Read berom Matayus 10 Bible Online

Matayus 10 - berom bible

Matayus 10

¹Yɛsu a yishi bemât masâ fwom mɛ kuru na vɛ beba vey na yɛ, ko a nɔng ɛn reto na be paa cēng yi e bemat, na be tɔk tɛ̀ kayɛ yerê serɔ tyang na mwa pyɛ́ de ye tak a bemat reyɔm arɔng.

²Bazâ betom mɛ kuru na vɛ beba ma vemo: Wo mɛsɛng o, à Simɔn, de ba to tang ɛ, à Bitrus, tanga gwa mɛ Andarawus, na Yakɔp tanga gwa mɛ Yohana, nèy Zɛbɛdayus,

³na Filip, na Bartɔlɔmayus, na Tomas, na Matayus, mwât serês dyâm yeles na pyɛ́, na Yakɔp Alfayus, na Tadayus,

⁴na Simɔn, de á sè e yong ɛ na a dul sevwel mɛ, tanga Yuda Iskaryot, de a row Yɛsu e yɛnɛ mo.

⁵Yɛn vemo kuru na vɛ beba mo, Yɛsu a tomo hɛn, ko a nɔng ɛn nu e ra pyɛ́ yemo ngan, a yang ɛn, “Yin kwon wɔ e bavwêl yére dyuk, kɛ yin yel e repomo rehak rê BeSamariya wɛt.

⁶Kyè in wɔ na BeIsrayɛl de ba sé sede vyēl de ya ga vusa hɛ.

⁷Jeng de yin a sé kyě kyè, shara hin reha remo: ‘Jeng de Dagwi e lagwi a rɔda hwo re negwɔm e ra jey ya ga vey bagat.’

⁸Tɛ̀sɛ hin bemât serɔ tyang, sensa hin vemo de ba ga kushu, tɛ̀sɛ hin bekparong tyang, paa in cēng yi e bemat arɔng. Yin a sey reto remo e nɔrɔ, ko rá in fwom na rɛ e nɔrɔ arɔng.

⁹Yin kwon vɔk dyām e berabak min wɛt, kɛ ya sé dyam shinang, kɛ dyam pyɛng, kɛ dyam zwey ayi.

¹⁰Yin kwon jut malâ won yaga kwɛngɛl min, kɛ yin a to gwɛ̌ gworugu gwohwak wɛt, kɛ yin vɔk bekpatak kɛ gwele arɔng wɛt. Yaga a jam na be nɔ̂ng mwât fwom pyɛ de e simo.

¹¹“E karɛ repomo kɛ kerepomo de yin ê yel ɛ̀, jāma hin mwat de ê wok há min, yi ano, a vey na a sey in e lɔ mɛ. Sangal hin e lɔ mo sɛ̌ jeng de yin e to ba hàla pomo mo.

¹²Sede yin ê yel e lɔ mo, yē in, ‘Tik na Dagwi a tɛ̀ bemât lɔ hemo be sangal tyang!’

¹³Sede bemât lɔ mo ba sey in, tik na té show hê netyang o hê nàra e ra yɛn. Ka ano wɛt, ko tik na he to toyo vey na yin.

¹⁴Ka sede mwat hwak a sey in wɛt, kɛ a wet betong na neha min arɔng wɛt, ko pagat hin búm de gwa dyɛng e bol min e jeng de yin a hàla lɔ mo kɛ repomo mo.

¹⁵Mwin me ha a yin: Tuk de Dagwi a rɔda ba ra shɔt, ê ba tosho reyɔ̂m bemât Sɔdɔm na Gɔmɔra a dal toshô reyɔm mɛ na bemât repomo rane mo.”

¹⁶“Wok in! Ma sé tomo hin sede tyīmit e tê bebwá Yaga ano, vɔk in netsitsɛng sede begwɔ̄m, ko sè in hywɛ sede bebɔp.

¹⁷Tē in naka na bemat! Yɛn a rɔda nára hin e vɔ bemât shɔt, ko ba rɔda dak in na zining e beduk re fongol.

¹⁸Ko yaga yin a sé bemât raa hom, yɛn a rɔda wɔ na yin e nuyêl begwɔmna na begbɔng begwɔ̀m. E hwomo, yin a rɔda nɔ̂ng bemat tanga bemât yére dyuk nuha e ra Yɛgɛt Yat.

¹⁹Ko jeng de yɛn a rɔda nára hin e vɔ mɛn, yin kwon sap pyɛ de yin a rɔda ha, kɛ gwong de yin ê dul mɛ̀ bato min wɛt. Sede jeng o ya vey, ba rɔda nɔng in pyɛ de yin a rɔda ha.

²⁰Yaga a sé e yin de yin ê ba ha wɛt, ko a sé e Gabîk Da min de hê ha yi na yin.

²¹“Gwà a rɔda ba nára gwa mɛ, na be mɔrɔ hɛ, ko da a rɔda ba ra tyɛng ano na hwey mɛ. Nèy na rɔda ba doyo e ra beda na beneng mɛn, ko nê ba tɛ̀ be mɔbɔs hɛn.

²²Kawɛ mwat a rɔda ba bɛɛ hin ves, yaga yin e raa me. Ko ba rɔda ba sey mwat de a niri vɔk e yɛnɛ mo.

²³Ka sede ba hwo tak a yin reyɔm e repomo remo, ko tele hin vɔk e repomo rehak. Mwin me ha a yin: Yin a rɔda yɛnɛ gwɔsɔ̂ mwa bapomô BeIsrayɛl wɛt gyam na Me de ma tɛ́ me mwat me vey.

²⁴“Mwat de be masa a yɛ pyɛ a dal mwat de e basa a yɛ wɛt, ko sam a dal dalɔ mɛ arɔng wɛt.

²⁵Tik na a vey a mwat de be masa a yɛ, na a tɛ́ ɛ sede mwat de e basa a yɛ mo, ko sam sede dalɔ mɛ arɔng. Sede remo de be tâng dâ lɔ mo, à Baal-Zɛbul, ko bê yila belɔ mɛ na baza de ba dal ano na neves!”

²⁶“Yaga ano, yin kwon wok bengyip bemat wɛt. Vit a pyɛ de ba ga kana bang, de ba rɔda ba wunta yɛ, ko vit a pyɛ de ya sé ye neyaang, de ba rɔda ba tɔk yɛ.

²⁷Pyɛ́ de me ha a yin e lwīl, to há in yɛ̄ e kwɔ̂n negbey, ko pyɛ́ de ba ga ha a yin show-show, mok in yɛ̄ e rahwol.

²⁸Yin kwon wok bengyip bemat de be mɔrɔ rebêk mwat, ko yɛn e tɔk mɔrɔ gabik mɛ wɛt. Wok in bengyip Dagwi, yɛ de a vɔk retô wey na rebek, mwa na gabik e kwɔ̂n kya.

²⁹Be rɛsɛl nenon tyǐ neba e nû kobo gwining wɛt arɛt? Ko mwa ano, vit a kining de kê gaba e vwel sana simô Da min.

³⁰Dagwi a ga basa nepyak setot e ratô kawɛ e ji min.

³¹Yaga ano, yin kwon wok bengyip wɛt; yin a dal nenon tyǐ pyak na nerey!”

³²“Kawɛ mwat de e dura wɛshɛrɛk e nuyêl bemat wɔgɔ, a tɔk me, ko me arɔng ma rɔda ba dura wɛshɛrɛk e nuyêl Da hom de a sé e ji lagwi wɔgɔ, ma tɔk ɛ.

³³Ko kawɛ mwat de e tono e nuyêl bemat wɔgɔ, a tɔk me wɛt, me arɔng ma rɔda ba tono hɛ e nuyêl Da hom de a sé e lagwi.”

³⁴“Yin kwon bare wɛt wɔgɔ, ma vey na me tɛ̀ bemât jey be sangal tyang na bemɛn. Wey, a sé e sangâl netyang de ma vey mɛ̀ wɛt, ko a sé e wal e negya.

³⁵Ma vey, yaga na me tɛ̀ mwat a ra repugu na da mɛ, na hwong a ra repugu na neng mɛ, na gwel a ra repugu na dekwop mɛ arɔng.

³⁶Ko belɔ̂ mwat ba rɔda sè vê repugu mɛ.

³⁷“Kawɛ mwat de a tɛ̀ yey na da mɛ kɛ neng mɛ a dal tɛ̂ yey mɛ na me a vey na a sè nwang wɛt. Ko kawɛ mwat de a tɛ̀ yey na hwêy wen kɛ hwêy hwong mɛ a dal tɛ̂ yey mɛ na me a vey na a sè nwang me wɛt.

³⁸Kawɛ mwat de e jut cɔ́gɔt-kak mɛ na a raa me wɛt a vey na a sè nwang me wɛt.

³⁹Kawɛ mwat de e simo na a sey neken mɛ a rɔda bidɛ nɛ, ko kawɛ mwat de a ye waa a neken mɛ, yaga e raa me, a rɔda sey nɛ.”

⁴⁰“Kawɛ mwat de a sey in, a sé e me de yɛ a sey, ko kawɛ mwat de a sey me a sey womo de a tomo me arɔng.

⁴¹Kawɛ mwat de a sey zarap Dagwi, yaga mwat o a sé zarap Dagwi, a rɔda sɛ̀ pyɔlɔ yê zarap Dagwi. Ko kawɛ mwat de a sey mwat rwat, yaga mwat o a sé rwat, a rɔda sɛ̀ pyɔlɔ yê mwat rwat arɔng.

⁴²Kawɛ mwat de e nɔ̂ng hwak e ji vê bamâ mwa e ji bemât raa hom nshî sɔ nesurum, yaga yɛ a sé mwât raa hom, mwin me ha a yin, a rɔda ba bidɛ pyɔlɔ mɛ wɛt!”