Read berom Matayus 4 Bible Online

Matayus 4 - berom bible

Matayus 4

¹E bama mo, Gabik Jɛrɛ ha kyè na Yɛsu wɔ e hey, yaga na gwɔ̀m cēng a tɔgɔs hɛ na a ra banɛn.

²E bama de a sangal e hwomo nepɔlɔ kuru banaas, naturuk na nagwi, sana re pyɛ́, a wok vyong.

³Mwât setɔgɔs o a vey, ko a hwo yang ɛ, “Ka sede hwà sé Hwey Dagwi, yâng beta vemo be tɛ́ ɛn kpam-tuk.”

⁴Ko Yɛsu a toyo a yɛ, a yang ɛ, “Bà jɛk e Bwok-basa Dagwi wɔgɔ, “ ‘A sé e kpam-tuk zɔng wɛt de wô tɛ̀ mwat a sè kwen, ko mwat e simo kahɛ há de Dagwi e ha.’ ”

⁵Ano, gwɔ̀m cēng a jut Yɛsu wɔ e Repomô Jɛrɛ Yɛrusalɛm, a tɛ̀ ɛ a tumal e ra tɛ̂t raduk Gbɔng Duk Re Fongol,

⁶a yang ɛ, “Ka sede hwà sé Hwey Dagwi, ko gyili vɔk e vwel. Yaga bà jɛk e Bwok-basa Dagwi wɔgɔ, “ ‘Dagwi a rɔda nɔ̂ng betom-lagwi mɛ nu e ra hwo; yɛn a rɔda vɔk o e ra vɔ mɛn, yaga na hwo kwon tiri bwol mō e ra gwofwa wɛt.’ ”

⁷Ko Yɛsu a toyo a yɛ, a ye, “Bà to jɛk e Bwok-basa Dagwi wɔgɔ, ‘Hwo mara Darwey Dagwi mō wɛt.’ ”

⁸Gwɔ̀m cēng o a to jut ɛ vɔk e ra tɛ̂t gwogbɔng gworaku gwohwak, ko a dura a yɛ mwa neyɛnɛ̂ segwɔm detidetu e jey na gbɔng nerât nɛ mwa,

⁹a yang ɛ, “Mê nɔng o mwa pyɛ́ yemo, ka sede hwô gaba e nuyel hom, na hwo re a me fongol.”

¹⁰Ko Yɛsu a yang ɛ, “Kyè yi e ngamo, à Shetan! Bà jɛk e ji Bwok-basa Dagwi wɔgɔ, “ ‘Rē a Darwey Dagwi mō fongol, ko e yɛ nju mɛ zɔng de hwô ra a yɛ fwom.’ ”

¹¹E bama mo, gwɔ̀m céng a hàla hɛ, ko betom-lagwi ba vey nɔng ɛ pyɛ de e simo.

¹²Jeng de Yɛsu a wok, ba ga tɛ̀ Yohana e ngyang, a kyè vɔk e sevwêl Galili.

¹³A hàla Nazarɛt, ko a wɔ̀ sangal e repomô Kafarnahum de ra sé bagat na Gworep Galili e yɛnɛ̂ bavwêl Zɛbulun na Naftali.

¹⁴A ra ano, yaga na a sila mɛ̀ pyɛ de Yɛshaya, zarap Dagwi, à kana ha wɔgɔ,

¹⁵“À hwo sevwêl Zɛbulun na hwo sevwêl Naftali de yin a sé e gwong vɔk e gworep, e gurâ Rɔt Yɔrdan; à hwo Galili de hwà sé sevwêl bemât yére dyuk!

¹⁶Bemat de ba sé sangal e ji lwīl ba ga di gbɔng negbey, ko e rà vemo de ba sé sangal e sevwêl reku de sa sé mwangalang, negbey na ga ta e ra yɛn.”

¹⁷Yi e jeng o, Yɛsu a hwo basa a bemat, a tē, “Doyo hin yi e banɛn min, yaga jeng de Dagwi e lagwi a rɔda hwo re negwɔm e ra jey ya ga vey bagat.”

¹⁸Jeng de Yɛsu á sè kwey e vwarâ Gworep Galili, a di bemât vôs betɔk beba, yɛ Simɔn de ba to tang ɛ, à Bitrus, na gwa mɛ Andarawus, ba sé bomo segun mɛn e ji gworep o.

¹⁹Yɛsu a yang ɛn, “Raa me hin, ko ma rɔda masa a yin gwong de yin ê vɛ̀sɛ a me na bemat, tyɛng sede yin a sé vos betɔk a remo.”

²⁰E ji jeng o, yɛn a pe hàla bagun mɛn, ko ba raa hɛ.

²¹Sede a gwɛ̌ kyè tyɔng yi e hwomo, a to di begwa behak beba, yɛn à Yakɔp na Yohana, nèy Zɛbɛdayus. Yɛn á sè e ji dwa-nshi tanga da mɛn Zɛbɛdayus, bá sè yông bagun mɛn. Yɛsu a yila hɛn,

²²ko remo-remo, yɛn a tik dwa-nshi mo na da mɛn, ko yɛn a raa hɛ.

²³Yɛsu a kyě kyè e sevwêl Galili, a basa a bemat pyɛ́ e beduk re fongol, ko a shara a yɛn Yɛgɛt Yat e ra Segwɔm Dagwi. A tɛ̀sɛ kasɛ̌ serɔ na kayɛ pyɛ de ya tak a bemat reyɔm tyang arɔng.

²⁴Reha mɛ ra shara hɛ vɔk e mwa sevwêl Sirya. Yaga ano, bemat o ba vɛ̀sɛ a yɛ na mwa vemo de ba ro ɛn na nerɔ detidetu, na vemo de ba tak reyɔm pyak: Vemo de ba vɔk cēng, na vemo de ba kushu cushu, tanga bemât gbɛrɛ̂k nedem, ko a tɛ̀sɛ hɛn tyang.

²⁵Bagbɔng bagyɛng bemat ba raa hɛ: Behak ba yi e sevwêl Galili, behak yi e yɛnɛ̂ bapomo kuru de ba tâng vɛ, à Dekapolis, behak yi e gbɔng repomô Yɛrusalɛm, behak yi e sevwêl Yudiya, ko behak kwong yi e gurâ Rɔt Yɔrdan.