Read berom Matayus 19 Bible Online

Matayus 19 - berom bible

Matayus 19

¹E bama de Yɛsu a yɛnɛ hâ pyɛ́ yane, a hàla sevwêl Galili, ko a kyè vɔk e yɛnɛ̂ sevwêl Yudiya de ha sé e gurâ Rɔt Yɔrdan.

²Bagyɛng bemat pyak ba raa hɛ, ko a tɛ̀sɛ hɛn tyang e hwomo.

³BeFarisi behak ba vey na yɛ, ba simo na be mara hɛ, ko ba rangal hɛ, ba ye, “Badu mot ba simo a mwat na a ro hwā mɛ yaga kayɛ pyɛ de ya té zɔng arɛt?”

⁴Yɛsu a yang ɛn, “Yin a ga basa pyɛ de bà jɛk e ji Bwok-basa Dagwi wɛt arɛt? Bà jɛk wɔgɔ, e susu mo, Dagwi à yong bemat, rwas na hwā.

⁵Ko à ye, ‘Pyɛ ma yemo de ya tɛ̀, rwas a rɔda tik da mɛ na dē mɛ, na a wuna hɛ na hwā mɛ, ko yɛn beba mo ba rɔda tɛ́ ɛn rebek rining.’

⁶Yi e ngamo nuyel, yɛn a to sé beba wɛt, ko ba sé pyɛ jining. Yaga ano, pyɛ de Dagwi a ga wuna, mwat a kwon gas yɛ wɛt.”

⁷BeFarisi mo ba to rangal hɛ, “Yaga sɛ́ de Mose à nɔng redu wɔgɔ, rwas e tɔk nɔ̂ng hwā mɛ bwôk gâs weneng, na a tɛ̀ hwā mo e gwong arɛt?”

⁸Ko Yɛsu a yang ɛn, “Mose à nɔng in gwong na yin a gas in na beha min, yaga neyey min na sé kashalang. Ko e jeng yông jey à sè ano wɛt.

⁹Ma sé ha a yin, kawɛ mwat de a ro hwā mɛ, sɛ̌ yaga á kana ra nejwang, ko mwat o a to vo hwā mo hwak, a sé ra nejwang.”

¹⁰Bemât masâ fwom mɛ ba yang ɛ, “Ka sede pyɛ mo ya sé ano e tê rwas na hwā mɛ, nduga mwat a sangal ano sana ra weneng.”

¹¹Ko Yɛsu a toyo a yɛn, a yang ɛn, “A sé e kawɛ mwat de e tɔk sey bása hemo wɛt, ko a sé e vemo zɔng de ba ga nɔng ɛn hɛ.

¹²Pyɛ́ ya sé detidetu de ye tɛ̀sɛ bemat behak be ra weneng wɛt: Behak ba sé berɛmɛt yaga ba tɔs ɛn ano, ko behak, yaga bemat ba tɛ̀ ɛn na be sè ano, ko behak kwong ba kyɛ́ ɛn weneng, yaga na be nɔng bato mɛn mwa yaga Segwɔm Lagwi. Tik na mwat de e tɔk sey bása hemo a sey hɛ.”

¹³Bemat behak ba vey na nèy na Yɛsu, yaga na a bin tɛ̀ vɔ mɛ e ra nɛ, na a to ra won yaga nɛ. Ko bemât masâ fwom mɛ ba hwo gyong ɛn.

¹⁴Yɛsu a yang ɛn, “Tík in nèy na ne vey na me! Yin ro nɛ wɛt, yaga e bemat sede yerê nèy nemo de ba rɔda ba sangal e Segwɔm Lagwi.”

¹⁵Ano kwong, a tɛ̀ vɔ mɛ e ra nɛ, ko a kyè yi e hwomo.

¹⁶Tuhak, mwat hwak a wɔ́ na Yɛsu, a rangal hɛ, a ye, “À Mwat Basa, e yɛ̌ pyɛ ryat de ma rɔda ra na me bin sɛ̀ mɛ̀ neken gbak-gbak arɛt?”

¹⁷Ko Yɛsu a yang ɛ, “Yaga sɛ́ de hwó rangal me e ra rehâ pyɛ de ya sé ryat arɛt? Mwat a sé gwining zɔng de a sé rwat. Ka sede hwó simo na hwo sɛ̀ neken, ko hwo gyenges badu Dagwi.”

¹⁸Mwat o a to rangal hɛ, “E vɛ̌ badu mo arɛt?” Yɛsu a toyo a yɛ, “Hwo mɔrɔ mwat wɛt; hwo ra nejwang wɛt; hwo shigi wɛt; hwo ha hâ bɔs e ra mwat hwak wɛt;

¹⁹nɔ̂ng da mō na neng mō nerey; tɛ̀ yey na mwât vwara mō sede hwà tɛ̀ yey na tó mo.”

²⁰Ko wen o a ye, “Ma ga gyenges badu vane mo mwa. E sɛ́ de mê to ra a remo arɛt?”

²¹Yɛsu a yang ɛ, “Ka sede hwó simo na hwo sila gyat, ko ci wɔ̀ row kayɛ pyɛ de hwà vɔk, na hwo gas a bepɛng dyām o, ko hwà rɔda ba sɛ̀ yas e lagwi. E bama mo, vey, na hwo ba raa me.”

²²Jeng de wen o a wok ano, a nára hɛ na lashê yey, yaga yɛ a sé gbɔng darwey.

²³Ko Yɛsu a yâng bemât masâ fwom mɛ, “Mwin me ha a yin: E ba sè gbang na bedaberey be yel e Segwɔm Lagwi!

²⁴Me to me ha a yin: E ba sè nduga maryat wo yel e rewôl kwêt tolo, na darwey a yel e ji Segwɔm Dagwi.”

²⁵Sede bemât masâ fwom mɛ mo ba wok ano, a vɛ̌ yang ɛn yɔɔt, ko yɛn a rangsâl bemɛn, “Ko sɛ̌ e wǎ de bê ba tɔk sey neken mɛ arɛt?”

²⁶Yɛsu a bɛrɛng hɛn, a yang ɛn, “Bemat be tɔk ra pyɛ yemo wɛt, ko Dagwi e tɔk ra kayɛ pyɛ.”

²⁷Ko Bitrus a toyo a yɛ, a yang ɛ, “Di, wot a ga tik kayɛ pyɛ na wot a raa hwo! E sɛ́ de wot a rɔda sɛ̀ kwong ɛ?”

²⁸Yɛsu a yang ɛn, “Mwin me ha a yin: Jeng de Dagwi a rɔda to ba tɛ̀ pyɛ̂ mwa ye sè pyas, Me de ma tɛ́ me mwat ma rɔda ba sangal e ra gwofwa negwɔm hom e ji gbɔng nerey. Ko e jeng jining o, yin bemat kuru na vɛ beba de yin e raa me, yin a rɔda ba sangal e ra beta negwɔm arɔng, na yin a ra a yere kuru na yɛ bya yê Israyɛl shɔt.

²⁹Ko kawɛ mwat de a ga tik nelɔ mɛ, kɛ begwa mɛ, kɛ da mɛ, kɛ neng mɛ, kɛ nèy mɛ, kɛ cāp mɛ yaga me, a rɔda sɛ̀ pyɛ́ de ye ba dal ano zang naga, ko a rɔda ba sey neken gbak-gbak.

³⁰Ko pyak e ji vemo de ba sé vê yel a remo ba rɔda ba tɛ́ ɛn vê bama; ko pyak e ji vemo de ba sé vê bama a remo kwong ba rɔda ba tɛ́ ɛn vê yel.”