Read berom Matayus 9 Bible Online

Matayus 9 - berom bible

Matayus 9

¹Yɛsu a yel e dwa-nshi, ko a ye dɔ a gworep vɔk e repomo mɛ.[1]

²E hwomo, bemat behak ba vey a yɛ na mwat hwak de a vɔk serɔ̂ gbɛrɛ̂k nedem, a sé e gwocàre. Sede Yɛsu a di, yɛn a tɛ̀ gap mɛn e ra yɛ, a yâng mwât gbɛrɛ̂k nedem o, “À hwey hom, vɔk yey ting! Ba ga hàla a hwo banɛn mō.”

³Ko bemât basâ Badu behak e hwomo ba ha e neyey mɛn, “Mwat womo a jut tó mɛ sede Dagwi!”

⁴Yɛsu a tɔk pyɛ́ de yɛn a sé bare, ko a yang ɛn, “Yaga sɛ́ de yin a vɔk bare ves e neyey min ɛ?

⁵E hɛ̌ mo ha dal na be ye, ‘Ba ga hàla a hwo banɛn mō’, kɛ be ye, ‘Sogo, na hwo kyè!’ ɛ?

⁶Ko mê dura a yin, na yin tɔk, Me de ma tɛ́ me mwat ma vɔk reto e ngamo e jey na me hàla banɛn.” Ko a yâng mwât gbɛrɛ̂k nedem o, “Sogo, jut gwocàre mō, na hwo kyè vɔk e lɔ.”

⁷Ko mwat o a sogo, a kyè vɔk e lɔ.

⁸Jeng de bemat o mwa ba di ano, bengyip ba vo ɛn, ko ba nɔ̂ng Dagwi nerey, yaga a nɔ̂ng bemat yerê reto remo.

⁹Sede Yɛsu a hàla kwɔn hane, a sé kwey, ko a di mwât serês dyâm yeles na pyɛ́ hwak de ba tang ɛ, à Matayus e sangal e duk fwom mɛ. A yang ɛ, “Raa me.” Ko Matayus a sogo, a raa hɛ.

¹⁰Jeng de Yɛsu á sè sangal e de rê pyɛ́ e lɔ Matayus o, pyak e ji bemât serês dyâm yeles na pyɛ́ tanga bemât negwɔn neves ba vey, ko yɛn a re tanga yɛ na bemât masâ fwom mɛ.

¹¹Sede BeFarisi behak ba di ano, yɛn a rangal bemât masâ fwom mɛ, ba yang ɛn, “Yaga sɛ́ de mwât basa min e re pyɛ́ na bemât serês dyâm yeles na pyɛ́ tanga bemât negwɔn neves behak arɔng arɛt?”

¹²Sede Yɛsu a wok ano, a yang ɛn, “Bemat de ba sé tyang be wɔ e lɔ vwoshon wɛt sɛ̌ bemat de be ro ɛn.

¹³Ko cī in, na yin a bare e ra há hemo, ‘A sé e toshô reyɔm de me simo yi na yin, ko a sé e nɔrɔ̂ yas de be yɛt vɔk na Dagwi wɛt.’ Ma vey na me ba yila bemat berat wɛt ko vê banɛn e negya.”

¹⁴E bama mo, bemât raà Yohana wo batisma ba wɔ́ na Yɛsu, ko ba rangal hɛ, ba ye, “Yaga sɛ́ de wot tanga BeFarisi wot e tik rê pyɛ́, ko bemât masâ fwom mō be tik rê pyɛ́ wɛt ɛ?”

¹⁵Yɛsu a toyo a yɛn, a yang ɛn, “A sé naka na besâ rwâs gwel be lashe yey e jeng de rwâs gwel a sé tanga yɛn a? Kée wey! Ko jeng ye kyè vey de bê ba jut rwâs gwel o yi na yɛn. E jeng yane kwong, yɛn ê ba tik rê pyɛ́.

¹⁶“Vit a mwat de ê ra fwom na cɛ̌k rugu pyas de ba rɔɔ nà kus yɛ, na a bang mɛ̀ revɔng rugu de gwa ga kwop. Yaga cɛ̌k rugu pyas de a ga tɛ̀ yê gunung hɛ, yê gwɛ̌ hama rugu mo, yê tɛ̀ kwɔn o he tɛ́ ɛ rey o.

¹⁷Ko vit a mwat de ê tɛ̀ nshî anap de na rɔngɔl nà sogo e betsung de ba ga taksal. Ka sede a ra ano, ko betsung bê taksal nshî anap o nê tele e vwel, ko betsung o bê lashe hɛn arɔng. Wey, bé shusha nshî anap de na rɔngɔl nà sogo e ji betsung de ba ga taksal wɛt, ko pyɛ́ mo mwa bya yê nàra naka.”

¹⁸Jeng de Yɛsu a rɔɔ ha há hane, mwat hwak e ji bemakûk BeYuda a hwo yi, a gaba e nuyel mɛ, a ye, “Hwóng hom a sé mɛsɛ̂ng ku. Gabɔk wɛt, vey na hwo wɔ̀ tɛ̀ vɔ mō e ra yɛ, ko a rɔda to sè na neken.”

¹⁹Yɛsu a sogo, a kyè tanga yɛ, ko bemât masâ fwom mɛ arɔng ba dopɛ.

²⁰Hwā hwak á sè e hwomo de á sè tak reyɔm na serɔ̂ telê nemi neshey kuru na nɛ neba. A vey yi e bamâ Yɛsu, ko a ra nû gworugu mɛ.

²¹A hwo bare e yey mɛ, “Ka sede ma ra rugu mɛ zɔng, ko mê tɛ̀ tyang.”

²²Yɛsu a doyo, a di ɛ, ko a yang ɛ, “À hwóng hom, vɔk yey ting! Ba ga tɛ̀ o tyang, yaga hwà tɛ̀ gap mō e ra me wɔgɔ, mê tɔk tɛ̀ o tyang.” E jeng o, hwā mo a tɛ̀ tyang.

²³Jeng de Yɛsu a pom e lɔ mwât nuyel o, a di bemât pɛsɛ̂l jū tanga regyɛng bemat de ra shusha gwolwɛlɛ,

²⁴ko a yang ɛn, “Kyè in e jey! Hwōng o a ga ku wɛt, ko a sê nevwa zɔng!” Yɛn mwa ba hwo shɛgɛsh hɛ.

²⁵Ko e bama de ba ga paa ɛn e majey, Yɛsu a yel e ji mo, a kaba hwong o na vwɔ, ko hwong o a sogo.

²⁶Rehâ pyɛ de Yɛsu a ra mo ra shara hɛ e mwa yɛnɛ̂ sevwel o.

²⁷Sede Yɛsu a hàla kwɔn o, a sé kwey, ko bebók behak beba ba raa hɛ, ba gbɔ, ba tē, “À Hwey Davit, wok nemwishish mot!”

²⁸Jeng de Yɛsu a yel e lɔ, bebók o ba wɔ́ na yɛ, ko a rangal hɛn, a ye, “Yin a tɛ̀ gap min e ra me wɔgɔ, ma vɔk reto na me tɛ̀, yin a bɛɛ jey a?” Yɛn a yang ɛ, “Ey, à Da!”

²⁹Ko Yɛsu a ra bayis mɛn, a ye, “Tik na a sè ano, sede remo de yin a tɛ̀ gap min e ra me.”

³⁰Ko yɛn a to hwo bɛrɛng jey. Ko Yɛsu a pat bayis e ra yɛn, a yang ɛn, “Yin kwon ha a mwat hwak pyɛ yemo wɛt!”

³¹Ko yɛn a nusu, yɛn a hwo shara reha mɛ mo e mwa yɛnɛ̂ sevwel o.

³²Jeng de bemat o bá sè kyè wɔ̀ nusu, bemat behak ba vey a Yɛsu na mwat hwak de a tɔk ha wɛt, yaga a vɔk ceng.

³³Ko jeng de Yɛsu a pat ceng o, mwat o a hwo ha, ko regyɛng bemat ba langat hɛn, ba tē, “Wot a ga sang di pyɛ yerê yemo e sevwêl Israyɛl wɛt.”

³⁴Ko BeFarisi ba ye, “A sé e gwɔ̀m cēng de e nɔngɔs hɛ reto na a paa mɛ̀ cēng!”

³⁵Yɛsu a kyě kyè e mwa bapomo tanga nebapomo. A basa a bemat e beduk re fongol, ko a shara a yɛn Yɛgɛt Yat e ra Segwɔm Dagwi. A tɛ̀sɛ kasɛ̌ serɔ na kayɛ pyɛ de ya tak a bemat reyɔm tyang arɔng.

³⁶Sede a di regyɛng bemat, a wok nemwishish mɛn, yaga ba ga kyě luk ɛn, ko vit a mwat de a tɔk sɛlɛ hɛn; yɛn á sè sede vyēl de ya vɔk lwek wɛt.

³⁷Yaga ano, a yâng bemât masâ fwom mɛ, “Bwal o gwa sé pyak, ko bemât fwom o ba sé hyet zɔng.

³⁸Yaga ano, rá in won na Darwey, yɛ dâ bwal o, na a bin tomo bemat vɔk e de bwal mɛ mo.”