Read berom Matayus 25 Bible Online

Matayus 25 - berom bible

Matayus 25

¹“E jeng yane mo, Segwɔm Lagwi sa rɔda sè sede ngan: Behwong behak kuru (10) bá sɛ̀ vemo de ba jut bekywa-kya mɛn na be wɔ̀ man na rwâs gwel e gwong.

²Betungun e ji mɛn bá sè betɔn, ko bwang betungun o ba vɔk netsitsɛng.

³Betɔn o ba jut bekywa-kya mɛn, ko ba vɔk ɛ̀ něy wɛt.

⁴Ko vemo de ba vɔk netsitsɛng ba vɔk bètus něy mwa na bekywa-kya mɛn o.

⁵Rwâs gwel o a rɛn ɛ, nevwa na hwo vos behwong o, ko mwa hɛn ba wɔ̂ nevwa.

⁶“Tê-turuk, yɛn a wok bemat ba sé gbɔ, be tē, ‘Rwâs gwel a womo! Nusu hin, na yin a vey man na yɛ!’

⁷Behwong kuru mo ba sene, ko ba yong bekywa-kya mɛn.

⁸Ko vemo de ba sé betɔn ba yâng vê netsitsɛng, ‘Nɔt ot hin něy min, yaga bekywa-kya mot ba sé kyè wɔ̀ rimi hɛn.’

⁹Yɛn a toyo a yɛn, ba ye, ‘Kɛ̀ɛ̄ wey! Něy o nê vey a wot tanga yin wɛt. Ci in na bemât rɛsɛl o, na yin wɔ̀ sey nemin.’

¹⁰Ano kwong, betɔn behwong o ba nára hɛn na be wɔ̀ sey něy o. Ko e bama de yɛn a ga kyè, rwâs gwel o a pom. Behwong betungun de ba ga yong ɛn, yɛn a yel tanga yɛ vɔk e de nzem jût gwel o, ko ba bang rwi duk o.

¹¹“E bamâ jeng, behwong vere mo ba pom arɔng, ba gbɔ, ba tē, ‘À da, à da! Wunta a wot rwi mo!’

¹²Ko rwâs gwel o a yang ɛn, ‘Mwin me ha a yin: Ma tɔk in wɛt.’ ”

¹³Yɛsu a yɛnɛ há mɛ mo, a ye, “Bɛrɛng hin nekanang, yaga yin a tɔk tuk kɛ jeng de Me de ma tɛ́ me mwat ma rɔda vey wɛt.”

¹⁴“Segwɔm Lagwi sa rɔda to ba sè sede ngan: Mwat hwak á sɛ̀ de á sè kyè wɔ̂ rekyɛn. A yila besam mɛ, ko a tik yas mɛ e vɔ mɛn.

¹⁵A nɔ̂ng kawɛ e ji mɛn pyɛ de ya sé tyɛng na gap mɛ: A nɔ̂ng gwining bedap betungun vê dyam shinang, ko a nɔ̂ng hwak bedap beba, ko a to nɔ̂ng hwak dap gwining. E bama mo, a kyè wɔ̂ rekyɛn mɛ mo.

¹⁶Mwat de a sey bedap betungun a nára hɛ ziri, a hwo ra nejik na dyām mɛ mo, ko a to sɛ̀ bedap betungun e ra rak vane mo.

¹⁷Ano arɔng, yɛ de a sey bedap beba a wɔ̀ ra nejik, ko a sɛ̀ bedap beba e ra rak vane mo.

¹⁸Ko mwat de a sey dap gwining a kyè, a wɔ̀ cing revɔng e vwel, a lɛrɛ ɛ̀ dyâm dalɔ mɛ mo.

¹⁹“E bamâ jeng pyak, dalɔ̂ besam o a vɛ̄ hɛ, ko a yang ɛn, be ha a yɛ pyɛ de yɛn a ga ra na dyām mɛ mo.

²⁰Mwat de á kana sey bedap betungun a vey na betungun de a sɛ̀ e ra rak vere mo, a ye, ‘À da, hwà tik bedap betungun e vɔ hom. Di, ma ga to sɛ̀ behak betungun e ra rak vane mo.’

²¹Dalɔ mɛ mo a toyo a yɛ, a yang ɛ, ‘Show! Hwà sé sam rwat de be tó yey na hwo wɛt! Yaga ma tó yey na hwo e ra pyɛ hyet wɛt, ma rɔda tik pyɛ́ pyak e vɔ mō. Vey, na hwo vɔk yey pyɛng tanga dalɔ mō!’

²²“Ano arɔng, mwat de á kana sey bedap beba a vey, a ye, ‘À da, hwà tik bedap beba e vɔ hom. Di, ma ga to sɛ̀ behak beba e ra rak vane mo.’

²³Dalɔ mɛ mo a toyo a yɛ, a yang ɛ, ‘Show! Hwà sé sam rwat de be tó yey na hwo wɛt! Yaga ma tó yey na hwo e ra pyɛ hyet wɛt, ma rɔda tik pyɛ́ pyak e vɔ mō. Vey, na hwo vɔk yey pyɛng tanga dalɔ mō!’

²⁴“Ko mwat de á kana sey dap gwining a vey, a ye, ‘À da, ma tɔk, hwà sé mwât rekyìt, hwó yɛt pyɛ́ e kwɔn de hwà ga tus ɛ̀ yɛ̄ wɛt, ko hwó tula pyɛ́ e kwɔn de hwà ga bere ɛ̀ yɛ̄ arɔng wɛt.

²⁵Yaga ano, ma tele me hwo, ko ma wɔ̀ lɛrɛ dyām mō mo e revɔng. Nā pyɛ mō a yemo.’

²⁶“Ko dalɔ mɛ mo a toyo a yɛ, a yang ɛ, ‘Hwo sam vwes, hwà sé riri zɔng! Hwà tɔk kɛk, me yɛt pyɛ́ e kwɔn de ma ga tus ɛ̀ yɛ̄ wɛt, ko me tula pyɛ́ e kwɔn de ma bere ɛ̀ yɛ̄ wɛt a?

²⁷Yàa! Ka gwa sé ano, ka hwà yâng wɔ̀ tik a me dyām hom e gban-dyām, yaga na jeng de ma toyo, ma yâng wɔ̀ sɛ̀ yɛ̄ na redàk e rak o!

²⁸A remo kwong, séy in ɛ̀ dap o yi na yɛ, na yin a nɔ̂ng mumwɛ de a vɔk vɛ kuru.

²⁹Yaga mwa mwat de a vɔk pyɛ cak, ba rɔda to gwɛ̌ a yɛ, yaga na a bin vɔk yɛ shɛrɛk, ko yɛ womo de a vɔk pyɛ wɛt, ba rɔda sey ɛ̀ yi na yɛ kepyɛ de a vɔk.

³⁰Ko gang in sam womo de a vɔk nerat nehak wɛt e jey e ji lwīl, e kwɔn de a rɔda tosho na roros yìn.’ ”

³¹“Jeng de Me de ma tɛ́ me mwat ma rɔda ba vey sede gbɔng gwɔ̀m, na mwa betom-lagwi tanga me, ma rɔda sangal e ra gwofwa negwɔm hom e ji gbɔng nerey.

³²Ba rɔda ba tula mwa yére bemat jey e nuyel hom, ko ma rɔda gas ɛn zang ba, sede remo de lwek vyēl e gas vyēl pyɛng na vyēl shi.

³³Ma rɔda tik bemat de ba ga ra pyɛ́ de Dagwi e simo e vwɔ yege hom, ko mê tik bwang bemat o e vwɔ mwɛlɛng hom.

³⁴Ano, me gbɔng gwɔ̀m ma rɔda yâng vemo de ba sé e vwɔ yege hom, ‘Vey in, yin de Da hom a ga tɛ̀ nerat mɛ e ra yin! Vey in, na yin a yel e ji segwɔm de ba yong yaga yin yimo jeng de bà yong jey.

³⁵Yaga jeng de ma wok vyong, yin a nɔng me pyɛ̂ re; jeng de ma wok yêy hwɔshɔ, yin a nɔng me nshî sɔ; jeng de ma sè kwɛnɛt de yin a tɔk ɛ wɛt, yin a sey me e ji nelɔ min.

³⁶Jeng de ma sè sana berugu, yin a nɔng me rugu na me tɛ̀; jeng de ma ro me, yin a bɛrɛng me naka; ko jeng de ma sè e lɔ̂ ngyang, yin a wɔ̀ yang me show.’

³⁷“Ko yɛn de ba ra pyɛ́ de Dagwi e simo ba rɔda toyo a me, be ye, ‘À Darwey, e yɛ̌ jeng de wot a di o na vyong, ko wot a nɔng o pyɛ̂ re, kɛ na yêy hwɔshɔ, ko wot a nɔng o nshî sɔ arɛt?

³⁸E yɛ̌ jeng de wot a di o sede kwɛnɛt, ko wot a sey o e ji nelɔ mot, kɛ wot a di o sana berugu, ko wot a nɔng o rugu arɛt?

³⁹Ko e yɛ̌ jeng de wot a to di o na serɔ kɛ e ji lɔ̂ ngyang, ko wot a wɔ̀ yang o show arɛt?’

⁴⁰Ko me, gbɔng gwɔ̀m, ma rɔda toyo a yɛn ngan: ‘Mwin me ha a yin: Kayɛ pyɛ de yin a ra yaga gwining e ji begwa hom de ba sé pyɛ cak wɛt, a sé e me wɛ de yin a ra a me!’

⁴¹“Ano arɔng, ma rɔda yâng vemo de ba sé e vwɔ mwɛlɛng hom, ‘Kyè in yi e ngamo na me, yin de yin a sé pyɛ sedusa na Dagwi! Kyè in vɔk e kya de he re gbak-gbak, hemo de ba ga yong yaga gwɔ̀m cēng tanga betom mɛ!

⁴²Yaga jeng de ma wok vyong, yin a nɔng me pyɛ̂ re wɛt; jeng de ma wok yêy hwɔshɔ, yin a nɔng me nshî sɔ wɛt.

⁴³Jeng de ma sè kwɛnɛt, yin a sey me e ji nelɔ min wɛt; ko jeng de ma sè sana berugu, yin a nɔng me rugu na me tɛ̀ wɛt; jeng de ma ro me, ko ma to sè e lɔ̂ ngyang, yin a bɛrɛng me wɛt.’

⁴⁴“Ko yɛn arɔng, yɛn a rɔda toyo a me, be ye, ‘À Darwey, e yɛ̌ jeng de wot a di o na vyong, kɛ na yêy hwɔshɔ, kɛ kwɛnɛt, kɛ sana berugu, kɛ na serɔ, kɛ e lɔ̂ ngyang, ko wot a tik nà sɛlɛ hwo arɛt?’

⁴⁵Ko ma rɔda toyo a yɛn ngan: ‘Mwin me ha a yin: Kayɛ pyɛ de yin a ra wɛt yaga gwining e ji vemo de ba sé pyɛ cak wɛt, a sé e me wɛ de yin a ra a me arɔng wɛt.’

⁴⁶“Ba rɔda wɔ na yɛn vane mo e kwɔn de ba rɔda tabak hɛn ɛ̀ gbak-gbak. Ko vemo de ba ga ra pyɛ́ de Dagwi e simo yɛn a rɔda wɔ e dem neken gbak-gbak.”