Read berom Matayus 23 Bible Online

Matayus 23 - berom bible

Matayus 23

¹E bama mo, Yɛsu a ha na bagyɛng bemat tanga bemât masâ fwom mɛ, a ye,

²“A sé e bemât basâ Badu na BeFarisi de ba nɔng ɛn reto na be basa a bemat Badu Mose.

³Yaga ano, a sé gbing-gbing na yin a gyeng, na yin a to ra kayɛ pyɛ de be ha a yin, na yin a ra yɛ. Ko yin kwon masa yerê tomong mɛn wɛt, yaga pyɛ́ de yɛn e basa a bemat, be ra yɛ̄, yɛn pyɛ mɛn yɛn e ragas yɛ̄ wɛt.

⁴Yɛn e tɛ̀sɛ a bemat pyɛ́ dirik e bato mɛn yemo de ya dal gap mɛn na be tos, ko yɛn e ka simo be tɛ̀ kekɛn vwɔ na yɛn a sɛlɛ hɛn mɛ̀ wɛt.

⁵Kayɛ pyɛ de yɛn e ra, yɛn e ra yɛ yaga na bemat be di zɔng: Yɛn e rɔgɔs balow de ba jɛk ɛ̀ neha Bwok-basa Dagwi e ji vɛ e bato mɛn tanga e bègasɔ mɛn, ko balow o ba sé barey o. Yɛn e to manas cɛ̂k rugû bwɛshɛ de ya sé lyis e begbɔng berugu mɛn na be tɔk di wɔgɔ, yɛn e raa Dagwi naka.

⁶Yɛn e simo nekwɔn begbɔng bemat e kwɔ̂n rê pyɛ́ na be saras ɛ̀, ko yɛn e kasa nekwɔn de be tikis a bemat beting e beduk re fongol;

⁷yɛn e simo bemat be tē a yɛn kwot, na be tang ɛn show e dúra, ko yɛn e to simo bemat be tang ɛn, à bemât basa.

⁸“Ko yin kwon simo na bemat be yishi hin, à bemât basa, yaga yin mwa yin a sé begwa bemin, ko yin a vɔk Mwat Basa gwining zɔng.

⁹Yin kwon yila mwat hwak e jey yemo, à da, yaga yin a vɔk Da gwining zɔng, yɛ de a sé e ji lagwi.

¹⁰Yin kwon to simo na be yishi hin, à bemât nuyel, yaga yin a vɔk Mwat Nuyel gwining zɔng, yɛ wɛ à Mwat de Dagwi a kasa na a sey bemat.

¹¹Tik na mwat de a dal na nerey e ji min a sè mwât fwom min.

¹²Kawɛ mwat de a jut tó mɛ, a sé gbɔng o, Dagwi a rɔda tɛ̀ ɛ a dyɛng to mɛ, ko yɛ de a dyɛng to mɛ, Dagwi a rɔda tɛ̀ ɛ a sè gbɔng o.

¹³“Yaa kukuuk! Gawey e ra yin bemât basâ Badu na yin BeFarisi! À yin bemât nenu-neba! Yin a dul a bemat gwong vɔk e ji Segwɔm Lagwi na be kwon yel ɛ̀ wɛt. Yin pyɛ min yin e yel ɛ̀ wɛt, ko yin e nɔ̂ng vemo de be simo be yel ɛ̀ gwong wɛt. [

¹⁴“Gawey e ra yin bemât basâ Badu na yin BeFarisi! À yin bemât nenu-neba! Yin e ra won lis na yin a dura, yin a dal bemat na re a Dagwi fongol, ko e ji hâ mwin, yin e doyo, ko yin e kyě re pyɛ̂ bekuma na yin a mɔt ɛn e ra nelɔ mɛn. Kis! Rezot min re ba dal na neves!]

¹⁵“Gawey e ra yin bemât basâ Badu na yin BeFarisi! À yin bemât nenu-neba! Yin e kyě kyè e ji bedwa-nshi, yin e to kyě tē dɔ vɔk e bavwel bahak, yaga na yin a bin sɛ̀ mwat gwining zɔng wo raà yerê basa min. Ko jeng de yin a di wɛng, yin a sɛ̀ ɛ, ko yin e tɛ̀ ɛ na a wɔ̀ yel e kwɔ̂n kya a dal in mɛ̀ zang ba.

¹⁶“Gawey e ra yin! Yin a sé bebók de yin e hwɔlɔ a bemin becwang! Yin e basa a bemat wɔgɔ, ‘Ka sede mwat hwak a sira na Gbɔng Duk Re Fongol, ko sira mo hê tɔk vo ɛ wɛt; ko ka sede a sira na dyam shinang de ya sé e Gbɔng Duk Re Fongol o, sira mo hê tɔk vo ɛ.’

¹⁷À yin betɔn de yin a to sé bebók! E wɛ̌ de a dal arɛt? Dyam shinang kɛ Gbɔng Duk Re Fongol de wo tɛ̀ dyam shinang o ye sè ye Dagwi arɛt?

¹⁸Yin e to basa a bemat wɔgɔ, ‘Ka sede mwat hwak a sira hɛ na gàgbang rangâs yas vɔk na Dagwi, ko sira mo hê tɔk vo ɛ wɛt; ko ka sede a sira hɛ na pyɛ de be rangas e ra gàgbang rangas o, sira mo hê tɔk vo ɛ.’

¹⁹À yin bebók! E wɛ̌ de a dal arɛt? Nɔrɔ̂ yas de be nása kɛ gàgbang rangâs nɔrɔ mo de wo tɛ̀ nɔrɔ mo he sè hê Dagwi arɛt?

²⁰Ano kwong, sede mwat e sira na gàgbang rangâs yas vɔk na Dagwi, a sé sira hɛ na wɛ tanga mwa pyɛ́ de ba sé rangas e ra kwɔn o.

²¹Ko mwat de e sira hɛ na Gbɔng Duk Re Fongol a sé sira hɛ na wɛ tanga Dagwi de e sangsal e ji wɛ.

²²Ko yɛ womo de a sira hɛ na lagwi a sé sira hɛ na gwofwa negwɔm Dagwi tanga yɛ womo de e sangsal e ra gwɛ.

²³“Gawey e ra yin bemât basâ Badu na yin BeFarisi! À yin bemât nenu-neba! Yin e nɔngɔ̂s Dagwi jining e ji kuru wo mazɛng, na dyara-lyu, na dyarâ-bak, ko yin e tik nà gyenges gbɔng basâ Badu, hɛ à gas badu e tē, na toshô reyɔm, na negwɔn de be tó yey na nɛ wɛt. A jam na yin a ra pyɛ́ yemo sana tik râ yane mo.

²⁴À yin bebók de yin e hwɔlɔ a bemin becwang! Yin e pat keswey yi e ji nshî sɔ min, ko yin e wɔlɔk dwa e negya.

²⁵“Gawey e ra yin bemât basâ Badu na yin BeFarisi! À yin bemât nenu-neba! Yin e kurus bebamâ begance na bebamâ neshǐ, ko ji mo wo sila na pyɛ́ de yin a sey ɛ̀ na retek na kât simô pyɛ́.

²⁶À hwo WoFarisi de hwà sé bwók! Tānga kus pyɛ́ de ya sé e ji gance na shǐ mo e ngyen, ko bamâ nɛ wa rɔda sè jɛkjɛk arɔng!

²⁷“Gawey e ra yin bemât basâ Badu na yin BeFarisi! À yin bemât nenu-neba! Yin a sé sede besak de ba mɔmɔ vɛ na būm pwɛng. Besak o ba sé berat e bɛrɛng e bama mo, ko e ji mo à, vit a pyɛ cak sɛ̌ bekup bemat na bwang babek o de ba ga bɔsɔ.

²⁸A sé tyɛng ano na yin arɔng: E bɛ́rɛng zɔng, yin a sé sede bemat berat, ko e ji mo, neyey min na sila hɛn na hâ nenu-neba tanga neves arɔng.

²⁹“Gawey e ra yin bemât basâ Badu na yin BeFarisi! À yin bemât nenu-neba! Yin e lɔkɔs beta báre e ra besak bezarap Dagwi, ko yin e kyɔrɔk besak bemat de ba ra pyɛ́ de Dagwi e simo.

³⁰Ko yin e tē, ‘Ka wot á yâng sè beken e jeng bedabeda mot, ka wot á yâng sɛlɛ hɛn e de mɔbɔs bezarap Dagwi wɛt.’

³¹Yi ano, yin e ye ey, yin a sé yére bemat de bà kana mɔbɔs bezarap Dagwi.

³²Ré in nuyel kwong, na yin a yɛnɛ pyɛ de bedabeda min bà kana pɛrɛ!

³³À yin begwɔ̄m! À yin nèy bègàbak! Yi e rɛ̌ de yin ê hywit in na be gang in na shɔt, na be bomo hin e kwɔ̂n kya arɛt?

³⁴Yaga ano, ma sé ha a yin, ma rɔda tomo a yin na bezarap Dagwi, na bemât netsitsɛng, na bemât basa. Yin a rɔda mɔbɔs behak e ji mɛn, yin ê kak behak e ra cɔ́gɔt, ko yin a rɔda dak behak e ji beduk re fongol, na yin a ro ɛn yi e repomo ret vɔk e ret arɔng.

³⁵Yi ano, ba rɔda ba tabak hin yaga mwa bemat de bà kana mɔbɔs, mwa ano de yɛn à ra renɛn wɛt, yi e jeng de bà mɔrɔ Hɛvɛl de à sè cik e bayîs Dagwi vey e jeng de bà mɔrɔ Zɛkarya Bɛrɛkya, de yin á kana mɔrɔ hɛ e tê kwɔ̂n jɛrɛ̂ Gbɔng Duk Re Fongol na gàgbang rangâs yas vɔk na Dagwi.

³⁶Mwin me ha a yin: Ba rɔda ba tabak bemât jeng yemo yaga mwa pyɛ́ vyes yane mo.”

³⁷“Káa! À bemât Yɛrusalɛm! Káa! À bemât Yɛrusalɛm! Yin e mɔbɔs bezarap Dagwi, ko yin e tó vemo de Dagwi a tomsal a yin mɛ̀ na beta, na yin a mɔbɔs hɛn arɔng! Zang ala de ma simo na me gunung hin sede congot ye gunung nèy mɛ arɛt? Ko yin a simo a me wɛt.

³⁸Di in, lɔ min ha rɔda tɛ́ ɛ rin, vit a mwat e ji mo.

³⁹Ko ma sé ha a yin, yin a rɔda to di me wɛt sɛ̌ jeng de yin e ba ye, ‘Tik na Dagwi a tɛ̀ nerat e ra womo de e kyè vey e ji rezâ Darwey.’ ”