Read berom Matayus 11 Bible Online

Matayus 11 - berom bible

Matayus 11

¹E bama de Yɛsu a yɛnɛ misang a bemât masâ fwom mɛ kuru na vɛ beba pyɛ́ yane, a kyè yi e hwomo na a wɔ̀ basa, na a to wɔ̀ shara Yɛgɛt Yat e bapomo de ba sé bagat na kwɔn hane mo.

²Yohana wo batisma de á sè e lɔ̂ ngyang a wok pyɛ́ de Kristi á sè ra mo, ko a tomo bemât masâ fwom mɛ wɔ́ e hwomo,

³na be rangal hɛ, “E hwo wɛ à mwat de ba ha, e kyè vey, kɛ wot e gyeng mwat o hwak arɛt?”

⁴Yɛsu a toyo a yɛn, a yang ɛn, “Tō in vɔk na Yohana, na yin a wɔ̀ ha a yɛ pyɛ́ de yin e wokos na yēmo de yin e bɛrɛng wɔgɔ:

⁵Bebók be tɔk bɛrɛng jey, ko bemat nà bol be tɔk kyè; ba sé tɛ̀ bekparong tyang, ko bekpey be tɔk wok há; ba sé sensa vemo de ba ga kushu, ko ba sé basa a bepɛng Yɛgɛt Yat.

⁶Wo yey pyɛng à womo de a ye bugurɛk yaga me wɛt!”

⁷Sede bemât masâ fwôm Yohana bá sè kyè wɛrɛn, ko Yɛsu a hwo ha na bagyɛng bemat e ra Yohana mo, a ye, “Sɛ́ de yin á simo na yin a di jeng de yin á wɔ́ na Yohana e tê hey ɛ? Yin á wɔ̀ di gwohwěy de gul gwo pɛsɛl gwɛ a?

⁸Ko e sɛ́ kwong de yin á wɔ̀ di arɛt? E mwat de a tɔrɔ hɛ na yɔ̀m yat a? Wey, vemo de be tɔrɔ hɛn ano, be sɛsɛm hɛn e nelɔ begbɔng begwɔ̀m!

⁹Há a me hin, e sɛ́ de yin á wɔ̀ di arɛt? Yin á wɔ̀ di zarap Dagwi a? Ey mwin, me ha a yin, yin á di mwat de a dal zarap Dagwi.

¹⁰Yohana wɛ à mwat o de bà jɛk e ra yɛ e Bwok-basa Dagwi wɔgɔ, “ ‘Di, tom hom à womo; ma sé tomo hɛ e nuyel mō, na a yong gwong yaga hwo.’

¹¹“Mwin me ha a yin: Vit a mwat de ba tɔ ɛ e jey yemo de a dal Yohana wo batisma na nerey. Ko mwa ano, mwat de a dal na nesɛl mwa e ji Segwɔm Lagwi a dal ɛ na nerey.

¹²E jeng de Yohana á ha reha mɛ, Dagwi á hwo re negwɔm e ra jey. Ko vey e remo, bemât repugû segwɔm o be jāma na be dul bemat na retek nà yel e ji segwɔm o.

¹³Vey e jeng Yohana mo, bwok-basa Badu Mose tanga mwa bezarap Dagwi bà kana ha e ra segwɔm o.

¹⁴Ko ka sede yin e simo na yin a sey reha mɛn o, Yohana mo a sé Eliya de bà kana ha e ra yɛ wɔgɔ, a rɔda vey.

¹⁵Mwat de a vɔk betong, tik na yɛ a wok!

¹⁶“Ma rɔda tyɛngrɛ bemât jeng yemo na sɛ́ arɛt? Yɛn a sé tyɛng na nèy de na sé sangal e nekwɔn rɛsɛl pyɛ́, ko be yila bemɛn, be tē,

¹⁷“ ‘Wot a pɛsɛl a yin jū, ko yin a rɛ̌ wɛt; wot a ra lɛlɛ sesin, ko yin a lashe yey min wɛt.’

¹⁸“Di, Yohana a ga vey, a tik rê pyɛ́, ko a to tik sɔ̂ nshî anap, ko bemat be tē, ‘A vɔk ceng!’

¹⁹Ko di, Me de ma tɛ́ me mwat ma vey, ma sé re na sɔ, ko bemat be tē, ‘Di, mwât serwéy na mwât sefeng de a sé sâ bemât serês dyâm yeles na pyɛ́ tanga bemât negwɔn neves behak!’ Ko mwa ano, tomong de be yi na netsitsɛ̂ng Dagwi be dura, netsitsɛng o na sé mwin.”

²⁰E bama mo, Yɛsu a hwo ra a bapomo de a ga ra bwarwêy pyɛ̂ bes mɛ e ji vɛ nu, yaga bemat o ba ga doyo yi e banɛn mɛn wɛt, a ye,

²¹“Yaa kukuuk! Gawey e ra hwo, à Kɔrasin! Gawey e ra hwo, à Bet-Saida! Ka sede ba yâng ra pyɛ̂ bes yemo e bapomô Tur na Sidɔn de ma ra e ji min, ka yimo bemat o ba ga yâng sangal e cɛ̂k rugu, na be tɛ̀sɛ fongol pwɛ̀ng e bato mɛn, na be dura, yɛn a ga doyo yi e banɛn mɛn!

²²Mwin me ha a yin: Tuk de Dagwi a rɔda ba ra shɔt, a rɔda ba tosho reyɔ̂m bapomô Tur na Sidɔn a dal toshô reyɔm mɛ na yin.

²³Ko hwo, à Kafarnahum à! Hwó bare, ba rɔda jut o vɔk e lagwi arɛt? Wey! Ba rɔda ba bomo hwo e ji kwɔ̂n kya! Ka sede ba yâng ra pyɛ̂ bes de bá kana ra e ji mō e repomô Sɔdɔm, ka repomo mo ra yâng nàra vey e yunung.

²⁴Mwin me ha a yin: Tuk de Dagwi a rɔda ba ra shɔt, a rɔda ba tosho reyɔ̂m repomô Sɔdɔm a dal toshô reyɔm mɛ na hwo!”

²⁵E jeng o, Yɛsu a ye, “À Da, hwo de hwà sé Darwêy lagwi na jey! Ma feng a hwo, yaga hwà ga lɛrɛ a bemât netsitsɛng na bemât tɔ́k pyɛ́ yemo, ko hwà ga wunta a vemo de ba vɔk tɔ́k wɛt yɛ̄.

²⁶Ey, ma feng a hwo, à Da, hwà ra ano, yaga a sé simo mō, na pyɛ de hwà di ya jam.

²⁷“Da hom a ga tɛ̀ pyɛ̂ mwa e vɔ hom. Vit a mwat de a tɔk Hwey o sɛ̌ Dâ hɛ zɔng, ko vit a mwat de a tɔk Da mo sɛ̌ Hwey o zɔng tanga vemo de Hwey o ha simo na he dura a yɛn Da mo.”

²⁸“Vey in na me, mwa hin de yin a sé gbɛrɛk, ko pyɛ́ min ya dal in dirik; mê nɔng in pɔngɔ.

²⁹Wuna hin na me, na me dura a yin gwong, na yin a masa yi na me, yaga ma sé hywɛ, ko me dyɛng to hom naka, ko yin a rɔda sɛ̀ pɔngɔ yaga neyey min.

³⁰Yaga gwong de me simo yin a kwey ɛ̀ gwa sé gbang wɛt, ko swesêk vɔk berɔndɔng de me tɛ̀ e ra yin gwa sé begelek.”