Read berom Matayus 6 Bible Online

Matayus 6 - berom bible

Matayus 6

¹“Tē in naka, yin kwon ra tomong min — yerê vemo de yin e ra, yaga yin e raa Dagwi — e bayîs bemat wɛt, yaga na yɛn a bin di pyɛ de yin e ra. Ka sede yin e ra ano, ko yin ê sɛ̀ pyɔlɔ min wɛt yi na Da min de a sé e ji lagwi.

²“Ano kwong, jeng de hwà sé nɔ̂ng mwat de a bidɛ pyɛ cak, hwo tɛ̀ bemat be gbɔ na be dura pyɛ de hwà sé ra wɛt, sede remo de bemât nenu-neba be ragas e beduk re fongol tanga e nehyok. Yɛn e ra ano, yaga na bemat be nɔng ɛn nerey. Mwin me ha a yin: Yɛn a ga kana sey pyɔlɔ mɛn.

³Ko jeng de hwó nɔ̂ng mwat de a bidɛ pyɛ cak, nɔng ɛ e gwong de vwɔ mwɛlɛng mō gwô tɔk pyɛ de vwɔ yege mō gwa sé ra wɛt.

⁴Yi ano, pyɛ de hwà ra ya sé e lɛrɛ. Ko Da mō de e bɛrɛng pyɛ́ de be ra e lɛrɛ a rɔda nɔng o pyɔlɔ mō.”

⁵“Jeng de yin a sé ra won, yin sè sede bemât nenu-neba wɛt! Yɛn e dal na simo be tumal e beduk re fongol tanga e tê nehyok na be ra won, yaga na kawɛ mwat a bin di ɛn. Mwin me ha a yin: Yɛn a ga kana sey pyɔlɔ mɛn.

⁶Ko jeng de hwó ra won, kyè wɔ̀ yel e duk mō, bang rwi mō, ko rá a Da mō, de be tɔk di ɛ wɛt, won. Ko Da mō mo de e bɛrɛng pyɛ́ de be ra e lɛrɛ a rɔda nɔng o pyɔlɔ mō.

⁷“Jeng de yin a sé ra won, yin kwon kyě ha neha nining o de na sé kpɛɛ zɔng, sede bemat de ba tɔk Dagwi wɛt be ra. Yɛn e bare, Dagwi a rɔda wok won mɛn yaga nepyak neha mɛn o.

⁸Yin kwon sè sede yɛn wɛt, yaga Da min a tɔk pyɛ de yin e simo gyam na yin a rangal hɛ.

⁹Ano kwong, rá in won sede ngan: “ ‘À Da mot de hwà sé e lagwi, tik na be nɔ̂ng reza mō re jɛrɛ nerey;

¹⁰tik na jeng de hwô re negwɔm ye vey; tik na be ra pyɛ́ de hwó simo e jey, sede remo de be ra e lagwi.

¹¹Nɔng ot pyɛ̂ re de wot e simo yunung.

¹²Hàla a wot buru de wot a ga ra, sede remo de wot arɔng wot a ga hàla a vemo de ba ga buru a wot.

¹³Hwo kwon tik wot wɔ́ e kwɔ̂n setɔgɔs wɛt, ko sey ot yi na Shetan, wo neves.’

¹⁴“Ka sede yin e hàla a bemat buru de ba ga ra a yin, ko Da min de a sé e lagwi a rɔda hàla a yin arɔng.

¹⁵Ko ka sede yin e hàla a bemat buru mɛn wɛt, ko Da min a rɔda hàla a yin wɛt arɔng.”

¹⁶“Ko jeng de yin e tik rê pyɛ́, yin kwon lashe bayis min, sede bemât nenu-neba be ra. Yɛn e bomos bayis, yaga na kawɛ mwat a bin di, yɛn a sé wusal hal. Mwin me ha a yin: Yɛn a ga kana sey pyɔlɔ mɛn.

¹⁷Ko di, jeng de hwó tik rê pyɛ́, mɔmɔ rato mō na něy, na hwo kus bayis mō,

¹⁸yaga na bemat be tɔk di, hwà sé tik rê pyɛ́. Ko e Da mō zɔng, de be tɔk di ɛ wɛt, de a tɔk. Ko Da mō mo de e bɛrɛng pyɛ́ de be ra e lɛrɛ a rɔda nɔng o pyɔlɔ mō.”

¹⁹“Yin kwon bang a bato min yas e jey wɛt, yaga e ngamo mo bekǔt na sénge be re yɛ, ko begbik arɔng be kulu na be shigi yɛ.

²⁰Ko báng in a bato min yas e lagwi. E hwomo, bekǔt na sénge be re yas o wɛt, ko begbik arɔng be tɔk kulu na be shigi yɛ wɛt.

²¹Yaga yey mō ya rɔda sè e kwɔn de hwà bang ɛ̀ yas mō.”

²²“Bayis ba sé sede kywa-kya wo rebek. Ka sede bayis mō ba sé barat, ko mwa rebek mō rê vɔk negbey;

²³ko ka sede bayis mō ba lashe hɛn, ko mwa rebek mō rê sè e lwīl. Yaga ano, ka sede negbey de na sé e ji mō na sé lwīl, ko lwīl gwane gwa rɔda sè mwangalang sedesi!”

²⁴“Vit a mwat de ê tɔk ra a beda beba fwom. Kɛ ê bɛrɛng womo ves na a simo woro, kɛ ê tɛ̀ nehywɛ mɛ e ra hâ womo na a byɛs woro. Yin ê tɔk ra a Dagwi tanga yas fwom e jeng jining wɛt.

²⁵“Yaga ano, ma sé ha a yin, yin sap wɛt e ra pyɛ de yin ê re kɛ sɔ na yin a sangal mɛ̀ beken, kɛ e ra berugu de yin a rɔda tɛ̀. Neken na dal pyɛ̂ re wɛt a? Ko rebek arɔng ra dal berugu wɛt arɛt?

²⁶Bɛrɛng hin benon de be kyě tele e lagwi: Be tus pyɛ cak wɛt, be yɛt bwal arɔng wɛt, ko be bang pyɛ́ e begban wɛt. Ko mwa ano, Da min de a sé e ji lagwi e nɔngɔ̂s vɛ pyɛ̂ re! Yin a dal benon o ding-ding wɛt a?

²⁷E wɛ̌ mwat e ji min de e tɔk gwɛ̌ pɔlɔ hining e jey, yaga e sap neken mɛ ɛ?

²⁸“Yaga sɛ́ de yin e sap e ra rehâ berugu ɛ? Bɛrɛng hin gwong de bejamûk hey be ras: Be ra fwom, kɛ be lɔk berugu yaga batô vɛ wɛt.

²⁹Ko ma sé ha a yin, mwa ano de yɔ̀m Gbɔng Gwɔ̀m Sɔlɔmɔn yà sè ryat sizɔng, ko nerât yɛ na ka vey ne gwining e ji bejamuk vane wɛt.

³⁰Ka sede Dagwi e tɛ̀sɛ sɔng gwo sè rwat ano, gwomo de gwa sé kwen yunung ko nahwol vit a gwɛ, ba ga kyé pyɛ́ na gwɛ, tàga yin arɛt? À yin de yin e tɛ̀ gap min mwa e ra me wɛt!

³¹“Yaga ano, yin hwo sap wɛt, na yin a tē, ‘Wot ê re sɛ́ ɛ?’ kɛ ‘Wot ê sɔ sɛ́ ɛ?’ kɛ ‘Wot ê tɛ̀ sɛ́ arɛt?’

³²Yaga a sé e bemat de ba tɔk Dagwi wɛt de ba sê búm ɛn e de jāmâ pyɛ́ yemo mwa, ko Da min de a sé e lagwi a tɔk, yin e simo mwa pyɛ́ yemo.

³³Nduga yin tānga jāma pyɛ́ de ya sé yê Segwɔm Dagwi, na yin a ra pyɛ́ de Dagwi e simo, ko a rɔda gwɛ̌ a yin ɛ̀ pyɛ́ mo mwa arɔng.

³⁴Ano kwong, yin sap e ra nahwol wɛt, yaga pyɛ́ de yin ê sap e ra yɛ̄ nahwol ya sɛ́. Kahɛ tuk ha vɔk reyɔm de ra vey a hɛ.”