Read berom Markus 12 Bible Online

Markus 12 - berom bible

Markus 12

¹E bama mo, Yɛsu a hwo ha a bemat na gwɔrɔ-há, a yang ɛn, “Mwat hwak a sé de a how bwi, ko a tus ɛ̀ cɔ́gɔt anap. A ta gwɛ naka, a cing kwɔ̂n farâng nèy anap, ko a to lɔk dem hak de mwat ê wɔ̀ sangal ɛ̀ na a bɛrɛng bwi mo. Ano kwong, a tik gwɛ e vɔ bemat behak na be bɛrɛng a yɛ, ko a kyè vɔk e sevwel sehak.

²Sede jeng vêl nèy cɔ́gɔt o ya vey, a tomo hwak e ji besam mɛ vɔk na bemât bɛrɛng bwi mo, na a wɔ̀ sey a yɛ numo mɛ e ji pyɛ́ de ya ga vel.

³Ko bemat o ba vo ɛ, ba dak ɛ, ko ba tomo hɛ vɔ sǎn.

⁴Dâ bwi mo a to tomo sam o hwak na yɛn. Wane kwong yɛn a dak ɛ e rato, ba mǎ hɛ, ko ba ha a yɛ há ves.

⁵E bama mo, a to tomo hwak gbak; e remo, yɛn a mɔrɔ hɛ. Ko yɛn a ra a behak pyak ano: Ba dakas behak, ko ba mɔbɔs behak.

⁶Mwat de a tɛt ɛ̀ sana tomo a sé hwêy yey mɛ. E tala mo kwong, a tomo hɛ vɔk na yɛn, a ye, ‘Yɛn a rɔda nɔ̂ng hwey hom nerey.’

⁷Ko bemât bɛrɛng bwi mo ba yâng bemɛn, ‘Hwey de he ba re nedanelɔ mɛ ma hemo! Vey in, na wot a mɔrɔ hɛ, na pyɛ̂ nedanelɔ mɛ ye bin tɛ́ ɛ myot!’

⁸Yɛn a vo hɛ, ba mɔrɔ hɛ, ko yɛn a bomo revin o e bamâ bwi.

⁹“E sɛ́ kwong de dâ bwi mo a rɔda ra arɛt? A rɔda kyè na a wɔ̀ mɔbɔs bemat o, ko a rɔda jut bwî anap o, a nɔ̂ng bemât bɛrɛng behak.

¹⁰Yin a ga basa há hemo e Bwok-basa Dagwi wɛt arɛt? Hā ye: “ ‘Gwofwa de bemât lɔ̂k duk ba kyɛ́ ɛn gwɛ wɔgɔ, gwa vɔk fwom wɛt, e gwɛ de gwa tɛ́ ɛ gbɔng gwofwa râ fwom.

¹¹A sé e Darwey de a ra ano, ko na wot, a sé pyɛ langat sizɔng!’ ”

¹²Ko bemât nuyêl BeYuda ba jāma begwong na be tɛ̀ be vo ɛ, yaga yɛn a tɔk, a ha gwɔrɔ-há mo e ra yɛn. Ko yaga yɛn a wok bengyip regyɛng bemat, yɛn a tik ɛ, ko ba kyè nedem mɛn.

¹³Ba tomo behak e ji BeFarisi tanga bemât raà Herodes wɔ na Yɛsu, na be sɛ̀ ɛ na há hak de ha sé tyɛng wɛt.

¹⁴Sede yɛn a pom, yɛn a yang ɛ, “À Mwat Basa, wot a tɔk, hwà sé mwat de hwó ha tsak o. Vit a pyɛ de ye bɔrɔk hwo na báre mwat hwak, yaga bemât mwa ba sé tyɛng e nuyel mō, ko hwó basa a yɛn pyɛ de ya sé tsak o e ra gwong de Dagwi e simo be raa gwɛ. Hā a wot, Badu mot ba simo a wot na wot a talâ Da vwel BeRoma dyâm vwel arɛt? Ko sɛ̌ wot tala yɛ̄ a? Kɛ wey arɛt?”

¹⁵Ko Yɛsu a pere di yerê netsitsɛng neves mɛn nane, a yang ɛn, “Yaga sɛ́ de yin e simo yin a tɛ̀ a me segun arɛt? Vey a me hin na dyam, na me di yɛ̀.”

¹⁶Yɛn a vey a yɛ mɛ̀, ko a rangal hɛn, a ye, “E ratô wà na rezâ wà de ba tɛ̀ e ra dyam o arɛt?” Yɛn a yang ɛ, “A sé rê Da vwel BeRoma.”

¹⁷Ko Yɛsu a yang ɛn, “Yàa! Tala hin Da vwel BeRoma pyɛ de ya sé myɛ; ko tala hin Dagwi pyɛ de ya sé ye Dagwi.” Ko yɛn a langat hɛn hɛ sizɔng.

¹⁸BeSaduki behak ba vey na Yɛsu. Yɛn a vemo de be tē, vit a mwat de a rɔda ba sene yi e reku.

¹⁹Yɛn a yang ɛ, “À Mwat Basa, Mose à kana jɛk a wot há hemo, a ye, ‘Ka sede mwat a ku, na a tik hwā mɛ vit à nèy, a sé gbing-gbing na gwa mwat o a vɔk kuma mo, na rɔ̌ be tɔs nèy, na be sɛ̀ mɛ̀ yerê lɔ mo.’

²⁰Hwà di a? Bemat behak bá sè betaama e neng mɛn. Kunat o a vo hwā, ko a ku sana sɛ̀ nèy.

²¹E bama mo, womo de a raa hɛ a vɔk hwā mo, ko a ku sana sɛ̀ nèy arɔng. Pyɛ jining o ya té na gwa mɛ wo netat.

²²Ano ya té na bwang o: Mwa hɛn betaama ba vɔk ɛ, ba kushu, ko vit a sɛ̀ nèy na hwā mo. E yɛnɛ mo, hwā mo arɔng a ku.

²³Ko di, tuk sensa bemat, hwā mo a rɔda ba tɛ́ ɛ wo wà arɛt? Yaga mwa hɛn betaama ba ga vɔk ɛ.”

²⁴Yɛsu a yang ɛn, “Yin vɛ, yin a tɔk há tyɔng wɛt! Ko yin a tɔk pyɛ de ya tɛ̀ in, na yin a ha ano arɛt? A sé yaga yin e dunus Bwok-basa Dagwi tanga reto mɛ arɔng.

²⁵Jeng de bemat de ba ga kushu ba rɔda ba sensa yi e reku, yɛn e to ba vos beha wɛt, ko beha be to ba kyese neweneng arɔng wɛt. Yɛn a rɔda ba sè sede betom-lagwi.

²⁶Ko e rà sensa bemat yi e reku — yin a basa e Bwok-basa Mose e kwɔn de bà ha mɛ̀ rehâ kya de hà lolo e reburuk wɛt arɛt? E hwomo, bà jɛk wɔgɔ, Dagwi à yâng Mose, ‘Me ma sé Dagwî Abraham, na wo Yishak, na wo Yakɔp.’

²⁷Hane ha dura, yɛ a sé Dagwî bavin wɛt, ko a sé Dagwî bemat de ba sé na neken, mwa ano de yɛn a ga kushu. Yin a ga buru ding-ding!”

²⁸Hwak e ji bemât basâ Badu á sè wokos pyɛ de yɛn á sè tó mɛ̀ cuna e ra tɛt o. A di, Yɛsu a ha a BeSaduki yɛt. Yaga ano, a gwɛ̌ sek na a rangal hɛ, a ye, “E rɛ̌ redu de ra dal bwang o mwa na nerey arɛt?”

²⁹Yɛsu a yang ɛ, “Redu de ra dal bwang o mwa na nerey à ret ngan: ‘Wet in betong, à yin BeIsrayɛl! Darwey Dagwi mot a sé Darwey gwining zɔng.

³⁰Ko tɛ̀ in yey na Darwey Dagwi min na yey min mwa, na neken min mwa, na tɔ́k min mwa, na gap min mwa arɔng.’

³¹Redu re neba rerey o a ret ngan: ‘Tɛ̀ yey na mwât vwara mō, sede hwà tɛ̀ yey na tó mo.’ Vit a redu rehak de ra dal vemo.”

³²Mwât basâ Badu mo a yâng Yɛsu, “Mwin, à Mwat Basa, hwà ha yɛt! Dagwi a sé gwining zɔng, vit a hwak sɛ̌ yɛ.

³³Ko a sé gbing-gbing na mwat a tɛ̀ yey na Dagwi na yey mɛ mwa, na tɔ́k mɛ mwa, na gap mɛ mwa arɔng, na a to tɛ̀ yey na mwât vwara mɛ sede a tɛ̀ yey na tó mɛ. A dal na nerey na mwat a gyeng badu vemo baba, de a rangas ngyāma burang e ra gàgbang rangâs pyɛ́, na bwang nenɔrɔ̂ yas de be yɛt vɔk na Dagwi.”

³⁴Sede Yɛsu a tɔk sá mo a ha na netsitsɛng, a yang ɛ, “Hwà ga hwo mɛsɛ̂ng tɔk pyɛ de be simo na mwat a ra, womo de Dagwi e re negwɔm e ra yɛ.” E bamâ há mo, vit a mwat de a vɔk yey ting na a to rangâl Yɛsu rangal hak.

³⁵Sede Yɛsu á sè basa e Gbɔng Duk Re Fongol, a ye, “E rɛ̌ de bemât basâ Badu be tē, Mwat de Dagwi a kasa na a sey bemat a sé hwêy Davit arɛt?

³⁶Gabik Jɛrɛ hà tɛ̀ Davit a ha wɔgɔ, “ ‘Dagwi Darwey a yâng Darwey hom: Sangal e ngamo e vwɔ yege hom, sɛ̌ ma tɛ̀ bemât repugu mō e nɛ̂n bol mō.’

³⁷Davit pyɛ mɛ à tâng Mwat de Dagwi a kasa na a sey bemat, à Darwey. E rɛ̌ de mwat o ê sè hwêy Davit o arɛt?” Regyɛng bemat ra wok hâ Yɛsu, ko ra vɔk yey pyɛng.

³⁸Jeng de a sé basa a yɛn, a ye, “Tē in naka na bemât basâ Badu! Be simo na be kyě kyè e begbɔng berugu belis, na be tē a yɛn kwot, na be tang ɛn show e dúra.

³⁹Yɛn e kasa nekwɔn de be tikis a bemat beting e beduk re fongol, ko be jāma nekwɔn begbɔng bemat e kwɔ̂n rê pyɛ́ na be saras ɛ̀.

⁴⁰Yɛn e ra won lis na be dura, yɛn a dal bemat na re a Dagwi fongol, ko e ji hâ mwin, yɛn e doyo, ko be kyě re pyɛ̂ bekuma na be mɔt ɛn e ra nelɔ mɛn. Kis! Rezot mɛn re ba dal na neves!”

⁴¹Sede Yɛsu a sangal bagat na kwɔ̂n tɛ́sɛ dyām e Gbɔng Duk Re Fongol, a sé bɛrɛng bemat de be tɛ̀sɛ dyām mɛn e ji mo. Bedaberey pyak ba tɛ̀sɛ dyām pyak e ji mo.

⁴²Ko kuma hwak de a sé pɛ́ng-pɛng a pom, a tɛ̀ nedyam zwey neba de na sé sede kobo gwining zɔng.

⁴³Ko Yɛsu a yila bemât masâ fwom mɛ e dem hining, a yang ɛn, “Tsak o mwin me ha a yin: Kuma womo de a sé pɛ́ng-pɛng a tɛ̀ pyɛ de ya dal yemo de bwang bemat ba tɛ̀sɛ.

⁴⁴Yaga mwa hɛn ba vɛ́sɛ yi e ji pyɛ̂ nedanerey mɛn, ko ba tɛ̀sɛ. Ko yɛ, mwa ano de a sé pɛ́ng-pɛng, a tɛ̀ mwa pyɛ de a vɔk; a nɔng mwa pyɛ de ê re mɛ̀ pyɛ́.”