Read berom Markus 10 Bible Online

Markus 10 - berom bible

Markus 10

¹Yɛsu a tik kwɔn hane, a vɔk e sevwêl Yudiya, ko a ye dɔ e gurâ Rɔt Yɔrdan. Regyɛng bemat pyak ra to vey, ba sé tus ɛn na yɛ, ko a basa a yɛn, sede remo de a dopse ra.

²BeFarisi behak ba vey na yɛ, ba simo na be mara hɛ, ko ba rangal hɛ, ba ye, “Badu mot ba simo a mwat na a ro hwā mɛ arɛt?”

³Yɛsu a toyo a yɛn na rángal, a ye, “Mose à kana nɔng in nu, à ye ala arɛt?”

⁴Yɛn a yang ɛ, “Mose à kana simo a wot, na mwat a jɛk a hwā mɛ bwok gâs weneng, na a tɛ̀ ɛ e gwong.”

⁵Ko Yɛsu a yang ɛn, “Mose à jɛk a yin redu remo, yaga neyey min na sé kashalang.

⁶Ko yimo susu mo jeng de bà yong jey, bà ye, ‘Dagwi a yong bemat, rwas na hwā.’

⁷Bà to ye, ‘Pyɛ ma yemo de ya tɛ̀, rwas a rɔda tik da mɛ na neng mɛ, na a wuna hɛ na hwā mɛ,

⁸ko yɛn beba mo ba rɔda tɛ́ ɛn rebek rining.’ E ngamo nuyel, yɛn a to sé beba wɛt, ba sé pyɛ jining.

⁹Yaga ano, pyɛ de Dagwi a ga wuna, mwat a kwon gas yɛ wɛt.”

¹⁰E ji lɔ kwong, bemât masâ fwom mɛ ba to rangal hɛ há mo.

¹¹A yang ɛn, “Mwat de a ro hwā mɛ, na a to vo hwak a sé ra nejwang na wo neba mo.

¹²Ano arɔng, hwā de a hàla rwas mɛ, na a to wɔ̂ weneng o hak, yɛ arɔng a sé ra nejwang.”

¹³Bemat behak ba vey na nèy na Yɛsu, yaga na a bin tɛ̀ vɔ mɛ e ra nɛ, ko bemât masâ fwom mɛ ba hwo gyong ɛn.

¹⁴Sede Yɛsu a di ano, shom ya sogo a yɛ, ko a yang ɛn, “Tík in nèy na ne vey na me! Yin ro nɛ wɛt, yaga e bemat sede yerê nèy nemo de ba rɔda ba sangal e ji Segwɔm Dagwi.

¹⁵Tsak o mwin me ha a yin: Ka sede mwat a sey Dagwi sede hwey wɛt, na Dagwi a re negwɔm e ra yɛ, ko a rɔda ba yel e ji segwɔm o wɛt.”

¹⁶E bama mo, a kula nèy o, a tɛ̀ vɔ mɛ e ra nɛ, ko a tɛ̀ nerat e ra nɛ.

¹⁷Sede Yɛsu a to hwo kwɛngɛl mɛ, mwat hwak a tele na a man na yɛ, a pom, a ye guduruk e nuyel mɛ, a rangal hɛ, a ye, “À Mwat Basa, ma tɔk hwà sé mwat rwat. Mê ra sɛ́ na me bin sɛ̀ neken gbak-gbak arɛt?”

¹⁸Ko Yɛsu a yang ɛ, “Yaga sɛ́ de hwà yang me, ma sé mwat rwat arɛt? Vit a mwat rwat sɛ̌ Dagwi nju mɛ zɔng.

¹⁹Hwà tɔk badu wɔgɔ, ‘Hwo mɔrɔ mwat wɛt; hwo ra nejwang wɛt; hwo shigi wɛt; hwo ha hâ bɔs e ra mwat hwak wɛt; hwo mɔt mwat wɛt; nɔ̂ng da mō na neng mō nerey.’ ”

²⁰Ko mwat o a ye, “À Mwat Basa, ma hwo gyenges mwa badu mo yimo me wen vey e remo.”

²¹Yɛsu a bɛrɛng hɛ, ko a tɛ̀ yey na yɛ, a yang ɛ, “Hwà bidɛ pyɛ jining zɔng: Ci wɔ̀ row kayɛ pyɛ de hwà vɔk, na hwo gas a bepɛng dyām o, ko hwà rɔda ba sɛ̀ yas e lagwi. E bama mo, vey, na hwo ba raa me.”

²²Jeng de mwat o a wok ano, a rɔgɔs bayis mɛ, ko a nára hɛ na lashe yey, yaga yɛ a sé gbɔng darwey.

²³Yɛsu a bɛrɛng bemât masâ fwom mɛ, ko a yang ɛn, “E ba sè gbang na bedaberey be yel e ji Segwɔm Dagwi!”

²⁴A yang ɛn kpɔrɔk na há hane, ko Yɛsu a to yang ɛn, “À nèy hom, a sé gbang na be yel e ji Segwɔm Dagwi!

²⁵E ba sè nduga maryat wo yel e rewôl kwêt tolo, na darwey a yel e ji Segwɔm Dagwi.”

²⁶A vɛ̌ yâng bemat mɛ mo yɔɔt na há hane, ko yɛn a rangsâl bemɛn, “Ko sɛ̌ e wǎ de bê ba tɔk sey neken mɛ arɛt?”

²⁷Yɛsu a bɛrɛng hɛn, ko a yang ɛn, “Pyɛ yemo ye tɔk té na bemat wɛt, ko ye tɔk té na Dagwi, yaga Dagwi e tɔk ra kayɛ pyɛ.”

²⁸Ko Bitrus a hwo yang ɛ, “Di, wot a ga tik kayɛ pyɛ na wot a raa hwo!”

²⁹Yɛsu a yang ɛn, “Tsak o mwin me ha a yin: Kawɛ mwat de a ga tik lɔ mɛ, kɛ begwa mɛ, kɛ neng mɛ, kɛ da mɛ, kɛ nèy mɛ, kɛ cāp mɛ yaga me tanga yaga sharâ Yɛgɛt Yat,

³⁰a rɔda sɛ̀ pyɛ́ de ye ba dal mwa. E jeng yemo, a rɔda sɛ̀ ye dal zang naga (100) e ra nelɔ, na begwa mɛ, na beneng mɛ, na nèy mɛ, na cāp — mwa tanga reyɔm. Ko e jeng de ye kyè vey a rɔda ba sey neken gbak-gbak.

³¹Pyak e ji vemo de ba sé vê yel a remo ba rɔda ba tɛ́ ɛn vê bama; ko pyak e ji vemo de ba sé vê bama a remo kwong ba rɔda ba tɛ́ ɛn vê yel.”

³²Yɛn a ga kaba gwong vɔk e Yɛrusalɛm, ko Yɛsu a sé kyè e nuyêl bemât masâ fwom mɛ vemo de ba langat hɛn hɛ, ko bemat de ba sé raa hɛn e bama kwong yɛn a wok bengyip. Yɛsu a to jut yɛn kuru na vɛ beba e hagat, ko a ha a yɛn e ra pyɛ́ de ye kyè wɔ̀ té na yɛ.

³³A yang ɛn, “Wok in, wot a sé kyè vɔk e Yɛrusalɛm, e kwɔn de ba rɔda nára Me de ma tɛ́ me mwat e vɔ begbɔng bepiris tanga bemât basâ Badu. Yɛn a rɔda ra a me shɔt reku. Ano, yɛn a rɔda nára me e vɔ bemat beduk.

³⁴Yɛn o ba rɔda shɛgɛsh me, bê tulus me na netey, bê dak me na zining, ko bê mɔrɔ me. E bamâ nepɔlɔ netat, ma rɔda sene yi e reku.”

³⁵Ko Yakɔp na Yohana, nèy Zɛbɛdayus, yɛn a gwɛ̌ sek bagat na Yɛsu, yɛn a yang ɛ, “À Mwat Basa, wot a sé ra won na hwo, pyɛ cak ya sɛ́ de wot e simo hwo ra a wot.”

³⁶Yɛsu a rangal hɛn, a ye, “E sɛ́ de yin e simo me ra a yin arɛt?”

³⁷Yɛn a yang ɛ, “Jeng de hwó ba sangal e ra gwofwa negwɔm mō e ji gbɔng nerât negwɔm o, ko wot e simo na hwo tik ot na wot a sangal gwining e vwɔ yege mō na gwining e vwɔ mwɛlɛng mō.”

³⁸Yɛsu a yang ɛn, “Yin a tɔk pyɛ de yin a sé ra wôn yɛ wɛt. Yin e ba tɔk sɔ keshi reyɔm de me ba sɔ arɛt? Kɛ be ba tɔk tɛ̀ a yin batisma e gwong de be ba tɛ̀ a me arɛt?”

³⁹Yɛn a ye, “Ey, wot ê tɔk.” Yɛsu a yang ɛn, “Mwin, yin a rɔda sɔ keshi reyɔm de ma rɔda sɔ, ko bê tɛ̀ a yin batisma e gwong de ba rɔda tɛ̀ a me.

⁴⁰Ko ma vɔk reto na me kasa bemat de bê sangal e vwɔ yege na mwɛlɛng hom wɛt. A sé e Dagwi de e ba nɔng nekwɔn o vɔk na vemo de a ga kana yong nɛ yaga yɛn.”

⁴¹Sede bwang bemât masâ fwom kuru ba wok ano, yɛn a hwo tɛ̀ shom e ra Yakɔp na Yohana.

⁴²Ko Yɛsu a yila hɛn mwa hɛn, a yang ɛn, “Yin a tɔk, bemat vemo de ba ga tɛ̀ ɛn, na be sè begwɔ̀m e ra yére dyuk be re negwɔm e ra bemat mɛn na retek, ko bemakuk mɛn be vɔk reto e ra yɛn arɔng.

⁴³Ko ê sè ano na yin wɛt. Ka sede mwat hwak e ji min e simo na a tɛ́ ɛ gbɔng o, gbing-gbing na a sè mwât fwom min.

⁴⁴Ko ka sede mwat hwak e ji min e simo na a sè wo yel, gbing-gbing na a sè sam bemât mwa.

⁴⁵Yaga Me de ma tɛ́ me mwat ma vey na be ba ra a me fwom wɛt. Ko ma vey, na me ra fwom, na me nɔng neken hom, na me vibis mɛ̀ bemat pyak.”

⁴⁶Yɛn a vey e Yeriko. Sede Yɛsu a sé tik repomo mo tanga bemât masâ fwom mɛ, gbɔng regyɛng bemat ra raa hɛ. Ko bwók hwak de ba tang ɛ, à Bartimawus Timawus a sé e sangal e vwarâ gwong, a sé ra won.

⁴⁷Jeng de a wok, a sé e Yɛsu wo Nazarɛt, a hwo gbɔ, a ye, “À Yɛsu, Hwêy Davit, tosho reyɔm hom!”

⁴⁸Bemat pyak ba gyong ɛ, ko yɛn a yang ɛ, a sǎ yuu. Ko a gwɛ̌ ye ngyat, a ye, “À Hwey Davit, tosho reyɔm hom!”

⁴⁹Yɛsu a tumal, a ye, “Yila hin hɛ.” Yɛn a yila bwók o, yɛn a yang ɛ, “Vɔk yey ting! Sogo, a sé yila hwo!”

⁵⁰A pat pyɛ banga mɛ, a bomo yɛ, a gyili, ko a vey na Yɛsu.

⁵¹Yɛsu a rangal hɛ, a ye, “Hwó simo me ra a hwo sɛ́ arɛt?” Bwók o a yang ɛ, “À Mwat Basa, me simo me to bɛrɛng jey.”

⁵²Yɛsu a yang ɛ, “Kyè, ba ga tɛ̀ o tyang, yaga hwà tɛ̀ gap mō e ra me wɔgɔ, mê tɔk tɛ̀ o tyang!” E ji jeng o, a hwo bɛrɛng jey, ko a raa Yɛsu e gwong.