Read berom Markus 11 Bible Online

Markus 11 - berom bible

Markus 11

¹Jeng de yɛn a vey bagat na Yɛrusalɛm, ba pom e nebapomô Bet-Fage na Bet-Anya de ba sé e vwâ Raku Pàt. Yɛsu a hwo tomo bemât masâ fwom mɛ beba,

²a yang ɛn, “Kyè in vɔk e kerepomo kane e nuyel min. Sede yin a yel e hwomo, yin a rɔda di hwêy madung e rɔgɔs, hemo de vit a mwat de a ga kana laga hɛ. Viri hin hɛ, na yin a vey mɛ̀.

³Ka sede mwat hwak a rangal hin, ‘Yaga sɛ́ de yin a sé ra ano arɛt?’ ko yang in hɛ, ‘Darwey e simo hɛ, ko a rɔda toyo na hɛ ziri.’ ”

⁴Yɛn a kyè, ko ba pom, ba sɛ̀ hwêy madung e vwâ gwong e rɔgɔs e majêy lɔ hak. Jeng de yɛn a hwo viri hɛ,

⁵bemat behak de ba sé e hwomo e tumal ba rangal hɛn, ba ye, “Yaga sɛ́ de yin a sé viri hwêy madung o arɛt?”

⁶Ko yɛn a ha tyɛng sede remo de Yɛsu a ha a yɛn, ko bemat o ba tik ɛn be kyè na hɛ.

⁷Yɛn a vey na hwêy madung o na Yɛsu. E hwomo, yɛn a paa pyɛ̂ banga mɛn, ba tɛ̀sɛ yɛ̄ e ra mâ madung o, ko Yɛsu a laga wɛ.

⁸Bemat pyak ba lasha pyɛ̂ banga mɛn e gwong, behak kwong ba lasha berang de yɛn a kwɔrɔs e règyeng.

⁹Bemat de ba sé kyè e nuyel tanga vemo de ba sé raa hɛ e bama ba hwo gbɔ, ba tē, “Hosana! Bē somo Dagwi! Tik na Dagwi a tɛ̀ nerat e ra womo de e kyè vey e ji rezâ Darwey!

¹⁰Tik na Dagwi a tɛ̀ nerat e ra jeng rê negwɔm de ye kyè vey, yemo de ya rɔda sè tyɛng na jeng de da mot Davit à kana re negwɔm! Bē somo Dagwi!”

¹¹Yɛsu a pom e Yɛrusalɛm, a yel e Gbɔng Duk Re Fongol, ko a kyě bɛrɛng pyɛ̂ mwa. Ko yaga jeng ya ga kyè, a nusu vɔk e Bet-Anya tanga bemât masâ fwom mɛ kuru na vɛ beba.

¹²Nusu hwol, sede yɛn a to ɛn yi e Bet-Anya, Yɛsu a wok vyong.

¹³Yi e jey, a di retîn regwi de ra vɔk berang, ko a wɔ̀ di, a tē kɛ gyeng ê sɛ̀ nèy o e ra rɛ. Ko jeng de a pom e hwomo, a di pyɛ cak wɛt sɛ̌ berang, yaga retîn regwi re tɔs e jeng o wɛt.

¹⁴Ko a yâng rɛ, “Vit a mwat de a rɔda to ba re nèy mō neshey gbak-gbak!” Bemât masâ fwom mɛ arɔng ba wok pyɛ de a ha.

¹⁵Sede yɛn a pom e Yɛrusalɛm, Yɛsu a wɔ̀ yel e nelalâ Gbɔng Duk Re Fongol, a hwo ro bemât rɛsɛl pyɛ́ tanga vemo de ba sé seres yɛ̄ yi e hwomo. A gangas betebut bemât segsâ dyām, na necɔgɔ̂t sangsâl bemat de ba sé rɛsɛl bebɔp,

¹⁶ko a tik mwat hwak a kwey na pyɛ cak e nelalâ Gbɔng Duk o wɛt.

¹⁷Ko a basa a bemat, a yang ɛn, “Bà jɛk e Bwok-basa Dagwi wɔgɔ, Dagwi a ye, ‘Ba rɔda tâng lɔ hom, à duk won yaga mwa yére bemat jey.’ Ko yin, yin a ga tɛ̀ hɛ he tɛ́ ɛ fwarâ begbik!”

¹⁸Jeng de begbɔng bepiris tanga bemât basâ Badu ba wok ano, yɛn a hwo jāma begwong de bê mɔrɔ hɛ. Ko yɛn a wok bengyip mɛ, yaga bemât mwa ba langat hɛn bása mɛ.

¹⁹Ko jeng de nahywegelek na vey, Yɛsu na bemât masâ fwom mɛ ba tik repomo mo.

²⁰Bop nagasi kwong, sede yɛn a sé kwey, yɛn a di retîn regwi o ra ga hworok yi e nelang o vɔk e berinis o.

²¹Bitrus a bare na pyɛ de Yɛsu a kana ha, ko a yang ɛ, “Di, à Mwat Basa, retîn regwi remo de hwà sira a rɛ ra ga hworok!”

²²Yɛsu a hanat, a yang ɛn, “Tɛ̀ in gap min e ra Dagwi.

²³Tsak o mwin me ha a yin: Yin ê tɔk yâng raku womo, ‘Sogo, na hwo wɔ̀ gaba e ji gworep.’ Ka sede yin a tó yey wɛt, ko yin a sey tsak o wɔgɔ, pyɛ mo yê té, ko mwin, ya rɔda té.

²⁴Yaga ano, ma sé ha a yin: Jeng de yin a sé ra won na Dagwi, na yin a rangal hɛ pyɛ cak, tɛ̀ in gap min e ra yɛ wɔgɔ, yin a ga sɛ̀ yɛ, ko yin a rɔda sɛ̀ yɛ.

²⁵Ko jeng de yin a sé ra won, hàla hin kayɛ pyɛ de rɔ̌ yin a vɔk na mwat hwak, yaga na Da min e lagwi a bin hàla a yin buru min arɔng. [

²⁶Ko ka sede yin a hàla a bemin wɛt, Da min e lagwi arɔng a rɔda hàla a yin buru min wɛt.]”

²⁷Yɛn a to ɛn vɔk e Yɛrusalɛm. Sede Yɛsu a sé kyè e Gbɔng Duk Re Fongol, begbɔng bepiris, na bemât basâ Badu, tanga bemakuk ba hwo vey na yɛ,

²⁸ba rangal hɛ, ba ye, “E rɛ̌ reto de hwà vɔk de hwó ra mɛ̀ pyɛ́ yemo arɛt? E wà de a nɔng o retô râ yɛ̄ arɛt?”

²⁹Yɛsu a hanat, a yang ɛn, “Mê rangal hin pyɛ cak arɔng. Ka sede yin a ha a me, ko ma rɔda ha a yin yerê reto de ma vɔk na me ra mɛ̀ pyɛ́ yemo.

³⁰Há a me hin: Yohana á sɛ̀ retô râ batisma yi e gwa arɛt? Á sɛ̀ rɛ yi na Dagwi a? Kɛ yi na bemat arɛt?”

³¹Yɛn a hwo tó cuna na bemɛn, “Sɛ̌ wot ye ala arɛt? Ka sede wot a ye, ‘Rá yi na Dagwi’, a rɔda yang ot, ‘Yaga sɛ́ de yin á sey tsak o na há mɛ wɛt arɛt?’

³²Ko ka sede wot a ye, ‘Rá yi na bemat’, bemat ba rɔda doyo e ra wot, yaga yɛn mwa ba jut Yohana á sè zarap Dagwi.”

³³Yaga ano, yɛn a yâng Yɛsu, “Wot a tɔk wɛt.” Ko Yɛsu a yang ɛn, “Me arɔng mê ha a yin wɛt kɛ na e rɛ̌ reto de me ra mɛ̀ pyɛ́ yemo.”