Read berom Matayus 28 Bible Online

Matayus 28 - berom bible

Matayus 28

¹Sede Tuk Shábat ha kwey, ko tûk mɛsɛng e ji sati mo ha sé kyè wɔ̀ ye gbey, Marya wo Magdala na Marya hwak yɛn a kyè na be wɔ̀ di sak o.

²Remo-remo, vwel ha digis na gap ding-ding, yaga tom-lagwi hwak wo Darwey a gyirik yi e lagwi, a wɔ̀ biring gwofwa sak o vɔk e vwara, ko a sangal e ra tɛ̂t gwɛ.

³Tom o a sé sede gbara de wa ye dɛbɛt, ko berugu mɛ ba pɛngɛ pes sede toro pwɛng.

⁴Bemât gyêng sak o ba wok bengyip sizɔng, babek mɛn ba vow, ko ba pe gabsa e vwel sede bavin o.

⁵Ko tom-lagwi o a yâng beha mo, “Yin wok bengyip wɛt! Ma tɔk, yin a sé jāma Yɛsu de bá kak ɛ e ra cɔ́gɔt.

⁶A sé e ngamo wɛt, ba ga sene hɛ yi e reku, sede remo de á kana ha. Vey di in kwɔn de á dyɛng ɛ̀.

⁷Ko a remo, toyo hin ziri, na yin a wɔ̀ ha a bemât masâ fwom mɛ, ‘Ba ga sene hɛ yi e reku, ko a remo, a sé tānga kyè vɔk e sevwêl Galili na a wɔ̀ gyeng in. Yin a rɔda di ɛ e hwomo.’ Bàre hin na pyɛ de ma ga ha a yin.”

⁸Ano kwong, beha mo yɛn a hàla sak o dey-dey. Neyey mɛn na sila hɛn na bengyip, ko mwa ano, yɛn a vɔk yey pyɛng ding-ding. Yɛn a tele, ko ba wɔ̀ ha a bemât masâ fwom mɛ neha mo.

⁹Remo-remo, Yɛsu a man na yɛn, a yang ɛn, “Show in!” Yɛn a vey bagat na yɛ, yɛn a kaba bol mɛ, ko yɛn a re a yɛ fongol.

¹⁰Ko Yɛsu a yang ɛn, “Yin wok bengyip wɛt! Ko kyè in, na yin a wɔ̀ ha a begwa hom, be wɔ́ e sevwêl Galili. Yɛn a rɔda di me e hwomo.”

¹¹Jeng de beha mo bá sè kyè kwɛngɛl mɛn, behak e ji bemât como de bá sè gyeng sak o ba to ɛn vɔk e ji repomo mo, ko yɛn a wɔ̀ ha a begbɔng bepiris kayɛ pyɛ de ya ga té.

¹²Yɛn kwong, yɛn a man na bemakuk, na yɛn a yong pyɛ de yɛn ê ra. Yɛn a nɔ̂ng bemât como mo dyām pyak,

¹³ko yɛn a yang ɛn, “Yē in ngan: ‘Bemât masâ fwom mɛ ba vey nabwalak, ba shigi revin o e jeng de wot á sè e de nevwa.’

¹⁴Ka sede há mo ha wul fwông gwɔmna, ko wot ê ha a yɛ pyɛ de yê dyɛng nehywɛ mɛ, ko reyɔm rehak ra rɔda sɛ̀ in wɛt.”

¹⁵Ano kwong, bemât como mo ba sey dyām o, ko yɛn a ra pyɛ de ba misang a yɛn. Há hemo ha shara hɛ e ji BeYuda pere vey e yunung.

¹⁶Bemât masâ fwôm Yɛsu kuru na wɛ gwining (11) yɛn a kyè wɔ e raku e sevwêl Galili, e kwɔn de Yɛsu á kana ha a yɛn.

¹⁷Jeng de yɛn a di ɛ, yɛn a re a yɛ fongol, mwa ano de behak e ji mɛn ba tó yey na yɛ.

¹⁸Yɛsu a wɔ́ bagat na yɛn, ko a yang ɛn, “Ba ga nɔng me retô mwa e ji lagwi tanga e ji jey.

¹⁹Yaga ano, kyè in wɔ na yére bemat jey mwa, na yin a tɛ̀ ɛn be tɛ́ ɛn bemât raa hom. Tɛ̀ in a yɛn batisma e ji rezâ Da, na Hwey, na Gabik Jɛrɛ,

²⁰ko basa hin a yɛn na be gyenges kayɛ pyɛ de ma ga nɔng in nu e ra yɛ. Mwin, ma rɔda sè tanga yin jojot vɔk e yɛnɛ̂ jey.”