Read berom Matayus 27 Bible Online

Matayus 27 - berom bible

Matayus 27

¹Bop nagasi, mwa begbɔng bepiris tanga bemakuk yɛn a wuna nu mɛn na be wey na Yɛsu.

²Yɛn a rɔgɔs hɛ, ko yɛn a kyè na yɛ, ba wɔ̀ nára hɛ e vɔ Pilatus, de a sé gwɔmna de BeRoma ba tɛ̀ e hwomo.

³Sede Yuda, de a row Yɛsu, a di, ba ga yɛrɛ a Yɛsu shɔt reku, a tosho gabɔk, ko a wɔ̀ nɔ̂ng begbɔng bepiris tanga bemakuk dyām pyɛng kuru batat (30) de bá kana nɔng ɛ.

⁴A ye, “Ma ga ra renɛn, yaga ma ga nára mwat de a ra renɛn rehak wɛt, na be wey na yɛ.” Yɛn a yang ɛ, “Sɛ́ mot ya sɛ́ ɛ? Pyɛ mō a yane.”

⁵Yuda a bomo a yɛn dyām o e hane e Gbɔng Duk Re Fongol, ko a kyè. E bama mo, a kyè wɔ̀ ta ngyɔt.

⁶Ko begbɔng bepiris yɛn a tɔng dyām pyɛng yane mo, ba ye, “Badu mot ba ro mɛ̀ na wot a tik dyām yemo e gban tikîs dyâm Gbɔng Duk Re Fongol, yaga ya sé dyām de ba row mɛ̀ mwat.”

⁷Yaga ano, yɛn a wuna nu mɛn, ko yɛn a yong ɛ̀ na be jut dyām o, be sey mɛ̀ cap mwât lɔk nerwèy, na ye tɛ́ ɛ kwɔ̂n lɛsɛ̂ bemat beduk de ba sé e ji repomo mɛn o.

⁸Yaga ano, vey e yunung, be tâng kwɔn o, à Cap Nemi.

⁹Hemo ha sila pyɛ de Yirmiya, zarap Dagwi, à kana ha wɔgɔ, “Yɛn a jut dyām pyɛng kuru batat, yɛ̄ à dyām de BeIsrayɛl ba simo na be tala e ra yɛ̀,

¹⁰ko yɛn a jut dyām o, na be sey mɛ̀ cap mwât lɔk nerwèy, sede remo de Dagwi á kana nɔng me nu.”

¹¹Sede Yɛsu á sè tumal e nuyêl gwɔmna, ko gwɔmna mo a hwo rangal hɛ, a ye, “Hwo wɛ hwà sé Gbɔng Gwɔ̀m BeYuda arɛt?” Yɛsu a toyo a yɛ, a yang ɛ, “Ey, hwà ha yɛt.”

¹²Ko jeng de begbɔng bepiris tanga bemakuk ba tɛ̀sɛ sekun mɛ, a hanat pyɛ cak wɛt.

¹³Ko Pilatus a yang ɛ, “Hwó wok neha nemo pyak de ba sé vɛ̀sɛ mɛ̀ e ra hwo wɛt arɛt?”

¹⁴E remo, Yɛsu a kyɛ́ ɛ nà to ha pyɛ cak, kɛ retîn há rining wɛt. Yaga ano, gwɔmna mo a langat hɛ sizɔng.

¹⁵E jeng Nzem Gyilsit Nelɔ BeIsrayɛl, á sè negwɔn gwɔmna na a viri mwât ngyang gwining, womo de bemat ba simo na a viri hɛ.

¹⁶E jeng o, mwat hwak á sè e lɔ̂ ngyang de ba tɔk ɛ tyɔng wɛt yaga neves mɛ; ba tang ɛ, à Barabas.

¹⁷Jeng de regyɛng bemat ra tula hɛ, Pilatus a rangâl bemat o, a ye, “E wà de yin e simo me viri a yin arɛt? Yin e simo Barabas kɛ Yɛsu de be tang ɛ, à Kristi arɛt?”

¹⁸A rangal ano, yaga yɛ a tɔk, bemât nuyêl BeYuda bá kana nára Yɛsu e vɔ mɛ, yaga yɛn a wok repugu mɛ.

¹⁹E jeng de Pilatus á sè sangal e ra gwofwa mwât shɔt, hwā mɛ a tomo a yɛ na há hemo ngan: “Hwo kwon tɛ̀ vɔ mō e ra mwat wane de a ra renɛn rehak wɛt, yaga yunung ma ranas negwi neves e ra yɛ.”

²⁰Begbɔng bepiris tanga bemakuk yɛn a tɛ̀ bemat be ye, yɛn e simo be viri Barabas, ko be wey na Yɛsu.

²¹Pilatus a to ha na bemat, a yang ɛn, “E wà de yin e simo me viri a yin e ji bemat beba vemo mo arɛt?” Ko yɛn a ye, “Barabas!”

²²A to rangal hɛn, a ye, “E sɛ́ kwong de yin e simo na me ra na Yɛsu de be tang ɛ, à Kristi arɛt?” Yɛn mwa ba toyo a yɛ, ba ye, “Bē kak ɛ e ra cɔ́gɔt!”

²³Pilatus a to rangal hɛn, a ye, “Ko e yɛ̌ pyɛ vyes de a ga ra arɛt?” Ko yɛn a gwɛ̌ shusha gwolwɛlɛ, ba tē, “Bē kak ɛ e ra cɔ́gɔt!”

²⁴Jeng de Pilatus a di, há mɛ hê tɔk sege pyɛ cak wɛt, ko a to di, e ji kejeng tyɔng yol ya rɔda sogo e hwomo, a ye, bē nɔng ɛ nshi, ko a kus vɔ mɛ e nuyêl regyɛng bemat o. A ye, “Pyɛ hom yê sè na rekû mwat womo wɛt! Pyɛ de yê té yê sè e vɔ min!”

²⁵Ko mwa bemat o ba hwo ye, “Tik na nemi mɛ ne sè e ra bato mot, wot na nèy mot!”

²⁶Ko Pilatus a viri a yɛn Barabas. Ano, a tɛ̀ be dak Yɛsu na zining, ko a nára hɛ e vɔ bemât como, na yɛn a wɔ̀ kak ɛ e ra cɔ́gɔt.

²⁷E bama mo, bemât comô gwɔmna ba wɔ́ na Yɛsu e lalâ lɔ gwɔmna, ko yɛn a yila bwang bemɛn, ba gwɔrɔ Yɛsu.

²⁸Yɛn a paa a yɛ berugu mɛ, ko yɛn a tɛ̀ a yɛ gworugu gwoswinang.

²⁹Ko yɛn a tsipta kpîn negwɔm na serɔgɔ, yɛn a tɛ̀ a yɛ e rato, ko ba to nɔng ɛ gwele e vwɔ yege mɛ. Yɛn a hwo tē guduruk e nuyel mɛ, ba shɛgɛsh hɛ, ba tē, “Nekên Gbɔng Gwɔ̀m BeYuda ne ros!”

³⁰Yɛn a tulus hɛ na netey, yɛn a jut gwele mo, ko ba dak ɛ mɛ̀ e rato.

³¹Jeng de yɛn a tala shɛgɛsh hɛ, yɛn a pat gworugu gwane mo, ko yɛn a to tɛ̀ a yɛ berugu mɛ. Ko yɛn a nusu na yɛ, yaga na be wɔ̀ kak ɛ e ra cɔ́gɔt.

³²Sede bá sè nusu yi e ji repomo mo, yɛn a man na mwat hwak de á sè yi e Kirene, reza mɛ, à Simɔn. Ko bemât como yɛn a tɛ̀ ɛ gbing-gbing a wut cɔ́gɔt-kâk Yɛsu.

³³Yɛn a wɔ̀ ta e kwɔn de be tâng hɛ, à Gɔlgɔta wɔgɔ, kwɔ̂n gwokup ratô mwat.

³⁴E hwomo, yɛn a simo be nɔ̂ng Yɛsu nshî anap de ba wuna na hwal hwak de gwa sé kpashak. Ko e bama de a lɛlɛ nɛ tyɔng, a kyɛ́ ɛ nà sɔ nɛ.

³⁵Ano, yɛn a kak ɛ e ra cɔ́gɔt, ko yɛn a ra cáca na be gas mɛ̀ berugu mɛ e bato mɛn.

³⁶E bamâ hane, yɛn a sangal e hwomo na be gyeng ɛ.

³⁷Ba jɛk pyɛ de ya tɛ̀ ba kak ɛ, ko ba tɛ̀ e ra rak rato mɛ wɔgɔ, YƐSU, GBƆNG GWƆM BEYUDA À WOMO.

³⁸Yɛn a kak begbik beba arɔng tanga Yɛsu, gwining e vwɔ yege mɛ ko hwak e vwɔ mwɛlɛng mɛ.

³⁹Bemat de ba kweres e gwong ba digis bato mɛn, ko ba tabas a Yɛsu nengyas,

⁴⁰yɛn a tē, “E hwo wɛ, à mwat de hwá ye, hwô gangas Gbɔng Duk Re Fongol, na hwo to lɔk wɛ e ji nepɔlɔ netat, sey tó mo! Ka sede hwà sé Hwey Dagwi, gyirik yi e ra cɔ́gɔt o!”

⁴¹Ano arɔng, begbɔng bepiris, tanga bemât basâ Badu, na bemakuk ba shɛgɛsh Yɛsu, yɛn a tē,

⁴²“Á seres bemat behak, ko e tɔk sey tó mɛ wɛt! Yɛ a sé Gbɔng Gwɔ̀m BeYuda wɛt arɛt? Ka sede yɛ a gyirik yi e ra cɔ́gɔt-kak a remo, ko wot a rɔda sey tsak o na há mɛ!

⁴³Yɛ a tɛ̀ gap mɛ e ra Dagwi, ko a ye, yɛ a sé Hwey Dagwi. Yàa! Tik na Dagwi o a sey ɛ, sede e simo hɛ!”

⁴⁴Ano arɔng, begbik beba vemo de ba kak ɛn tanga Yɛsu ba tabas a yɛ nengyas.

⁴⁵Yi e jeng de gwi gwa vey e tē vɔk e dyām tyat nahywegelek, sevwel o mwa sa ye mwangalang.

⁴⁶Sede e dyām tyat, Yɛsu a gbɔ na gbɔng fwɔ, a ye, “Eli, Eli, lama sabaktani?” Wɔgɔ, “À Dagwi hom, à Dagwi hom, yaga sɛ́ de hwà kyini me arɛt?”

⁴⁷Bemat behak de ba sé e hwomo ba wok ɛ, ko ba ye, “A sé yishi Eliya!”

⁴⁸Remo-remo, gwining e ji mɛn a tele, a jut sòso, ko a sing wɛ e ji nshî jwaatat. A tɛ̀ wɛ e ra gwocwang, ko a nára a Yɛsu wɛ e nu, yaga na a suyu.

⁴⁹Ko bwang bemɛn ba ye, “Tik yaang, na wot a di kɛ Eliya mo ê vey, na a ba sey ɛ!”

⁵⁰Ko Yɛsu a to gbɔ na gbɔng fwɔ, a hàla neken mɛ.

⁵¹Ko gworugû bâng duk e ji Gbɔng Duk Re Fongol gwa vɛ̌ vugu hɛ bebak o beba yi e rak o vɔk e retin o. E jeng o, vwel ha digis, ko beta ba taksal.

⁵²Besak ba wuma hɛn, ko bemat pyak de ba ga kushu, vemo de bá kana raa Dagwi naka, ba sensa na neken,

⁵³ko yɛn a nunus yi e ji besak o. E bama de Yɛsu a sene yi e reku, yɛn a wɔ̀ yel e ji Repomô Jɛrɛ, ko yɛn a dura a bemat pyak bato mɛn.

⁵⁴Jeng de gbɔng o wo bemât como na bemât como mɛ de ba sé gyeng Yɛsu ba di de vwel ha digis, na mwa pyɛ́ de ya ga té, yɛn a wok bengyip sizɔng, ko yɛn a ye, “Mwin, mwat womo á sè Hwey Dagwi!”

⁵⁵Beha pyak arɔng ba sé e hwomo, ba sé bɛrɛng yi e jey. Yɛn á kana raa Yɛsu yi e sevwêl Galili, ko yɛn a kyě sɛlɛ hɛ.

⁵⁶E ji mɛn, à Marya wo Magdala, na Marya nêng Yakɔp na Yɔsɛf, tanga nêng nèy Zɛbɛdayus.

⁵⁷Sede nahywegelek na pom, darwey hwak yi e Arimatiya a vey. Ba tang ɛ, à Yɔsɛf, ko á sè mwât raà Yɛsu.

⁵⁸A wɔ́ na Pilatus, a rangal hɛ na be nɔng ɛ revîn Yɛsu, na a wɔ̀ lɛrɛ. Ko Pilatus a nɔng nu be nɔng ɛ rɛ.

⁵⁹Yɔsɛf a jut revin o, ko a hanas rɛ na gworugu gwopwɛng gworwat de gwa sé gwopwas o,

⁶⁰ko a lɛrɛ rɛ e ji sak pas de a ga ta yaga tó mɛ e ji gwofwa. Ko a biring gwogbɔng gwofwa gwohwak, a tɛ̀ gwɛ gàk e rwi sak o, ko a kyè.

⁶¹Marya wo Magdala tanga Marya hwak yɛn a sé sangal e hwomo, yɛn a sé bɛrɛng sak o.

⁶²Tuk het wɔgɔ, tuk de he raa tûk yông pyɛ́, begbɔng bepiris tanga BeFarisi ba wɔ̀ tula hɛn na Pilatus.

⁶³Yɛn a yang ɛ, “À da, wot a bare, jeng de mwât kwɛlɛ̂ng bemat wane á sè rɔngɔl na neken, á ye, ‘E bamâ pɔlɔ tat, ma rɔda to sene yi e reku.’

⁶⁴Yaga ano, nɔng nu, na be gyeng sak o naka sɛ̌ nepɔlɔ netat na sila. Ka ano wɛt, gyeng rɔ̌ bemât masâ fwom mɛ ba rɔda wɔ, na be shigi revin o, ko bê ha a bemat wɔgɔ, ba ga sene hɛ yi e reku. Ko kwɛlɛng hemo ha rɔda dal hê mɛsɛng na neves.”

⁶⁵Pilatus a toyo a yɛn, a yang ɛn, “Ci in, jut in bemât como, na yin a wɔ̀ gyeng sak o naka-naka.”

⁶⁶Ano kwong, yɛn a kyè, yɛn a wɔ̀ man gwofwa rwi sak o naka na tô gwɔ̀m, ko yɛn a tɛ̀ bemât como be gyeng sak o arɔng.