Read berom Matayus 14 Bible Online

Matayus 14 - berom bible

Matayus 14

¹E jeng yane, Gbɔng Gwɔ̀m Herodes a wok neha de bemat ba shara e ra Yɛsu.

²Ko a yâng bemât fwom mɛ, “Yaa kukuuk! Womo a sé e Yohana wo batisma. Ba ga to sene hɛ yi e reku! Pyɛ ma yemo de ya tɛ̀, a vɔk reto na a ra mɛ̀ pyɛ̂ bes yemo.”

³Yɛ Herodes o á kana tɛ̀, be vo Yohana, be rɔgɔs hɛ na be tɛ̀ ɛ e lɔ̂ ngyang. Retîn pyɛ de ya tɛ̀ a ra ano a ret ngan: Á kana jut hwâ gwa mɛ Filip, ko á ra weneng mɛ. Ba tâng hwā mo, à Herodyas.

⁴Ko Yohana a tâng Herodes, “A sé tyɛng de hwà jut hwâ gwa mō e weneng wɛt!”

⁵Herodes a simo na a mɔrɔ Yohana mo, ko a tele hɛ bemat, yaga yɛn a jut Yohana a sé zarap Dagwi.

⁶Sede tûk tɔ̂ Herodes ha doyo, hwông Herodyas a rɛ̌ a bemat de ba rini hɛn, ko rɛ́ɛ mo ha pɛngɛ a Herodes yey sizɔng.

⁷Yaga ano, a ha a hwong o na sira wɔgɔ, a rɔda nɔng ɛ kayɛ pyɛ de e simo.

⁸Hwong o a wɔ́ na neng mɛ, na a rangal hɛ pyɛ de ê ye. Ano kwong, a toyo a gbɔng gwɔ̀m na há, a ye, “Nɔng me e ngamo ratô Yohana wo batisma e bworo!”

⁹Yêy gbɔng gwɔ̀m o ya lashe hɛ; ko yaga sira de a ga kana ra e nuyêl bekɛnɛt mɛ, a nɔng nu be nɔ̂ng hwong o pyɛ de a ra won o.

¹⁰Ko a tɛ̀ be wɔ̀ tùt ratô Yohana e lɔ̂ ngyang o.

¹¹Ba vey na rɛ e ji bworo, ba nɔ̂ng hwong o, ko hwong o a wɔ̀ nɔ̂ng neng mɛ.

¹²Bemât masâ fwôm Yohana ba wɔ́, ba jut rebek mɛ, ko yɛn a wɔ̀ lɛrɛ rɛ. E bama mo, yɛn a wɔ̀ ha a Yɛsu pyɛ de ya té.

¹³Sede Yɛsu a wok pyɛ de ya ga té na Yohana, a hàla kwɔn o e dwa-nshi, a kyè vɔk e kwɔn de vit a mwat, yɛ nju mɛ zɔng. Jeng de bemat ba wok ano, ba halsa bapomo mɛn, ko ba raa hɛ e bol.

¹⁴Yɛsu a wul gura gworo, ko a gyirik yi e dwa-nshi mo. Jeng de a di gbɔng regyɛng bemat, a wok nemwishish mɛn, ko a tɛ̀sɛ bemât serɔ mɛn tyang.

¹⁵Sede nahywegelek na vey, bemât masâ fwom mɛ ba vey na yɛ, ba yang ɛ, “Di, gwi gwa ga kyè, ko kwɔn hemo ha sé vit à mwat. Tɛ̀ bemat o e gwong, yaga na yɛn a kyè vɔk e nebapomo, na yɛn a wɔ̀ sey a bato mɛn pyɛ̂ re.”

¹⁶Ko Yɛsu a toyo a yɛn, a ye, “A sé gbing-gbing na yɛn a kyè wɛt. Yin pyɛ min, nɔng in hɛn pyɛ cak na be re.”

¹⁷Yɛn a yang ɛ, “Kéy kàa! Pyɛ de wot a vɔk e ngamo ya sé bāgat kpam-tuk batungun na betɔk beba zɔng!”

¹⁸A yang ɛn, “Vey in na vɛ e ngamo na me.”

¹⁹Ko a tɛ̀ bemat o be sangal e ra sɔng. Ano arɔng, a jut bagat kpam-tuk vane batungun tanga betɔk beba, a tɛ̀ bayis mɛ vɔk e lagwi, ko a feng a Dagwi yaga pyɛ́ mo. A hwo kwɔrɔs bagat o, a nɔ̂ng bemât masâ fwom mɛ, ko bemat mɛ ba gas a bemat o vɛ arɔng.

²⁰Yɛn mwa ba re, ba siris. Bwang o gwa pɔl, ko bemât masâ fwom mɛ mo ba to sila sháp kuru na yɛ bya (12) na cɛ́k o de ya pɔl.

²¹Nepyak bemat de ba re pyɛ́ mo na sé sede gu batungun (5,000); beras zɔng a vane, sana tɛ̀ beha na nèy.

²²E bama mo, Yɛsu a tɛ̀ bemât masâ fwom mɛ gbing-gbing be yel e dwa-nshi, na be ka kyè e nuyel mɛ vɔk e gura gworo, ko yɛ a ka tɛ̀ bemat e gwong.

²³E bama de a ga tɛ̀ ɛn e gwong, yɛ nju mɛ a tút vɔk e raku, na a wɔ̀ ra won. Jeng de nawiri na vey, yɛ a rɔngɔl e hwomo nju mɛ,

²⁴ko dwa-nshi mo wa ga kana kyè yikyik yi e rekwogom. Bagung nshi bá sè tak a yɛn tyɔng wɛt, yaga gul gwa gangas hɛn na bama.

²⁵E rwa hwol gasi, a sé kyè wɔ na yɛn, e kyè e ra tɛ̂t nshi.

²⁶Ko jeng de bemât masâ fwom mɛ ba di ɛ, a sé kyè e ra tɛ̂t nshi, yɛn a ye lot sizɔng, yɛn a ye, “A sé e wovuvwel!” Ko yɛn a dak sekun yaga bengyip.

²⁷Yɛsu a vɛ̌ hanat na yɛn, a yang ɛn, “Vɔk in yey ting! A sé me. Yin wok bengyip wɛt!”

²⁸Ko Bitrus a toyo a yɛ, a ye, “À Darwey, ka sede a sé hwo wɛ, yang me, me vey na hwo e ra tɛ̂t nshi mo.”

²⁹Yɛsu a yang ɛ, “Vey!” Bitrus a gyirik yi e dwa-nshi mo, ko a hwo kyè e ra tɛ̂t nshi vɔk na Yɛsu.

³⁰Ko jeng de a di gul de gwa pɛsɛl na gap, a tɛ̀ bengyip, ko a hwo kyè wɔ̀ ye pyɔp. A tɛ̀ sekun, a ye, “À Darwey, sey me!”

³¹Remo-remo, Yɛsu a nára a yɛ vwɔ mɛ, a kaba hɛ, ko a yang ɛ, “À hwo de hwà tɛ̀ gap mō mwa e ra me wɛt! Yaga sɛ́ de hwà tó yey arɛt?”

³²Sede yɛn a yel e dwa-nshi mo, gul o gwa ye ting.

³³Ko vemo de ba sé e ji dwa mo ba re a yɛ fongol, ba tē, “Mwin, hwà sé Hwey Dagwi!”

³⁴Sede yɛn a ye dɔ, yɛn a gyirik e Gɛnɛsarɛt.

³⁵E hwomo, bemât kwɔn o ba tɔk Yɛsu, ko yɛn a tomsal na há mo vɔk e yɛnɛ̂ sevwel o mwa. Ko bemat ba vɛ̀sɛ a yɛ na mwa vemo de ba ro ɛn.

³⁶Yɛn a ra won na yɛ, ka a tik vê serɔ mo be ra nû gworugu mɛ zɔng. Ko mwa vemo de ba ra gwɛ, ba tɛ̀ tyang.