Read berom Matayus 26 Bible Online

Matayus 26 - berom bible

Matayus 26

¹E bama de Yɛsu a yɛnɛ hâ neha mo mwa, a yâng bemât masâ fwom mɛ,

²“Sede remo de yin a tɔk, a sé bwang nepɔlɔ neba na be yel e ji Nzem Gyilsit Nelɔ BeIsrayɛl, ko ba rɔda nára Me de ma tɛ́ me mwat e vɔ bemat na be kak me e ra cɔ́gɔt.”

³Ko begbɔng bepiris tanga bemakuk yɛn a man e gbɔng lɔ Kayafas de a sé darwêy bepiris.

⁴Yɛn a hwo yong begwong na be wɔ̀ vo Yɛsu yaang, na be mɔrɔ hɛ.

⁵Ko yɛn a ye, “Wot vo ɛ e jeng nzem wɛt, yaga bemat bê hwo ot na yol.”

⁶Yɛsu á sè e Bet-Anya e lɔ Simɔn de á kana sè kparong.

⁷Ko hwā hwak a yi na kefus de ba yong na gwofwa alabasta, de ka sila na něy de na sé ne nesang hyɔɔlɔl, ko na vɔk dyām sizɔng arɔng. A shushu něy o e ratô Yɛsu e jeng de a sé e dem rê pyɛ́.

⁸Ko bemât masâ fwom mɛ ba di ano, ba tɛ̀ shom, ba ye, “Yaga sɛ́ de ba lashe něy nemo arɛt?

⁹Ba yâng tɔk row nɛ e nû dyām pyak na be gas a bepɛng yɛ̄!”

¹⁰Yɛsu a tɔk pyɛ de yɛn a sé ha, ko a yang ɛn, “Sɛ́ min ya sé na hwā mo arɛt? Yɛ a ga ra a me pyɛ ryat.

¹¹Bepɛng bê sè na yin kayɛ jeng, ko me, mê sè na yin kayɛ jeng wɛt.

¹²A ga shushu něy nesang hyɔɔlɔl o e ra rebek hom, na a yong me yaga tɛ́ e sak.

¹³Mwin me ha a yin: E kahɛ kwɔn mwa e ji jey de bemat bê shara ɛ̀ Yɛgɛt Yat yemo, ba rɔda ha pyɛ de hwā mo a ga ra, na be bin bare mɛ̀ na yɛ.”

¹⁴E bama mo, gwining e ji bemât masâ fwôm Yɛsu kuru na vɛ beba de ba tang ɛ, à Yuda Iskaryot a nusu, ko a wɔ́ na begbɔng bepiris,

¹⁵a rangal hɛn, a ye, “E sɛ́ de yin a rɔda nɔng me, ka sede ma row a yin Yɛsu arɛt?” Yɛn a basa dyām pyɛng kuru batat, yɛn a nɔng ɛ.

¹⁶Yi e jeng o, Yuda a hwo jāma begwong de ê nára Yɛsu e vɔ mɛn.

¹⁷Tûk mɛsɛ̂ng Nzem Kpam-tuk Sana Géy-sing, bemât masâ fwom mɛ ba vey na Yɛsu, ko ba rangal hɛ, “E gwa de hwó simo wot a yong a hwo pyɛ̂ nzem o arɛt?”

¹⁸A yang ɛn, “Ci in e ji repomo na sa-pen, ko yang in hɛ: ‘Da mot a ye: Jeng hom ya ga vey. Ma rɔda re pyɛ̂ nzem tanga bemât masâ fwom hom e lɔ mō.’ ”

¹⁹Yɛn a wɔ̀ ra tyɛng sede remo de Yɛsu a misang a yɛn, ko yɛn a yong pyɛ̂ nzem e hwomo.

²⁰Jeng de nahywegelek na vey, Yɛsu tanga bemât masâ fwom mɛ kuru na vɛ beba ba hwo sangal na be re pyɛ́.

²¹Ko sede yɛn a sé re pyɛ́ mo, Yɛsu a yang ɛn, “Mwin me ha a yin: Gwining e ji min a rɔda row me.”

²²Bemat mɛ mo ba lashe yey sizɔng, ko ba hwo rangsal hɛ vivining, ba tē, “Kɛ̀ɛ̄, à Darwey, a sé e me a?”

²³Yɛsu a toyo a yɛn, a ye, “A sé e womo de a sé mɛsɛ̂ng gyira kpam-tuk mɛ e ji shǐ hining na me de a rɔda row me.

²⁴Me de ma tɛ́ me mwat ma rɔda jut bol, sede remo de bà kana jɛk e ji Bwok-basa Dagwi. Ko gawey e ra womo de a rɔda row me! E ba sè a mwat o nduga ka ba tɔ̀ ɛ wɛt!”

²⁵Yuda de a sé kyè wɔ̀ row Yɛsu a hwo ye, “Kɛ̀ɛ̄, à Mwat Basa, a sé e me a?” Yɛsu a yang ɛ, “Hwà ga ha.”

²⁶Jeng de yɛn a rɔngɔl e de rê pyɛ́, Yɛsu a jut kpam-tuk, a feng a Dagwi, a kwɔrɔs wɛ, ko a nɔ̂ng bemât masâ fwom mɛ, a ye, “Ná in, ré in; rebek hom a remo.”

²⁷Ano arɔng, a jut keshi, a to feng a Dagwi, a nára a yɛn, ko a ye, “Sɔ́ in mwa hin yi e ji kɛ.

²⁸Nemi hom a nemo de ba shushu yaga bemat pyak, na be halsa a yɛn banɛn mɛn. Yi na nɛ Dagwi a rɔda wuna hɛ na sira tanga bemat.

²⁹Ma sé ha a yin, ma rɔda to ba sɔ nshî anap nemo wɛt sɛ̌ tuk de ma rɔda ba sɔ nɛ nepas o tanga yin e ji Segwɔm Da hom.”

³⁰E bama de yɛn a somo Dagwi na lwɛ̄lɛ, yɛn a nu ɛn, ko ba kyè vɔk e Raku Pàt.

³¹Ko Yɛsu a yang ɛn, “Nabwalak yunung, yin mwa yin a rɔda to in na bama, na yin a tik me, yaga bà jɛk e Bwok-basa Dagwi wɔgɔ, ‘Dagwi a rɔda mɔrɔ lwek vyēl, ko kwara mo gwa rɔda shara hɛ.’

³²Ko bama de ba sene me yi e reku, ma rɔda tānga kyè vɔk e Galili, na me wɔ̀ gyeng in e hwomo.”

³³Bitrus a toyo a yɛ, a ye, “Mwa ano de bwang o ba rɔda to ɛn na bama, na be tik o, ko me ma rɔda ra ano ko tyɔng wɛt!”

³⁴Ko Yɛsu a yang ɛ, “Mwin me ha a hwo: Yunung nabwalak, gyam na rungat wo ba dak segwɔm, hwà ga kana tono na me zang tat.”

³⁵Ko Bitrus a hanat, a ye, “Ma rɔda tono na hwo ko tyɔng wɛt, kɛ a sé gwokushu, mê ku tanga hwo!” Ko bwang bemât masâ fwôm Yɛsu ba ha tyɛng ano arɔng.

³⁶E bama mo, Yɛsu a kyè tanga bemât masâ fwom mɛ wɔ e dem hak de be tâng hɛ, à Gɛtsɛmani, ko a yang ɛn, “Kā sangal hin e ngamo, ko me kyè wɔ e nuyel na me wɔ̀ ra won.”

³⁷Ko a jut Bitrus tanga nèy Zɛbɛdayus neba, na be kyè tanga yɛ. Reyɔm ra hwo e ra yɛ, ko yey mɛ ya lashe hɛ.

³⁸Ko a yang ɛn, “Yey hom ye lɔl sizɔng, bwang o tyɔng na ye wey na me. Sangal hin e ngamo, na yin a bɛrɛng nekanang tanga me.”

³⁹A kyè vɔk e nuyel tyɔng, a pom, a gaba gup e vwel, ko a ra won, a ye, “À Da hom, ka sede gwong gwô tɔk sɛ̀, jut keshi reyɔm kemo yi na me. Ko mwa ano, rá pyɛ de hwó simo zɔng, de pyɛ de me simo wɛt.”

⁴⁰E bama mo, a to ɛ vɔk na bemât masâ fwom mɛ betat o, a pom, a sɛ̀ ɛn e de nevwa, ko a rangâl Bitrus, a ye, “Ano ā! Yin e tɔk bɛrɛng jey na me yaga dyam-gwi jining zɔng wɛt arɛt?

⁴¹Bɛrɛng hin nekanang, na yin a ra won, yaga na yin a gaba wɛt jeng de yin a yel e ji mara. Mwin, yey ye simo, ko rebek ra sé gbɛrɛk.”

⁴²A wɔ́ hê neba e de râ won, a ye, “À Da hom, ka sede be tɔk jut a me keshi reyɔm kemo wɛt, sɛ̌ ma sɔ kɛ, tik na me ra pyɛ de hwó simo.”

⁴³Ko jeng de a to ɛ vɔk na bemat mɛ mo, a to sɛ̀ ɛn e de nevwa, yaga bayis mɛn ba sé zorgos na nɛ.

⁴⁴Yɛsu a to hàla hɛn, a wɔ̀ ra won hê netat, ko a ha na Dagwi tyɛng sede remo de á kana ha.

⁴⁵E bama mo, a to ɛ vɔk na bemât masâ fwom mɛ mo, a yang ɛn, “Yin a rɔngɔl e pɔngɔ e de nevwa mo arɛt? Di in, jeng ya ga vey de ba rɔda nára Me de ma tɛ́ me mwat e vɔ bemât banɛn.

⁴⁶Sogo hin, na wot a kyè! Di, mwat a womo de ê row me!”

⁴⁷Jeng de Yɛsu á sè rɔ̌ ha, Yuda, yɛ gwining e ji bemât masâ fwom mɛ kuru na vɛ beba, a pom. Regyɛng bemat pyak de ba vɔkɔs bewal na bekpurûng begele ba raa hɛ; e yɛn à vemo de begbɔng bepiris tanga bemakuk ba tomo hɛn.

⁴⁸Ko mwat de ê row ɛ mo á kana ye ngyɛ̀k a bemat o, a yang ɛn, “Mwat de mê man ranang hom na yɛ, na me yang ɛ mɛ̀ show, e yɛ de yin e simo. Vo in hɛ.”

⁴⁹Yuda a pere wɔ na Yɛsu, ko a ye, “Show, à Mwat Basa!” Ko a man ranang mɛ na yɛ.

⁵⁰Yɛsu a yang ɛ, “À sa, rá pyɛ de ya vey na hwo.”[4] Ko bemat o ba gwɛ̌ sek bagat na yɛ, ba vo ɛ, ba vɔk ɛ gak.

⁵¹Ko gwining e ji vemo de ba sé tanga Yɛsu a hwɔtɔ wal mɛ, a tara mɛ̀ sam darwêy bepiris, ko a tùt a yɛ fwong.

⁵²Ko Yɛsu a yang ɛ, “Gyira wal mō e ji fwal wɛ. Yaga mwa mwat de a jut wal, ba rɔda mɔrɔ hɛ na wɛ.

⁵³Hwà tɔk, me tɔk ha na Da hom, na a sɛlɛ me wɛt arɛt? Sede ma ra ano, a rɔda tomo a me na betom-lagwi de ba dal bagbɔng bagyɛng kuru na vɛ beba.

⁵⁴Ko yi e rɛ̌ kwong de ba rɔda sila há de bà jɛk e Bwok-basa Dagwi arɛt? Há mo hà dura, a sé gbing-gbing na pyɛ yemo ye té ano!”

⁵⁵Ko Yɛsu a hwo ha na bemat o, a yang ɛn, “Ko sɛ̌ yin a nusu na bewal tanga bekpurûng begele, na yin a ba vo me mɛ̀ sede ma sé gbik arɛt? Kahɛ tuk ma sè e sangal e de basa e Gbɔng Duk Re Fongol, ko yin a vo me wɛt.

⁵⁶Ko mwa pyɛ́ yemo ya té ano, yaga na be bin sila mɛ̀ pyɛ́ de bezarap Dagwi bà jɛk e Bwok-basa Dagwi.” Ano, mwa bemât masâ fwom mɛ ba hàla hɛ, ba tele.

⁵⁷Bemat de ba vo Yɛsu yɛn a kyè na yɛ vɔk e lɔ Kayafas, yɛ darwêy bepiris, e kwɔn de bemât basâ Badu tanga bemakuk bá sè tula hɛn ɛ̀.

⁵⁸Bitrus a kyě raa e bama yikyik tyɔng vɔk e lalâ lɔ mo. A yel e hwomo, ko a sangal tanga bemât gyêng lɔ mo, na a di pyɛ de yê té.

⁵⁹Ko begbɔng bepiris tanga mwa bemakûk Badu ba simo be sɛ̀ bemat de bê nɔng nuhâ bɔs e ra Yɛsu, yaga na yɛn a bin mɔrɔ hɛ.

⁶⁰Ko yɛn a tɔk sɛ̀ wɛt, mwa ano de bemat pyak ba vey nɔng nuhâ bɔs e ra yɛ. E yɛnɛ mo, bemat beba ba hwo vey,

⁶¹ko ba ye, “Mwat womo a ye, ‘Mê tɔk gangas Gbɔng Duk Re Fongol wo Dagwi, ko e ji nepɔlɔ netat ma rɔda to lɔk wɛ.’ ”

⁶²Ko darwêy bepiris a sogo, a rangâl Yɛsu, a ye, “Hwà vɔk há de hwô ha e ra neha nemo de bemat o be vɛ̀sɛ mɛ̀ e ra hwo wɛt arɛt?”

⁶³Ko Yɛsu a sǎ yuu. Darwêy bepiris a to rangal hɛ, a ye, “Sīra hwo e nuyêl Dagwi wo neken, na hwo ha a wot, hwà sé Mwat de Dagwi a kasa na a sey bemat a? Hwà sé Hwey Dagwi arɛt?”

⁶⁴Yɛsu a yang ɛ, “Ey, hwà ha yɛt. Ko mwin me ha a yin: Yi e jeng yemo, yin a rɔda di Me de ma tɛ́ me mwat e sangal e vwɔ yegê Dagwi Wo Reto. Yin a rɔda di me kwong, me kyè vey e ji bale yi e lagwi!”

⁶⁵Sede darwêy bepiris a wok ano, a hama berugu mɛ, a ye, “A ga jut tó mɛ sede Dagwi! Wot e to jāma bemât nuha behak wɛt! A remo, yin a ga wok de a ga jut tó mɛ sede Dagwi!

⁶⁶Ko sɛ̌ yin a ye ala arɛt?” Yɛn a toyo a yɛ, yɛn a ye, “A vey na be mɔrɔ hɛ.”

⁶⁷Ano, ba tulus Yɛsu na netey e bwang bayis mɛ, ko ba dak ɛ. Behak ba rusu hɛ,

⁶⁸ba ye, “À hwo Mwat de Dagwi a kasa na hwo sey bemat! Kɛ hwô tɔk ha a wot mwat de a ga rusu hwo arɛt?”

⁶⁹Jeng de Bitrus a rɔ̌ e sangal e lala, gwining e ji behwông fwom e lɔ mo a vey, ko a yang ɛ, “Hwò arɔng, hwá sè tanga Yɛsu, mwât Galili.”

⁷⁰Ko Bitrus a tono e nuyel mɛn mwa, a ye, “Ma ka tɔk pyɛ de hwà sé ha e ra tɛt o wɛt.”

⁷¹Sede a nusu e ruhup vɔk e majey, hwông fwôm lɔ mo hwak a di ɛ, ko a ha a bemat de ba sé e hwomo, “Mwat womo á sè tanga Yɛsu wo Nazarɛt.”

⁷²Ko Bitrus a to tono na sira, a ye, “Ma tɔk mwat wane mo wɛt.”

⁷³Sede ba sangal jeng tyɔng, bemat de ba sé tumal bagat yɛn a vey na Bitrus, ba hwo ɛ, ba yang ɛ, “Hwô tɔk tono, hwà sé gwining e ji mɛn wɛt, yaga hâ nu mō ha dura ano.”

⁷⁴Ko Bitrus a hwo sira, a ye, “Ka sede ma sé ha bɔs, tik na gwi gwo re banama hom! Ma ka tɔk mwat o wɛt!” E ji jeng o, rungat wa vɛ̌ dak segwɔm.

⁷⁵Ko Bitrus a pere bare na há de Yɛsu á kana ha a yɛ wɔgɔ, “Gyam na rungat wo dak segwɔm, hwà ga kana tono na me zang tat.” Ko a nusu e jey, a wɔ̀ tosho tyɔng wɛt.