Read berom Matayus 18 Bible Online

Matayus 18 - berom bible

Matayus 18

¹E jeng yane mo, bemât masâ fwôm Yɛsu ba vey na yɛ, ba rangal hɛ, “E wɛ̌ de a dal na nerey e Segwɔm Lagwi arɛt?”

²Yɛsu a yila hwey hak, a tɛ̀ hɛ he tumal e nuyel mɛn,

³ko a yang ɛn, “Mwin me ha a yin: Sɛ̌ yin a sege negwɔn min na yin a tɛ́ in sede nèy, ko yin ê sang yel e Segwɔm Lagwi wɛt.

⁴Kawɛ mwat de a dyɛng to mɛ na a sè sede hwey hemo, e yɛ wɛ de a dal na nerey e Segwɔm Lagwi.

⁵Kawɛ mwat de a sey hwey sede hemo e ji reza hom, a sé e me de yɛ a sey.”

⁶“Ka sede mwat hwak a tɛ̀ hining e ji nèy nemo de na tɛ̀ gap mɛn e ra me, he tik nà tɛ̀ gâp hɛ e ra me, ê dal a yɛ ka ba rɔgɔs gbɔng gwofwa hwongo e fwɔ mɛ, na be bomo hɛ mɛ̀ pyɔp e ji gworep de gwa sé ciwil.

⁷Gawey e ra jey yemo, yaga pyɛ́ ya sé de ye tɛ̀sɛ bemat be tik nà tɛ̀ gap mɛn e ra Dagwi! Yerê pyɛ́ yane yê re nuyel na té, ko gawey e ra mwat de e tɛ̀ pyɛ́ mo ye té!

⁸“Ka sede e vwɔ mō kɛ bwol mō de gwo tɛ̀sɛ hwo, hwò ra banɛn, kpɔktɔ gwɛ na hwo bomo gwɛ! A dal naka hwo yel e kwɔ̂n neken gbak-gbak na vwɔ gwining kɛ bwol gwining, de hwô vɔk vɔ mō na bol mō mwa vɛ, na be bomo hwo e ji kya de he re gbak-gbak.

⁹Ko ka sede e reyis mō de re tɛ̀sɛ hwo na hwo ra banɛn, pat rɛ, na hwo bomo rɛ! A dal naka hwo yel e kwɔ̂n neken gbak-gbak na reyis rining, de hwô vɔk bayis mō baba, na be bomo hwo e kwɔ̂n kya.”

¹⁰“Tē in naka, yin byɛs hining e ji nèy nemo wɛt. Yaga ma sé ha a yin, betom-lagwi mɛn ba sé e nuyêl Da hom e ji lagwi kayɛ jeng. [

¹¹Yaga Me de ma tɛ́ me mwat ma vey na me sey bemat de ba ga vusa hɛn.]

¹²“Yin ê ye ala? Ka sede mwat a vɔk tyīmit naga, ko jining e ji yɛ̄ ya vuru hɛ, e sɛ́ de ê ra arɛt? Ê hàla bwang yemo de ya sé kuru shabatat na yɛ shatyat (99) e de rê sehwey e vwarâ raku, na a wɔ̀ jāma yane de ya vuru hɛ mo.

¹³Ka sede a sɛ̀ yɛ, mwin me ha a yin, a rɔda vɔk yey pyɛng e ra yɛ, a dal mɛ̀ yane de ya sé kuru shabatat na yɛ shatyat de ya vuru hɛ wɛt.

¹⁴Ano arɔng, Da min de a sé e ji lagwi e simo na hak e ji nèy nemo he vuru hɛ wɛt.”

¹⁵“Ka sede gwa mō a ra a hwo renɛn, ko wɔ na yɛ na hwo dura a yɛ renɛn mɛ; yin beba nju min zɔng. Ka sede a wok há mō, ko hemo he dura hwà ga toyo na yɛ à wane.

¹⁶Ko ka sede a wok há mō wɛt, to wɔ́, na hwo vɔk ɛ̀ mwat gwining kɛ beba ayi, yaga na kahɛ há de ba ha e hwomo be sɛ̀ bemât nuha tɛk beba kɛ betat, sede remo de bà kana jɛk e ji Bwok-basa Dagwi.

¹⁷Ka sede a kyɛ́ ɛ nà wok há mɛn, wɔ na há mo na ekilisiya. Ko ka sede a kyɛ́ ɛ nà wok hâ ekilisiya mo mwa arɔng, teshe hin na yɛ, tyɛng sede yin e teshe na mwat de a tɔk Dagwi wɛt kɛ mwât seres dyâm yeles na pyɛ́ ayi.”

¹⁸“Mwin me ha a yin: Pyɛ de yin ê ye wey a yɛ e ngamo e jey, Dagwi ê ye wey a yɛ arɔng. Ko pyɛ de yin ê ye ey a yɛ e ngamo e jey, Dagwi ê ye ey a yɛ arɔng.

¹⁹“Ko me to gwɛ̌ ha a yin: Ka sede beba e ji min e ngamo e jey ba wuna nu e ra pyɛ cak de yin a ra wôn yɛ, ko Da hom de a sé e ji lagwi a rɔda ra a yin yɛ.

²⁰Yaga e kwɔn de bemat beba kɛ betat ba tula hɛn ɛ̀ e ji reza hom, ma sé e hwomo e tē mɛn.”

²¹E bama mo, Bitrus a vey na Yɛsu, ko a rangal hɛ, a ye, “À Darwey, ka sede gwa hom a dopse ra a me banɛn, ko mê hàla a yɛ zang ala arɛt? Zang taama a?”

²²Yɛsu a yang ɛ, “Wey, a sé zang taama wɛt, ko a sé kuru bataama (70) zang taama.[2]

²³Yaga Segwɔm Lagwi sa sé sede ngan: Gbɔng gwɔ̀m hwak á sɛ̀ womo de a simo na a basa yas mɛ de ya sé e vɔ bemât fwom mɛ.

²⁴Jeng de a hwo basa mo, ba vey a yɛ na mwat hwak de gbɔng gwɔ̀m o e rangal hɛ betalen gu kuru (10,000).[3]

²⁵Ko mwat o a vɔk pyɛ cak de ê tala mɛ̀ pyɛ de be rangal hɛ mo wɛt. Yaga ano, dalɔ mɛ mo a nɔng nu na be wɔ̀ row ɛ, yɛ na hwā mɛ, na nèy mɛ, tanga mwa pyɛ́ de a vɔk, na be tala mɛ̀ redu mo.

²⁶Ko mwât fwom o a gaba e cat bol mɛ, a ra won na yɛ, a ye, ‘Gabɔk wɛt, niri na me, ko ma rɔda tala hwo kayɛ pyɛ de hwó rangal me!’

²⁷Dalɔ mɛ mo a wok nemwishish mɛ, a hàla a yɛ redu mo, ko a tik ɛ, a kyè.

²⁸“Ko jeng de mwât fwom o a nusu, a sé kyè, a sɛ̀ hwak e ji besâ fwom mɛ de yɛ e rangal hɛ dyâm fwom yê tuk naga. A kaba hɛ, a hwo tá a yɛ ngyɔt, a ye, ‘Tala me pyɛ de me rangal hwo!’

²⁹Sâ fwom mɛ mo a gaba e nuyel mɛ, a ra won na yɛ, a ye, ‘Gabɔk wɛt, niri na me, ko ma rɔda tala hwo pyɛ de hwó rangal me!’

³⁰Ko a kyɛ́ ɛ, a wɔ̀ tɛ̀ sa mɛ mo e lɔ̂ ngyang, sɛ̌ a tɔk tala redu mɛ.

³¹“Sede bwang bemât fwôm lɔ gwɔ̀m o ba di pyɛ de ya ga té, yɛn a lashe yey mɛn sizɔng, yɛn a wɔ́ na gbɔng gwɔ̀m o, ko yɛn a misang a yɛ mwa pyɛ de ya ga té mo.

³²Yaga ano, dalɔ mo a yila mwât fwom mɛ wane de a ra pyɛ yane mo, a yang ɛ, ‘À hwo mwât fwom vwes! Ma hàla a hwo mwa pyɛ́ de me rangal hwo, yaga hwà ra won na me.

³³A yâng jam, ka hwà yâng tosho reyɔ̂m sâ fwom mō, tyɛng sede remo de ma tosho reyɔm mō arɔng.’

³⁴Gwɔ̀m o a wok shom sizɔng, ko a nára hɛ e vɔ bemât gyeng lɔ̂ ngyang na be tak a yɛ reyɔm sɛ̌ bama de a ba tala kayɛ pyɛ de be rangal hɛ.

³⁵“Gwong a gwomo de Da hom e ji lagwi a rɔda teshe na kawɛ e ji min, ka sede yin a hàla a gwa min na yey rining wɛt.”