Read berom Matayus 5 Bible Online

Matayus 5 - berom bible

Matayus 5

¹Sede Yɛsu a di bagyɛng bemat o, a tút vɔk e raku, ko a sangal e hwomo. Bemât masâ fwom mɛ ba vey na yɛ,

²ko a hwo basa a yɛn, a ye:

³“Vê yey pyɛng a vemo de ba tɔk, yɛn a sé bepɛng e ra pyɛ́ de ya sé yê Dagwi, yaga yɛn a sé nèy vwel ne Segwɔm Lagwi!

⁴Vê yey pyɛng a vemo de neyey mɛn ne lashe hɛn, yaga Dagwi a rɔda wɔrɔk hɛn!

⁵Vê yey pyɛng a vemo de be dyɛngɛs bato mɛn, yaga Dagwi a rɔda nɔng ɛn jey na ye sè myɛn!

⁶Vê yey pyɛng a vemo de be simo tyɔng wɛt pyɛ́ de Dagwi e simo, yaga a rɔda nɔng ɛn pyɛ́ mo shɛrɛk!

⁷Vê yey pyɛng a vemo de be wok nemwishish bemat, yaga Dagwi a rɔda wok nemwishish mɛn arɔng!

⁸Vê yey pyɛng a vemo de neyey mɛn na sé haalal, yaga yɛn a rɔda di Dagwi!

⁹Vê yey pyɛng a vemo de be tɛ̀ bemat be sangal tyang na bemɛn, yaga Dagwi a rɔda tang ɛn, à nèy mɛ!

¹⁰Vê yey pyɛng a vemo de be tak a yɛn reyɔm, yaga yɛn e ra pyɛ́ de ya sé ryat e nuyêl Dagwi; yɛn a sé nèy vwel ne Segwɔm Lagwi!

¹¹“Yin a sé vê yey pyɛng jeng de bemat be dùsa hin, ko be tak a yin reyɔm, ko yɛn e ha neha neves detidetu ne bɔs e ra yin arɔng, yaga yin e raa me.

¹²Vɔk in yey pyɛng sedesi, yaga pyɔlɔ min ya rɔda ba sè pyak e lagwi. A sé e gwong gwining o de bà kana tak a bezarap Dagwi reyɔm, yɛn vemo de bà tānga vey e ra yin.”

¹³“Yin a sé sede nevwashe yaga bemât jey. Ko ka sede nevwashe na tik tâ nɛ, e rɛ̌ de bê to tɔk tɛ̀ nɛ ne ta arɛt? E ngamo nuyel na to vɔk nerat yaga pyɛ cak wɛt. Yaga ano, be losho nɛ zɔng, na bemat be bɔrɔs nɛ.

¹⁴“Yin a sé sede negbey yaga bemât jey. Repomo de ba lɔk rɛ e ra tɛ̂t rahwol re tɔk sè e lɛrɛ wɛt.

¹⁵Ko vit a mwat de ê tɛ̀ kya e kywa-kya na a ye gup a wɛ na kwɛt. Ko ê tik wɛ e ra kwɔn de ha sé garang, ko wô nɔ̂ng kawɛ mwat de a sé e ji lɔ negbey.

¹⁶Ano arɔng, tik na negbey min ne lolo e nuyêl bemat, yaga na yɛn a bin di tomong min rat o, na yɛn a somo Da min de a sé e lagwi.”

¹⁷“Yin kwon bare wɛt wɔgɔ, ma vey, yaga na me gang Badu Mose tanga pyɛ́ de bezarap Dagwi bà kana basa a bemat. Ma ga vey, yaga na me gang vɛ wɛt, ko yaga na me sila vɛ.

¹⁸Mwin me ha a yin: Gyam na lagwi tanga jey be tala hɛn, vit a keretîn jɛk kɛ keyis kesɛl o ko kining de kê vuru hɛ yi e Badu mo, sɛ̌ ba sila kayɛ pyɛ e ngyen.

¹⁹Ano kwong, kawɛ mwat de e gyili redu de ra dal mwa na nesɛl, na a to basa a bemat be ra ano arɔng, a rɔda sè wo bamâ mwa e ji Segwɔm Lagwi. Ko kawɛ mwat de e raa mwa Badu mo, na a to basa a bemat be raa vɛ arɔng, a rɔda sè wo yel e ji Segwɔm Lagwi.

²⁰Yaga ano, ma sé ha a yin, sɛ̌ gwong de yin e ragas pyɛ́ de Dagwi e simo gwa dal gwô bemât basâ Badu tanga BeFarisi, ko yin a rɔda yel e ji Segwɔm Lagwi ko tyɔng wɛt.”

²¹“Yin a ga wok pyɛ de bà ha a bemât raane wɔgɔ, ‘Hwo mɔrɔ mwat wɛt! Kawɛ mwat de a mɔrɔ mumwɛ, a jam na be ra a yɛ shɔt.’

²²Ko me ma sé ha a yin, kawɛ mwat de a wok shom na mumwɛ, ba rɔda ra a yɛ shɔt. Kawɛ mwat de a yâng mumwɛ, à tɔn, a jam na bemakûk badu be ra a yɛ shɔt. Ko kawɛ mwat de a yâng mumwɛ, ‘Hwà sé pyɛ cak wɛt!’ a jam na pyɔlɔ mɛ ye sè e kwɔ̂n kya.

²³Yaga ano, ka sede hwà sé nára nɔrɔ mō e gàgbang rangâs yas vɔk na Dagwi, ko e hwomo hwà bare, gwà mō hwak a vɔk há hak na hwo,

²⁴hàla nɔrɔ mō e hwomo e nuyêl gàgbang rangas o, ko tānga kyè na hwo wɔ̀ gang-nshi na gwa mō e ngyen. E bama mo, toyo, na hwo wɔ̀ nára nɔrɔ mō mo.

²⁵“Ka sede mwat hwak a vey na há hak na hwo, na a wɔ̀ tɛ̀ kun mō e duk shɔt, ko yóng in há mo dey-dey jeng de yin a sé rɔngɔl tanga yɛ e gwong. Ka ano wɛt, ko a rɔda nára hwo e vɔ mwât shɔt; mwât shɔt o a rɔda to nára hwo e vɔ mwât fwôm gwɔ̀m, ko yɛ mo a rɔda tɛ̀ o e ngyang.

²⁶Mwin me ha a hwo: Hwô nusu yi e hwomo wɛt, sɛ̌ hwà tala kakɛ kedyam de e rangal hwo.”

²⁷“Yin a ga wok pyɛ de bà ha wɔgɔ, ‘Hwo kwon ra nejwang wɛt!’

²⁸Ko me ma sé ha a yin, kawɛ mwat de a bɛrɛng hwā na a wok cwey mɛ a ga ra renɛ̂n râ nejwang na yɛ e yey mɛ.

²⁹Ka sede reyis mō rê vwɔ yege re tɛ̀sɛ hwo na hwo ra banɛn, ko pat rɛ, na hwo bomo rɛ. A dal naka na hwo bidɛ dem hining hê rebek mō, de bê bomo rebek mō burang e kwɔ̂n kya.

³⁰Ko ka sede vwɔ yege mō gwo tɛ̀sɛ hwo na hwo ra banɛn, kpɔktɔ gwɛ, na hwo bomo gwɛ. A dal naka na hwo bidɛ dem hining hê rebek mō, de hwô yel e kwɔ̂n kya na rebek mō burang.”

³¹“Bà kana to ha wɔgɔ, ‘Kawɛ mwat de a ro hwā mɛ, a sé gbing-gbing na a nɔng ɛ bwok gâs weneng.’

³²Ko me ma sé ha a yin, kawɛ mwat de a ro hwā mɛ, sɛ̌ yaga á kana ra nejwang, a sé tɛ̀ hwā mo a ra nejwang, ka sede yɛ hwā mo a to ra weneng. Ko kawɛ mwat de a vo hwā de ba ga kana ro ɛ a sé ra nejwang arɔng.”

³³“Yin a ga to wok pyɛ de bà ha a bemât raane wɔgɔ, ‘Hwo kwon kwɔrɔ sira de hwà ga ra wɛt, ko gyenges pyɛ́ de hwà ga sira a Darwey, hwô ra.’

³⁴Ko me ma sé ha a yin, yin ka sira ko tyɔng wɛt. Yin kwon sira na lagwi wɛt, yaga wa sé gwofwa negwɔm Dagwi,

³⁵kɛ na jey, yaga ya sé kwɔ̂n tikîs bol mɛ, kɛ na Yɛrusalɛm, yaga ra sé repomô Gbɔng Gwɔ̀m de a vɔk nerey sizɔng.

³⁶Hwo kwon sira na rato mō arɔng wɛt, yaga hwô tɔk tɛ̀ setôt rato mō ko sining se pɛngɛ kɛ se siri wɛt.

³⁷Tik na pyɛ de yin a ha ye sè ‘ey’ kɛ ‘wey’ zɔng. Ka sede yin e to ha pyɛ cak detu, ko ya yi na Shetan, wo neves.”

³⁸“Yin a ga wok pyɛ de bà ha wɔgɔ, ‘Mwat de a pat a mumwɛ yis, be pat a yɛ mɛ arɔng, kɛ a sé hwin ayi, be pat a yɛ mwɛ arɔng.’

³⁹Ko me ma sé ha a yin, ka sede mwat hwak a ra a hwo pyɛ vyes cak, hwo kwon toyo a yɛ mɛ̀ ano wɛt. Ka sede mwat hwak a fala hwo e rwanâng vwɔ yege, ko doyo a yɛ gwot na a to fala arɔng.

⁴⁰Ko ka sede mwat hwak a wɔ̀ tɛ̀ kun mō e duk shɔt, na a bin sey ɛ̀ rugu mō, hàla a yɛ pyɛ banga mō mwa arɔng.

⁴¹Ka sede mwat hwak a tɛ̀ o gbing-gbing na hwo kyè na yɛ lyosho jining, ko kyè na yɛ lyōsho bya.

⁴²Nɔ̂ng kawɛ mwat pyɛ de a vey won na hwo, ko ka sede mwat e simo na a hwɔp pyɛ cak arɔng, hwo kwon ro mɛ̀ wɛt.”

⁴³“Yin a ga to wok pyɛ de bà ha wɔgɔ, ‘Tɛ̀ yey na mwât vwara mō, ko kyɛ́ o mwât repugu mō.’

⁴⁴Ko me ma sé ha a yin, tɛ̀ in yey na bemât repugu min, ko rá in won yaga vemo de ba sé tak a yin reyɔm.

⁴⁵Yi ano, yin a rɔda sè nèy Da min de a sé e ji lagwi. Yɛ e tɛ̀ gwi mɛ gwo ta e ra bemat beves na bemat berat, ko e to tɛ̀ rwak wo rop e ra bemat de ba sé cik e nuyel mɛ, mwa na vemo de ba sé cik wɛt.

⁴⁶Ka sede yin e tɛ̀ yey na bemat de be tɛ̀ yey na yin zɔng, ko e pyɔlɔ̂ sɛ́ de yin ê sɛ̀ arɛt? Bemât seres dyâm yeles na pyɛ́ be ragas ano wɛt arɛt?

⁴⁷Ko ka sede yin e tâng bemin zɔng show, e yɛ̌ pyɛ de ya dal ye bwang bemat de yin a ga ra arɛt? Bemat de ba tɔk Dagwi wɛt be ragas ano wɛt arɛt?

⁴⁸Yaga ano, tik na yin a sila gyat, tyɛng sede Da min de a sé e ji lagwi a sila gyat arɔng.”