Read berom Matayus 8 Bible Online

Matayus 8 - berom bible

Matayus 8

¹Jeng de Yɛsu a gyirik yi e raku mo, bagyɛng bemat pyak ba raa hɛ.

²Ko kparong hwak a vey na yɛ, a gaba e nuyel mɛ, ko a ye, “À Darwey, ka sede hwà simo, ko hwà vɔk reto na hwo tɛ̀ me tyang.”

³Yɛsu a nára vwɔ mɛ, ko a ra mɛ̀ mwat o, a yang ɛ, “Ey, me simo; tɛ̀ tyang!” Remo-remo, sekwa mo sa hàla hɛ, ko a sɛ̀ netyang.

⁴Ko Yɛsu a yang ɛ, “Wok, hwo kwon ha a mwat hwak pyɛ de ma ga ra a hwo wɛt. Ko nára hwo vɔk na piris, na a bɛrɛng rebek mō. E bama mo, nára nɔrɔ hemo de Mose à kana nɔng nu e ra hɛ, na he dura a kawɛ mwat, hwà ga tɛ̀ tyang.”

⁵Jeng de Yɛsu a yel e ji Kafarnahum, gbɔng o wo bemât comô BeRoma hwak a vey na yɛ, a ra won,

⁶a ye, “À Da, mwât fwom hom a sé e dyɛngɛ e lɔ na serɔ̂ gbɛrɛ̂k nedem de se ro ɛ sizɔng.”

⁷Yɛsu a yang ɛ, “Mê wɔ̀ tɛ̀ ɛ tyang.”

⁸Ko gbɔng o mo a ye, “Kée wey, à Da! Ma ka vey na hwo yel e lɔ hom wɛt. Hwo hanat zɔng, ko mwât fwom hom ê tɛ̀ tyang.

⁹Yaga me pyɛ hom ma sé e nɛ̂n gbɔng mwat mot, ko me arɔng ma vɔk bemât como e nɛn hom. Me yâng womo, ‘Kyè!’ ko e kyè; me yâng woro, ‘Vey!’ ko e vey, ko me yâng sam hom, ‘Rá pyɛ yemo!’ ko e ra yɛ.”

¹⁰Sede Yɛsu a wok há mɛ, a langat hɛ, ko a yâng bemat de ba raa hɛ, “Mwin me ha a yin: Ma ga ka di mwat hwak e ji BeIsrayɛl de a tɛ̀ gap mɛ e ra me e gwong gwomo sede mwat womo wɛt!

¹¹Ma to sé ha a yin, bemat pyak ba rɔda yi e rwa rak na yi e rwa tā, ko yɛn ê sangal tanga Abraham, na Yishak, tanga Yakɔp e de re pyɛ́ e Segwɔm Lagwi.

¹²Ko vane de ba yâng sé e ji segwɔm o, ba rɔda ba gang ɛn e jey e ji lwīl, e kwɔn de yɛn a rɔda tosho na be roros yìn mɛn.”

¹³Ko Yɛsu a yâng gbɔng o wo bemât como mo, “Kyè wɔ e lɔ! Pyɛ de hwà tɛ̀ gap mō e ra me yaga yɛ, yê té.” Ko mwât fwom mɛ mo a tɛ̀ tyang e jeng mo.

¹⁴Jeng de Yɛsu a yel e lɔ Bitrus, a di gùna Bitrus o e dyɛngɛ pep-pep na bêk fes.

¹⁵A ra vwɔ mɛ, ko bêk fes o ha hàla hɛ. A sogo, ko a yong a yɛ pyɛ́.

¹⁶Sede nawiri na vey, bemat ba vɛ̀sɛ na bemat pyak de ba vɔk cēng. Yɛsu a paa begabik beves o na hâ nu mɛ zɔng, ko a tɛ̀sɛ bemât serɔ mo mwa tyang.

¹⁷A ra ano, yaga na be sila mɛ̀ pyɛ de Yɛshaya, zarap Dagwi, à kana ha wɔgɔ, “Yɛ pyɛ mɛ a jut nezap nerɔ mot, ko a to kyè na pyɛ́ de ye ro ot.”

¹⁸Sede Yɛsu a di regyɛng bemat ra gwɔrɔ hɛ, a nɔ̂ng bemât masâ fwom mɛ nu na be ye dɔ vɔk e gurâ gworep gworo.

¹⁹Ko mwât basâ Badu hwak a vey na yɛ, a yang ɛ, “À Mwat Basa, ma rɔda raa hwo vɔk e kahɛ kwɔn de hwô vɔk ɛ̀.”

²⁰Ko Yɛsu a toyo a yɛ, a ye, “Benɛ́t ba vɔk bavɔng mɛn; nenon arɔng na vɔk barɛngɛ mɛn. Ko Me de ma tɛ́ me mwat ma vɔk kwɔn de mê dyɛng ɛ̀ na me pɔnglɔ wɛt.”

²¹Mwat o hwak arɔng, gwining e ji bemât masâ fwom mɛ, a yang ɛ, “À Da, tík me, na me tānga wɔ̀ lɛrɛ da hom e ngyen.”

²²Ko Yɛsu a yang ɛ, “Raa me, tik na bavîn bemat be lɛsɛ bemɛn.”

²³Yɛsu a yel e dwa-nshi, ko bemât masâ fwom mɛ ba raa hɛ wɔ e ji mo.

²⁴E jeng o, gwogul gwa nusu, gwa hwo pɛsɛl na gap sedesi, ko gwa hashe nshi vɔk e ji dwa mo. Ko Yɛsu a sé e dyɛngɛ e de nevwa.

²⁵Bemat mɛ ba wɔ́ na yɛ, ba wɔ̀ shina hɛ, ba yang ɛ, “À Darwey, sey ot! Wot a sé kyè wɔ̀ ye pyɔp!”

²⁶Yɛsu a yang ɛn, “Yaga sɛ́ de yin a wok bengyip ano ɛ? À yin de yin e tɛ̀ gap min mwa e ra me wɛt!” Ko a sogo e tumal, a gyong gwogul o na nshi mo, ko kwɔn o ha ye yuu tyɔng wɛt.

²⁷Bemat o ba langat hɛn, ba ye, “Kée! E yerê wɛ̌ mwat a womo de gwogul na gworep be gyeng há mɛ ɛ?”

²⁸Jeng de Yɛsu a wɔ̀ wul e gura gworo e yɛnɛ̂ sevwêl BeGadara, bemat behak beba de ba vɔk cēng ba nusu yi e tara de be lɛsɛ ɛ̀ bavîn bemat, ba man na yɛ. Yɛn á ra yol tyɔng wɛt; yaga ano, vit a mwat de á tɔk kwey e gwong o.

²⁹Remo-remo, yɛn a gbɔ, ba ye, “À Hwey Dagwi, hwó simo sɛ́ na wot arɛt? Hwà ga vey e ngamo, na hwo tak a wot reyɔm gyam na jeng de bà kana yong ɛ̀ ye vey a?”

³⁰Kwarâ bezà rwey o gwa losho hɛ e hwomo bagat na yɛn e de rê sehwey.

³¹Ko cēng o ya ra won na Yɛsu, ya ye, “Ka sede hwô pat ot, ko tomo hot vɔk e kwarâ bezà mo, na wot a wɔ̀ yel e ji vɛ.”

³²A yâng yɛ̄, “Ci in!” Ano cēng o ya nusu, ko ya wɔ̀ yel e bezà mo. Kwara mo mwa gwa hwo tele cidirang e vwak, gwa wɔ̀ gaba e gworep, ko gwa wey.

³³Bemât gyeng bezà mo ba jut setele, ba wɔ̀ yel e repomo, ko ba wɔ̀ ha a bemat pyɛ̂ mwa tanga pyɛ de ya té na bemat de bá kana vɔk cēng o.

³⁴Bemât repomo mo mwa ba nusu na be wɔ̀ man na Yɛsu. Ko jeng de yɛn a di ɛ, yɛn a ra won na yɛ a hàla yɛnɛ̂ sevwel mɛn.