Read berom Luka 12 Bible Online

Luka 12 - berom bible

Luka 12

¹E jeng yane, sede bemat gu kpɛɛ bá sè tús ɛn e dem hining, yɛn á bɔrɔs bemɛn, ko Yɛsu á tānga yâng bemât masâ fwom mɛ, “Tē in naka na géy-sing BeFarisi de wa sé negwɔn vɔ̂k nenu-neba.

²Vit a pyɛ de ba ga kana bang de ba rɔda ba wunta yɛ wɛt, ko vit a pyɛ de ya sé ye neyaang de ba rɔda ba tɔk yɛ wɛt.

³Yaga ano, kayɛ pyɛ de yin a ga ha e lwīl, ba rɔda wok yɛ e kwɔ̂n negbey ko kayɛ pyɛ de yin a ga ha a bemin show-show e ji duk, ba rɔda ba mok yɛ e rahwol.”

⁴“À besa hom, sǎ me ha a yin, yin wok bengyip bemat de be mɔrɔ rebêk mwat, ko e bama mo, yɛn e to tɔk ra pyɛ cak de ya dal yane wɛt.

⁵Ko ma rɔda dura a yin mwat de a jam na yin a wok bengyip mɛ: Wok in bengyip Dagwi, yɛ de a vɔk retô mɔrɔ, de a to vɔk retô bomo e kwɔ̂n kya arɔng. Ey, ma sé ha a yin, e yɛ wɛ de yin ê wok bengyip mɛ!

⁶“Be rɛsɛl nenon tyǐ netungun e nû bekobo beba wɛt arɛt? Ko mwa ano, Dagwi a ye bam a kehak e ji nɛ wɛt.

⁷Àa! Dagwi a ga basa nepyak setot e ratô kawɛ e ji min. Yin wok bengyip wɛt; yin a dal nenon tyǐ pyak na nerey!”

⁸“Ma to sé ha a yin, kawɛ mwat de e dura wɛshɛrɛk e nuyêl bemat, a tɔk me, ko Me de ma tɛ́ me mwat ma rɔda ba dura wɛshɛrɛk e nuyêl betom-lagwî Dagwi, ma tɔk ɛ arɔng.

⁹Ko kawɛ mwat de e tono e nuyêl bemat a tɔk me wɛt, ba rɔda ba tono hɛ e nuyêl betom-lagwî Dagwi arɔng.

¹⁰“Dagwi ê tɔk hàla a kawɛ mwat de a ha há ves e ra Me de ma tɛ́ me mwat, ko a rɔda hàla a mwat de a ha há ves e ra Gabik Jɛrɛ wɛt.

¹¹“Jeng de yɛn a rɔda vos in na be vɔk na yin e beduk re fongol, kɛ e nuyêl begwɔmna kɛ bedagwɔm, na be ra a yin shɔt, yin sap gwong de yin ê dul mɛ̀ bato min wɛt, kɛ pyɛ de yin a rɔda ha arɔng wɛt.

¹²Yaga e jeng o, Gabik Jɛrɛ ha rɔda basa a yin pyɛ de yin a rɔda ha.”

¹³Mwat hwak yi e ji regyɛng bemat o a hwo yâng Yɛsu, “À Mwat Basa, hā a gwa hom a gas pyɛ̂ nedanelɔ tanga me.”

¹⁴Yɛsu a hanat, a yang ɛ, “À sa! Wà a tɛ̀ me mwât shɔt kɛ mwât gas a yin pyɛ́ arɛt?”

¹⁵Ko a re nuyel na ha a yɛn mwa wɔgɔ, “Tē in naka, na yin a gyeng bato min yi e kayɛ yerê gananâng pyɛ́. Yaga mwa ano de mwat a vɔk pyɛ́ pyak, nepyak pyɛ́ mo ne nɔng ɛ neken wɛt.”

¹⁶Ko a ha a yɛn gwɔrɔ-há hemo, a yang ɛn, “Darwey hwak a vɔk cāp de ya nɔng ɛ pyɛ́ tyɔng wɛt.

¹⁷Ko a hwo bare e yey mɛ, ‘Mê ra sɛ́ ɛ? Yaga ma vɔk kwɔn de mê tik ɛ̀ pyɛ́ yemo mwa wɛt.’

¹⁸Ko a ye, ‘Pyɛ ma yemo de ma rɔda ra: Ma rɔda gangas begban hom vemo na me lɔk berey o, ko e ji vɛ mê tik ɛ̀ pyɛ̂ hwiri hom mwa na bwang pyɛ́ hom cak arɔng.

¹⁹Ano, ma rɔda yâng tó hom, “À sa-pen, hwà ga sɛ̀ pyɛ́ shɛrɛk de yê wul a hwo neshey pyak. Sangal bes, na hwo re, na hwo sɔ, na hwo wok neta mó!” ’

²⁰Ko Dagwi a yang ɛ, ‘À hwo tɔn! Yunung nabwalak ma rɔda jut neken mō; ko pyɛ́ de hwà ga kana tula mwa yê tɛ́ ɛ yê wǎ kwong ɛ?’ ”

²¹Yɛsu a yɛnɛ há mo, a ye, “E ba sè tyɛng ano na womo de e tulsa a tó mɛ yas, ko e nuyêl Dagwi yɛ a vɔk yas wɛt.”

²²E bama mo, Yɛsu a yâng bemât masâ fwom mɛ, “Yaga ano, ma sé ha a yin: Yin kwon sap e ra pyɛ de yin ê re na yin a sangal mɛ̀ beken, kɛ e ra berugu de yin a rɔda tɛ̀.

²³Yaga neken na dal pyɛ̂ re, ko rebek arɔng ra dal berugu.

²⁴Bɛrɛng hin behwǎk: Be tus pyɛ cak wɛt, be yɛt bwal arɔng wɛt, be vɔkɔs befang kɛ begban wɛt; ko mwa ano, Dagwi e nɔngɔ̂s vɛ pyɛ̂ re! Nekên benon na se sɛ́, ka sede ba tyɛngrɛ nɛ na nemin arɛt?

²⁵E wɛ̌ mwat e ji min de e tɔk gwɛ̌ pɔlɔ mɛ e jey, yaga e sap neken mɛ arɛt?

²⁶Yàa! Ka sede yin e tɔk ra kepyɛ yere kane wɛt, ko yaga sɛ́ de yin e sap e ra bwang pyɛ́ mo arɛt?

²⁷Bɛrɛng hin gwong de bejamuk hey be ras: Be ra fwom, kɛ be lɔk berugu yaga bato mɛn wɛt. Ko ma sé ha a yin, mwa ano de yɔ̀m Gbɔng Gwɔ̀m Sɔlɔmɔn yà sè ryat sizɔng, ko nerât yɛ na ka vey ne gwining — e ji bejamuk vane wɛt.

²⁸Ka sede Dagwi e tɛ̀sɛ sɔng gwo sè rwat ano, gwomo de gwa sé kwen yunung ko nahwol vit a gwɛ, ba ga kyé mɛ̀ pyɛ́ na gwɛ, tàga yin arɛt? À yin de yin e tɛ̀ gap min mwa e ra me wɛt!

²⁹“Yin dopse bare e ra pyɛ́ de yin ê re kɛ yēmo de yin ê sɔ wɛt. Yin sap pyɛ cak e yey min wɛt.

³⁰Yaga a sé e mwa bemat de ba tɔk Dagwi wɛt de ba sê bûm ɛn e de jāmâ pyɛ́ yemo, ko Da min a tɔk, yin e simo pyɛ́ mo.

³¹Nduga yin tānga jāma pyɛ́ de ya sé yê Segwɔm Dagwi, ko Dagwi a rɔda gwɛ̌ a yin ɛ̀ pyɛ́ yane mo mwa arɔng.”

³²“Yin vɔk bengyip wɛt, yin de yin a sé sede kwara swɛl, yaga Da min a vɔk yey pyɛng na yin a re negwɔm tanga yɛ e ji Segwɔm mɛ.

³³Rɛsɛl hin mwa pyɛ́ de yin a vɔk, na yin a nɔ̂ng bepɛng dyām o. Jāma hin a bato min berabâk dyām de be kwop wɛt, na yin a bang yas min de yê tala hɛ wɛt e lagwi. E hwomo, vit a gbik de e tɔk wɔ̀ shigi yɛ; bekǔt arɔng be tɔk re yɛ wɛt.

³⁴Yaga yey min ya rɔda sè e kwɔn de yin a bang ɛ̀ yas min.”

³⁵“Yóng in, na yin a rɔgɔs bègbɔng berugu min gak na begyindi yaga fwom, na yin a tɛ̀ nekyǎ bekywa-kya min ne lolo.

³⁶Sè in sede besam de ba sé gyeng dalɔ mɛn na a vɛ̄ hɛ yi e dem nzem weneng. Jeng de a vey, a kwɔktɔ rwi lɔ mo, ko remo-remo, yɛn a rɔda wunta a yɛ.

³⁷Vê yey pyɛng a besam vemo de dalɔ mɛn ê pom, a sɛ̀ ɛn ba sé bɛɛ nekanang. Tsak o mwin me ha a yin: Dalɔ mo a rɔda rɔgɔs gbɔng rugu mɛ, ko ê tɛ̀ ɛn, yɛn a sangal na a nɔng ɛn pyɛ̂ re.

³⁸Vê yey pyɛng a besam vemo de dalɔ mɛn a rɔda sɛ̀ ɛn ywey, ka a ka vɛ̄ hɛ nakabadem kɛ e rwa hwol gasi ayi.

³⁹Ko bàre hin, ka sede dalɔ a yâng tɔk jeng de gbik ê wɔ̀ yel e lɔ mɛ, ka ê bɛɛ jey na a ro ɛ nà yel ɛ̀.

⁴⁰Ko yin arɔng, sangal hin e yong in, yaga Me de ma tɛ́ me mwat ma rɔda ba vey e jeng de yin ê sè gyeng vey hom wɛt.”

⁴¹Bitrus a hwo yâng Yɛsu, “À Darwey, hwà sé ha gwɔrɔ-há hemo yaga wot kɛ yaga kawɛ mwat arɛt?”

⁴²Darwey a hanat, a yang ɛ, “E wǎ kwong de a sé gbɔng sam wo netsitsɛng de be tó yey na yɛ wɛt arɛt? A sé e womo de dalɔ ê tik a yɛ bɛrɛ̂ng lɔ mɛ, na a nɔngɔ̂s bwang besam lɔ mo pyɛ́ mɛn yê kahɛ tuk tyɛng e ra jeng.

⁴³Wo yey pyɛng a gbɔng sam de dalɔ mɛ mo ê sɛ̀ ɛ a sè ra ano jeng de a vɛ̄ hɛ!

⁴⁴Mwin me ha a yin: Dalɔ mo a rɔda nɔng ɛ bɛrɛng pyɛ̂ nedanelɔ mɛ mwa.

⁴⁵Ko ka sede sam o a ye e yey mɛ, ‘Kée! Dalɔ hom ê ros na vɛ̄ hɛ’, ko yɛ ê hwo dak bwang besam beras o na beha mo, ko ê hwo re, e sɔ sɛ̌ a hwo feng.

⁴⁶Dalɔ̂ sam o a rɔda ba to ɛ pút, ko sam o a rɔda ba tɔk jeng o wɛt. Ko dalɔ mɛ mo ê gas ɛ zang ba na a wey na yɛ, ko ê wuna hɛ na bemat de ba sey tsak o na Dagwi wɛt.

⁴⁷“Sam de a tɔk pyɛ de dalɔ mɛ e simo yɛ a ra, ko a yong ɛ wɛt, ko a to kyɛ́ ɛ nà ra yɛ, a rɔda ba sɔ barâm dak sizɔng.

⁴⁸Ko sam de a tɔk pyɛ de dalɔ mɛ e simo na yɛ a ra wɛt, ko a ra pyɛ de ya jam dak, a rɔda sɔ baram hyet. Kawɛ mwat de ba nɔng ɛ pyɛ́ pyak, ba rɔda ba simo pyɛ́ pyak yi na yɛ; ko mwat de ba tik pyɛ́ pyak e vɔ mɛ, ba rɔda ba jāma pyɛ́ de ya dal yane mo na nepyak yi na yɛ arɔng.”

⁴⁹“Ma vey na me ba tɛ̀ kya e jey; ko a sé a me ka ba ga kana pɛl hɛ!

⁵⁰Ko batisma wa sɛ́ de ba rɔda tɛ̀ a me wɛ, ko yey hom ye lashe hɛ, sɛ̌ ba ga yɛnɛ tɛ́ a me wɛ e ngyen.

⁵¹A sé a yin sede ma vey na me tɛ̀ bemât jey be sangal tyang na bemɛn arɛt? Wey, ma sé ha a yin, ma vey na me tɛ̀ ɛn be gas ɛn e negya.

⁵²E ngamo nuyel, lɔ de ha vɔk bemat betungun ha rɔda gas ɛ, betat ba rɔda ra repugu na beba, ko beba ba rɔda ra repugu na betat.

⁵³Ano kwong, yɛn a rɔda gas ɛn, da a rɔda ra repugu na hwey mɛ, ko hwey ha rɔda ra repugu na da mɛ arɔng. Neng a rɔda ra repugu na hwóng mɛ, ko hwóng mɛ a rɔda ra repugu na neng mɛ arɔng. Dekwop a rɔda ra repugu na gwel mɛ, ko gwel a rɔda ra repugu na dekwop mɛ arɔng.”

⁵⁴Yɛsu a to yâng regyɛng bemat o, “Jeng de yin e di rele ra yi e tā, remo-remo yin e ye, ‘Rwak wo kyè wɔ̀ rop’, ko wô rop.

⁵⁵Ko jeng de yin e wok gûl batin gwo pɛsɛl, yin e ye, ‘Jey ye kyè wɔ̀ fes’, ko yê fes.

⁵⁶À yin bemât nenu-neba! Yin e tɔk bɛrɛng jey tanga lagwi, ko yin e misang cap-hâ pyɛ́ de ya sé e ji mo, ko yaga sɛ́ de yin e tɔk misang cap-hâ pyɛ̂ jeng yemo wɛt arɛt?”

⁵⁷“Yaga sɛ́ de yin e masa pyɛ́ de ya sé ryat pyɛ min wɛt arɛt?

⁵⁸Ka sede shɔt ya wuna hwo na mwat hwak de e simo a wɔ̂ kun mō e duk shɔt, ko ye ngyɛ́k na hwo yong há mō na yɛ e gwong e ngyen. Ka ano wɛt, ko a rɔda hwɔlɔ hwo e nuyêl mwât shɔt, mwât shɔt o a rɔda nára hwo e vɔ mwât fwôm gwɔ̀m, ko yɛ mo a rɔda tɛ̀ o e ngyang.

⁵⁹Ma sé ha a hwo, mwin, hwà rɔda nusu yi e hwomo wɛt, sɛ̌ hwà tala kakɛ kedyam de e rangal hwo.”