Read berom Matayus 21 Bible Online

Matayus 21 - berom bible

Matayus 21

¹Jeng de yɛn a vey bagat na Yɛrusalɛm, ba pom e kerepomô Bet-Fage de ka sé e vwâ Raku Pàt. Yɛsu a hwo tomo bemât masâ fwom mɛ beba,

²a yang ɛn, “Kyè in vɔk e ji kerepomo kane e nuyel min. Sede yin a pom e hwomo, remo-remo, yin a rɔda di madung e rɔgɔs na hwêy wɛ e hagât wɛ. Viri hin vɛ, na yin a vey a me mɛ̀.

³Ka sede mwat hwak a rangal hin pyɛ cak, ko yang in hɛ, ‘Darwey e simo vɛ’, ko yɛ ê tomo na vɛ ziri.”

⁴Hemo ha té, yaga na be bin sila mɛ̀ pyɛ de zarap Dagwi à kana ha wɔgɔ,

⁵“Yang in repomô Siyɔn, ‘Di, gbɔng gwɔ̀m mō a sé kyè vey na hwo! A dyɛng to mɛ, ko a sé laga madung, a sé laga hwêy madung.’ ”

⁶Bemât masâ fwom mɛ ba wɔ̀ ra pyɛ de Yɛsu á kana misang hɛn.

⁷Yɛn a vey na madung o na hwêy wɛ, yɛn a paa pyɛ̂ banga mɛn, ba tɛ̀sɛ yɛ̄ e ra mâ bemadung o, ko Yɛsu a laga.

⁸Bemat pyak vit a yere mo ba lasha pyɛ̂ banga mɛn e gwong, ko behak ba kwɔrɔs berang yi e batîn cɔ́gɔt, ko ba lasha vɛ e ra gwong o.

⁹Bagyɛng bemat de ba sé kyè e nuyêl Yɛsu tanga vemo de ba sé raa hɛ e bama ba hwo gbɔ, ba tē, “Hosana! Bē somo Hwêy Davit! Tik na Dagwi a tɛ̀ nerat e ra womo de e kyè vey e ji rezâ Darwey! Bē somo Dagwi!”

¹⁰Jeng de Yɛsu a yel e Yɛrusalɛm, nehywɛ mwa bemât gbɔng repomo mo na sogo, ko ba hwo rangsal, “E wà a womo arɛt?”

¹¹Bagyɛng bemat o ba yang ɛn, “Womo a sé Yɛsu, zarap Dagwi, de a sé yi e Nazarɛt e ji sevwêl Galili.”

¹²Yɛsu a wɔ̀ yel e nelalâ Gbɔng Duk Re Fongol, ko a ro mwa bemât rɛsɛl pyɛ́ tanga vemo de ba sé seres yɛ̄ yi e hwomo. A gangas betebut bemât segsâ dyām, na necɔgɔ̂t sangsâl bemat de ba sé rɛsɛl bebɔp.

¹³A yang ɛn, “Bà jɛk e Bwok-basa Dagwi wɔgɔ, Dagwi a ye, ‘Ba rɔda tâng lɔ hom, à duk won.’ Ko yin, yin a sé tɛ̀ hɛ he tɛ́ ɛ fwarâ begbik!”

¹⁴Bebók na bemat nà bol ba vey na yɛ e Gbɔng Duk Re Fongol o, ko a tɛ̀sɛ hɛn tyang.

¹⁵Ko jeng de begbɔng bepiris tanga bemât basâ Badu ba di pyɛ̂ bes de a ra, ko ba to di nèy de na gbɔ e Gbɔng Duk o wɔgɔ, “Bē somo Hwêy Davit!” Yɛn a tɛ̀ shom.

¹⁶Yaga ano, yɛn a rangâl Yɛsu, “Hwà wok pyɛ́ de nèy nemo na sé tē arɛt?” Yɛsu a yang ɛn, “Ey, ma wok. Yin a ga sang basa há hemo e Bwok-basa Dagwi wɛt arɛt? Há ma het: ‘Hwà tɛ̀ nèy tanga nèy-vɔ ne somo hwo naka.’ ”

¹⁷Ko a hàla hɛn, a nusu yi e repomo mo vɔk e Bet-Anya, ko a wɔ̀ pɔl ɛ̀.

¹⁸E nusû hwol bop nagasi, sede a sé to ɛ vɔk e ji repomo, ko Yɛsu a wok vyong.

¹⁹A di retîn regwi e vwarâ gwong, a wɔ́ bagat na rɛ, ko a sɛ̀ pyɛ cak wɛt sɛ̌ berang zɔng. Ko a yâng rɛ, “Hwo to ba tɔs nèy wɛt neshey gbak-gbak!” Remo-remo, retîn cɔgɔt o ra hworok.

²⁰Jeng de bemât masâ fwom mɛ ba di ano, yɛn a langat hɛn, ko yɛn a rangal hɛ, “Yi e rɛ̌ de retîn regwi o ra pe hworok ziri ano arɛt?”

²¹Yɛsu a toyo a yɛn, a yang ɛn, “Mwin me ha a yin: Ka sede yin a tɛ̀ gap min e ra Dagwi, na yin a tó yey wɛt, ko yin a rɔda tɔk ra pyɛ de ma ra a retîn regwi remo zɔng wɛt, ko yin ê tɔk yâng raku womo, ‘Sogo, na hwo wɔ̀ gaba e ji gworep’, ko pyɛ mo ya rɔda té.

²²Ka sede yin a tɛ̀ gap min e ra Dagwi, ko yin a rɔda sɛ̀ kayɛ pyɛ de yin a lolo yɛ e ji won o.”

²³Yɛsu a to yel e nelalâ Gbɔng Duk Re Fongol. Jeng de a sé basa a bemat, begbɔng bepiris tanga bemakuk ba hwo vey na yɛ, ba rangal hɛ, ba ye, “E rɛ̌ reto de hwà vɔk de hwó ra mɛ̀ pyɛ́ yemo arɛt? E wà de a nɔng o reto remo mo arɛt?”

²⁴Yɛsu a hanat, a yang ɛn, “Mê rangal hin pyɛ cak arɔng. Ka sede yin a ha a me, ma rɔda ha a yin yerê reto de ma vɔk na me ra mɛ̀ pyɛ́ yemo.

²⁵Yohana á sɛ̀ retô râ batisma yi e gwa arɛt? Á sɛ̀ rɛ yi na Dagwi a? Kɛ yi na bemat arɛt?” Yɛn a hwo tó cuna na bemɛn, “Sɛ̌ wot ye ala arɛt? Ka sede wot a ye, ‘Rà yi na Dagwi’, a rɔda yang ot, ‘Yaga sɛ́ de yin a sey tsak o na há mɛ wɛt arɛt?’

²⁶Ko ka sede wot a ye, ‘Rà yi na bemat’, wot e tele hot pyɛ de bemat ba rɔda ra — yaga yɛn mwa ba jut Yohana, a sé zarap Dagwi.”

²⁷Yaga ano, yɛn a yâng Yɛsu, “Wot a tɔk wɛt.” Ko Yɛsu a yang ɛn, “Me arɔng mê ha a yin wɛt kɛ na e rɛ̌ reto de me ra mɛ̀ pyɛ́ yemo.”

²⁸“Yin a di e rɛ̌ arɛt? Mwat hwak á sɛ̀ de a vɔk nèy neba. A wɔ́ na kunat o, a yang ɛ, ‘À hwey hom, ci wɔ̀ ra fwom e bwî anap yunung.’

²⁹Hwey o ha yang ɛ, ‘Wey, mê wɔ wɛt!’ Ko e bama mo, ha sege yêy hɛ, ko ha wɔ̂ fwom o.

³⁰Da mo a wɔ́ na hwey o het, ko a ha a hɛ tyɛng ano arɔng. Ha yang ɛ, ‘Ey, mê wɔ, à da’, ko ha de wɔ́ wɛt.

³¹E ji nèy o, e hɛ̌ de ha ra pyɛ de da mɛn a simo arɛt?” Yɛn a ye, “Kunat o.” Ko Yɛsu a yang ɛn, “Mwin me ha a yin: Bemât seres dyâm yeles na pyɛ́ tanga bedebeves yɛn a rɔda tānga ba yel e ji Segwɔm Dagwi e ra yin.

³²Yaga Yohana wo batisma á kana vey, na a dura a yin gwong de Dagwi e simo na yin a raa gwɛ, ko yin a sey tsak o na há mɛ wɛt, ko bemât seres dyâm yeles na pyɛ́ na bedebeves yɛn á kana sey tsak o na há mɛ mo. Ko mwa ano de yin a di pyɛ mo, yin a doyo yi e banɛn min na yin a sey tsak o na há mɛ wɛt.”

³³“Gwɔrɔ-há mo hak a hemo: Mwat hwak á sɛ̀ de a how bwi, ko a tus ɛ̀ cɔ́gɔt anap. A ta gwɛ naka, a cing kwɔ̂n farâng nèy anap, ko a to lɔk kwɔn hak de mwat ê wɔ̀ sangal ɛ̀ na a bɛrɛng bwi mo. E bama mo, a tik gwɛ e vɔ bemat behak na be bɛrɛng a yɛ gwɛ, ko a kyè vɔk e sevwel sehak.

³⁴Sede jeng vêl nèy cɔ́gɔt o ya vey, a tomo besam mɛ vɔk na bemât bɛrɛng bwi mo, na be wɔ̀ sey a yɛ numo mɛ e ji pyɛ́ de ya ga vel.

³⁵Ko bemat o ba vo besam mɛ, ba dak gwining, ba mɔrɔ hwak, ko ba tó hwak na beta na be mɔrɔ hɛ.

³⁶Dâ bwi mo a to tomo besam o behak de ba dal vê mɛsɛng o na nepyak. Ko bemât bɛrɛng bwi mo yɛn a to ra a yɛn tyɛng na vere mo.

³⁷E yɛnɛ mo, a tomo hwey mɛ vɔk na yɛn, a ye, ‘Yɛn a rɔda nɔ̂ng hwey hom nerey.’

³⁸Ko jeng de bemât bɛrɛng bwi mo ba di hwey o, ba yâng bemɛn, ‘Hwey de he ba re nedanelɔ mɛ ma hemo! Vey in, na wot a mɔrɔ hɛ, na wot a sɛ̀ pyɛ̂ nedanelɔ mɛ!’

³⁹Yɛn a vo hɛ, ba bomo hɛ e jey yi e bwi mo, ko yɛn a mɔrɔ hɛ.

⁴⁰“Ano kwong, jeng de dâ bwi mo ê vɛ̄ hɛ, a rɔda ra sɛ́ na bemât bɛrɛng bwi mo arɛt?”

⁴¹Yɛn a yang ɛ, “A rɔda mɔbɔs bemat beves vane mo mɔbɔs ves, ko a rɔda to tik bwî anap o e vɔ bemât bɛrɛng o behak, vemo de bê nɔng ɛ numo mɛ hê nèy cɔ́gɔt o e jeng de na ga vel.”

⁴²Yɛsu a to yang ɛn, “Yin a ga sang basa há de bà jɛk e ji Bwok-basa Dagwi wɛt arɛt? Hā ye, “ ‘Gwofwa de bemât lɔk duk ba kyɛ́ ɛn gwɛ wɔgɔ, gwa vɔk fwom wɛt, e gwɛ de gwa tɛ́ ɛ gbɔng gwofwa râ fwom. A sé e Darwey de a ra ano, ko na wot, a sé pyɛ langat sizɔng!’

⁴³“Yaga ano, ma sé ha a yin, yin a sé vê Segwɔm Dagwi, ko Dagwi a rɔda sey ɛ̀ reto min o yi na yin, na a nɔ̂ng bemat behak de ba rɔda ra tomong de ba sé tyɛng na pyɛ́ de Dagwi e simo.

⁴⁴Mwat de e gaba e ra gwofwa gwomo a rɔda cɛgɛt rebek mɛ e ra gwɛ; ko ka sede gwofwa mo gwa gaba e ra yɛ, gwa rɔda hwongo hɛ sede nemuk.”

⁴⁵Sede begbɔng bepiris tanga BeFarisi ba wok gwɔrɔ-há detidetu de Yɛsu a ha, yɛn a pere tɔk, a sé ha e ra yɛn.

⁴⁶Yɛn a jāma begwong na be tɛ̀ be vo ɛ. Ko yɛn a wok bengyip bagyɛng bemat, yaga bemat o ba jut Yɛsu, a sé zarap Dagwi.