Read berom Matayus 7 Bible Online

Matayus 7 - berom bible

Matayus 7

¹“Yin kwon ra a bemat shɔt wɛt, yaga na Dagwi a ba ra a yin yɛ arɔng wɛt.

²Yaga Dagwi a rɔda ra a yin shɔt e gwong gwining de yin a ra a bemat yɛ, ko a rɔda raa begwong de yin á kana raa e jeng de yin a ra a bemat behak shɔt arɔng.

³Yaga sɛ́ de hwó di keshugu e yîs gwa mō, ko hwó tɛ̀ tong na bak cɔgɔt de wa sé e yis mō wɛt ɛ?

⁴Kɛ e rɛ̌ de hwô tɔk yâng gwa mō, ‘Tik me pat a hwo keshugu kane e yis mō’, e jeng de bak cɔgɔt wa sé e yis mō ɛ?

⁵À hwo mwât nenu-neba! Tānga pat bak cɔgɔt de wa sé e yis mō e ngyen, ko e bama mo, hwô tɔk di kyɛrɛng na hwo pat keshugu yi e yîs gwa mō.

⁶“Yin kwon jut pyɛ́ de ya sé jɛrɛ na yin nɔ̂ng bevu wɛt, yaga yɛn a rɔda doyo na be roros hin zɔng. Yin kwon barak a bezà beta min de ba sé berat sedesi, yaga yɛn a rɔda bɔrɔs vɛ na bol mɛn zɔng.”

⁷“Rá in wôn pyɛ de yin e simo na Dagwi, ko a rɔda nɔng in. Jāma hin, ko yin a rɔda sɛ̀ pyɛ de yin a sé jāma. Kwɔgɔt hin, ko ba rɔda wunta a yin rwi duk o.

⁸Yaga kawɛ mwat de e ra wôn pyɛ cak, ba rɔda nɔng ɛ yɛ; ko yɛ womo de e jāma pyɛ cak, a rɔda sɛ̀; ko yɛ womo kwong de e kwɔgɔt rwi duk, ba rɔda wunta a yɛ gwɛ.

⁹E wà e ji min de a rɔda nɔ̂ng hwey mɛ gwofwa jeng de ha ra wôn kpam-tuk ɛ?

¹⁰Kɛ e wà de ê nɔ̂ng hɛ gwɔ̄m jeng de ha ra wôn tɔk ɛ?

¹¹Ka sede yin kwong de yin a sé beves yin e tɔk nɔ̂ng nèy min pyɛ́ ryat, tàga Da min e lagwi a rɔda nɔ̂ng vemo de ba ra won na yɛ pyɛ́ ryat!

¹²“Yaga ano, kayɛ jeng rá in a bemat tyɛng pyɛ de yin e simo yɛn a ra a yin arɔng. Badu Mose tanga bása bezarap Dagwi ba sé e ra tɛ̂t há hane mo.”

¹³“Yél in e ruhup de gwa sé ngyɔgɔdɔk! Yaga ruhup de gwa sé wɔ e kwɔ̂n kya gwa sé gbey, ko gwông wɔ e hwomo gwa to sé gbang wɛt, ko a sé bemat pyak de be kwey e gwɛ.

¹⁴Ko ruhup de gwa sé wɔ e kwɔ̂n neken gwa sé ngyɔgɔdɔk, ko gwông wɔ e hwomo gwa to sé gbang, ko a sé bemat tyɔng zɔng de be sè gwɛ.”

¹⁵“Tē in naka na bezarap Dagwi vê bɔs! Yɛn e vɛ̀sɛ na yin, ko jeng de yin e bɛrɛng hɛn, yin e bare, yɛn a sé vyēl pyɛng, ko e ji hâ mwin, yɛn a sé sede ngyāma vyes e neyey mɛn.

¹⁶Yin ê tɔk ɛn yi na tomong mɛn. Bemat be tɔk vos nèy anap e ra serɔgɔ kɛ nèy regwi e ra jaal arɛt?

¹⁷Kayɛ cɔgɔt ryat ye tɔs nèy nerat, ko cɔgɔt vyes ye tɔs nèy neves arɔng.

¹⁸Cɔgɔt ryat ye tɔk tɔs nèy neves wɛt, ko cɔgɔt vyes arɔng ye tɔk tɔs nèy nerat wɛt.

¹⁹Kayɛ cɔgɔt de ye tɔs nèy nerat wɛt, be tow yɛ, be bomo yɛ e kya.

²⁰Ano kwong, yin ê tɔk bezarap Dagwi vê bɔs yi na tomong mɛn.”

²¹“A sé e kawɛ mwat de e tang me, à Darwey, à Darwey de a rɔda yel e Segwɔm Lagwi wɛt, ko a sé e womo zɔng de e ra pyɛ de Da hom de a sé e lagwi e simo.

²²E tuk de ba rɔda ba ra a jey shɔt, bemat pyak ba rɔda ba yang me, ‘À Darwey, à Darwey, a sé e ji reza mō de wot á zarap na Dagwi wɛt a? A sé e ji reza mō de wot á paa cēng wɛt a? A sé e ji reza mō arɔng de wot á ra pyɛ̂ bes pyak wɛt a?’

²³Ko mê yang ɛn, ‘Ma ga sang tɔk in wɛt. Kyè in e ngamo, à yin de yin e ragas pyɛ́ vyes!’ ”

²⁴“Yaga ano, kawɛ mwat de e wet betong na neha hom nemo, na a gyeng nɛ, a sé sede mwât netsitsɛng de a lɔk lɔ mɛ e ra gbondong.

²⁵Rwak wa hwo rop, tɛmɛ-nshi na pom, ko gul gwa pɛsɛl na gap, gwa tɛ́s lɔ mo; ko mwa ano, ha gaba wɛt, yaga bá kana bomo retîs hɛ e ra gbondong.

²⁶Ko kawɛ mwat de e wet betong na neha hom nemo wɛt, na a gyeng nɛ wɛt a sé sede tɔn de a lɔk lɔ mɛ e ra bazɛk.

²⁷Rwak wa hwo rop, tɛmɛ-nshi na pom, ko gul gwa pɛsɛl na gap, gwa tɛ́s lɔ mo, ko ha gaba. Hm! Lɔ hane ha gaba gaba ves!”

²⁸E bama de Yɛsu a yɛnɛ neha nemo, bagyɛng bemat o ba langat hɛn e ra gwong de a basa a yɛn,

²⁹yaga gwa sé detu na gwomo de bemât basâ Badu ba ra. Yɛsu a basa a yɛn na reto.