Read berom Matayus 17 Bible Online

Matayus 17 - berom bible

Matayus 17

¹E bamâ nepɔlɔ netyiimin, Yɛsu a jut Bitrus, na Yakɔp, tanga gwa mɛ Yohana, a vɔk na yɛn e gbɔng raku hwak, ko yɛn a sé e hwomo nju mɛn.

²Ko e bɛrɛng mɛn, ba hwo sege hɛ. Bwang bayis mɛ gwa hwo nɛp sede gwi, ko berugu mɛ ba pɛngɛ pes sede negbey.

³E ji jeng o, bemât masâ fwom mɛ vane betat ba di Mose na Eliya, ba sé ha na Yɛsu.

⁴Ko Bitrus a hwo tɛ̀ nu mɛ, a yâng Yɛsu, “À Darwey, a sé naka de wot a sé e ngamo! Ka sede hwô simo, mê yong buk tat e ngamo: Gwining yaga hwo, gwining yaga Mose, ko gwining o yaga Eliya arɔng.”

⁵Jeng de a sé rɔɔ ha, rele de ra nɛp ra yi, ra tɛ̀ necam e ra yɛn. Ko fwɔ gwa hwo yi e ji rele mo, gwa ye, “Hwêy yey hom a hemo, yey hom ya pɛngɛ na hɛ sizɔng! Wok in hâ hɛ!”

⁶Sede bemât masâ fwôm Yɛsu ba wok fwɔ mo, yɛn a wok bengyip sizɔng, ko yɛn a gaba gup e vwel.

⁷Ko Yɛsu a vey na yɛn, a ra ɛn, ko a yang ɛn, “Sogo hin! Yin wok bengyip wɛt.”

⁸Ko jeng de yɛn a yâng bato mɛn cik, yɛn a to di mwat hwak wɛt sɛ̌ Yɛsu nju mɛ.

⁹Sede yɛn a sé gyirik yi e raku, Yɛsu a nɔng ɛn nu, a yang ɛn, “Yin ha a mwat hwak pyɛ de yin a ga di wɛt sɛ̌ bama de ba ga tānga sene Me de ma tɛ́ me mwat yi e reku.”

¹⁰Bemât masâ fwom mɛ mo ba rangal hɛ, “Yaga sɛ́ de bemât basâ Badu ba ye, a sé gbing-gbing na Eliya a tānga vey e ngyen arɛt?”

¹¹A toyo a yɛn, a yang ɛn, “Mwin, Eliya ê vey e ngyen, na a ba yong pyɛ̂ mwa.

¹²Ko ma sé ha a yin, Eliya à ga kana vey, ko bemat bà tɔk ɛ wɛt, ko yɛn à ga ra a yɛ pyɛ́ de yɛn à simo. Ano arɔng, Me de ma tɛ́ me mwat ma rɔda sɔ reyɔm e vɔ mɛn.”

¹³E bama mo kwong, yɛn a de tɔk, a sé ha a yɛn e ra Yohana wo batisma.

¹⁴Sede yɛn a wɔ̀ sɛ̀ regyɛng bemat, mwat hwak a kyè vey na Yɛsu, a ye guduruk e nuyel mɛ,

¹⁵a yang ɛ, “À Da, tosho reyɔ̂m hwey hom. He kushu cushu, ko he re mɛ̀ yɔ́m tyɔng wɛt. Ha ga gabsa e ji kya kɛ e ji nshi zang pyak.

¹⁶Ma ga vey na hɛ na bemât masâ fwom mō, ko yɛn a tɔk tɛ̀ hɛ tyang wɛt.”

¹⁷Yɛsu a hanat, a yang ɛn, “À yin bemât jeng yemo de yin a tɛ̀ gap min e ra Dagwi wɛt, ko neyey min na sé gbarak! Mê sangal tanga yin vɔk e yɛ̌ jeng arɛt? Vey in a me na hwey o e ngamo.”

¹⁸Ko Yɛsu a gyong cēng o, ko ya nusu yi e ji hwey o. Remo-remo, hwey o ha tɛ̀ tyang.

¹⁹E bama mo, bemât masâ fwom mɛ ba wɔ́ na Yɛsu zɔgɔ̂ hɛn, ba rangal hɛ, ba ye, “Yaga sɛ́ de wot a tɔk pat cēng o wɛt arɛt?”

²⁰Yɛsu a yang ɛn, “Yaga yin a tɛ̀ gap min mwa e ra Dagwi wɛt, sede remo de a sé naka na yin a ra. Mwin me ha a yin: Ka sede nepyak tɛ̂ gap min e ra Dagwi na sé sede keyenêng mastat zɔng, ko yin ê tɔk yâng raku womo, ‘Sogo yi e ngamo vɔk e hworo’, ko wa rɔda sogo. Pyɛ cak yê dal in wɛt. [

²¹Sɛ̌ be ra won na be tik rê pyɛ́, na be de tɔk pat ceng yerê yemo zɔng.]”

²²Jeng de mwa bemât masâ fwôm Yɛsu ba wɔ̀ man e sevwêl Galili, Yɛsu a yang ɛn, “Ba rɔda nára Me de ma tɛ́ me mwat e vɔ bemat

²³de yɛn ê mɔrɔ me. Ko e tuk hê tat, ba rɔda sene me yi e reku.” Ko bemât masâ fwom mɛ ba lashe yey mɛn sizɔng.

²⁴E bama de Yɛsu na bemât masâ fwom mɛ ba wul Kafarnahum, bemât seres dyām de ba tɛ̀ yaga Gbɔng Duk Re Fongol ba wɔ́ na Bitrus, ko yɛn a rangal hɛ, “Mwat Basa min e talsa dyâm Gbɔng Duk Re Fongol wɛt arɛt?”

²⁵Bitrus a yang ɛn, “E talsa.” Jeng de Bitrus a yel e ji lɔ, Yɛsu a tānga hanat na yɛ, a ye, “À Simɔn, hwó bare ala arɛt? E beva de be talsa a begbɔng begwɔ̀m jey dyâm yeles na pyɛ́ tanga dyâm vwel arɛt? A sé e nèy vwel o kɛ e bemat beduk arɛt?”

²⁶Bitrus a toyo a yɛ, a yang ɛ, “E bemat beduk.” Yɛsu a yang ɛ, “Ka sede a sé ano, ko sɛ̌ nèy vwel o nê tala pyɛ cak wɛt.

²⁷Ko wot e simo na bemat vemo be wok shom na wot wɛt. Yaga ano, ci vɔk e gworep, na hwo nára guk mō e ji nshi mo. Pat tɔk de hwô tānga vo. Wunta nû wɛ, ko e ji mo, hwô sɛ̀ dyam de yê vey, na hwo tala hɛn mɛ̀ dyâm Gbɔng Duk o yaga me tanga hwo.”