Read berom Markus 3 Bible Online

Markus 3 - berom bible

Markus 3

¹Yɛsu a to wɔ̀ yel e duk re fongol, ko mwat hwak á sè e hwomo de vwɔ mɛ gwa gyɔt.

²Bemat behak ba simo na be sɛ̀ pyɛ cak e ra Yɛsu, na be wɔ̂ sekun mɛ. Yaga ano, yɛn a bɛrɛng hɛ naka, na be di, kɛ gyeng ê tɛ̀ ɛ tyang e Tuk Shábat.

³Yɛsu a yâng mwat de vwɔ mɛ gwa gyɔt, “Sogo, na hwo vey e tē.”

⁴Ko a rangâl bemat o, a ye, “Badu mot ba simo a wot na wot a ra sɛ́ Tuk Shábat arɛt? Wot a ra pyɛ ryat kɛ pyɛ vyes arɛt? Wot a sey nekên mwat, kɛ wot a wey na nɛ arɛt?” Ko yɛn a sǎ yuu.

⁵Jeng de Yɛsu a gwɔrɔ na bayis, na a bɛrɛng hɛn, a wok shom, ko a lashe yey mɛ, yaga neyey mɛn na sé kashalang. A yâng mwat o, “Nára vwɔ mō!” A nára gwɛ, ko gwa to tɛ́ ɛ gyat.

⁶BeFarisi ba nusu, ko ba pere wɔ̀ wuna nu na bemât raà Herodes, na be jāma begwong de bê wey na Yɛsu.

⁷Yɛsu tanga bemât masâ fwom mɛ ba kyè vɔk e Gworep Galili; ko regyɛng bemat pyak ra raa hɛ. Behak ba yi e bavwêl Galili na Yudiya,

⁸behak yi e gbɔng repomô Yɛrusalɛm, behak yi e sevwêl Idumiya, behak kwong yi e gurâ Rɔt Yɔrdan, na yi e nebapomô vara de na sé bagat na bapomô Tur tanga Sidɔn. Bemat o ba vey na Yɛsu, yaga yɛn á kana wok pyɛ̂ mwa de á ra.

⁹Yɛn a wɔ́ vɛt, ko Yɛsu a ha a bemât masâ fwom mɛ, be tik a yɛ kedwa-nshi bagat, yaga na bemat be kwon ngyɔ hɛ wɛt.

¹⁰A ga kana tɛ̀sɛ bemat pyak tyang, ko vemo de ba vɔk nezap nerɔ detidetu ba bang ɛn e ra yɛ, na be bin ra ɛ.

¹¹Ko jeng de bemat de ba vɔk cēng ba di ɛ, yɛn a gaba e nuyel mɛ, ba gbɔ, ba tē, “Hwo wɛ hwà sé Hwey Dagwi!”

¹²Ko Yɛsu a nɔ̂ng cēng o nu na gap, a ye, “Yin ha a bemat mwat de me ma sé wɛt.”

¹³E bama mo, Yɛsu a tút vɔk e raku, a yishi bemat de e simo, ko yɛn a vey na yɛ.

¹⁴A kasa kuru na vɛ beba, ko a vo a yɛn rezâ Betom. A yang ɛn, “Ma ga kasa hin na yin a sǎ tanga me. Ko ma rɔda tomo hin, na yin a shara Yɛgɛt Yat,

¹⁵yin a rɔda vɔk reto na yin a paa cēng.”

¹⁶Bemat kuru na vɛ beba ma vemo de a kasa: Simɔn, de Yɛsu a vo a yɛ rezâ Bitrus;

¹⁷na Yakɔp tanga gwa mɛ Yohana, nèy Zɛbɛdayus, de Yɛsu a tâng nɛ, à Bɔwanɛrgɛs wɔgɔ, “yɛn e lulum sede gbara”,

¹⁸na Andarawus, na Filip, na Bartɔlɔmayus, na Matayus, na Tomas, na Yakɔp Alfayus, na Tadayus, na Simɔn, de á sè e yong ɛ na a dul sevwel mɛ,

¹⁹tanga Yuda Iskaryot, womo de a row Yɛsu e yɛnɛ mo.

²⁰E bama mo, Yɛsu a yel e lɔ hak. Regyɛng bemat o ra to wɔ̀ tula hɛ e hwomo, yaga ano, Yɛsu na bemât masâ fwom mɛ ba ka tɔk sɛ̀ jeng rê pyɛ́ wɛt.

²¹Jeng de bemât lɔ mɛ ba wok ano, yɛn a nusu na yɛn a wɔ̀ vo ɛ, yaga bemat ba tē, “E tē how!”

²²Bemât basâ Badu behak de ba yi e Yɛrusalɛm ba tē, “A vɔk Baal-Zɛbul e rato mɛ! A sé e gwɔ̀m cēng de e nɔngɔs hɛ reto na a paa mɛ̀ cēng!”

²³Ko Yɛsu a hwo yishi hɛn, a misang hɛn na gwɔrɔ-há, a ye, “Yi e rɛ̌ de Shetan ê tɔk pat tó mɛ arɛt?

²⁴Ka sede sevwel sa gas ɛ, na se tó como na tô sɛ, ko sa rɔda lashe hɛ.

²⁵Ka sede lɔ ha gas ɛ, na he tó como na tô hɛ, ko lɔ mo hê gaba.

²⁶Ko ka Shetan a yâng sé tó como na tó mɛ, ka a yâng ros wɛt, ê gaba, ko yɛnɛ mɛ à hane.

²⁷“Vit a mwat de ê tɔk yel e lɔ mwât gap na a hashe pyɛ́ mɛ, sɛ̌ a tānga rɔgɔs mwât gap o e ngyen. Ano, ê tɔk hashe pyɛ́ mɛ.

²⁸“Tsak o mwin me ha a yin: Dagwi ê tɔk hàla a bemat yére banɛ̂n mwa de yɛn e ragas, na mwa yére há ves de be ha e ra yɛ.

²⁹Ko a rɔda hàla a mwat de a ha há ves e ra Gabik Jɛrɛ ko tyɔng wɛt, yaga yɛ a ga ra renɛn neshey gbak-gbak.”

³⁰Yɛsu a ha ano yaga ba ye, “A vɔk ceng.”

³¹E jeng o, nêng Yɛsu na begwa mɛ ba hwo pom. Yɛn a tumal e majêy lɔ mo, ko yɛn a tomo be yila hɛ.

³²Bemat pyak ba sé e sangal tanga Yɛsu, ba gwɔrɔ hɛ, ko ba yang ɛ, “Di, neng mō na begwa mō ba sé e tumal e majey, be jāma hwo.”

³³Yɛsu a hanat a ye, “E beva, à neng hom na begwa hom arɛt?”

³⁴Ko a bɛrɛng bemat mwa de ba gwɔrɔ hɛ, a ye, “Di, neng hom na begwa hom à vemo!

³⁵Kawɛ mwat de e ra pyɛ de Dagwi e simo, e yɛ wɛ de a sé gwa hom na neng hom arɔng.”