Read berom Matayus 15 Bible Online

Matayus 15 - berom bible

Matayus 15

¹Behak e ji BeFarisi na bemât basâ Badu ba vey yi e Yɛrusalɛm wɔ na Yɛsu, yɛn a rangal hɛ,

²“Yaga sɛ́ de bemât masâ fwom mō be kyɛ́ ɛn nà raa basâ bedabeda mot arɛt? Yaga yɛn e kus vɔ mɛn gyam na be re pyɛ́ wɛt.”

³Yɛsu a toyo a yɛn, a yang ɛn, “Ko yin ɛ̀, yaga sɛ́ de yin e kyɛ́ in nà raa redu Dagwi, ko yin e raa bása min zɔng arɛt?

⁴Yaga Dagwi à kana ye, ‘Nɔ̂ng da mō na neng mō nerey’, ko à to ye, ‘Kawɛ mwat de a dùsa da mɛ kɛ neng mɛ, a sé gbing-gbing be mɔrɔ hɛ.’

⁵Ko yin, yin e basa wɔgɔ, mwat ê tɔk yâng da mɛ kɛ neng mɛ, ‘Pyɛ de ma ga ye, mê nɔng in, ma ga nɔ̂ng Dagwi yɛ e nɔrɔ.’

⁶Ko ka sede mwat o a ye ano, ko yin e basa, a sé gbing-gbing wɛt na a nɔ̂ng da mɛ nerey. Yi ano, yin a sé tɛ̀ hâ Dagwi he sè pyɛ wɛt, yaga na yin a bin raa bása hê tó min.

⁷À yin bemât nenu-neba! Yɛshaya à ha tyɛng jeng de à ha há yi na Dagwi e ra yin wɔgɔ,

⁸“ ‘Dagwi a ye, bemat vemo be nɔng me nerey na nenu mɛn zɔng, ko neyey mɛn na sé yikyik na me.

⁹Jeng de yɛn a sé re a me fongol, yɛn a sé ra fwôm mɔrɔ̂ rebek zɔng, yaga yɛn e raa badu de ba yi na bemasi sede ba yi na Dagwi.’ ”

¹⁰Yɛsu a yila regyɛng bemat vey na yɛ, a yang ɛn, “Wet in betong, na yin a tɔk há hom!

¹¹A sé e pyɛ́ de ye yel e nû mwat de ye tɛ̀ ɛ ligis wɛt, ko a sé e pyɛ́ de ye nunus yi e ji mwat de ye tɛ̀ ɛ ligis.”

¹²Ano kwong, bemât fwom mɛ ba vey na yɛ, ba yang ɛ, “Hwà tɔk, hwà tɛ̀ neyey BeFarisi ne sogo na há de hwà ha arɛt?”

¹³Yɛsu a toyo a yɛn, a yang ɛn, “Kayɛ pyɛ de Da hom de a sé e lagwi a tus yɛ wɛt, ba rɔda lùt yɛ.

¹⁴Tík in hɛn. Yɛn e simo be hwɔlɔ a bebók vɔ, ko yɛn pyɛ mɛn ba sé bebók. Ka sede bwók e hwɔlɔ mumwɛ bwók, mwa hɛn ba rɔda gaba e ji revɔng.”

¹⁵Bitrus a yang ɛ, “Misang a wot cap gwɔrɔ-há mo.”

¹⁶Ko Yɛsu a yang ɛn, “Yin arɔng, yin a rɔngɔl nà tɔk pyɛ́ mo arɛt?

¹⁷Yin a tɔk di wɛt arɛt? Kayɛ pyɛ de ye yel e nû mwat ye kyè vɔk e rebu, ko ye wɔ̀ nu ɛ e beving.

¹⁸Ko pyɛ́ de ye nunus e nû mwat ye yi e yey mɛ, ko a sé e yɛ̄ de ye tɛ̀ mwat o a sè ligis.

¹⁹Yaga a sé yi e yêy mwat de báre ves he yís, hemo de he tɛ̀ mwat a mɔrɔ mwat, a ra jɛ̀m, a ra nejwang, a shigi, a ha hâ bɔs e ra mwat hwak, ko a lashe bazâ bemat.

²⁰E yɛ̄ à pyɛ́ de ye tɛ̀ mwat ligis. Ko ka sede e re pyɛ́ sana kus vɔ, hemo he tɛ̀ ɛ ligis wɛt.”

²¹Yɛsu a sogo yi e hwomo, a kyè vɔk e yɛnɛ̂ sevwel de sa sé bagat na bapomô Tur na Sidɔn.

²²Hwā hwak WoKanaan de á sè na sangal e yɛnɛ̂ sevwel o a vey na yɛ, a gbɔ, a ye, “À Da, à Hwêy Davit, tosho reyɔm hom! Hwóng hom e re yɔ́m tyɔng wɛt na ceng.”

²³Ko Yɛsu a toyo a yɛ na há hak wɛt. Yaga ano, bemât masâ fwom mɛ ba vey na yɛ, ba shonong e ra yɛ, ba ye, “Tɛ̀ ɛ e gwong. Hwà di, e kyě raa hot na lwɛ́lɛ wɛt arɛt?”

²⁴A toyo a yɛn, “Ba tomo me vey na bemat de ba sé sede vyēl de ya vusa hɛ zɔng, yɛn vɛ à BeIsrayɛl.”

²⁵Ano kwong, hwā mo a vey, a gaba e nuyel mɛ, a yang ɛ, “À Da, sɛlɛ me!”

²⁶Ko Yɛsu a ye, “A sé tyɛng wɛt na mwat a jut pyɛ̂ nèy, na a bomo a bevu.”

²⁷Hwā mo a yang ɛ, “Ey, a sé ano, à Da. Ko mwa ano, bevu be re cɛ̂k pyɛ̂ bedanelɔ mɛn de ye gabsa e vwel!”

²⁸Yaga ano, Yɛsu a yang ɛ, “Háa! À neng-gwɔ, hwà tɛ̀ gap mō e ra me tyɔng wɛt! Pyɛ de hwó simo, ba rɔda ra a hwo yɛ.” Ko e ji jeng o, hwóng mɛ mo a tɛ̀ tyang.

²⁹Yɛsu a hàla hwomo, ko a raa vwâ Gworep Galili. E bama mo, a tút e raku, ko a sangal e hwomo.

³⁰Bagyɛng bemat pyak ba raa hɛ wɔ e kwɔn o, ba vɛ̀sɛ na bemat nà bol, na bebók, na vemo de be yɔmɔng, na bekpey, na bwang behak pyak. Yɛn a tikis hɛn e nuyel mɛ, ko a tɛ̀sɛ hɛn tyang.

³¹Bemat o ba langat hɛn tyɔng wɛt jeng de yɛn a di bekpey be ha, na vemo de bá kana yɔmɔng ba tɛ́ ɛn gyat, bemat nà bol be kyě kyè, na bebók be bɛrɛng jey arɔng, ko yɛn a nɔ̂ng Dagwi wo BeIsrayɛl nerey.

³²Yɛsu a yila bemât masâ fwom mɛ vey na yɛ, ko a yang ɛn, “A sé a me mwishish na bemat vemo, yaga pɔlɔ mɛn hê netat a hemo na me, ko yɛn a vɔk pyɛ́ na be re wɛt. Me simo na me tɛ̀ ɛn e gwong na vyong wɛt, yaga ê tang ɛn cwɛ̀ɛ e gwong.”

³³Bemât masâ fwom mɛ ba rangal hɛ, ba ye, “Wot ê sɛ̀ pyɛ́ e gwa e tê hey hemo de yê vey na be nɔ̂ng regyɛng bemat sede remo arɛt?”

³⁴Yɛsu a rangal hɛn, a ye, “Bāgat kpam-tuk ba sé ala na yin arɛt?” Yɛn a ye, “Ba sé bataama na betɔk besɛl o tyɔng zɔng.”

³⁵Yɛsu a yâng bemât mwa be sangal e vwel.

³⁶Ko a jut bagat kpam-tuk vane bataama na betɔk o, a feng a Dagwi, a kwɔrɔs vɛ, a nɔ̂ng bemât masâ fwom mɛ, ko yɛn a gas a bemat.

³⁷Yɛn mwa ba re, ba siris. E bama mo, bemât masâ fwom mɛ mo ba jut sháp tyaama de ya sila na cɛ́k o de ya pɔl.

³⁸Nepyak bemat de ba re na sé gu banaas (4,000); beras zɔng à vane, sana tɛ̀ beha na nèy.

³⁹Ano Yɛsu a tɛ̀ bemat o e gwong, a yel e dwa-nshi, ko a kyè vɔk e yɛnɛ̂ sevwêl Magadan.