Read berom Markus 6 Bible Online

Markus 6 - berom bible

Markus 6

¹Yɛsu a tik Kafarnahum, ko a kyè vɔk e repomô lɔ mɛ. Bemât masâ fwom mɛ ba raa hɛ.

²Sede Tuk Shábat ha vey, a yel e duk re fongol mɛn, ko a hwo basa a yɛn. Bemat pyak de ba wok ɛ ba langat hɛn, ba tē, “Mwat womo a tɔk pyɛ́ yemo mwa yi e gwa ano arɛt? E wà de a basa a yɛ pyɛ́ yemo de e ra mɛ̀ pyɛ̂ bes ano arɛt?

³À besa! E mwât yɛ̂t cɔ́gɔt a womo wɛt arɛt? Yɛ a sé hwêy Marya wɛt a? Begwa mɛ, à Yakɔp, na Yoses, na Yuda, tanga Simɔn wɛt a? Bepolgwo mɛ ba sé na sangal e ngamo wɛt arɛt?” Yaga ano, yɛn a kyɛ́ ɛn hɛ.

⁴Ko Yɛsu a yang ɛn, “Bemât mwa be nɔngɔ̂s zarap Dagwi nerey; sɛ̌ bemât repomo mɛ, na cáng mɛ, tanga belɔ mɛ be nɔngɔs hɛ nerey wɛt.”

⁵A tɔk ra pyɛ̂ bes e repomô lɔ mɛ yɛt wɛt, ko a tɛ̀ vɔ mɛ e ra bemât serɔ tyɔng zɔng, na a tɛ̀ ɛn tyang.

⁶A langat hɛ sizɔng, yaga yɛn a tɛ̀ gap mɛn e ra yɛ wɛt. E bama mo, Yɛsu a kyě kyè e ji nebapomo, a kyě basa a bemat.

⁷A yishi bemât masâ fwom mɛ kuru na vɛ beba e dem hining, yaga na a tomo hɛn bibeba. A nɔng ɛn retô paà cēng,

⁸ko a yang ɛn, “Yin jut pyɛ cak yaga kwɛngɛl o wɛt sɛ̌ gwele zɔng. Yin vɔk kpam-tuk, kɛ malâ won, kɛ dyām e berabak min wɛt.

⁹Kyè in na bekpatak, ko yin to gwɛ̌ gworugu gwohwak wɛt.”

¹⁰Ko a to yang ɛn, “Kahɛ lɔ de yin ê gyirik ɛ̀, sangal hin e lɔ mo sɛ̌ jeng de yin e ba sogo.

¹¹Ka sede yin a pom e kwɔn hak de bemat o ba sey in wɛt, kɛ ba wet betong na yin wɛt, ko pagat hin búm de gwa dyɛng e bol min, na yin a nusu hin. Hane hê sè túsa vɔk na yɛn!”

¹²E bama mo, bemât masâ fwom mɛ ba nusu, ko yɛn a kyè wɔ̀ shara a bemat wɔgɔ, yɛn a doyo yi e banɛn mɛn.

¹³Yɛn a paa cēng pyak, ba shushu vê serɔ pyak na něy arɔng, ko ba tɛ̀sɛ hɛn tyang.

¹⁴Gbɔng Gwɔ̀m Herodes a wok rehâ pyɛ́ yemo mwa, yaga rehâ Yɛsu rá kana shara hɛ e kahɛ kwɔn. Bemat behak ba tē, “Ba ga to sene Yohana wo batisma yi e reku! Pyɛ ma yemo de ya tɛ̀, a vɔk reto na a ra mɛ̀ pyɛ̂ bes yemo.”

¹⁵Behak kwong ba tē, “A sé e Eliya.” Ko behak ba tē, “Yɛ a sé zarap Dagwi, sede hwak e ji bezarap Dagwi vê raane.”

¹⁶Ko sede Herodes a wok ano, a ye, “Yaa kukuuk! A sé e Yohana de ma kana tɛ̀ be tùt rato mɛ, ko a to sé na neken!”

¹⁷Yaga yɛ pyɛ mɛ á kana tɛ̀ be vo Yohana, be rɔgɔs hɛ, na be tɛ̀ ɛ e lɔ̂ ngyang. Retîn pyɛ de ya tɛ̀ a ra ano a ret ngan: Á kana jut hwâ gwa mɛ Filip, ko a ra weneng mɛ. Ba tâng hwā mo, à Herodyas.

¹⁸Ko Yohana a tâng Herodes, “A sé tyɛng de hwà jut hwâ gwa mō e weneng wɛt!”

¹⁹Ko Herodyas a hwo bɛɛ Yohana ves, a simo na be mɔrɔ hɛ, ko a sɛ̀ gwong o wɛt,

²⁰yaga Herodes o a wokos bengyip Yohana, yaga yɛ a tɔk, Yohana mo a sé mwat rwat, ko a to sé mwât Dagwi. Yaga ano, a simo na pyɛ cak ye ra neken mɛ wɛt. Herodes a simo na a wokos há mɛ, mwa ano de a tang ɛ zii kayɛ jeng de a wok há mɛ mo.

²¹E yɛnɛ mo, Herodyas a sɛ̀ gwông râ pyɛ cak. Sede tûk tɔ̂ Herodes ha doyo, ko a yong a bemɛn begwɔ̀m, na begwɔ̀m bemât como, tanga bedaberey sevwêl Galili pyɛ́.

²²Jeng de yɛn a sé re pyɛ́, hwông Herodyas a yel, ko a rɛ̌ a yɛn. Rɛ́ɛ mo ha pɛngɛ a Herodes tanga vemo de ba sé e sangal tanga yɛ yey sizɔng. Ko gbɔng gwɔ̀m o a yang hwong o, “E sɛ́ de hwó simo na me nɔng o arɛt? Mê nɔng o kayɛ pyɛ de hwó simo.”

²³Ko a sira a ye, “Ma rɔda nɔng o kayɛ pyɛ de hwô yang me, me nɔng o, mwa vɔk e rebit sevwel de me re ɛ̀ negwɔm!”

²⁴Ko hwong o a nusu, a wɔ̀ rangâl neng mɛ, a ye, “E sɛ́ de mê ye, be nɔng me arɛt?” Neng mɛ a ye, “Yē, be nɔng o ratô Yohana wo batisma.”

²⁵Hwong o a to ɛ ziri vɔk na gbɔng gwɔ̀m o, ko a yang ɛ, “Me simo hwo nɔng me a remo ngan ratô Yohana wo batisma e ji bworo!”

²⁶Yêy gbɔng gwɔ̀m o ya lashe hɛ ding-ding. Ko yaga sira de a ga kana ra e nuyêl bekɛnɛt mɛ, a tɔk ro na hɛ e yɛ wɛt.

²⁷A pat gwining e ji bemât gyeng mɛ, a ha a yɛ a kyè ziri, na a wɔ̀ tùt ratô Yohana, na a vey mɛ̀. Mwat o a kyè, a wɔ́ e ji duk ngyang, ko a tùt rɛ.

²⁸A vey na rɛ e ji bworo, a nɔ̂ng hwong o, ko hwong o kwong a wɔ̀ nɔ̂ng neng mɛ.

²⁹Sede bemât masâ fwôm Yohana ba wok ano, ba wɔ́, ba jut rebek mɛ, ko yɛn a lɛrɛ rɛ e sak.

³⁰Betom Yɛsu ba vɛ̄ hɛn, ko yɛn a tula hɛn na yɛ. Yɛn a ha a yɛ yɛnɛ̂ pyɛ̂ mwa de yɛn a ga ra, na yɛnɛ̂ pyɛ̂ mwa de yɛn a ga basa.

³¹Bemat pyak ba sé vɛ̀sɛ, ko ba sé kyesem, ko Yɛsu na bemât masâ fwom mɛ ba tɔk sɛ̀ jeng rê pyɛ́ wɛt. Yaga ano, a yang ɛn, “Tik na wot a sogo vɔk e dem hak de wot ê sè nju mot, na yin a pɔnglɔ tyɔng.”

³²Yɛn a yel e ji dwa-nshi zɔgɔ̂ hɛn, ko ba kyè vɔk e dem de vit a mwat.

³³Mwa ano, bemat pyak ba di ɛn jeng de yɛn a sé kyè, ko yɛn a tɔk ɛn. Yɛn a nusu yi e bapomô mwa, ba tele e bol, ba raa rekwogom, ko ba tānga wɔ̀ ta e kwɔn o e ra BeYɛsu mo.

³⁴Jeng de Yɛsu a nusu yi e dwa-nshi mo, a di gbɔng regyɛng bemat, ko a wok nemwishish mɛn, yaga yɛn a sé sede vyēl de ya vɔk lwek wɛt. Ko a hwo basa a yɛn pyɛ́ pyak.

³⁵Sede gwi gwa ga vey bagât gaba, ko bemât masâ fwom mɛ ba vey na yɛ, ba yang ɛ, “Di, gwi gwa ga kyè, ko kwɔn hemo ha sé vit a mwat.

³⁶Tɛ̀ bemat o e gwong, yaga na yɛn a kyè vɔk e bemajey na nebapomo de na sé bagat, na yɛn a wɔ̀ sey a bato mɛn pyɛ́ na be re.”

³⁷Ko Yɛsu a toyo a yɛn, a ye, “Yin pyɛ min, nɔng in hɛn pyɛ cak na be re.” Yɛn a ye, “Kée kàa! Dyām de wot e simo yê sè sede dyâm fwôm mwat yê pɛl rwit. Hwó simo na wot a wɔ̀ sey kpam-tuk na kǔs dyām yane, na wot a nɔng ɛn na be re arɛt?”

³⁸Ko Yɛsu a rangal hɛn, a ye, “Yin a vɔk bāgat kpam-tuk ala e ngamo arɛt? Ci wɔ̀ di in.” Jeng de yɛn a yi wɔ̀ di, yɛn a yang ɛ, “Batungun na betɔk beba.”

³⁹Yɛsu a ha a bemât masâ fwom mɛ mo be tɛ̀ bemat be sangal bagyɛng o bagyɛng o, na be sangal e ra sɔng lwa.

⁴⁰Bemat o ba tyɛngsɛ hɛn, behak ba tyɛngrɛ hɛn naga, ko behak kuru batungun.

⁴¹Ano, Yɛsu a jut bagat kpam-tuk vane batungun tanga betɔk beba, a tɛ̀ bayis mɛ vɔk e lagwi, ko a feng a Dagwi yaga pyɛ́ mo. A hwo kwɔrɔs bagat o, ko a nɔ̂ng bemât masâ fwom mɛ, na be gas a bemat. A to nɔng ɛn betɔk beba na yɛn a gas a yɛn arɔng.

⁴²Yɛn mwa ba re, ba siris.

⁴³Bwang o gwa pɔl, ko bemât masâ fwom mɛ ba sila sháp kuru na yɛ bya na cɛ̂k kpam-tuk tanga cɛ̂k betɔk.

⁴⁴E ji bemat de ba re pyɛ́ mo, beras ba sé gu batungun (5,000).

⁴⁵E jeng o, Yɛsu a tɛ̀ bemât masâ fwom mɛ gbing-gbing be yel e ji dwa-nshi, na be ka kyè e nuyel mɛ vɔk e Bet-Saida de wa sé e gura gworo. Ko yɛ a ka tɛ̀ bemat e gwong.

⁴⁶E bama de a ga yâng bemat kala, a tút vɔk e raku, na a wɔ̀ ra won.

⁴⁷Jeng de nawiri na vey, dwa-nshi mo wa sé e tê gworep, ko Yɛsu a rɔngɔl e raku nju mɛ.

⁴⁸A di bemât masâ fwom mɛ ba sé di reyɔm e ra gangâs dwa-nshi mo, yaga gul gwa gangas hɛn na bama. E rwa hwol gasi, a sé kyè wɔ na yɛn, a kyè e ra tɛ̂t nshi. A yě ye rɛng a hɛn,

⁴⁹ko jeng de yɛn a di ɛ, a sé kyè e ra tɛ̂t nshi, yɛn a tē kɛ gyeng a sé e wovuvwel. Yɛn a dak sekun,

⁵⁰yaga yɛn mwa ba di ɛ, ko ba wok bengyip sizɔng. Yɛsu a vɛ̌ hanat na yɛn, a yang ɛn, “Vɔk in yey tiing! A sé me. Yin wok bengyip wɛt!”

⁵¹A yel e ji dwa-nshi mo na yɛn, ko gul o gwa ye ting. Bemat mɛ mo ba langat hɛn sizɔng,

⁵²yaga yɛn a tɔk cap-hâ pyɛ bes wɛt, yemo de Yɛsu a kana ra e jeng de a tɛ̀ kpam-tuk wo gwɛ̌ hɛ, ko neyey mɛn na tɔk bare wɛt.

⁵³Sede yɛn a ye dɔ, yɛn a gyirik e yɛnɛ̂ sevwêl Gɛnɛsarɛt; e hwomo yɛn a rɔgɔs dwa-nshi mo na rekwogom.

⁵⁴Jeng de yɛn a sé nunus yi e dwa mo, ko bemat pyak ba pere tɔk Yɛsu.

⁵⁵Yɛn a yeles e ji yɛnɛ̂ sevwel o mwa na setele, ko ba vɛ̀sɛ na bemât serɔ e dyɛngɛ e ra becāre mɛn e kahɛ kwɔn de yɛn a wok a sé ɛ̀.

⁵⁶Ko kahɛ kwɔn de Yɛsu a yel ɛ̀, kɛ e ji bapomo, kɛ nebapomo, kɛ bemajey, bemat ba lasha bemât serɔ e nekwɔn de bemat be tulsa hɛn ɛ̀. Ko yɛn a ra won na yɛ, ka a tik vê serɔ mo be ra nû gworugu mɛ zɔng. Ko mwa vemo de ba ra gwɛ, ba tɛ̀ tyang.