Read berom Markus 1 Bible Online

Markus 1 - berom bible

Markus 1

¹Mɛsɛ̂ng Yɛgɛt Yât Yɛsu Kristi, Hwey Dagwi, à yemo.

²Ya sé sede remo de Yɛshaya, zarap Dagwi, à kana jɛk e bwok-basa mɛ pyɛ de Dagwi à ha wɔgɔ, “Di, tom hom à womo; ma sé tomo hɛ e nuyel mō, na a yong gwong yaga hwo.”

³“Be wok fwɔ̂ mwat hwak gwo mok e hey, gwo tē, ‘Yóng in a Darwey gwong; tɛ̀ in gwɛ tas, na a bin kwey ɛ̀!’ ”

⁴Há hemo ha sila jeng de Yohana á sè e hey, ko a tɛ̀sɛ a bemat batisma. A shara a yɛn reha wɔgɔ, “Doyo hin yi e banɛn min, na be tɛ̀ a yin batisma, yaga na Dagwi a hàla a yin banɛn min.”

⁵Bemât mwa yi e sevwêl Yudiya na bemât mwa yi e gbɔng repomô Yɛrusalɛm ba kyese na yɛ. Yɛn a kulsa banɛn mɛn, ko a tɛ̀sɛ a yɛn batisma e ji Rɔt Yɔrdan.

⁶Yohana á tɛ̀sɛ gworugu de bá yong na setôt maryat, á rɔgɔs gyindî rehwo e rawit mɛ, ko a re yɔ́rɔ na shok.

⁷A ha a bemat, a yang ɛn, “Mwat de e kyè vey e bama hom a dal me na reto. Ma ka vey na me ye kwot, na me viri batsɛ̂p bekpatak mɛ wɛt.

⁸Me tɛ̀sɛ a yin batisma na nshi, ko yɛ de e kyè vey a rɔda tɛ̀sɛ a yin batisma na Gabik Jɛrɛ.”

⁹E ji nepɔlɔ nane, Yɛsu a vey yi e Nazarɛt wo Galili, ko Yohana a tɛ̀ a yɛ batisma e ji Rɔt Yɔrdan.

¹⁰Jeng de Yɛsu a nusu yi e nshi, a di lagwi wa wunta hɛ, ko Gabik Jɛrɛ ha sé gyirik sede gwobɔp, ha hwo e ra yɛ.

¹¹Ko fwɔ gwa yi e lagwi, gwa ye, “Hwà sé Hwêy yey hom, yey hom ya pɛngɛ na hwo sizɔng.”

¹²Ko remo-remo, Gabik Jɛrɛ ha gang ɛ vɔk e hey.

¹³A sangal e hwomo nepɔlɔ kuru banaas (40), ko Shetan a tɔgɔs hɛ na a ra banɛn. Ngyāma ya sé e hwomo arɔng, ko betom-lagwi ba nɔng ɛ pyɛ de e simo.

¹⁴Bama de ba ga tɛ̀ Yohana e ngyang, Yɛsu a wɔ́ e sevwêl Galili, a shara a bemat Yɛgɛt Yat yi na Dagwi.

¹⁵A yang ɛn, “Jeng ya ga vey de Dagwi ê kwɔk jut segwɔm e ra jey. Doyo hin yi e banɛn min, na yin a sey tsak o na Yɛgɛt Yat!”

¹⁶Jeng de Yɛsu a sé kwey e vwarâ Gworep Galili, a di bemât vôs betɔk beba, yɛ Simɔn na gwa mɛ Andarawus; ba sé vos betɔk e ji gworep na segun.

¹⁷Yɛsu a yang ɛn, “Raa me hin, ko ma rɔda masa a yin gwong de yin ê vɛ̀sɛ a me na bemat, tyɛng sede yin a sé vos betɔk a remo.”

¹⁸E ji jeng o, yɛn a pe hàla bagun mɛn, ko ba raa hɛ.

¹⁹Sede a gwɛ̌ kyè tyɔng vɔk e nuyel, a to di bemat beba, yɛ Yakɔp na gwa mɛ Yohana, nèy Zɛbɛdayus. Yɛn a sé e ji dwa-nshi, ba sé yong bagun mɛn.

²⁰Remo-remo, Yɛsu a yishi hɛn; ko yɛn a tik da mɛn Zɛbɛdayus na bemât fwom mɛ e ji dwa-nshi mo, ko yɛn a raa hɛ.

²¹Yɛn a yel e ji repomo de be tâng rɛ, à Kafarnahum. Tuk Shábat, Yɛsu a yel e duk re fongol mɛn, ko a hwo basa a bemat rehâ Dagwi.

²²Bemat o ba langat hɛn e ra gwong de a basa, yaga gwa sé detu na gwomo de bemât basâ Badu ba ra. Yɛsu a basa a yɛn na reto.

²³E ji jeng o, mwat hwak de a vɔk ceng a yel e duk re fongol o, ko a hwo gbɔ, a ye,

²⁴“À Yɛsu wo Nazarɛt, e sɛ́ de hwó simo hwo ra na wot arɛt? Hwà vey na hwo ba wey na wot a? Ma tɔk yerê mwat de hwà sé: Hwà sé mwât Dagwi de yɛ a tomo hɛ!”

²⁵Ko Yɛsu a pat bayis e ra ceng o, a yâng yɛ, “Sǎ yuu! Nusu yi e ji mwat womo!”

²⁶Ceng o ya digta mwat o na gap, ya dak sekun, ko ya nusu.

²⁷A vɛ̌ yâng bemat o mwa kpɔrɔk, ko ba hwo tâng bemɛn, “Hàa! E sɛ́ a yemo ɛ? E yerê basa mo pas o hak a hemo a? Mwat womo e nɔngɔ̂s cēng nu yi na reto, ko ye wokos hɛ!”

²⁸Ko há de ba ha e ra Yɛsu ha shara hɛ ziri e kahɛ kwɔn e ji sevwêl Galili.

²⁹E bama mo, yɛn a nusu yi e duk re fongol, ko yɛn a bérem vɔk e lɔ Simɔn na Andarawus; Yakɔp na Yohana ba kyè tanga yɛn.

³⁰Gùna Simɔn o á sè e dyɛngɛ pep-pep na bêk fes. Ko jeng de Yɛsu a yel e hwomo, bemat ba ha a yɛ, e ro ɛ.

³¹A wɔ́ na yɛ, a kaba vwɔ mɛ, ko a sogo hɛ. Bêk fes ha hàla hɛ, ko a yong a yɛn pyɛ́.

³²Nawiri jeng de gwi gwa gaba, bemat ba vɛ̀sɛ na mwa bemât serɔ na yɛ tanga vemo de ba vɔk cēng arɔng.

³³Mwa bemât repomo mo ba tula hɛn e nuyêl lɔ mo.

³⁴Ko Yɛsu a tɛ̀sɛ bemât serɔ pyak tyang, vemo de ba vɔk nezap nerɔ detidetu, ko a paa cēng pyak. A tik yɛ̄, na ye ha wɛt, yaga ya tɔk mwat de yɛ a sé.

³⁵E rwa hwol rey, Yɛsu a sogo, ko a tik lɔ mo. A vɔk e dem de vit a mwat, ko e hwomo a ra won.

³⁶Ko Simɔn na vemo de ba sé tanga yɛ ba nusu, ba wɔ̀ jāma hɛ.

³⁷Jeng de yɛn a sɛ̀ ɛ, yɛn a yang ɛ, “Bemât mwa ba sé jāma hwo!”

³⁸Ko Yɛsu a yang ɛn, “Tik na wot a vɔk e bapomo de ba sé bagat e ngamo, na me kyě basa e ji vɛ arɔng, yaga pyɛ ma yane de ya tɛ̀, ma vey.”

³⁹A kyě kyè mwa e ji sevwêl Galili, a shara rehâ Dagwi e beduk re fongol, ko a paa cēng arɔng.

⁴⁰Kparong hwak a vey na Yɛsu, a ye guduruk, ko a ra won na yɛ, a ye, “Ka sede hwà simo, ko hwà vɔk reto na hwo tɛ̀ me tyang.”

⁴¹Yɛsu a wok nemwishish mɛ, a hanat, a yang ɛ, “Ey, me simo.” A nára vwɔ mɛ, ko a ra mɛ̀ mwat o, a ye, “Tɛ̀ tyang!”

⁴²Remo-remo, sekwa mo sa hàla hɛ, ko a sɛ̀ netyang.

⁴³E bama mo, Yɛsu a hwo pat bayis e ra yɛ, a yang ɛ, “Wok, hwo ha a mwat hwak pyɛ de ma ga ra a hwo wɛt! Ko nára hwo vɔk na piris, na a bɛrɛng rebek mō. E bama mo, nára nɔrɔ de Mose à kana nɔng nu e ra hɛ, na he dura a kawɛ mwat, hwà ga tɛ̀ tyang.” E yɛnɛ mo, Yɛsu a tɛ̀ ɛ e gwong, a yang ɛ, “Nára hwo.”

⁴⁵Ko mwat o a nára hɛ, a vɛ̌ hwo bere reha mo ding-ding e kahɛ kwɔn. Ko há mo ha tɛ̀ Yɛsu a tɔk yel e repomo rehak gbey wɛt. A wusal e nedem de na sé vit a mwat. Ko bemat ba yís yi e nedem detidetu, ba kyè wɔ̀ sɛsɛm hɛ.