Read berom Luka 11 Bible Online

Luka 11 - berom bible

Luka 11

¹Tuhak, Yɛsu á sè ra won e dem hak. Jeng de a tala, gwining e ji bemât masâ fwom mɛ a yang ɛ, “À Darwey, bàsa a wot râ won, tyɛng sede remo de Yohana á kana basa a bemât masâ fwom mɛ.”

²Ko Yɛsu a yang ɛn, “Jeng de yin a sé ra won, yē in: “ ‘À Da, tik na be nɔ̂ng reza mō rê jɛrɛ nerey; tik na jeng de hwô re negwɔm ye vey.

³Nɔng ot kahɛ tuk pyɛ̂ re de wot e simo.

⁴Hàla a wot banɛn mot, yaga wot pyɛ mot wot e hàla a kawɛ mwat de e ra a wot banɛn. Hwo tik na wot a wɔ́ e kwɔ̂n setɔgɔs wɛt.’ ”

⁵Ko a to yang ɛn, “Sede wot a ye ngan: Mwat hwak e ji min a vɔk sa mɛ, ko a hwo wɔ na yɛ nakabadem, a yang ɛ, ‘À sa hom, hwɔp a me bāgat kpam-tuk batat.

⁶Yaga sa hom hwak a pom a me a remo yi e kwɛngɛl, ko ma vɔk pyɛ de mê nɔng ɛ wɛt.’

⁷Ko sa mɛ mo a hanat yi e hwomo e ji mo wɔgɔ, ‘Hwo shɔk a me yey wɛt! Ma ga kana man rwi duk, ko me na nèy hom wot a sé e dyɛngɛ. Mê tɔk sogo na me nɔng o pyɛ cak wɛt.’

⁸Ko ma sé ha a yin: Mwa ano de mwat o ê sogo na a nɔ̂ng sa mɛ pyɛ cak yaga nesa mɛ wɛt, ko a rɔda sogo na a nɔng ɛ kayɛ pyɛ de a simo, yaga sa mɛ mo a shonong e ra yɛ.

⁹“Yaga ano, ma sé ha a yin: Rá in wôn pyɛ de yin e simo na Dagwi, ko a rɔda nɔng in. Jāma hin, ko yin a rɔda sɛ̀ pyɛ mo. Kwɔgɔt hin, ko ba rɔda wunta a yin rwi duk o.

¹⁰Yaga kawɛ mwat de e ra wôn pyɛ cak, ba rɔda nɔng ɛ yɛ; ko yɛ de e jāma pyɛ cak, a rɔda sɛ̀, ko yɛ de e kwɔgɔt kwong, ba rɔda wunta a yɛ rwi duk o.

¹¹E wà e ji min de a sé da de a rɔda nɔ̂ng hwey mɛ gwofwa jeng de ha ra wôn kpam-tuk arɛt? Ko e wà de a rɔda nɔ̂ng hɛ gwɔ̄m jeng de ha ra wôn tɔk arɛt?

¹²Kɛ e wà de a rɔda nɔ̂ng hɛ lyang jeng de ha ra wôn regyi arɛt?

¹³Ka sede yin kwong de yin a sé beves yin e tɔk nɔ̂ng nèy min pyɛ́ ryat, tàga Da min e ji lagwi a rɔda nɔ̂ng vemo de ba ra won na yɛ Gabik Jɛrɛ!”

¹⁴Tuhak, Yɛsu á sè pat ceng cak de ya tɛ̀ mwat hwak a tɛ́ ɛ kpey. Jeng de ceng o ya nusu, mwat o a hwo ha, ko bemat ba langat hɛn.

¹⁵Ko bemat o behak ba ye, “A sé e Baal-Zɛbul, gwɔ̀m cēng, de e nɔngɔs hɛ reto na a paa mɛ̀ cēng!”

¹⁶Ko behak kwong ba simo be mara hɛ; yaga ano, yɛn a rangâl Yɛsu na a dura a yɛn pyɛ bes cak yemo de yê dura, reto mɛ ra yi na Dagwi.

¹⁷Ko Yɛsu a tɔk bare mɛn, a yang ɛn, “Kasɛ̌ sevwel de sa gas ɛ na se tó como na tô sɛ sa rɔda lashe hɛ. Ko kahɛ lɔ de ha gas ɛ na tô hɛ ha rɔda gaba arɔng.

¹⁸Ko ka sede Shetan a yâng sé tó como na tó mɛ, yi e rɛ̌ de segwɔm mɛ sê tumal arɛt? Ma ye ano, yaga yin a ye, me paa cēng na reto de Baal-Zɛbul a nɔng me.

¹⁹Ko ka sede me paa cēng na retô Baal-Zɛbul, ko bemât raa min ɛ̄, be paa yɛ̄ na retô wà arɛt? Di, pyɛ de bemât raa min o be ra ye dura tsɛng-tsɛng, yin a ga buru.

²⁰Ko sede remo de me paa cēng yi na retô Dagwi, ko hane he dura, Dagwi a ga hwo re negwɔm e ra yin.

²¹“Ka sede mwât gap a ga yong ɛ na pyɛ̂ yol mɛ, na a gyeng mɛ̀ lɔ mɛ, ko pyɛ cak yê ra pyɛ́ mɛ wɛt.

²²Ko ka sede mwat de a dal ɛ na gap a wɔ̀ hwo ɛ, na a di wɛng e ra yɛ, ko mwat o a rɔda hashe pyɛ̂ yol mwât mɛsɛng wane de á sè dak mɛ̀ ragey na yɛ̄, na a to gas a bemɛn pyɛ́ de a hashe yi na yɛ̀.

²³“Kawɛ mwat de a sé nwang me wɛt a kyɛ́ ɛ me; ko yɛ womo de e sɛlɛ me e de tulâ pyɛ́ wɛt e shara yɛ̄.”

²⁴“Jeng de ceng ya ga nusu yi e ji mwat, ya sé kyě kyè e nedem nehwogot na ye jāma kwɔn de yê pɔng ɛ̀. Ka sede ya sɛ̀ wɛt, ko ye yâng tô yɛ, ‘Mê to me vɔk e lɔ hom de ma ga kana yi ɛ̀.’

²⁵Ko jeng de ye wɔ, ye wɔ̀ sɛ̀ lɔ mo ba ga yishing hɛ haalal, ko ba ga to yong hɛ mwa gyat.

²⁶Ye to kyè, ko ye wɔ̀ vey na cēng o cak tyaama de ya dal yɛ̀ na neves, ko ye yel na ye sangal e hwomo. E yɛnɛ mo, negwɔn sangâl mwat o ne dal ne mɛsɛng o na neves.”

²⁷Jeng de Yɛsu a ha ano, hwā hwak a hwo ye ngyat yi e ji regyɛng bemat, a yang ɛ, “Hwā de a tɔ o, na a ngas o arɔng a sé wo yey pyɛng!”

²⁸Ko Yɛsu a toyo a yɛ, a yang ɛ, “A sé e vemo de be wok hâ Dagwi e negya, na be gyenges hɛ, de ba sé vê yey pyɛng.”

²⁹Jeng de bemat bá sè gwɛsɛ hɛn na Yɛsu, a re nuyel na ha, a yang ɛn, “Bemât jeng yemo ba sé beves! Yɛn e simo be dura a yɛn pyɛ bes cak, ko ba rɔda dura a yɛn yɛ wɛt sɛ̌ yè Yona.

³⁰Sede remo de Yona, zarap Dagwi, à sè pyɛ cak ye bɛrɛng na bemât Nineve, ano arɔng Me de ma tɛ́ me mwat ma rɔda sè a bemât jeng yemo pyɛ bɛrɛng.

³¹Tuk de Dagwi a rɔda ba ra shɔt, hwā de à sè gbɔng gwɔ̀m e rwa batin a rɔda ba sogo tanga bemât jeng yemo, ko a rɔda ba tɛ̀ kun mɛn, yaga à kyě gwɔsɔ yi e yɛnɛ̂ jey, na a wokos neha tɔ́k ne Sɔlɔmɔn. Ko di in, mwat hwak a sé e ngamo de a dal Sɔlɔmɔn o na nerey!

³²Tuk shɔt o arɔng, bemât Nineve yɛn a rɔda ba sogo tanga bemât jeng yemo, ko yɛn a rɔda ba tɛ̀ kun mɛn, yaga bemât Nineve mo bà kana doyo yi e banɛn mɛn jeng de yɛn à wok Yona à shara hâ Dagwi. Ko di in, mwat hwak a sé e ngamo de a dal Yona mo na nerey!”

³³“Vit a mwat de e tɛ̀ kya e kywa-kya, na a lɛrɛ wɛ, kɛ na a ye gup a wɛ na kwɛt. Ko ê tik wɛ e ra kwɔn de ha sé garang, na bemat de bê yel bê di negbey o.

³⁴Bayis ba sé sede kywa-kya wo rebek. Ka sede bayis mō ba sé barat, ko mwa rebek mō rê vɔk negbey; ko ka sede bayis mō ba lashe hɛn, ko mwa rebek mō rê sè e ji lwīl.

³⁵Yaga ano, tē naka, yaga na negbey de na sé e ji mō ne tɛ́ ɛn lwīl wɛt.

³⁶Ka sede rebek mō mwa kwong ra vɔk negbey, ko vit a dem hak de ha sé e ji lwīl, ko mwa rɛ ra rɔda sè wɛshɛrɛk, sede remo de kywa-kya de wa sé wɛshɛrɛk naka wo nɔng o negbey.”

³⁷Jeng de Yɛsu a ga yɛnɛ ha, WoFarisi hwak a rini hɛ pyɛ́ e lɔ mɛ, ko a yel, a sangal na a re yɛ̄.

³⁸Jeng de WoFarisi mo a di Yɛsu a hwo re pyɛ́ sana kus vɔ, a langat hɛ.

³⁹Ko Darwey a yang ɛ, “Di, yin BeFarisi, yin e kus bebamâ begance na bebamâ neshǐ, ko ji mo min ha sila na retek na neves.

⁴⁰À yin betɔn! A sé e Dagwi de a yong bama mo tanga ji mo arɔng wɛt arɛt?

⁴¹Ko nɔng în bepɛng pyɛ́ de ya sé e ji begance tanga neshǐ min; e bama mo, kayɛ pyɛ ya rɔda sè jɛrɛ yaga yin.

⁴²“Yaa kukuuk! Gawey e ra yin BeFarisi! Yin e nɔngɔ̂s Dagwi jining e ji kuru wo mazɛng, na leng sit, na kahɛ hwonong, ko yin e tik nà gas badu e tē, yin a tɛ̀ yey na Dagwi arɔng wɛt. A jam na yin a ra pyɛ́ yemo sana tik râ yane mo.

⁴³“Gawey e ra yin BeFarisi! Yin e simo nekwɔn de be tikis a bemat beting e beduk re fongol, ko yin e to simo bemat be tē a yin kwot na be tang in show e dúra.

⁴⁴Gawey e ra yin! Yin a sé sede besak de ba gwɔrɔ vɛ na beta wɛt, vemo de bemat be kyě kyè e ra vɛ vit a tɔk.”

⁴⁵Gwining e ji bemât basâ Badu a hanat, a yang ɛ, “À Mwat Basa, sede hwó ha ano, hwà ha há ves e ra wot arɔng!”

⁴⁶Ko Yɛsu a toyo a yɛ, a yang ɛ, “Gawey e ra yin arɔng, yin bemât basâ Badu! Yin e tɛ̀ a bemat pyɛ́ dirik de ya dal gap mɛn na be tos, ko yin pyɛ min yin e ka tɛ̀ kekɛn vwɔ na yin a sɛlɛ hɛn mɛ̀ wɛt.

⁴⁷Gawey e ra yin! Yin e lɔkɔs beta báre e ra besak bezarap Dagwi, ko à sè e bedabeda min de bà mɔbɔs hɛn.

⁴⁸Ano kwong, yin pyɛ min yin e nɔng nuha, yin e simo pyɛ de bedabeda min bà ra. E yɛn vɛ de yɛn a mɔbɔs bezarap Dagwi o, ko e yin vɛ de yin e lɔkɔs beta báre na yɛn e rà besak o.

⁴⁹Yaga ano, Dagwi yi na netsitsɛng mɛ a ye, ‘Ma rɔda tomo a yɛn na bezarap Dagwi tanga betom, ko yɛn a rɔda mɔbɔs behak e ji mɛn, ko bê tak a behak reyɔm arɔng.’

⁵⁰Yaga ano, ba rɔda ba rangâl bemât jeng yemo nemî mwâ bezarap Dagwi nemo de bà shushu yimo yi e susû jey,

⁵¹yimo yi e jeng de bà mɔrɔ Hɛvɛl vey e jeng de bà mɔrɔ Zɛkarya, yɛ Zɛkarya mo à wey e tê gàgbang rangâs yas vɔk na Dagwi na kwɔ̂n jɛrɛ hê Gbɔng Duk Re Fongol. Ey, me ha a yin, ba rɔda ba rangâl bemât jeng yemo nemî bemat o mwa!

⁵²“Gawey e ra yin bemât basâ Badu! Yin a ga jut makwili de be wunta mɛ̀ gwông tɔ́k. Yin pyɛ min yin a raa gwɛ wɛt, ko yin e ro vemo de be simo be raa gwɛ arɔng!”

⁵³Sede Yɛsu a sé nusu yi e hwomo, bemât basâ Badu tanga BeFarisi ba tɛ̀ shom sizɔng, ko yɛn a hwo jɔgɔt hɛ na nerangsal e ra pyɛ́ pyak.

⁵⁴Yɛn a jāma na be tɛ̀sɛ a yɛ segun na be vo ɛ, ka sede a gyili nu e há mɛ hak.