Read berom Malaki 3 Bible Online

Malaki 3 - berom bible

Malaki 3

¹Dagwi Darwey, Dâ Jey Mwa a ye, “Di, ma sé tomo tom hom na a yong gwong gyam na me vey, ko Darwey de yin e jama a rɔda vey gobok e Gbɔng Duk Re Fongol mɛ. Tom de yin e simo yin di tyɔng wɛt, a rɔda vey, ko a shara rehâ wuna-na-sira hom na yin.”

²Ko e wa de ê kyɛm a niri tuk de ɛ ba vey o ɛ? E wa de ê kyɛm a ba dal tuk de e ba nusu wɛshɛrɛk arɛt? A rɔda ba sè sede kyâ ju de he ye ywey à dyam na he paa gbàrak o, kɛ sede fulukus ye kûs pyɛ́ haalal.

³A rɔda vey ra shɔt sede mwat de e rugut dyam pyɛng na ye sɛ̀ celes o. Sede mwât fwôm dyam de e rugut dyam pyɛng na dyam shinang, ano de tom Dagwi Darwey a rɔda rugut bepiris, na yɛn a vɛ̀sɛ a Dagwi Darwey na nenɔrɔ de na jam.

⁴Ano nenɔrɔ de BeYuda na bemât Yɛrusalɛm bê vey a Dagwi Darwey mɛ, nê pɛngɛ a yɛ yey, sede remo de á kana sè raane.

⁵Dagwi Darwey, Dâ Jey Mwa a ye, “Ma rɔda dura to hom e tē min na me ra shɔt. Ma rɔda ye kyùk na me nɔng nuha e ra vemo de be ragas vyoshon, na vê ragas nejwang, na vɛ nɔngɔ̂s nuhâ bɔs, na vemo de be mɔt bemât fwom e ra sehwoyo mɛn, tanga vemo de be mɔt bekuma na nehyɛn, na vemo de be yɛ́t a yére dyuk shɔ̂t na bɔs, ko yɛn e sap me wɛt.”

⁶“Me Dagwi Darwey, me sege me wɛt, yaga ano yin yerê Yakɔp, yin a ga wey wɛt.

⁷Yin, sede bedabeda min, yin a ga wuba Badu hom, ko yin e gyenges vɛ wɛt. Doyo hin vey na me, ko ma rɔda doyo vey na yin arɔng. Me Dagwi Darwey, Dâ Jey Mwa ma ye ano. Ko yin a rangal, ‘E sɛ́ de wot ê ra na wot a doyo vey na hwo ɛ?’

⁸Mwat e tɔk sey ɛ pyɛ̂ Dagwi na retek bɛ̀? Kée wey! Ko mwa ano yin e seres ɛ pyɛ́ hom na retek! Ko yin e rangsal, ‘E sɛ́ de wot e seres ɛ yɛ na retek ɛ?’ Yin e mɔt me e ra pyɔlɔ na nenɔrɔ de na yang sɛ̀ nenang.

⁹Gawey e ra yin mwa, yaga yin yére bemat jey o mwa yin a sé seres ɛ pyɛ́ hom na retek.

¹⁰Vey in na pyɔlɔ min mwa e begban hom, yaga na be sɛ̀ pyɛ́ shɛrɛk e Gbɔng Duk Re Fongol hom. Dagwi Darwey, Dâ Jey Mwa a ye, ‘Mara me hin e gwong gwomo, na yin a di kɛ mê tik nà wuma bagbɔng bapɔk lagwi, na me shushu a yin pyɛ́ ryat sizɔng, de yin ê sɛ̀ kwɔ̂n tîk yɛ wɛt!’

¹¹Ma rɔda dul rawal nà re pyɛ̂ hiri min, ko cɔ́gɔt anap min ya rɔda tik nà mara wɛt.

¹²Ano mwa yére jey ya rɔda yila hin a vê wɛng, yaga vwel min ha rɔda sè kwɔ̂n sangal rat. Me Dagwi Darwey, Dâ Jey Mwa ma ye ano.”

¹³Dagwi Darwey a ye, “Yin a ga ha neha neves e ra me, ko mwa ano yin a rangal, ‘E sɛ́ de wot a ga ha e ra hwo ɛ?’

¹⁴Yin a ga ye, ‘A sé yapyi zɔng na wot a ra a Dagwi fwom. Wot e sɛ̀ sɛ́ yi e gyêng badu mɛ, kɛ wot a kyě kyè sede bemât sesin e nuyel Dagwi Darwey, Dâ Jey Mwa ɛ?

¹⁵E di mot, vê wɛng a vê dâk kaa. Vê ragas neves be sè bedaberey zɔng wɛt, ko be masa nirî Dagwi yi na ragâs tomong ves mɛn o, ko mwa ano, pyɛ cak ye sɛ̀ ɛn wɛt!’ ”

¹⁶E bama mo, bemat de ba vɔk bengyip Dagwi ba ha na bemɛn, ko Dagwi Darwey a wet betong, ko a wok pyɛ de yɛn a se ha. E bayis mɛ, ba jɛk e ji bwok-basâ pyɛ̂ bare e ra vemo de ba vɔk bengyip Dagwi Darwey ko yɛn a nɔng ɛ nerey arɔng.

¹⁷Dagwi Darwey, Dâ Jey Mwa a ye, “Yɛn a rɔda sè bemat hom. E tuk de ma rɔda ba ra pyɛ cak, yɛn a rɔda ba sè bemat hom vê tó hom. Ma rɔda tosho reyɔm mɛn sede remo de da e tosho reyɔ̂m hwey de he ra a yɛ fwom.

¹⁸Ano arɔng, bemat hom ba rɔda di nedetû pyɛ́ de ye té na vemo de ba sé cik e bayîs Dagwi na vê ragas neves; bemat hom ba rɔda di nedetû vemo de be ra a Dagwi fwom na vemo de be ra a yɛ gwɛ wɛt.”