Read berom Matayus 22 Bible Online

Matayus 22 - berom bible

Matayus 22

¹Yɛsu a to ha a bemat na negwɔrɔ-há, a ye,

²“Segwɔm Lagwi sa sé sede ngan: Gbɔng gwɔ̀m hwak á sɛ̀ de á yong pyɛ̂ nzem yaga wenêng hwey mɛ.

³Á tomo besam mɛ wɔ na bemat de bá kana rini hɛn nzem o, na be yila hɛn be vey, ko yɛn á simo be vey wɛt.

⁴A to tomo besam behak na há hemo vɔk na bemat de ba rini hɛn o wɔgɔ, ‘Ma ga yɛnɛ yong nzem weneng o: Ba ga yɛt bemus, na nèy berɔndɔng de ba gyenges nɛ na ne mɔsɔ naka, ko ba ga yɛnɛ yông kayɛ pyɛ a remo. Vey in e de weneng o!’

⁵Ko bemat de ba rini hɛn o yɛn a ka tɛ̀ nehywɛ mɛn e ra há mo wɛt, ko yɛn a re nuyel na pyɛ́ de yɛn a sé ra mo zɔng: Hwak a kyè wɔ e cap mɛ, ko hwak a kyè vɔk e kwɔ̂n rɛsɛl pyɛ́ mɛ.

⁶Ko behak ba vos besam o, ba tak a yɛn reyɔm, ko ba mɔbɔs hɛn.

⁷“Gbɔng gwɔ̀m o a wok shom sizɔng. Yaga ano, a tomo bemât como mɛ, ba wɔ̀ mɔbɔs mwa bemat mɔbɔs bemat vane mo, ko ba dak kya e ra repomo mɛn.

⁸E bama mo, a yâng besam mɛ, ‘Ba ga yɛnɛ yông pyɛ̂ nzem o, ko bemat de ma rini hɛn weneng o ba jam wɛt.

⁹A remo kwong, ci in vɔk e begbɔng begwong, na yin a yila mwa bemat de yin a tɔk sɛ̀.’

¹⁰Besam o ba nusu, yɛn a raa begwong, ko yɛn a tula mwa bemat de ba tɔk sɛ̀, berat mwa na beves, ko duk nzem o wa sila na bemat pyak.

¹¹“Ko jeng de gbɔng gwɔ̀m o a yel e duk nzem o, na a di bemat de ba sé e hwomo, a di mwat hwak de a tɛ̀ berugu de bà jam yaga weneng o wɛt.

¹²A hwo rangal hɛ, a ye, ‘À sá, yi e rɛ̌ de hwà yel e ngamo sana berugu de ba jam yaga weneng o arɛt?’ Ko mwat o a tɔk toyo na há hak wɛt.

¹³Yaga ano, gbɔng gwɔ̀m o a yâng bemât fwom mɛ, ‘Rɔgɔs hin mwat womo, vɔ na bol mɛ, ko gang in hɛ e jey e ji lwīl, e kwɔn de a rɔda tosho na a roros yìn.’ ”

¹⁴Ko Yɛsu a yɛnɛ há mo, a ye, “A sé e bemat pyak de ba rini vɛ, ko a sé e tyɔng zɔng de ba kasa hɛn.”

¹⁵E bama mo, BeFarisi ba kyè, ba wɔ̀ yong gwong na be sɛ̀ Yɛsu na há hak de ha sé tyɛng wɛt.

¹⁶Yɛn a tomo behak e ji bemât raa mɛn na bemât raà Herodes wɔ na yɛ, ko yɛn a hwo yang ɛ, “À Mwat Basa, wot a tɔk, hwà sé mwat de hwó ha tsak há. Hwó basa a bemat pyɛ de ya sé tsak o e ra gwong de Dagwi e simo be raa gwɛ. Vit a pyɛ de ye bɔrɔk hwo na barê mwat hwak, yaga bemât mwa ba sé tyɛng e nuyel mō.

¹⁷Hā a wot pyɛ de hwó bare. E di mō, Badu mot ba simo a wot na wot a tala Da vwel BeRoma dyâm vwel kɛ wey arɛt?”

¹⁸Ko Yɛsu a pere tɔk yerê bare ves mɛn, a yang ɛn, “À yin bemât nenu-neba! Yaga sɛ́ de yin e simo na yin a tɛ̀ a me segun arɛt?

¹⁹Dura a me hin dyam de be talsa mɛ̀ dyâm vwel o.” Yɛn a vey a yɛ na dyam o,

²⁰ko a rangal hɛn, a ye, “E retô wà na rezâ wà de ba tɛ̀ e ra dyam o arɛt?”

²¹Yɛn a yang ɛ, “A sé rê Da vwel BeRoma.” Ko Yɛsu a yang ɛn, “Yàa! Tala hin Da vwel BeRoma pyɛ de ya sé myɛ, ko tala hin Dagwi pyɛ de ya sé ye Dagwi.”

²²Sede yɛn a wok ano, yɛn a langat hɛn, ko yɛn a hàla hɛ, yɛn a kyè.

²³E tuk hane mo gbak, BeSaduki behak ba vey na Yɛsu. Yɛn á vemo de be tē, vit a mwat de a rɔda to ba sene yi e reku.

²⁴Yɛn a yang ɛ, “À Mwat Basa, Mose à kana ye, ka sede mwat a ku, ko a vɔk nèy wɛt, a sé gbing-gbing na gwa mɛ a vo kuma mo, na rɔ̌ be tɔs nèy, na be sɛ̀ mɛ̀ yerê lɔ mo.

²⁵Hwà di a? Bemat behak bá sè betaama e neng mɛn, yɛn á kana sè na sangal e ngamo. Kunat o a vo hwā, ko a ku sana sɛ̀ nèy. Ano kwong, gwa mɛ a jut kuma mo.

²⁶Yɛ mo arɔng a ku sana sɛ̀ nèy na hwā mo. Ko bwang begwa mo yi e wo netat wɔ e wo netaama mo pyɛ jining o ya té na yɛn.

²⁷E yɛnɛ mo mwa, hwā mo arɔng a ku.

²⁸Ko di, tuk sensa bemat, hwā mo a rɔda ba tɛ́ ɛ wo wà e ji yɛn betaama mo arɛt? Yaga mwa hɛn ba ga vɔk ɛ.”

²⁹Yɛsu a yang ɛn, “Yin vɛ, yin a tɔk há tyɔng wɛt! A sé yaga yin e dunus Bwok-basa Dagwi tanga reto mɛ arɔng.

³⁰Yaga jeng de bemat de ba ga kushu ba rɔda ba sensa yi e reku, yɛn e to ba vos beha wɛt, ko beha be to ba kyese neweneng arɔng wɛt. Yɛn a rɔda ba sè sede betom-lagwi.

³¹Ko e rà sensa bemat yi e reku — yin á kana basa pyɛ de Dagwi à kana ha a yin wɛt arɛt? À ye,

³²‘Me ma sé Dagwî Abraham, na wo Yishak, na wo Yakɔp.’ Hane ha dura, yɛ a sé Dagwî bavin wɛt, ko a sé Dagwî bemat de ba sé na neken, mwa ano de yɛn a ga kushu.”

³³Sede bagyɛng bemat ba wok há mɛ mo, yɛn a langat hɛn pyɛ de a basa a yɛn.

³⁴E bama de BeFarisi ba di, Yɛsu a ga dal BeSaduki na há, yɛn a wɔ̀ tula hɛn.

³⁵Hwak e ji mɛn de a sé mwât basâ Badu a simo na a tɛ̀ a Yɛsu segun; yaga ano, a rangal hɛ, a ye,

³⁶“À Mwat Basa, e rɛ̌ redu de ra dal bwang o mwa na nerey e ji Badu arɛt?”

³⁷Yɛsu a yang ɛ, “ ‘Tɛ̀ yey na Darwey mō na yey mō mwa, na neken mō mwa, na tɔ́k mō mwa arɔng.’

³⁸Redu rê mɛsɛng a remo, ko e rɛ de ra dal bwang o mwa na nerey.

³⁹Redu re neba rerey o ra sé sede rɛ: ‘Tɛ̀ yey na mwât vwara mō, sede hwà tɛ̀ yey na tó mo.’

⁴⁰Mwa Badu de bà kana nɔ̂ng Mose, tanga bása hê bezarap Dagwi ba sé e ra badu baba vemo.”

⁴¹Jeng de BeFarisi ba tula hɛn e dem hining, Yɛsu a rangal hɛn, a ye,

⁴²“Yin e bare sɛ́ e ra Mwat de Dagwi a kasa na a sey bemat arɛt? Yɛ a sé hwêy wà arɛt?” Yɛn a yang ɛ, “A sé hwêy Davit.”

⁴³Yɛsu a to rangal hɛn, a ye, “Yi e rɛ̌ de Gabik Jɛrɛ hà tɛ̀ Davit o à tang ɛ, à Darwey arɛt? Yaga Davit à ye,

⁴⁴“ ‘Dagwi Darwey a yâng Darwey hom: Sangal e ngamo e vwɔ yege hom, sɛ̌ ma tɛ̀ bemât repugu mō e nɛ̂n bol mō.’

⁴⁵“Sede remo de Davit pyɛ mɛ a tâng Mwat de Dagwi a kasa na a sey bemat, à Darwey, yi e rɛ̌ kwong de mwat o ê sè hwêy Davit o arɛt?”

⁴⁶Vit a mwat e ji mɛn de a tɔk toyo a Yɛsu na há hak. Ko yi e tuk hane, vit a mwat de a vɔk yey ting na a to rangal hɛ pyɛ cak.