Read berom Markus 13 Bible Online

Markus 13 - berom bible

Markus 13

¹Sede Yɛsu á sè nu ɛ yi e Gbɔng Duk Re Fongol, gwining e ji bemât masâ fwom mɛ a ha a yɛ, a ye, “À Mwat Basa, di yerê beta berey vemo na yerê lɔ̂k nelɔ nerat nemo!”

²Ko Yɛsu a hanat, a yang ɛ, “Hwà di gbɔng nelɔ nemo a? Vit a gwofwa gwohwak e ngamo de ba rɔda ba tik gwɛ e ra tɛ̂t mumwɛ; ba rɔda ba gangas vɛ mwa e vwel.”

³Jeng de Yɛsu á sè e sangal e Raku Pàt de wa sé e gura e bayîs Gbɔng Duk Re Fongol, Bitrus, na Yakɔp, na Yohana, tanga Andarawus ba wɔ́ na yɛ zɔgɔ̂ hɛn.

⁴Yɛn a hwo rangal hɛ, yɛn a ye, “Hā a wot, pyɛ́ yemo ye ba té nayu ɛ? Ko e sɛ́ de ye ba dura a wot, pyɛ́ mo mwa ya sé kyè ba té arɛt?”

⁵Yɛsu a yang ɛn, “Tē in naka, mwat hwak a kwon kwɛlɛng hin wɛt!

⁶Bemat pyak ba rɔda ba vey e ji reza hom, ko kawɛ e ji mɛn ê ba ye, yɛ a sé me. Ko yɛn ê ba tɛ̀ bemat pyak be vuru gwong.

⁷Yin vo yey wɛt jeng de yin e ba wok rehâ tô como bagat kɛ yikyik ayi. Gbing-gbing na pyɛ́ yane ye ba té, ko jeng ye yɛnɛ mo ya ga vey e ngyen wɛt.

⁸Yerê bemât jey ya rɔda ba tó como na bemɛn, ko yere arɔng ya rɔda ba tó como na yere cak. Vwel ha rɔda ba digis e nedem detidetu, ko vyong ya rɔda ba sè. Pyɛ́ yemo ya sé sede mɛsɛ̂ng rûs tɔ́.

⁹“Tē in naka na bato min, yaga ba rɔda ba vos in, ko bê ba nása hin e nuyêl bemât shɔt. Yɛn a rɔda ba dak in e beduk re fongol; be ba yila hin e nuyêl begbɔng begwɔ̀m na begwɔmna, yaga yin e raa me. E jeng o, yin a rɔda ba nɔng nuha e ra Yɛgɛt Yat e nuyel mɛn.

¹⁰Gbing-gbing sɛ̌ bemat ba tānga shara a yerê bemasî mwa e jey Yɛgɛt Yat.

¹¹Ko jeng de be ba vos in, na be ba vɔk na yin e nelɔ shɔt, yin sap gyam rehâ pyɛ de yin ê ha wɛt. E jeng o, yin a rɔda ba ha pyɛ de bê nɔng in, yaga a sé e yin de yin ê ba ha wɛt, ko a sé e Gabik Jɛrɛ de hê ha.

¹²Gwà a rɔda ba nára gwa mɛ, na be mɔrɔ hɛ; ko da a rɔda ba ra tyɛng ano na hwey mɛ. Nèy na rɔda ba doyo e ra beda na beneng mɛn, ko nê ba tɛ̀ be mɔbɔs hɛn.

¹³Kawɛ mwat a rɔda ba bɛɛ hin ves, yaga yin e raa me. Ko ba rɔda ba sey mwat de a niri vɔk e yɛnɛ mo.”

¹⁴“Yin a rɔda ba di ‘Pyɛ vyes sizɔng de ye tɛ̀ kwɔ̂n jɛrɛ ligis’ e tumal e kwɔn de ha jam na ye tumal ɛ̀ wɛt.” (Mwat de e basa há hemo, tik na yɛ a tɔk.) “E jeng o, tik na bemat de be ba sè e sevwêl Yudiya be tele vɔk e beraku.”

¹⁵Womo de e ba sè e sangal e ji fwam, a kwon yel e ji lɔ na a lashe jeng e de jût pyɛ mɛ cak wɛt.

¹⁶Ko womo de e ba sè e hey kwong, a to ɛ vɔk e lɔ, na a wɔ̀ jut pyɛ banga mɛ wɛt.

¹⁷Yaa kukuuk! Gawey e ra beha de bê ba vɔk jim, mwa na vemo de bê ba ngas nèy e jeng o!

¹⁸Rá in won na Dagwi, na pyɛ́ yemo ye ba té nabolos wɛt!

¹⁹Yaga e jeng o, bemat ba rɔda ba sɛ̀ reyɔm reves o, yerê remo de ba ga kana sɛ̀ rɛ wɛt yimo susu mo jeng de Dagwi à yong jey vey e jeng yemo, ko ba rɔda to ba sɛ̀ yerê rɛ arɔng wɛt.

²⁰Ko ka Darwey a yâng tɛt nepɔlɔ mo wɛt, ka vit a mwat de a yâng ba làl. Ko a sé yaga bemat de yɛ a ga kana kasa de a tɛt nepɔlɔ mo.

²¹“E jeng o, ka sede mwat hwak a yang in, ‘Di, Mwat de Dagwi a kasa na a sey bemat á womo!’ kɛ ‘Di, á woro!’ — yin sey tsak o na há mɛ wɛt.

²²Yaga bemât bɔs de be tē, yɛn a sé vemo de Dagwi a kasa, tanga bezarap Dagwi vê bɔs ba rɔda ba nusu. Yɛn ê ba ra pyɛ̂ bes, ko bê to ba dúsa pyɛ́ de bemat ba rɔda ba langat hɛn, yaga na be kwɛlɛng mɛ̀ bemat de Dagwi a ga kasa, ka sede yɛn ê tɔk ra ano.

²³Tē in naka! Ma ga ha a yin pyɛ́ yemo mwa gyam na ye té.”

²⁴“E bamâ jeng reyɔm yane, gwi gwa rɔda ba tɛ́ ɛ mwangalang, ko pwɛl gwa rɔda ba pɛngɛ wɛt,

²⁵netangacɛn na rɔda ba gabsa yi e lagwi, ko pyɛ́ de ya vɔk reto e gwi ba rɔda ba kàsa yɛ̄ e begwông yɛ̄.

²⁶E jeng o kwong, bemat ba rɔda ba di Me de ma tɛ́ me mwat: Me kyè vey e ji bale na reto sizɔng tanga nedyɛt nerat.

²⁷Ko ma rɔda ba tomo betom-lagwi vey e jey vɔk e rwa gùl naas, na yɛn a ba tula bemat de Dagwi a ga kasa yi e yɛnɛ̂ jêy bak womo vɔk e yɛnɛ̂ jêy bak woro.”

²⁸“Tik na yin a masa yi e retîn regwi. Jeng de nelang o ne tɛ́ ɛn yɔkyɔk na ne hwo turuk, ne tɛ̀sɛ berang, ko yin a tɔk, swigi gwa ga vey bagat.

²⁹Tyɛng ano arɔng, jeng de yin a di pyɛ́ yemo ya ga hwo té, ko yin a tɔk, jeng hom ya ga vey bagat, ko ma sé lɛs e rwi duk.

³⁰Tsak o mwin me ha a yin: Bemat de ba sé beken a remo, mwa vɛ ba rɔda kushu wɛt, sɛ̌ pyɛ́ yemo mwa ya té.

³¹Jey tanga lagwi ba rɔda ba tala hɛn, ko reha hom ra rɔda ba tala hɛ ko tyɔng wɛt.”

³²“Vit a mwat de a tɔk tuk na jeng o, kɛ betom-lagwi kɛ Hwey Dagwi, sɛ̌ Da nju mɛ zɔng de a tɔk.

³³Tē in naka, na yin a bɛrɛng nekanang! Yaga yin a tɔk tuk de jeng o yê ra wɛt.

³⁴E ba sè sede mwat de e sogo wɔ̂ rekyɛn: E tik besam mɛ na be bɛrɛng a yɛ lɔ, e nɔ̂ng kawɛ e ji mɛn fwom de ê ra, ko e ha a lwêk rwi duk, yɛ a bɛrɛng nekanang.

³⁵Yaga ano, bɛrɛng hin nekanang arɔng, yaga yin a tɔk jeng de dalɔ mo ê pom wɛt: Ê tɔk sè nawiri, kɛ nakabadem, kɛ e rwa-hwol gasi rey, kɛ e rwa hwol gasi cereng.

³⁶Ka sede a pom pút, yɛ a sɛ̀ in e de nevwa wɛt.

³⁷Pyɛ de me ha a yin ya sé yaga bemât mwa arɔng: Bɛrɛng hin nekanang!”