Read berom Markus 14 Bible Online

Markus 14 - berom bible

Markus 14

¹Á sè bwang nepɔlɔ neba na be yel e ji Nzem Gyilsit Nelɔ BeIsrayɛl tanga Nzem Kpam-tuk Sana Géy-sing. Begbɔng bepiris tanga bemât basâ Badu ba jāma gwong na be vo Yɛsu yaang, na yɛn a tɛ̀ be mɔrɔ hɛ.

²Ko yɛn a ye, “Wot kwon vo ɛ e jeng nzem wɛt, yaga bemat bê hwo ot na yol.”

³Yɛsu á sè e Bet-Anya e ji lɔ Simɔn de á kana sè kparong. Jeng de a sé e de rê pyɛ́, hwā hwak a yi na kefus de ba yong na gwofwa alabasta, de ka sila na něy nât nerat. Něy o na sé nè nesang hyɔɔlɔl, ko na vɔk dyām sizɔng. A kwɔrɔ fwɔ kefus o, ko a shushu něy o e ratô Yɛsu.

⁴Bemat behak e hwomo ba tɛ̀ shom, ko ba yâng bemɛn, “Yaga sɛ́ de ba lashe něy nemo arɛt?

⁵Ba yâng tɔk row nɛ e nû pyɛ de ya dal dyâm fwôm mwat yê shey hining, na be gas a bepɛng yɛ̄!” Ko yɛn a pat bayis e ra yɛ, ba gyong ɛ e ra pyɛ de a ra.

⁶Ko Yɛsu a yang ɛn, “Tík in hɛ! Sɛ́ min ya sɛ́ na yɛ arɛt? Yɛ a ga ra a me pyɛ ryat.

⁷Bepɛng bê sè na yin kayɛ jeng, ko mwa jeng de yin e simo kwong yin ê tɔk sɛlɛ hɛn. Ko me, mê sè na yin kayɛ jeng wɛt.

⁸Hwā mo a ga ra pyɛ de a ga tɔk ra: A ga shushu něy nesang hyɔɔlɔl o e ra rebek hom, na a mɔmɔ rɛ gyam yaga tɛ́ e sak.

⁹Tsak o mwin me ha a yin: E kahɛ kwɔ̂n mwa e ji jey de bemat bê shara ɛ̀ Yɛgɛt Yat, ba rɔda ha pyɛ de hwā mo a ra, na be bin bare mɛ̀ na yɛ.”

¹⁰E bama mo, Yuda Iskaryot, gwining e ji bemât masâ fwôm Yɛsu kuru na vɛ beba, a nusu, ko a wɔ́ na begbɔng bepiris, na a row a yɛn Yɛsu.

¹¹Jeng de yɛn a wok há hane, yɛn a vɔk yey pyɛng, ko yɛn a ha wɔgɔ, yɛn ê tala hɛ dyām. Yaga ano, Yuda a hwo jāma begwong de ê row Yɛsu.

¹²E tûk mɛsɛ̂ng Nzem Kpam-tuk Sana Géy-sing wɔgɔ, tuk de ba yɛt beturuk besɛl yaga yông pyɛ̂ Nzem Gyilsit Nelɔ BeIsrayɛl, bemât masâ fwôm Yɛsu ba rangal hɛ, ba ye, “E gwa de hwó simo wot a wɔ̀ yong a hwo pyɛ̂ nzem o arɛt?”

¹³Ko Yɛsu a pat bemat o beba, a yang ɛn, “Ci in e ji repomo, ko yin a rɔda man na mwat de a tos nshi. Raa hin hɛ

¹⁴vɔk e lɔ de a rɔda yel ɛ̀, ko yang in dalɔ mo ngan: ‘Da mot a ye: Duk a wɛ de me tanga bemât masâ fwom hom wot a rɔda re ɛ̀ pyɛ̂ nzem o arɛt?’

¹⁵Ko dalɔ mo a rɔda dura a yin gbɔng duk hwak e ji lɔ̂ rak o, womo de ba ga tɔrɔ wɛ gyat na pyɛ́. Yong a wot hin kayɛ pyɛ e hwomo.”

¹⁶Yɛn a kyè, ba wɔ́ e ji repomo, ko ba sɛ̀ kayɛ pyɛ tyɛng na pyɛ de Yɛsu a kana ha a yɛn; ko yɛn a yong pyɛ̂ nzem o.

¹⁷Jeng de nahywegelek na vey, Yɛsu tanga bemât masâ fwom mɛ kuru na vɛ beba ba pom e kwɔn o.

¹⁸Ko sede yɛn a sé sangal e dem rê pyɛ́ mo, Yɛsu a yang ɛn, “Tsak o mwin me ha a yin: Gwining e ji min de a sé re pyɛ́ tanga me a rɔda row me.”

¹⁹Bemat mɛ mo ba hwo lashe yey, ko ba rangsal hɛ vivining, ba tē, “Kɛ̀ɛ̄! A sé e me a?”

²⁰Yɛsu a toyo a yɛn, a ye, “A sé gwining e ji min kuru na vɛ beba, womo de a sé gyisa kpam-tuk mɛ e ji shǐ hining na me.

²¹Me de ma tɛ́ me mwat ma rɔda jut bol, sede remo de bà kana jɛk e Bwok-basa Dagwi. Ko gawey e ra womo de a rɔda row me! E ba sè a mwat o nduga ka ba tɔ̀ ɛ wɛt!”

²²Jeng de yɛn a rɔngɔl e de rê pyɛ́, Yɛsu a jut kpam-tuk, a feng a Dagwi, a kwɔrɔs wɛ, ko a nɔ̂ng bemât masâ fwom mɛ, a ye, “Ná in, rebek hom a remo.”

²³Ano a jut keshi, a to feng a Dagwi, a nára a yɛn, ko yɛn mwa ba sɔ yi e ji kɛ.

²⁴Ko Yɛsu a ye, “Nemi hom a nemo de ba shushu yaga bemat pyak. Yi na nɛ Dagwi a rɔda wuna hɛ na sira tanga bemat.

²⁵Tsak o mwin me ha a yin: Ma rɔda to ba sɔ nshî anap wɛt sɛ̌ tuk de ma rɔda ba sɔ nɛ nepas o e ji Segwɔm Dagwi.”

²⁶E bama de yɛn a somo Dagwi na lwɛ̄lɛ, yɛn a nu ɛn, ko ba kyè vɔk e Raku Pàt.

²⁷Ko Yɛsu a yang ɛn, “Yin mwa, yin a rɔda to in na bama, na yin a tik me, yaga bà jɛk e Bwok-basa Dagwi wɔgɔ, ‘Dagwi a rɔda mɔrɔ lwek vyēl, ko vyēl o ya rɔda shara hɛ.’

²⁸Ko bama de ba ga sene me yi e reku, ma rɔda tānga kyè vɔk e Galili, na me wɔ̀ gyeng in e hwomo.”

²⁹Bitrus a hanat, a ye, “Mwa ano de bwang o ba rɔda to ɛn na bama, na be tik o, ko me ma rɔda ra ano wɛt!”

³⁰Ko Yɛsu a yang ɛ, “Tsak o mwin me ha a hwo: Yunung naturuk, gyam na rungat wo dak segwɔm tɛ̀ ba, hwà ga tono na me zang tat.”

³¹Ko Bitrus a gwɛ̌ hanat na gap, a ye, “Ma rɔda tono na hwo ko tyɔng wɛt, kɛ a sé gwokushu, mê ku tanga hwo!” Ko bwang bemât masâ fwôm Yɛsu ba ha tyɛng ano arɔng.

³²Sede yɛn a wɔ̀ ta e kwɔn hak de be tâng hɛ, à Gɛtsɛmani, Yɛsu a yâng bemât masâ fwom mɛ, “Ka sangal hin e ngamo e jeng de ma sé ra won.”

³³Ko a jut Bitrus, na Yakɔp, tanga Yohana, na be kyè tanga yɛ. Yey mɛ ya lɔ́l, ko ya lashe hɛ.

³⁴A yang ɛn, “Yey hom ye lashe hɛ sizɔng, bwang o tyɔng na ye wey na me. Sangal hin e ngamo, na yin a bɛrɛng nekanang.”

³⁵A kyè vɔk e nuyel tyɔng, a pom, a gaba e vwel, ko a ra won wɔgɔ, ka sede gwong gwô tɔk sɛ̀ na reyɔ̂m jeng yane re kwey.

³⁶Ko a ye, “À Dara, à Da hom, hwó tɔk ra kayɛ pyɛ. Jut keshi reyɔm kemo yi na me. Ko mwa ano, rá pyɛ de hwó simo zɔng, ko pyɛ de me simo wɛt.”

³⁷E bama mo, a to ɛ vɔk na bemât masâ fwom mɛ vane betat, a pom, a sɛ̀ ɛn e de nevwa, ko a rangâl Bitrus, a ye, “À Simɔn, hwà sê nevwa arɛt? Hwô tɔk bɛrɛng jey dyam-gwi jining zɔng wɛt arɛt?”

³⁸Ko a ha a yɛn, “Bɛrɛng hin nekanang, na yin a ra won, yaga na yin a gaba wɛt jeng de yin a yel e ji mara. Mwin, yey ye simo, ko rebek ra sé gbɛrɛk.”

³⁹A to kyè wɔ e de râ won, ko a ha na Dagwi tyɛng sede remo de á kana ha.

⁴⁰Ko jeng de a to ɛ vɔk na bemat mɛ mo, a to sɛ̀ ɛn e de nevwa, yaga bayis mɛn ba sé zorgos na nɛ, ko yɛn a tɔk ha a yɛ pyɛ cak wɛt.

⁴¹Jeng de a vey, vey hê netat, a yang ɛn, “Yin a rɔngɔl e pɔngɔ e de nevwa mo arɛt? Nà ga vey ano! Jeng ya ga vey de ba rɔda nára Me de ma tɛ́ me mwat e ji vɔ bemât banɛn.

⁴²Sogo hin, na wot a kyè! Di, mwat a womo de ê row me!”

⁴³Jeng de Yɛsu á sè rɔ̌ ha, Yuda, yɛ gwining e ji bemât masâ fwom mɛ kuru na vɛ beba, a pom. Bemat pyak de ba vɔkɔs bewal na bekpurûng begele ba raa hɛ; e yɛn de begbɔng bepiris, na bemât basâ Badu, tanga bemakuk ba tomo hɛn.

⁴⁴Ko mwat de ê row ɛ mo a kana ye ngyɛ̀k a bemat o, a yang ɛn, “Mwat de mê man ranang hom na yɛ, na me yang ɛ mɛ̀ show, e yɛ wɛ de yin e simo. Vo in hɛ, na yin a kyè na yɛ; tɛ̀ in bemat na be gyenges hɛ naka.”

⁴⁵Sede Yuda a pom, a pere wɔ na Yɛsu, a ye, “À Mwat Basa!” Ko a yang ɛ show na mân ranang mɛ.

⁴⁶Ko bemat o ba vo ɛ, ba vɔk ɛ gak.

⁴⁷Ko gwining e ji vemo de ba sé e tumal e hwomo a hwɔltɔ wal mɛ, a tara mɛ̀ sam darwêy bepiris, ko a tùt a yɛ fwong.

⁴⁸Yɛsu a yang ɛn, “Ko sɛ̌ yin a nusu na bewal tanga bekpurûng begele, na yin ba vo me mɛ̀ sede ma sé gbik arɛt?

⁴⁹Kahɛ tuk ma sè tanga yin e de basa e Gbɔng Duk Re Fongol, ko yin á vo me wɛt. Ko ba ra ano, na be sila mɛ̀ Bwok-basa Dagwi.”

⁵⁰Ko mwa bemât masâ fwom mɛ ba hàla hɛ, ba tele.

⁵¹Wen hwak de a bang ɛ na pyɛ pyɛng zɔng á sè raa Yɛsu e bama. Ko sede bemat o ba kaba hɛ,

⁵²a ye hywit, a tik a yɛn pyɛ banga mɛ, a tele warap.

⁵³Yɛn a kyè na Yɛsu vɔk e lɔ darwêy bepiris e kwɔn de begbɔng bepiris, na bemakuk, tanga bemât basâ Badu bá sè tula hɛn ɛ̀.

⁵⁴Ko Bitrus a raa e bama yikyik tyɔng, a wɔ̀ yel e ji lalâ lɔ mo. E hwomo, a sangal, a sé wok kya tanga bemât gyeng lɔ mo.

⁵⁵Ko begbɔng bepiris tanga mwa bemakûk badu ba simo na be sɛ̀ bemat de bê nɔng nuha e ra Yɛsu, yaga na yɛn a bin mɔrɔ hɛ; ko yɛn a tɔk sɛ̀ wɛt.

⁵⁶Bemat pyak ba vey, ba ha hâ bɔs e ra yɛ, ko neha mɛn na man wɛt.

⁵⁷Ko bemat behak ba sogo, ba ha hâ bɔs hemo e ra Yɛsu wɔgɔ:

⁵⁸“Wot a wok ɛ, a ye, ‘Ma rɔda gangas Gbɔng Duk Re Fongol womo de bemat bá kana lɔk. Ko e ji nepɔlɔ netat ma rɔda lɔk hwak de e bemat vɛ de ba lɔk wɛ wɛt!’ ”

⁵⁹Ko mwa ano, yɛn a tɔk tɛ̀ neha mɛn ne man wɛt.

⁶⁰E bama mo, darwêy bepiris a sogo e nuyel mɛn mwa, ko a rangâl Yɛsu, a ye, “Hwà vɔk há de hwô ha e ra neha nemo de bemat o be vɛ̀sɛ mɛ̀ e ra hwo wɛt arɛt?”

⁶¹Ko Yɛsu a sǎ yuu, a toyo a yɛ na pyɛ cak wɛt. Darwêy bepiris a to rangal hɛ, a ye, “Hwà sé Mwat de Dagwi a kasa na a sey bemat a? Hwà sé Hwey Dagwi, yɛ womo de bemat be nɔng ɛ nerey arɛt?”

⁶²Ko Yɛsu a yang ɛ, “Ey, hwà ha yɛt. Ko yin a rɔda di Me de ma tɛ́ me mwat e sangal e vwɔ yegê Dagwi Wo Reto Mwa. Yin a rɔda di me kwong, me kyè vey e ji bale yi e lagwi!”

⁶³Sede darwêy bepiris a wok ano, a hanta gworugu mɛ, a ye, “Wot e to jāma bemât nuha behak wɛt!

⁶⁴Yin a ga wok, a ga jut tó mɛ sede Dagwi. Ko sɛ̌ yin a ye ala arɛt?” Yɛn mwa ba ye, “Wot a ga gang ɛ na shɔt, a vey na be mɔrɔ hɛ.”

⁶⁵Behak ba hwo tulus Yɛsu na netey, ko yɛn a bang a yɛ bayis, ba rusu hɛ. Yɛn a rangal hɛ, ba ye, “Kɛ hwô tɔk ha a wot mwat de a ga rusu hwo arɛt?” Ko bemât gyeng lɔ ba jut ɛ, ba dak ɛ.

⁶⁶Jeng de Bitrus a rɔɔ e lala e vwel o, gwining e ji behwông fwom e lɔ darwêy bepiris a vey.

⁶⁷Sede a di Bitrus a sé wok kya, a bɛrɛng hɛ yɛɛlɛl, a ye, “Hwo arɔng, hwá sè tanga Yɛsu wo Nazarɛt.”

⁶⁸Ko Bitrus a tono, a ye, “Ma ka tɔk pyɛ cak e ra tɛt o wɛt, ma tɔk pyɛ de hwà sé ha arɔng wɛt.” Ko a nusu e ruhup vɔk e majey. Ràs de a sé nusu, rungat wa dak segwɔm.

⁶⁹Hwông fwôm lɔ mo a to di ɛ e hwomo, ko a to hwo ha a bemat de ba sé e hwomo, “Mwat womo a sé gwining e ji mɛn!”

⁷⁰Ko Bitrus a to tono. Sede ba sangal jeng tyɔng, bemat de ba sé tumal bagat ba to hwo Bitrus, ba yang ɛ, “Hwô tɔk tono, hwà sé gwining e ji mɛn wɛt, yaga hwo arɔng hwà sé mwât Galili.”

⁷¹Ko Bitrus a hwo sira, a ye, “Ka sede ma sé ha bɔs, ko tik na gwi gwo re banama hom. Ma ka tɔk mwat de yin a sé ha e ra yɛ mwa wɛt!”

⁷²E ji jeng o, rungat wa vɛ̌ dak segwɔm hê ba, ko Bitrus a pere bare na há de Yɛsu á kana ha a yɛ wɔgɔ, “Gyam na rungat wa ba dak segwɔm tɛ̀ ba, hwà ga tono na me zang tat.” Ko a hwo tosho sizɔng.