Read berom Luka 10 Bible Online

Luka 10 - berom bible

Luka 10

¹E bama mo, Yɛsu a to kasa bemat behak kuru bataama na vɛ beba (72), a tomo hɛn bibeba na be tānga kyè e ra yɛ vɔk e karɛ repomo tanga kahɛ kwɔn de yɛ pyɛ mɛ ê kwɔk wɔ ɛ̀.

²Ko a yang ɛn, “Bwal o gwa sé pyak, ko bemât fwom o ba sé hyet zɔng. Yaga ano, rá in won na Darwey, yɛ dâ bwal o, na a bin tomo bemat vɔk e de bwal mɛ mo.

³Kyè in! Ma sé tomo hin sede nèy vyēl pyɛng vɔk e ji bebwá.

⁴Yin vɔk berabâk dyām, kɛ malâ won, kɛ bekpatak wɛt. Yin tumal na yin a yâng mwat hwak show e gwong arɔng wɛt.

⁵Kahɛ lɔ de yin ê gyirik ɛ̀, tānga yē in, ‘Tik na Dagwi a tɛ̀ bemât lɔ hemo be sangal tyang na bemat!’

⁶Ka sede mwat de a sé e ji lɔ mo a simo na a sangal tyang na bemat, ko té show hê netyang o hê sè mɛ́. Ka ano wɛt, ko ha rɔda to ɛ vey na yin.

⁷Sangal hin e lɔ mo, na yin a re, na yin a sɔ kayɛ pyɛ de yɛn ê nɔng in, yaga a jam na be tala mwât fwom pyɔlɔ mɛ. Yin segsa nelɔ wɛt.

⁸Karɛ repomo de yin ê yel ɛ̀, ko bemat o ba sey in, ré in pyɛ́ de ba nɔng in.

⁹Tɛ̀sɛ hin bemât serɔ̂ repomo mo tyang, ko yē in, ‘Jeng ya ga vey bagat de Dagwi ê re negwɔm e ra yin.’

¹⁰Ko karɛ repomo de yin ê yel ɛ̀, ko bemat o ba sey in wɛt, kyě kyè in e nehyok mɛn, yē in,

¹¹‘Wot ê ka tik bûm repomo min de gwa dyɛng e bol mot sana yishing gwɛ wɛt. Hemo ha rɔda sè túsa na yin. Ko mwa ano, bàre hin, jeng ya ga vey bagat de Dagwi ê hwo re negwɔm e ra jey.’

¹²Ma sé ha a yin, tuk de Dagwi a rɔda ba ra shɔt, a rɔda ba tosho reyɔ̂m repomô Sɔdɔm a dal toshô reyɔm mɛ na repomo rane mo.”

¹³“Yaa kukuuk! Gawey e ra yin, à bemât repomô Kɔrasin! Gawey e ra yin, à bemât repomô Bet-Saida! Ka sede ba yâng ra pyɛ̂ bes yemo e bapomô Tur na Sidɔn de ma ra e ji min, ka yimo bemat o ba ga yâng sangal e cɛ̂k berugu, na be tɛ̀sɛ fongol pwɛ̀ng e berato mɛn, na be dura, yɛn a ga doyo yi e banɛn mɛn!

¹⁴Ko tuk de Dagwi a rɔda ba ra shɔt a rɔda ba tosho reyɔ̂m bapomô Tur na Sidɔn a dal toshô reyɔm mɛ na yin.

¹⁵Ko à yin bemât Kafarnahum! Yin e bare, ba rɔda jut in vɔk e lagwi arɛt? Wey! Ba rɔda ba bomo hin e kwɔ̂n kya!”

¹⁶Yɛsu a to yâng bemât masâ fwom mɛ, “Kawɛ mwat de e wet betong na há min e wet betong na me arɔng; ko kawɛ mwat de e kyɛ́ ɛ hin e kyɛ́ ɛ me arɔng; ko kawɛ mwat de e kyɛ́ ɛ me e kyɛ́ ɛ womo de a tomo me arɔng.”

¹⁷Bemat kuru bataama na vɛ beba mo ba vɛ̄ hɛn na yey pyɛng, yɛn a ye, “À Darwey, mwa na cēng arɔng ya gyeng há mot jeng de wot a ha a yɛ̄ na gap e ji reza mō!”

¹⁸Ko Yɛsu a toyo a yɛn, a yang ɛn, “Ma ga di Shetan a gaba yi e lagwi sede gbara.

¹⁹Di in! Ma ga nɔng in reto na yin a bɔrɔs begwɔ̄m tanga lyāng, na yin a to di wɛng e ra mwa retô wo repugu arɔng, ko vit a pyɛ cak de yê mǎ hin.

²⁰Ko mwa ano, yin vɔk yey pyɛng wɛt, yaga cēng ya gyeng há min; ko vɔk in yey pyɛng, yaga ba ga jɛk baza min e ji lagwi.”

²¹E jeng yane, Gabik Jɛrɛ ha tɛ̀ Yɛsu a sila na yey pyɛng, ko a ye, “À Da, hwo de hwà sé Darwêy lagwi na jey! Ma feng a hwo, yaga hwà ga lɛrɛ a bemât netsitsɛng na bemât tɔ́k pyɛ́ yemo, ko hwà ga wunta a vemo de ba vɔk tɔ́k wɛt yɛ̄. Ey, ma feng a hwo, à Da, hwà ra ano, yaga a sé simo mō, na pyɛ de hwà di ya jam.

²²“Da hom a ga tɛ̀ pyɛ̂ mwa e vɔ hom. Vit a mwat de a tɔk mwat de Hwey o ha sé sɛ̌ Dâ hɛ zɔng; ko vit a mwat de a tɔk mwat de Da a sé sɛ̌ Hwey o zɔng tanga vemo de Hwey o ha simo na he dura a yɛn Da mo.”

²³Yɛsu a doyo vɔk na bemât masâ fwom mɛ, ko a ha a yɛn zɔgɔ̂ hɛn, a ye, “Vê yey pyɛng a vemo de ba sé bɛrɛng pyɛ́ de yin a sé bɛɛ!

²⁴Yaga ma sé ha a yin, bezarap Dagwi pyak tanga begbɔng begwɔ̀m pyak arɔng bà kana simo be di pyɛ́ de yin e bɛrɛng, ko yɛn à di yɛ̄ wɛt; yɛn à to simo be wok pyɛ́ de yin e wokos, ko yɛn à wok yɛ̄ arɔng wɛt.”

²⁵Tuhak, mwât basâ Badu hwak a tumal na a mara Yɛsu. A hwo rangal hɛ, a ye, “À Mwat Basa, mê ra sɛ́ na me sey mɛ̀ neken hom gbak-gbak arɛt?”

²⁶Yɛsu a toyo a yɛ mɛ̀, a yang ɛ, “Bà jɛk sɛ́ e Bwok-basa Badu arɛt? Hwà wok, ba ye ala arɛt?”

²⁷Mwat o a ye, “ ‘Tɛ̀ yey na Darwey Dagwi mō na yey mō mwa, na neken mō mwa, na gap mō mwa, tanga tɔ́k mō mwa arɔng’, ko ‘Tɛ̀ yey na mwât vwara mō, sede hwà tɛ̀ yey na tó mo.’ ”

²⁸Yɛsu a yang ɛ, “Há mō ha sé tɛk. Rá ano, ko hwà rɔda sey neken.”

²⁹Ko mwat o a simo na a dura, yɛ a ha tyɛng, ko a yâng Yɛsu, “Sɛ̌ e wà de a sé mwât vwara hom arɛt?”

³⁰Ko Yɛsu a ye, “Mwat hwak a sogo yi e Yɛrusalɛm, ko a kyè wɔ̀ gyirik vɔk e Yeriko. Ko begbik ba dul ɛ e gwong, ba paa berugu mɛ, ba dak ɛ, ko ba tik ɛ e nû reku.

³¹A sé wɛng ano de piris hwak a sé kyè wɔ̀ gyirik e gwong gwane mo. Ko jeng de a di mwat o, a ye rɛng e jey, a nára hɛ.

³²Ano arɔng, WoLevi hwak a pom e kwɔn o, a di mwat o, ko a ye rɛng e jey, a to nára hɛ.

³³Ko mwât Samariya hwak a sé kyè e gwong o arɔng, a pom e kwɔn de mwat o a sé ɛ̀. Ko jeng de a di ɛ, nemwishish na hwo vo ɛ.

³⁴A wɔ́ na yɛ, a tɛ̀sɛ něy na nshî anap e baram o, ko a rɔgɔs vɛ na betoro. Ano a tɛ̀ ɛ e ra dwa mɛ, ko a kyè na yɛ vɔk e lɔ bekɛnɛt hak; e hwomo a pege hɛ.

³⁵Nusu hwol, a pat dyām pyɛng bya, a nɔ̂ng dalɔ mo, a yang ɛ, ‘Pege hɛ, ko ka sede hwô wey na pyɛ de ya dal ano, ma rɔda ba tala hwo jeng de ma toyo.’ ”

³⁶E yɛnɛ mo, Yɛsu a yâng mwât basâ Badu mo, “E di mō, e wà e ji bemat betat vemo de a dura, yɛ a sé mwât vwarâ mwat de begbik ba dak ɛ arɛt?”

³⁷Mwat o a toyo a yɛ, a yang ɛ, “Mwat de a tosho reyɔm mɛ.” Ko Yɛsu a yang ɛ, “Kyè kwong, na hwo wɔ̀ ra tyɛng ano.”

³⁸Sede yɛn á sè e ji kwɛngɛl mɛn, Yɛsu a pom e kerepomo kehak, ko hwā hwak de ba tang ɛ, à Marta a sey ɛ e lɔ mɛ.

³⁹A vɔk gwa mɛ de ba tang ɛ, à Marya, womo de a sangal e nuyêl Yɛsu na a wokos bása mɛ.

⁴⁰Ko fwom gwa kat a Marta, a sé a yɛ kpɛɛ. Yaga ano, a wɔ́ na Yɛsu, a ye, “À Darwey, a sé a hwo pyɛ wɛt de gwa hom a tik a me fwom nju hom arɛt? Yang ɛ, yɛ a ba sɛlɛ me!”

⁴¹Ko Darwey a toyo a yɛ, a yang ɛ, “À Marta, à Marta! Hwó sap pyɛ́ pyak, ko ye bɔrɔk hwo arɔng.

⁴²Ko e pyɛ jining zɔng de be simo. Marya a ga kasa pyɛ ryat o mo, ko ba rɔda to jut yɛ yi na yɛ wɛt.”