ.

¹⁵A sé e Dagwi gwining de a yong rebek na gabik rining o wɛt a? A ra ano yaga sɛ́ ɛ? A sé yaga na yin a vɔk nèy de nê sè bemât Dagwi mwin. Yaga ano, tē in naka, hwak e ji min a kwɔrɔ sira de a ga ra na hwā mɛ wɛt.

¹⁶Dagwi Darwey, Dagwi wo Israyɛl a ye, “Me kyɛ́ me gâs weneng. Me kyɛ́ me hɛ zakzak jeng de hwak e ji min a ra a hwā mɛ pyɛ vyes yere yemo. Tē naka, hwo kwɔrɔ sira mo wɛt, ko tik na hwo vɔk hwā mo na tsak o.”

¹⁷Yin a ga tɛ̀ Dagwi Darwey gbɛrɛk na neha min. Ko mwa ano yin e tɛ̀, “E rɛ̌ de wot a ga tɛ̀ ɛ gbɛrɛk arɛt?” Yi na té “Mwa vemo de be ra pyɛ́ vyes ba sé berat e bayîs Dagwi Darwey ko e feng na yɛn.” Kɛ yin e rangsal yin e tē, “Dagwi wo gâs badu e tē a wɛ arɛt?”