Read berom Matayus 2 Bible Online

Matayus 2 - berom bible

Matayus 2

¹Ba tɔ Yɛsu e repomô Bet-Lɛhɛm e ji sevwêl Yudiya e jeng de Herodes á sè re negwɔm sevwel o. E bamâ jeng tyɔng na tɔ́ mɛ, bemât tɔ̂k netangacɛn behak ba yi e rwa rak wɔ e Yɛrusalɛm.

²Yɛn a rangal, ba ye, “Hwey a hɛ̌ de ba tɔ hɛ, de hê sè gbɔng gwɔ̀m BeYuda arɛt? Wot a ga di tangacɛ̂n hɛ e rak, ko wot a ga vey na wot a bin re a hɛ fongol.”

³Sede Gbɔng Gwɔ̀m Herodes a wok ano, pyɛ mo ya bɔrɔk hɛ tanga mwa bemât Yɛrusalɛm sizɔng.

⁴A yila mwa begbɔng bepiris tanga bemât basâ Badu, ko a rangal hɛn kwɔn de ba rɔda tɔ ɛ̀ Mwat de Dagwi a kasa na a sey bemat.

⁵Yɛn a toyo a yɛ, ba yang ɛ, “E repomô Bet-Lɛhɛm e ji sevwêl Yudiya. Yaga pyɛ de zarap Dagwi à jɛk a yet ngan:

⁶“ ‘À hwo Bet-Lɛhɛm e ji sevwêl Yuda, hwà radɛ hwo na nerey e ji bagbɔng bapomô Yuda ko tyɔng wɛt; yaga a sé yi e ji mō de mwat de ê re negwɔm a rɔda yi, womo de a rɔda bɛrɛng bemat hom BeIsrayɛl sede lwek vyēl.’ ”

⁷Ano kwong, Herodes a yila bemât tɔ̂k netangacɛn o e lɛrɛ, yaga na a bin sɛ̀ yi na yɛn tyɛng jeng de tangacɛn o wá kana nusu.

⁸Ko a tomo hɛn vɔk e Bet-Lɛhɛm, a yang ɛn, “Ci in, na yin wɔ̀ ngyɛgɛt kwɔn de hwey o ha sɛ́. Ko jeng de yin a sɛ̀ hɛ, toyo hin, na yin ba ha a me, yaga na me arɔng me wɔ na me wɔ̀ re a hɛ fongol.”

⁹E bama de yɛn a yɛnɛ wôk hâ gbɔng gwɔ̀m o, yɛn a kaba gwong. E ji kwɛngɛl mɛn, yɛn a to di tangacɛn de yɛn á kana di e rwa rak. Wa sé kyè e nuyel mɛn, sɛ̌ wa wɔ̀ tumal e ra tɛ̂t kwɔn de hwey o ha sé ɛ̀.

¹⁰Sede yɛn a di tangacɛn o, yɛn a vɔk yey pyɛng vit a yere mo.

¹¹Yɛn a yel e lɔ mo, ko jeng de yɛn a di hwey o tanga nêng hɛ Marya, yɛn a gaba e nuyêl hɛ, ko yɛn a re a hɛ fongol. Yɛn a wuma pyɛ̂ nedanerey mɛn, ko yɛn a nɔ̂ng hɛ nɔrɔ̂ dyam shinang, na firankinsɛn, na mir.

¹²Yɛn a toyo vɔk e sevwel mɛn; ko yɛn a raa gwong hwak detu, yaga Dagwi á kana tusa hɛn e ji negwi, be to kwey na Herodes wɛt.

¹³E bama de bekɛnɛt o ba ga kyè, tom-lagwi hwak de Darwey a tomo hɛ a dura a Yɔsɛf to mɛ e ji negwi, a yang ɛ, “Sogo, jut hwey o na nêng hɛ, na yin a wɔ̀ hywit in e sevwêl Misra. Sangal e hwomo sɛ̌ jeng de me ba ha a hwo, yaga Herodes a sé kyè wɔ ngyɛgɛt na a sɛ̀ hwey o, yaga na a mɔrɔ hɛ.”

¹⁴Ano kwong, Yɔsɛf a sogo, a jut hwey o na nêng hɛ, ko naturuk yɛn a nára hɛn vɔk e Misra.

¹⁵Yɛn a sangal e hwomo sɛ̌ jeng de Herodes a ku. Hemo ha té ano, yaga na há de Darwey à kana ha yi na zarap Dagwi he sila wɔgɔ, “A sé yi e Misra de ma yila Hwey hom.”

¹⁶Sede Herodes a di, bemât tɔ̂k netangacɛn ba ra a yɛ netsitsɛng, a tɛ̀ shom sizɔng. A nɔng nu na be wɔ̀ mɔbɔs mwa nèy bewen de na dal neshey neba wɛt e Bet-Lɛhɛm na e nebapomo de na gwɔrɔ repomo mo. Neshey o na sé tyɛng na nepyak jeng de á kana wok yi na bekɛnɛt e ra jeng de yɛn á kana di tangacɛn o.

¹⁷E gwong gwomo, ba sila pyɛ de Yirmiya, zarap Dagwi, à kana ha wɔgɔ,

¹⁸“Ba wok fwɔ hwak e Rama, gwa sé gwô sesin na lashe yey ding-ding. A sé e Rahɛl de a sé tosho yaga nèy mɛ. A kyɛ́ ɛ na be wɔrɔk hɛ, yaga nà to sɛ́ wɛt.”

¹⁹E bama de Herodes a ga ku, tom-lagwi hwak de Darwey a tomo hɛ a dura a Yɔsɛf tó mɛ e ji negwi e Misra,

²⁰a yang ɛ, “Sogo, jut hwey o na nêng hɛ, na hwo toyo vɔk e sevwêl Israyɛl, yaga vemo de bá kana jāma na be wey na hwey o ba ga kushu.”

²¹Ano kwong, Yɔsɛf a sogo, a jut hwey o na nêng hɛ, ko a toyo wɔ e sevwêl Israyɛl.

²²Ko jeng de a wok, a sé e Arkelaus de a sé re negwɔm e yɛnɛ̂ sevwêl Yudiya e tô da mɛ Herodes, a vo bengyip wɔ́ e hwomo. E bama de ba to ha a yɛ e ji negwi, a vɛ̌ kyè vɔk e bak sevwêl Galili.

²³A wɔ̀ sangal e repomo rehak de be tâng rɛ, à Nazarɛt. Yi ano, ba sila pyɛ de bezarap Dagwi bà kana ha wɔgɔ, “Bê tang ɛ, à Wo Nazarɛt.”