Read berom Matayus 12 Bible Online

Matayus 12 - berom bible

Matayus 12

¹E jeng yane, Yɛsu á sè kwey e hwirî alkama. Tuk hane mo há sè Tuk Shábat. Bemât masâ fwom mɛ ba wok vyong, ko ba hwo kwɔrɔs batô alkama mo, ba re yéneng o.

²Sede BeFarisi ba di ano, ba yâng Yɛsu, “Di, bemât masâ fwom mō ba sé ra pyɛ de Badu mot ba ro na be ra Tuk Shábat.”

³Yɛsu a toyo a yɛn, a yang ɛn, “Yin a ga basa pyɛ de Gbɔng Gwɔ̀m Davit à kana ra jeng de yɛ tanga bemat mɛ yɛn à wok vyong wɛt arɛt?

⁴À yel e ji duk Dagwi, à re kpam-tuk de bà nása e nuyêl Dagwi, ko à to gas a bemat de bà sè tanga yɛ, mwa ano de Badu mot ba ro mwat hwak nà re wɛ sɛ̌ bepiris zɔng.

⁵Kɛ yin a ga to basa e bwok-basa Badu Mose wɛt arɛt? Kahɛ Tuk Shábat bepiris e Gbɔng Duk Re Fongol yɛn e gyilsit redu de ra sé e ra Tuk Shábat. Ko mwa ano, a sé a yɛn buru wɛt.

⁶Ma sé ha a yin, mwat hwak a sé e ngamo de a dal Gbɔng Duk Re Fongol na nerey.

⁷Bà jɛk e Bwok-basa Dagwi wɔgɔ, ‘A sé e toshô reyɔm de me simo yi na yin, ko e nɔrɔ̂ yas de be yɛt vɔk na Dagwi wɛt.’ Ka yin a yâng tɔk cap-hâ há hemo, ka yin a yâng gang bemat de ba ga buru wɛt na shɔt wɛt.

⁸Yaga Me de ma tɛ́ me mwat ma vɔk reto e ra Tuk Shábat.”

⁹Yɛsu a hàla kwɔn hane mo, ko a wɔ̀ yel e duk re fongol mɛn.

¹⁰Mwat hwak a sé e hwomo de vwɔ mɛ gwa gyɔt. Bemat behak ba simo na be sɛ̀ pyɛ cak e ra Yɛsu, na be wɔ̂ kun mɛ. Yaga ano, yɛn a rangal hɛ, ba ye, “Badu mot ba simo a wot na be tɛ̀ mwât serɔ tyang e Tuk Shábat arɛt?”

¹¹Yɛsu a yang ɛn, “Ka sede hwak e ji min a vɔk tyimit, ko ya gaba e ji revɔng e Tuk Shábat, mwat o a rɔda nára vwɔ, a kaba yɛ, na a pat yɛ e jey wɛt arɛt?

¹²Ko mwat a dal vyel pyɛng na nerey zang pyak! Yaga ano, Badu mot ba simo a wot na wot a ra pyɛ ryat e Tuk Shábat.”

¹³Ano a yâng mwat o, “Nára vwɔ mō.” A nára gwɛ, ko gwa to tɛ̀ gyat tyɛng sede gwot.

¹⁴Ko BeFarisi ba nusu, ba hwo jāma begwong de bê wey na Yɛsu.

¹⁵Jeng de Yɛsu a wok pyɛ de BeFarisi ba yong ɛ̀, a hàla kwɔn o. Bemat pyak ba raa hɛ, ko a tɛ̀ vê serɔ mwa tyang,

¹⁶ko a nɔng ɛn nu, a ye, “Yin kwon ha a bemat mwat de me ma sé wɛt.”

¹⁷A ra ano, yaga na be bin sila mɛ̀ pyɛ de Dagwi à kana ha e nû Yɛshaya, zarap mɛ wɔgɔ,

¹⁸“Di, mwât fwom hom a womo de ma ga kasa, womo de ma tɛ̀ yey na yɛ, ko yey hom ya pɛngɛ na yɛ. Ma rɔda nɔng ɛ Gabik hom, ko yɛ a rɔda ha a mwa yére bemat jey, me gas shɔt e tē.

¹⁹A rɔda jāma há wɛt, kɛ a tá lwɛ́lɛ arɔng wɛt; vit a mwat de a rɔda wok fwɔ mɛ e nehyok.

²⁰A rɔda kwɔrɔ mapak de wa ye net wɛt, ko a rɔda rimi kywa-kya de wa vey bagât ku wɛt. A rɔda ra ano, sɛ̌ bemât mwa ba sey gâs shɔt hom.

²¹Ko mwa yére bemat jey ya rɔda sɛt yey e ra yɛ.”

²²E bama mo, bemat behak bá vey a Yɛsu na mwat hwak de á sè bwók, ko á to sè kpey yaga á vɔk ceng. Yɛsu a tɛ̀ ɛ tyang, ko mwat o a tɔk ha, a bɛrɛng jey arɔng.

²³A sé a bemât mwa de ba sé e hwomo kpɔrɔk, ko yɛn a ye, “Kɛ̀ e yɛ de a sé Hwey Davit bɛ?”

²⁴Sede BeFarisi ba wok ano, yɛn a ye, “A sé e Baal-Zɛbul, gwɔ̀m cēng zɔng de e nɔngɔ̂s mwat womo reto na a paa mɛ̀ cēng!”

²⁵Sede remo de Yɛsu a tɔk báre mɛn, a yang ɛn, “Kasɛ̌ sevwel de sa gas ɛ na se tó como na tô sɛ sa rɔda lashe hɛ. Ko kahɛ pomo kɛ lɔ de ha gas ɛ na he ra repugu na tô hɛ ha rɔda gaba.

²⁶Ko ka sede Shetan a yâng tɔk pat tó mɛ, a yâng sé tó como na tó mɛ a wane. Yi e rɛ̌ de segwɔm mɛ sê tumal arɛt?

²⁷Ko ka sede me paa cēng na retô Baal-Zɛbul, ko bemât raa min ɛ̄, be paa yɛ̄ na retô wà arɛt? Di, pyɛ de bemât raa min o be ra ye dura tsɛng-tsɛng, yin a ga buru.

²⁸Ko sede remo de me paa cēng na retô Gabik Dagwi, ko hane he dura, Dagwi a ga hwo re negwɔm e ra yin.

²⁹“Vit a mwat de ê tɔk yel e lɔ mwât gap na a hashe pyɛ́ mɛ, sɛ̌ a tānga rɔgɔs mwât gap o e ngyen. E bama mo, ê tɔk hashe pyɛ́ mɛ.

³⁰“Kawɛ mwat de a sé nwang me wɛt a kyɛ́ ɛ me; ko yɛ womo de e sɛlɛ me e de tulâ pyɛ́ wɛt e shara yɛ̄.

³¹Yaga ano, ma sé ha a yin, Dagwi ê tɔk hàla a bemat yére banɛ̂n mwa de yɛn e ragas, na mwa yére há ves de be ha e ra yɛ. Ko a rɔda hàla a mwat de a ha há ves e ra Gabik Jɛrɛ wɛt.

³²Dagwi ê to tɔk hàla a kawɛ mwat de a ha há ves e ra Me de ma tɛ́ me mwat, ko a rɔda hàla a mwat de a ha há ves e ra Gabik Jɛrɛ wɛt, kɛ e jeng yemo kɛ e jeng de ye kyè vey arɔng.”

³³“Ka sede cɔgɔt ya sé ryat, nèy o nê sè nerat, ko ka sede cɔgɔt o ya sé vyes, nèy o nê sè neves arɔng. Yaga be tɔk cɔgɔt yi e nèy de ye tɔs.

³⁴À yin bègàbak! Yi e rɛ̌ de yin e tɔk ha pyɛ́ ryat, a remo de yin a sé beves arɛt? Yaga pyɛ́ de mwat e ha na nu, e yɛ̄ de ye sila yey mɛ.

³⁵Mwat rwat e ha pyɛ́ ryat yi e pyɛ́ ryat de ya sé e yey mɛ, ko mwat vwes e ha pyɛ́ vyes yi e pyɛ́ vyes de ya sé e yey mɛ arɔng.

³⁶“Ma sé ha a yin, tuk de Dagwi a rɔda ba ra shɔt, ba rɔda ba rangâl kawɛ mwat e ra pyɛ de ya tɛ̀ a ha kahɛ há hê kpɛɛ de á kana ha.

³⁷A sé e neha mō nɛ de ba rɔda ba ra a hwo mɛ̀ shɔt: E nɛ de na rɔda ba tɛ̀ be hàla hwo washak kɛ be gang o na shɔt.”

³⁸Behak e ji bemât basâ Badu na BeFarisi ba yâng Yɛsu, “À Mwat Basa, wot e simo wot a di pyɛ bes cak yi na hwo.”

³⁹Ko Yɛsu a toyo a yɛn, a ye, “Bemât jeng yemo ba sé beves, ko be kyɛ́ ɛn nà raa Dagwi! Yin e simo be dura a yin pyɛ bes cak a? Wey! Pyɛ bes de ba rɔda dura a yin yɛ, à yè Yona, zarap Dagwi.

⁴⁰Sede remo de Yona à ra pɔlɔ tat, gwi na turuk, e ji jîm gwogbɔng gwotɔk, ano arɔng Me de ma tɛ́ me mwat ma rɔda ra pɔlɔ tat, gwi na turuk, e nɛ̂n vwel.

⁴¹Tuk de Dagwi a rɔda ba ra shɔt, bemât Nineve yɛn a rɔda ba sogo tanga bemât jeng yemo, ko yɛn a rɔda ba tɛ̀ kun mɛn, yaga bemât Nineve mo bà kana doyo yi e banɛn mɛn jeng de yɛn à wok Yona à shara hâ Dagwi. Ko di in, mwat hwak a sé e ngamo de a dal Yona mo na nerey.

⁴²Tuk shɔt o arɔng, hwā de à sè gbɔng gwɔ̀m e rwa batin a rɔda ba sogo tanga bemât jeng yemo, ko a rɔda ba tɛ̀ kun mɛn, yaga à kyě gwɔsɔ yi e yɛnɛ̂ jey, na a wokos neha tɔ́k ne Sɔlɔmɔn. Ko di in, mwat hwak a sé e ngamo de a dal Sɔlɔmɔn o na nerey.”

⁴³“Jeng de ceng ya ga nusu yi e ji mwat, ya sé kyě kyè e nedem nehwogot na ye jāma kwɔn de yê pɔng ɛ̀, ko ye sɛ̀ kwɔn o wɛt.

⁴⁴Ko ye yâng tô yɛ, ‘Mê to me vɔk e lɔ hom de ma ga kana yi ɛ̀.’ Ko jeng de ye wɔ, ye sɛ̀ lɔ mo, vit à pyɛ cak e ji mo, ba ga yishing hɛ haalal, ko ba ga to yong hɛ mwa gyat.

⁴⁵Ye to kyè, ko ye wɔ̀ vey na cēng o cak tyaama de ya dal yɛ̀ na neves, ko ye yel na ye sangal e hwomo. E yɛnɛ mo, negwɔn sangâl mwat o ne dal ne mɛsɛng o na neves. Pyɛ ma yemo de yê té na bemat beves vê jeng yemo.”

⁴⁶Sede Yɛsu á sè rɔ̌ ha na regyɛng bemat o, neng mɛ na begwa mɛ ba hwo pom, ba tumal e majêy lɔ mo, yɛn a sé simo na yɛn a ha na yɛ.

⁴⁷Yaga ano, mwat hwak de a sé e hwomo a ha a yɛ, “Di, neng mō na begwa mō ba sé e tumal e majey, yɛn e simo be ha na hwo.”

⁴⁸Yɛsu a toyo a mwat o, a yang ɛ, “E wà, à neng hom ɛ? E beva, à begwa hom arɛt?”

⁴⁹Ko a nára vwɔ mɛ wɔ na bemât masâ fwom mɛ, a ye, “Di, neng hom na begwa hom a vemo!

⁵⁰Kawɛ mwat de e ra pyɛ de Da hom de a sé e ji lagwi e simo, e yɛ wɛ de a sé gwa hom na neng hom arɔng.”