Read berom Matayus 13 Bible Online

Matayus 13 - berom bible

Matayus 13

¹E tuk hining o, Yɛsu a nusu yi e lɔ, ko a wɔ̀ sangal e vwâ gworep na a basa a bemat.

²Bagyɛng bemat de ba tula hɛn bá sè bagbɔng o sizɔng. Yaga ano, a yel e dwa-nshi, a sangal, ko bemat o mwa ba sé tumal e rekwogom.

³Yɛsu a misang a yɛn pyɛ́ pyak na gwɔrɔ-há detidetu, a yang ɛn: “Mwat hwak a nusu na a wɔ̀ bere yére.

⁴Jeng de a sé bere yére mo, cak ya gaba e tê gwong, ko benon ba vey, ba tɔng yɛ̄.

⁵Cak ya gaba e kwɔ̂n kusha, kwɔn de ha vɔk nefongol pyak wɛt. Yére mo ya tānga vungu, yaga kwɔn o ha vɔk nefongol yɛt wɛt.

⁶Ko jeng de gwi gwa vey e tē, gwa tá yɛ̄, ko ya hworok, yaga berinîs yɛ̄ bá kana yel yikyik e vwel wɛt.

⁷Cak ya gaba e kwɔ̂n serɔgɔ. Rɔgɔ mo ha ras, ko ha vo yɛ̄.

⁸Ko cak arɔng ya gaba e nefongol nerat, ya tɛ̀ yéneng, ko ba sɛ̀ pyɛ de ba bere zang naga (100), cak kuru batyiimin (60), na cak kuru batat (30).”

⁹E yɛnɛ mo, Yɛsu a yang ɛn, “Mwat de a vɔk betong, tik na yɛ a wok.”

¹⁰Bemât masâ fwôm Yɛsu ba vey na yɛ, ba rangal hɛ, “Yaga sɛ́ de hwó ha na bemat na gwɔrɔ-há arɛt?”

¹¹Yɛsu a hanat, a yang ɛn, “A sé e yin vɛ de ba nɔng in tɔ̂k pyɛ̂ neyaàng Segwɔm Lagwi, ko a sé e yɛn wɛt.

¹²Yaga mwat de a vɔk pyɛ cak, ba rɔda to gwɛ̌ a yɛ, yaga na a bin vɔk yɛ shɛrɛk, ko yɛ de a vɔk pyɛ wɛt, ba rɔda sey ɛ̀ yi na yɛ kepyɛ de a vɔk.

¹³Pyɛ de ya tɛ̀, ma ha na yɛn na gwɔrɔ-há a yet: Yɛn e bɛrɛng, ko yɛn e di wɛt, yɛn e wokos, ko yɛn e wok kɛ be tɔk pyɛ mo wɛt.

¹⁴Yaga ano, pyɛ de Yɛshaya, zarap Dagwi, à kana ha ya sila yi na yɛn: “ ‘Bemat vemo yɛn ê sǎ e de wokos, ko yɛn ê tɔk há mo wɛt, yɛn ê sǎ e de bɛrɛng, ko yɛn ê di pyɛ cak wɛt.

¹⁵Yaga neyey bemat na ga tɛ́ ɛn kashalang, yɛn a bang betong mɛn, yɛn a to bang bayis mɛn. Ka a sé ano wɛt, ka yɛn a yâng bɛrɛng na bayis mɛn, yɛn a yâng wokos na betong mɛn, yɛn a yâng tɔk tsak o e neyey mɛn, ko yɛn a yâng doyo vɔk na Dagwi de ê tɛ̀ ɛn tyang.’

¹⁶“Ko yin à, yin a sé vê yey pyɛng, yaga bayis min be tɔk bɛrɛng jey, ko betong min be tɔk wokos há.

¹⁷Mwin me ha a yin: Bezarap Dagwi pyak, tanga pyak e ji bemat de ba ra pyɛ de Dagwi e simo bà kana vɔk cwey dî pyɛ́ de yin e bɛrɛng, ko yɛn à di yɛ̄ wɛt, bà kana to simo be wok pyɛ́ de yin e wokos, ko yɛn à wok yɛ̄ wɛt.”

¹⁸“Wet in betong, na yin a masa cap-hâ gwɔrɔ-hâ mwât berê yére mo:

¹⁹Bemat de be wok há e ra Segwɔm Dagwi, ko yɛn a tɔk hɛ wɛt, yɛn a sé sede yére yane de ya gaba e tê gwong. Shetan, wo neves, e vey, ko e sey ɛ̀ na gap pyɛ de bá kana bere e neyey mɛn.

²⁰Yére yane de ya gaba e ra kusha ya sé e tô bemat de be wok reha mo, ko e ji jeng o, yɛn e sey rɛ na yey pyɛng.

²¹Ko re tɛ̀ berinis e ji mɛn wɛt, yɛn e pɔl ɛ̀ ba wɛt. Jeng de reyɔm re vey, kɛ be hwo tak a yɛn reyɔm yaga reha mo, ko remo-remo, yɛn e to ɛn na bama.

²²Yére de ya gaba e ji serɔgɔ ya sé e tô vemo de be wok reha mo, ko bɔrɔ̂k pyɛ̂ jey, na netâ yas ye vo reha mo, ko re mara wɛt.

²³Ko yére de ba bere e nefongol nerat ya sé e tô bemat de be wok reha mo, ko be tɔk rɛ. Be ra mɛ̀ fwom naka, sede yére de ya tɛ̀ zang naga (100), cak kuru batyiimin (60), ko cak kuru batat (30) arɔng.”

²⁴Yɛsu a to vey a yɛn na gwɔrɔ-há mo hak, a ye, “Segwɔm Lagwi sa sé sede ngan: Mwat hwak a wɔ̀ bere yére ryat e hwiri mɛ.

²⁵Ko nabwalak jeng de bemat ba sê nevwa, mwât repugu mɛ a wɔ̀ bere yére behwěy e hwirî alkama mɛ mo, ko a to kyè wɛrɛ.

²⁶Jeng de alkama mo wa ras, wa tɛ̀ bato naka, ko behwěy o arɔng ba nusu.

²⁷Besam dâ hwiri mo ba vey na yɛ, ba ye, ‘À da, a sé e yére ryat de hwá bere e hwiri mō wɛt a? Yi e gwa kwong de behwěy ba yi ɛ̀ arɛt?’

²⁸A toyo a yɛn, a yang ɛn, ‘A sé e wo repugu hwak de a ra ano.’ Yɛn a to rangal hɛ, ‘Hwô simo na wot a wɔ̀ lùyu vɛ arɛt?’

²⁹Ko a yang ɛn, ‘Wey, yaga jeng de yin ê sè lùyu behwěy o, gyeng rɔ̌ yin ê kyě lùyu alkama mo hwak tanga vɛ.

³⁰Tík in na mwa yɛ̄ bya ye ras e dem o sɛ̌ jeng bwal. E jeng yane, ma rɔda yâng bemât bwal o: Tānga tula hin behwěy o e ngyen, na yin a rɔgɔs vɛ bapam o bapam o, na be tɛ̀ kya e vɛ arɔng. E bama mo, toyo hin na yin a wɔ̀ yɛt alkama mo, na be bang wɛ e ji gban hom.’ ”

³¹Yɛsu a to ha a yɛn gwɔrɔ-há mo hak, a ye, “Segwɔm Lagwi sa sé sede ngan: Mwat hwak a jut keyenêng mastat, ko a tus e hwiri mɛ.

³²Mwa ano de ka dal bwang yére mwa de be tus na nesɛl, ko jeng de ka ras, ke dal bwang batîn berang de be tus e ji bwi. Ke tɛ́ ɛ retîn cɔgɔt; ko benon be tɔk yís na be lɔkɔs barɛngɛ mɛn e nelang o.”

³³Yɛsu a to gwɛ̌ ha a yɛn gwɔrɔ-há mo gbak, a ye, “Segwɔm Lagwi sa sé sede ngan: Hwā hwak a jut géy-sing, ko a wuna wɛ na shǐ tat hê nemuk, sɛ̌ regat o mwa ra tɛ́ ɛ fugum.”

³⁴Yɛsu a ra fwom na gwɔrɔ-há pyak na a ha a bagyɛng bemat pyɛ́ yemo mwa, ko a ha a yɛn pyɛ cak sana gwɔrɔ-há wɛt.

³⁵A ra ano, yaga na a bin sila pyɛ de zarap Dagwi à kana ha wɔgɔ, “Ma rɔda ra fwom na gwɔrɔ-há jeng de mê ha na yɛn, ma rɔda ha a yɛn pyɛ́ de yà sè e lɛrɛ yimo jeng de bà yong jey.”

³⁶Yɛsu a hàla bagyɛng bemat o, ko a wɔ̀ yel e ji lɔ. Bemât masâ fwom mɛ ba wɔ̀ sɛ̀ ɛ e lɔ mo, ba yang ɛ, “Misang a wot cap-hâ gwɔrɔ-há e ra behwěy e ji hwiri.”

³⁷Yɛsu a yang ɛn, “Yɛ mwat wane de a bere yére ryat o mo a sé Me de ma tɛ́ me mwat.

³⁸Hwiri mo, gwɛ à jey, ko yére ryat o ya sé bemat de Dagwi e re negwɔm e ra yɛn. Behwey o vɛ à bemat de be raa gwɔ̀m cēng, wo neves,

³⁹ko mwât repugu de a bere behwěy o, yɛ à gwɔ̀m cēng o. Jeng bwal o, yɛ à jeng yɛnɛ̂ jey, ko bemât bwal o, vɛ à betom-lagwi.

⁴⁰Sede remo de be lùyu behwěy o na be tɛ̀ kya e vɛ, a rɔda ba sè tyɛng ano e jeng yɛnɛ̂ jey:

⁴¹Me de ma tɛ́ me mwat ma rɔda ba tomo betom-lagwi na be tula yi e ji segwɔm hom mwa bemat de be tɛ̀sɛ bemat be ragas banɛn tanga mwa vemo de be ragas pyɛ́ vyes.

⁴²Yɛn a rɔda bomos hɛn e ji gwokya de gwo re sedesi, e kwɔn de yɛn a rɔda ba tosho na be roros yìn mɛn.

⁴³Ko vemo de be ra pyɛ de Dagwi e simo yɛn a rɔda ba lolo sede gwi e ji segwɔm Da mɛn. Mwat de a vɔk betong, tik na yɛ a wok!”

⁴⁴“Segwɔm Lagwi sa sé sede ngan: Mwat hwak a sɛ̀ yas de bá kana lɛrɛ e ji cap. Jeng de a sɛ̀ yɛ, a to bang yɛ e hwomo gbak. Ko yaga a vɔk yey pyɛng ding-ding, a kyè, a wɔ̀ row kayɛ pyɛ de a vɔk, ko a sey mɛ̀ cap yane mo.”

⁴⁵“Ano arɔng, Segwɔm Lagwi sa sé sede ngan: Gbɔng jik hwak a wɔ̀ jāma beta berat sedesi.

⁴⁶Jeng de a sɛ̀ gwining de gwa vɔk nerat yɔ̀kyɔk, a kyè, a wɔ̀ row kayɛ pyɛ de a vɔk, ko a sey mɛ̀ gwɛ.”

⁴⁷“Segwɔm Lagwi sa to sé sede ngan: Bemât vôs betɔk behak ba bomo segun mɛn e ji gworep, ko yɛn a vos yerê betɔk detidetu.

⁴⁸Jeng de segun o sa sila, bemât vôs betɔk o ba hwɔlɔ sɛ vɔk e rekwogom. Ko yɛn a sangal na be kasa betɔk berat o. Yɛn a tɛ̀sɛ berat o e ji sháp, ko ba bomos beves o.

⁴⁹A rɔda ba sè tyɛng ano e jeng yɛnɛ̂ jey: Betom-lagwi ba rɔda ba nusu na be gas bemat de be ragas pyɛ́ vyes yi e vemo de be ragas pyɛ́ de Dagwi e simo.

⁵⁰Yɛn a rɔda bomos hɛn e ji gwokya de gwo re sedesi, e kwɔn de yɛn a rɔda tosho na be roros yìn.”

⁵¹Yɛsu a rangâl bemât masâ fwom mɛ, a ye, “Yin a ga tɔk pyɛ́ yemo mwa yɛ̄ arɛt?” Yɛn a toyo a yɛ, “Ey.”

⁵²Ko a yang ɛn, “Hemo he dura wɔgɔ, kawɛ mwât basâ Badu de a tɛ́ ɛ mwât masâ fwom e ji Segwɔm Lagwi a sé sede dâ lɔ hwak de e paa yi e gban mɛ pyɛ́ de ya sé pyas o, mwa na yēmo de ya sé ryoso.”

⁵³E bama de Yɛsu a yɛnɛ hâ gwɔrɔ-há detidetu mo, a hàla kwɔn o,

⁵⁴ko a toyo wɔ e repomô lɔ mɛ. E hwomo, a basa a bemat e ji duk re fongol mɛn, ko yɛn a langat hɛn, ba tē, “Mwat womo a sɛ̀ netsitsɛng nemo yi e gwa arɛt? A to sɛ̀ retô râ pyɛ̂ bes yemo yi e gwa arɛt?

⁵⁵À besa! E hwêy mwât fwom cɔ́gɔt a hemo wɛt arɛt? Rezâ neng-gwɔ̂ hɛ, à Marya wɛt a, ko begwa mɛ, à Yakɔp, na Yɔsɛf, na Simɔn, tanga Yuda wɛt arɛt?

⁵⁶Bepolgwo mɛ mwa ba sé na sangal e ngamo tanga wot wɛt arɛt? Ko sɛ̌ yi e gwa de a sɛ̀ pyɛ́ yemo mwa arɛt?”

⁵⁷Yaga ano, yɛn a kyɛ́ ɛn hɛ. Ko Yɛsu a yang ɛn, “Bemât mwa be nɔngɔ̂s zarap Dagwi nerey sɛ̌ bemât repomo mɛ na belɔ mɛ.”

⁵⁸A ra pyɛ̂ bes pyak e hwomo wɛt, yaga yɛn a tɛ̀ gap mɛn e ra yɛ wɛt.