Read berom Matayus 20 Bible Online

Matayus 20 - berom bible

Matayus 20

¹“Segwɔm Lagwi sa sé sede ngan: Dâ bwi hwak á sɛ̀ de á nusu bop nagasi, na a wɔ̀ jāma bemât fwôm dyām na be vey ra a yɛ fwom e bwî anap mɛ.

²Jeng de a sɛ̀ bemat o, yɛn a yong ɛ̀ e ra pyɛ de bê tala hɛn, yɛ̀ à dyam pyɛng jining tuk hining, ko a tomo hɛn na be wɔ̀ ra fwom o e bwi mɛ mo.

³Sede dyâm-gwi shatyat ya vey, a to nusu wɔ e bajang, ko a di bemat behak e hwomo de ba sé kyě kyè zɔng, vit a fwôm ra mo.

⁴A yang ɛn, ‘Yin arɔng, ci wɔ̀ ra in fwom e bwî anap hom; ma rɔda tala hin pyɛ de ya sé tyɛng.’

⁵Yɛn a simo, ko yɛn a kyè. A to nusu e tê-gwi tanga e dyām tyat nahywegelek, ko a ra tyɛng ano.

⁶Sede dyām tyungun ya vey, a nusu gbak, a to wɔ́ e bajang o ko a di bemat behak de ba sé tumal zɔng. A rangal hɛn, ‘Yaga sɛ́ de yin a sé tumal e ngamo ngan, yin a bomo gwi e de râ pyɛ wɛt arɛt?’

⁷Yɛn a toyo a yɛ, ‘Vit a mwat de a ba jut ot e fwom.’ A yang ɛn, ‘Yin arɔng, ci wɔ̀ ra in fwom e bwî anap hom.’

⁸“Jeng de gwi gwa gaba, dâ bwî anap o a yâng mwât nuyêl bemât fwom mɛ, ‘Yila bemat de ba ra fwom e ji bwi mo, na hwo tala hɛn byɛ mɛn. Tānga pɛrɛ na vemo de bá gà jut ɛn e fwom e tala mo, na hwo kyè mɛ̀ vɔk e vê susu mo.’

⁹Bemat de ba hwo fwom dyām tyungun nahywegelek zɔng ba vey, ko ba tala hɛn dyam pyɛng jining.

¹⁰Ano kwong, vemo de bá ga tānga jut ɛn nagasi ba pom, ko yɛn a bare, ba rɔda tala hɛn pyɛ de ya dal ye bemɛn. Ko ba talâ kawɛ e ji mɛn dyam pyɛng jining arɔng.

¹¹Sede yɛn a sey dyām o, yɛn a hwo gwɔrɔng a dâ bwi mo.

¹²Yɛn a ye, ‘Di, bemat vemo de hwà jut ɛn e fwom e yɛnɛ mo yɛn a ra fwom dyam-gwi jining zɔng, ko hwà tɛ̀ ɛn tyɛng na wot, wot vemo de wot a jut nedirîk fwom o, ko wot a to sɔ nepêp gwi de gwa ta yunung o!’

¹³“Ko dâ bwi mo a toyo a hwak e ji mɛn, a yang ɛ, ‘À sa hom, ma mɔt o wɛt. Hwá ga simo na hwo ra fwom o e nû dyam pyɛng jining wɛt arɛt?

¹⁴Jut dyam fwom mō, na hwo kyè! Ma simo na me talâ mwat de ma jut ɛ e fwom e yɛnɛ mo tyɛng pyɛ de ma nɔng o.

¹⁵Ma vɔk reto na me ra pyɛ de me simo na dyām hom wɛt arɛt? Kɛ hwó ra repugu bemin, yaga ma viri vwɔ na yɛn arɛt?’ ”

¹⁶Ko Yɛsu a yɛnɛ há mo, a ye, “Yaga ano, vemo de ba sé vê bama a remo ba rɔda ba tɛ́ ɛn vê yel, ko vemo de ba sé vê yel a remo ba rɔda ba tɛ́ ɛn vê bama.”

¹⁷Sede Yɛsu á sè kyè vɔk e Yɛrusalɛm, a jut bemât masâ fwom mɛ kuru na vɛ beba e hagat, yɛn e de kwɛngɛl o, ko a yang ɛn,

¹⁸“Wok in, wot a sé kyè vɔk e Yɛrusalɛm, e kwɔn de ba rɔda nára Me de ma tɛ́ me mwat e vɔ begbɔng bepiris tanga bemât basâ Badu. Yɛn a rɔda ra a me shɔt reku;

¹⁹e bama mo, yɛn a rɔda nára me e vɔ bemat beduk, na be shɛgɛsh me, na be dak me na zining arɔng, ko yɛn a rɔda kak me e ra cɔ́gɔt. Ko e tuk hê tat, ba rɔda sene me yi e reku.”

²⁰E bama mo, nêng nèy Zɛbɛdayus a vey na Yɛsu, yɛ tanga nèy mɛ. A gaba e nuyel mɛ, ko a jāma na Yɛsu a ra a yɛ pyɛ cak.

²¹Yɛsu a rangal hɛ, a ye, “E sɛ́ de hwó simo arɛt?” Hwā mo a yang ɛ, “Simo a me na hak e ji nèy hom nemo he sangal e vwɔ yege mō, ko hak e vwɔ mwɛlɛng mō jeng de hwó ba sangal e ra gwofwa negwɔm mō.”

²²Ko Yɛsu a yang ɛn, “Yin a tɔk pyɛ de yin a sé ra wôn yɛ wɛt. Yin e ba tɔk sɔ keshi reyɔm de me ba sɔ arɛt?” Yɛn a yang ɛ, “Ey, wot ê tɔk sɔ.”

²³Yɛsu a yang ɛn, “Mwin, yin a rɔda sɔ keshi reyɔm de ma rɔda sɔ. Ko me, ma vɔk reto na me kasa bemat de bê sangal e vwɔ yege na mwɛlɛng hom wɛt. A sé e Da hom de e ba nɔng nekwɔn o vɔk na vemo de a ga kana yong nɛ yaga yɛn.”

²⁴Sede bwang bemât masâ fwom kuru ba wok ano, yɛn a tɛ̀ shom e ra begwa beba vane mo.

²⁵Ko Yɛsu a yila hɛn mwa hɛn, a yang ɛn, “Yin a tɔk bemat de ba ga tɛ̀ ɛn, na be sè begwɔ̀m e ra yére dyuk be re negwɔm e ra bemat mɛn na retek, ko bemakuk mɛn ba vɔk reto e ra yɛn arɔng.

²⁶Ko ê sè ano na yin wɛt. Ka sede mwat hwak e ji min e simo na a tɛ́ ɛ gbɔng o, gbing-gbing na a sè mwât fwom min.

²⁷Ko ka sede mwat hwak e ji min e simo na a sè wo yel, gbing-gbing na a sè sam min,

²⁸tyɛng sede remo de Me de ma tɛ́ me mwat ma vey na be ba ra a me fwom wɛt. Ko ma vey, na me ra fwom, na me nɔng neken hom, na me vibis mɛ̀ bemat pyak.”

²⁹Sede Yɛsu na bemât masâ fwom mɛ bá sè tik Yeriko, gbɔng regyɛng bemat ra raa hɛ.

³⁰Bebók beba bá sè e sangal e vwarâ gwong. Jeng de yɛn a wok, Yɛsu a sé kwey, yɛn a hwo gbɔ, ba ye, “À Da, à Hwêy Davit, tosho reyɔm mot!”

³¹Regyɛng bemat o ra gyong ɛn, ko ra yang ɛn, be sǎ yuu. Ko yɛn a gwɛ̌ ye ngyat, ba ye, “À Da, à Hwêy Davit, tosho reyɔm mot!”

³²Yɛsu a tumal, ko a yila hɛn, a rangal hɛn, a ye, “Yin e simo na me ra a yin sɛ́ arɛt?”

³³Yɛn a yang ɛ, “À Da, wot e simo na wot a to bɛrɛng jey.”

³⁴Yɛsu a wok nemwishish mɛn, ko a ra bayis mɛn. E ji jeng o, yɛn a hwo bɛrɛng jey, ko yɛn a raa hɛ.