Read berom Markus 15 Bible Online

Markus 15 - berom bible

Markus 15

¹Bop nagasi, begbɔng bepiris, na bemakuk, na bemât basâ Badu, tanga mwa bemakûk badu ba man, ko mwa hɛn ba wuna nu. Yɛn a rɔgɔs Yɛsu, ko yɛn a kyè na yɛ, ba wɔ̀ nára hɛ e vɔ Gwɔmna Pilatus.

²Pilatus a hwo rangal hɛ, a ye, “Hwo wɛ hwà sé Gbɔng Gwɔ̀m BeYuda arɛt?” Yɛsu a toyo a yɛ, a yang ɛ, “Ey, hwà ha yɛt.”

³Ko begbɔng bepiris ba tɛ̀ sekûn Yɛsu e ra pyɛ́ pyak.

⁴Ko Pilatus a to rangal hɛ, a ye, “Hwô hanat wɛt arɛt? Di, yɛn a ga tɛ̀ kun mō e ra pyɛ́ pyak!”

⁵E remo, Yɛsu a kyɛ́ ɛ nà to ha pyɛ cak, ko Pilatus a langat hɛ́.

⁶E jeng Nzem Gyilsit Nelɔ BeIsrayɛl, á sè negwɔn Pilatus na a viri mwât ngyang gwining womo de bemat ba ra won na yɛ na a viri hɛ.

⁷E jeng yane, mwat hwak de ba tang ɛ, à Barabas á sè e lɔ̂ ngyang tanga bemat de bá kana yě ye gup a segwɔm, ko yɛn á kana mɔrɔ mwat e jeng o arɔng.

⁸Jeng de bemat pyak ba tula hɛn, yɛn a hwo ra won na Pilatus, ba ye, “Rá a wot pyɛ de hwó dopse ra jeng nzem o.”

⁹Ko a rangal hɛn, a ye, “Yin e simo na me viri a yin Gbɔng Gwɔ̀m BeYuda arɛt?”

¹⁰A rangal ano, yaga yɛ a tɔk, begbɔng bepiris bá kana nára Yɛsu e vɔ mɛ, yaga yɛn á wok repugu mɛ.

¹¹Ko begbɔng bepiris ba tɔgɔs regyɛng bemat, na be yâng Pilatus, a viri a yɛn Barabas.

¹²Pilatus a to ha na bemat, a yang ɛn, “E sɛ́ kwong de yin e simo me ra na mwat de yin e tang ɛ, à Gbɔng Gwɔ̀m BeYuda arɛt?”

¹³Yɛn a shusha gwolwɛlɛ, ba tē, “Bē kak ɛ e ra cɔ́gɔt!”

¹⁴Pilatus a rangal hɛn, a ye, “Ko e yɛ̌ pyɛ vyes de a ga ra arɛt?” Ko yɛn a gwɛ̌ shusha gwolwɛlɛ, ba tē, “Bē kak ɛ e ra cɔ́gɔt!”

¹⁵Pilatus a simo na a dyɛng a bemat yey; yaga ano, a viri a yɛn Barabas. Ano kwong, a tɛ̀ be dak Yɛsu na zining, ko a nára hɛ e vɔ bemât como, na yɛn a wɔ̀ kak ɛ e ra cɔ́gɔt.

¹⁶Bemât como mo ba wɔ́ na Yɛsu e lalâ gbɔng lɔ gwɔmna, ko yɛn a yila bwang bemɛn.

¹⁷Yɛn a tɛ̀ a Yɛsu gwogbɔng gworugu yerê gwo begbɔng begwɔ̀m de gwa sé zwey, ko ba tsipta kpîn negwɔm na serɔgɔ, yɛn a tɛ̀ a yɛ e rato.

¹⁸Ko yɛn a hwo tang ɛ, “Nekên Gbɔng Gwɔ̀m BeYuda ne ros!”

¹⁹Yɛn a sǎ e de dak ɛ e rato na gwele, ba tulus hɛ na netey, ko yɛn a tē guduruk, sede yɛn a sé nɔng ɛ nerey.

²⁰Jeng de yɛn a tala shɛgɛsh hɛ, yɛn a pat gwogbɔng gworugu gwane mo, ko yɛn a to tɛ̀ a yɛ berugu mɛ. Ano, yɛn a nusu na yɛ, yaga na be wɔ̀ kak ɛ e ra cɔ́gɔt.

²¹Sede yɛn á sè kyè, yɛn á man na mwat hwak de á yi e nebapomô hey, a kyè wɔ e ji repomo. Ko bemât como yɛn a tɛ̀ ɛ gbing-gbing na a wut cɔ́gɔt-kak Yɛsu. Mwat o á sè Simɔn wo Kirene, dâ Aleksanda tanga Rufus.

²²Yɛn a wɔ̀ ta na Yɛsu e kwɔn de ba tâng hɛ, à Gɔlgɔta wɔgɔ, kwɔ̂n gwokup ratô mwat.

²³E hwomo, yɛn a simo be nɔng ɛ nshî anap de ba wuna nɛ na hwal mir, ko Yɛsu a kyɛ́ ɛ nà sɔ nɛ.

²⁴E bama mo, yɛn a kak ɛ e ra cɔ́gɔt, ko yɛn a gas berugu mɛ e bato mɛn; yɛn a ra cáca, na be di pyɛ de kawɛ e ji mɛn ê sɛ̀.

²⁵Á sè dyām shatyat nagasi de yɛn á kak ɛ e ra cɔ́gɔt.

²⁶Ba jɛk pyɛ de ya tɛ̀ ba kak ɛ, ko ba tɛ̀ e rak o wɔgɔ, GBƆNG GWƆM BEYUDA.

²⁷Yɛn a kak begbik beba arɔng tanga Yɛsu, gwining e vwɔ yege mɛ ko hwak e vwɔ mwɛlɛng mɛ.

²⁸Ano kwong, reha de bà kana jɛk e Bwok-basa Dagwi ra sila hɛ wɔgɔ, “Ba bɛrɛng hɛ sede hwak e ji bemat de be gyeng badu wɛt.”

²⁹Bemat de ba kweres e gwong ba digis bato mɛn, ko ba tabas a Yɛsu nengyas, yɛn a tē, “Ngyâ ngyā! E hwo wɛ, à mwat de hwá ye, hwô gangas Gbɔng Duk Re Fongol, na hwo to lɔk wɛ e ji nepɔlɔ netat!

³⁰Gyirik yi e ra cɔ́gɔt o, na hwo sey tó mo!”

³¹Ano arɔng, begbɔng bepiris tanga bemât basâ Badu ba shɛgɛsh Yɛsu, ba tâng bemɛn, “Á seres bemat behak, ko e tɔk sey tó mɛ wɛt!

³²Tik na wot a di Mwat de Dagwi a kasa na a sey bemat, yɛ Gbɔng Gwɔ̀m BeYuda, a gyirik yi e ra cɔ́gɔt-kak a remo, ko wot a rɔda sey tsak o na há mɛ!” Ko vemo de ba kak ɛn tanga Yɛsu ba tabas a yɛ nengyas arɔng.

³³Jeng de gwi gwa vey e tē, sevwel o mwa sa ye mwangalang, ko sa sangal ano sɛ̌ dyām tyat nahywegelek.

³⁴E dyām tyat, Yɛsu a gbɔ na gbɔng fwɔ, a ye, “Eloyi, Eloyi, lama sabaktani?” Wɔgɔ, “À Dagwi hom, à Dagwi hom, yaga sɛ́ de hwà kyini me arɛt?”

³⁵Bemat behak de ba sé e hwomo ba wok ɛ, ko ba ye, “Wok in, a sé yishi Eliya!”

³⁶Gwining e ji mɛn a tele na sòso, a sing wɛ e ji nshî jwaatat. A tɛ̀ wɛ e ra gwocwang, ko a nára a Yɛsu wɛ e nu, yaga na a suyu. Mwat o a ye, “Tik yaang, na wot a di kɛ Eliya mo ê vey, na a ba gyirik hɛ yi e ra cɔ́gɔt-kak!”

³⁷Ko Yɛsu a gbɔ na gbɔng fwɔ, a hàla neken mɛ.

³⁸Ko gworugû bâng duk e Gbɔng Duk Re Fongol gwa vugu hɛ bebak o beba yi e rak o vɔk e retin o.

³⁹Gbɔng o wo bemât como a sé e tumal e nuyêl cɔ́gɔt-kak. Jeng de a di Yɛsu a hàla neken mɛ ano, a ye, “Mwin, mwat womo á sè Hwey Dagwi!”

⁴⁰Beha behak arɔng ba sé e hwomo, ba sé bɛrɛng yi e jey. E ji mɛn, à Marya wo Magdala, na Marya nêng Yakɔp swɛl na gwa mɛ Yoses, tanga Salome.

⁴¹Yɛn vɛ, yɛn á kana kyě raa Yɛsu jeng de á sè e sevwêl Galili, ko yɛn a kyě sɛlsɛ hɛ. Beha behak pyak arɔng bá sè e hwomo, vemo de bá kana yi tanga yɛ vey e Yɛrusalɛm.

⁴²Sede nahywegelek na pom, Yɔsɛf wo Arimatiya a wɔ́ na Pilatus. Yɛ Yɔsɛf á sè gbɔng mwat e ji bemakûk badu, womo de á sè gyeng jeng de Dagwi ê re negwɔm e ra jey. Tuk hane há sè tûk yông pyɛ́ gyam yaga Tuk Shábat. Yaga ano de Yɔsɛf a wɔ̀ yel na yey ting e nuyêl Pilatus, na a rangal hɛ na be nɔng ɛ revîn Yɛsu, na a wɔ̀ lɛrɛ.

⁴³

⁴⁴Pilatus a langat hɛ sede a wok, Yɛsu a ga ku. A yila gbɔng o wo bemât como na a rangal hɛ, kɛ Yɛsu a ga ku yimo.

⁴⁵Jeng de Pilatus a wok hâ gbɔng o mo wɔgɔ, a sé ano, a simo a Yɔsɛf na a wɔ̀ jut revin o.

⁴⁶Yɔsɛf a sey gworugu gwopwɛng gworwat o, a gyirik revin o e vwel, a hanas rɛ na gworugu mo, ko a wɔ̀ lɛrɛ rɛ e ji sak de ba ga ta e ji gwofwa. E bama mo, a biring gwofwa gwohwak, ko a tɛ̀ gwɛ gàk e rwi sak o.

⁴⁷Marya wo Magdala tanga Marya nêng Yoses yɛn a bɛrɛng, ko yɛn a di kwɔn de ba lɛrɛ ɛ̀ Yɛsu.