Read berom Luka 13 Bible Online

Luka 13 - berom bible

Luka 13

¹E jeng o, bemat behak bá sè e hwomo, ko ba ha a Yɛsu rehâ bemât Galili de Pilatus á kana tɛ̀ ba mɔbɔs hɛn. Hemo há té jeng de yɛn á sè nára nenɔrɔ̂ yas de be yɛt vɔk na Dagwi, ko nemi mɛn ná wuna hɛ na ne yas de bá yɛt o.

²Ko Yɛsu a hanat, a yang ɛn, “A sé a yin sede pyɛ vyes yemo ya té a bemat vane, yaga yɛn a dal bwang bemât Galili na ragâs banɛn arɛt?

³Ma sé ha a yin: Wey! Ko ka sede yin a doyo yi e banɛn min wɛt, yin mwa yin a rɔda wey tyɛng sede yɛn.

⁴Ala rehâ bemat kuru na vɛ rwit yi e Silowam de gbɔng duk bɛrɛng nekanang wa gaba e ra yɛn, ko wa mɔrɔ hɛn arɛt? A sé a yin sede bemat vane ba dal bwang bemât Yɛrusalɛm na neves arɛt?

⁵Ma sé ha a yin: Wey! Ko ka sede yin a doyo yi e banɛn min wɛt, yin mwa yin a rɔda wey tyɛng sede yɛn arɔng.”

⁶E bama mo, Yɛsu a ha a yɛn gwɔrɔ-há hemo, a yang ɛn, “Mwat hwak a vɔk retîn regwi e ji bwî anap mɛ. Jeng de a wɔ́ na a wɔ̀ jāma nèy cɔgɔt o, a sɛ̀ pyɛ cak wɛt.

⁷A hwo yâng mwât bɛrɛng bwi mo, ‘Di, shey hê tat a hemo de ma sé vɛ̀sɛ e ngamo na me ba di, kɛ gyeng tîn regwi hemo ha ga tɔs arɛt, ko ma sɛ̀ pyɛ cak wɛt. Tow hɛ! Yaga sɛ́ de he lashe fongol zɔng arɛt?’

⁸Ko mwât bɛrɛng o a yang ɛ, ‘À da, niri na hwo to tik hɛ e shey hemo zɔng, ko ma rɔda bugut tin o na me tɛ̀ a hɛ yǔk.

⁹Ka sede ha ba tɔs nák, ey ko wɛng; ko ka sede ha ba tɔs wɛt, ko hwo ba tow gwomǎ.’ ”

¹⁰Tuk Shábat hak, Yɛsu á sè basa e duk re fongol hwak.

¹¹Hwā hwak á sè e hwomo, de á vɔk ceng de ya tɛ̀ a yɛ serɔ neshey kuru na nɛ rwit, a ye gup, vit a tɔk ye cik wɛt.

¹²Jeng de Yɛsu a di hwā mo, a yila hɛ, a yang ɛ, “À delɔ, ba ga hàla hwo yi e serɔ mo!”

¹³A tɛ̀ vɔ mɛ e ra yɛ, ko remo-remo, rebek mɛ ra ye cik, ko a nɔ̂ng Dagwi nerey.

¹⁴Mwât nuyêl duk re fongol o a wok shom, yaga Yɛsu a tɛ̀ mwat tyang Tuk Shábat, ko a hwo yâng bemat o, “Nepɔlɔ de be ra fwom na sé netyiimin. Vey in e ji negasi nane na be tɛ̀ in tyang, ko yin vey Tuk Shábat wɛt!”

¹⁵Darwey a toyo a yɛ, a ye, “À yin bemât nenu-neba! Kawɛ mwat e ji min e viri hywàrak mɛ kɛ madung mɛ yi e ji duk, na a wɔ̀ nɔ̂ng wɛ nshi Tuk Shábat.

¹⁶Ko di, hwā womo a sé yere Abraham de Shetan a ga rɔgɔs hɛ neshey kuru na nɛ rwit; ko sɛ̌ a jam na be viri hɛ Tuk Shábat wɛt arɛt?”

¹⁷Sede Yɛsu a ha ano, mwa bemât repugu mɛ ba wok rekyen, ko bwang bemât mwa ba vɔk yey pyɛng na gbɔng pyɛ̂ langât mwa de a ra.

¹⁸Ko Yɛsu a rangal hɛn, a ye, “Segwɔm Dagwi sa sé sede sɛ́ arɛt? Ma rɔda tyɛngrɛ sɛ na sɛ́ ɛ?

¹⁹Sa sé sede ngan: Mwat hwak a jut keyenêng mastat, ko a tus e ji bwi mɛ. Ka ras, ka tɛ́ ɛ retîn cɔgɔt, ko benon ba lɔkɔs ɛ̀ barɛngɛ mɛn e nelang o.”

²⁰Yɛsu a to rangal hɛn, a ye, “Ma rɔda tyɛngrɛ Segwɔm Dagwi na sɛ́ arɛt?

²¹Sa sé sede ngan: Hwā hwak a jut géy-sing, ko a wuna wɛ na shǐ tat hê nemuk, sɛ̌ regat o mwa ra tɛ́ ɛ fugum.”

²²Yɛsu a kaba gwong mɛ vɔk e Yɛrusalɛm, ko a kweres e bapomo na bemajey, a kyě basa.

²³Ko mwat hwak a hwo rangal hɛ, a yang ɛ, “À Da, ê sè bemat hyet zɔng de be ba sey neken arɛt?” Yɛsu a hanat, a yang ɛn,

²⁴“Yē in ngyɛ́k na yin a yel e rwi duk de gwa sé ngyɔgɔdɔk, yaga ma sé ha a yin, bemat pyak ba rɔda ba ye ngyɛ́k na yɛn a yel ɛ̀, ko yɛn a rɔda ba tɔk wɛt.

²⁵Yaga jeng de dalɔ mo a ga sogo, a man rwi duk o, ko yin kwong, yin ê ba sè e jey. Yin a rɔda ba kwɔgɔt gwɛ, yin ê ba ye, ‘À da, wunta a wot rwi duk o!’ Ko ê ba yang in, ‘Ma tɔk kwɔn de yin a yi ɛ̀ wɛt.’

²⁶Ko yin a rɔda ba ye, ‘Wot á re, ko wot á sɔ tanga hwo; ko hwá basa e ji nehyok bapomo mot!’

²⁷Ko a rɔda to ba yang in, ‘Ma sé ha a yin, ma tɔk kwɔn de yin a yi ɛ̀ wɛt. Kyè in yi e ngamo, à mwa hin bemât ragâs banɛn!’

²⁸Jeng de yin a rɔda ba di Abraham, na Yishak, na Yakɔp, tanga mwa bezarap Dagwi e ji Segwɔm Dagwi, yin a rɔda ba tosho na yin a roros yìn, yaga ba ga bang in e jey.

²⁹Bemat ba rɔda ba yi e rwa rak na e rwa tā, yi e rwa batin na e rwa bato, na be sangal e de rê pyɛ́ e ji Segwɔm Dagwi.

³⁰Ko di in, vemo de ba sé vê bama a remo ba rɔda ba tɛ́ ɛn vê yel; ko vemo de ba sé vê yel a remo ba rɔda ba tɛ́ ɛn vê bama.”

³¹E jeng yane, BeFarisi behak ba vey na Yɛsu, ba yang ɛ, “A sé naka na hwo nusu yi e ngamo na hwo kyè vɔk e dem hak, yaga Herodes e simo na a mɔrɔ hwo.”

³²Yɛsu a hanat, a yang ɛn, “Ci wɔ̀ yang in kevu-hey kane ngan: ‘Yunung ma sé paa cēng, ko ma sé tɛ̀sɛ bemat tyang, nahwol ano arɔng, ko e pɔlɔ hê tat ma rɔda tala fwom hom.’

³³Ko mwa ano, a sé gbing-gbing na me re nuyel na kwɛngɛl hom yunung, na nahwol na gwaane. Yaga a sé tyɛng na be mɔrɔ zarap Dagwi e kwɔn hak wɛt sɛ̌ e Yɛrusalɛm!

³⁴“Káa! À bemât Yɛrusalɛm! Káa! À bemât Yɛrusalɛm! Yin e mɔbɔs bezarap Dagwi, yin e tó vemo de Dagwi a tomsal a yin mɛ̀ na beta, na yin a mɔbɔs hɛn arɔng! Zang ala de ma simo na me gunung hin sede congot ye gunung nèy mɛ arɛt? Ko yin a simo a me wɛt.

³⁵Di in, lɔ min ha rɔda tɛ́ ɛ rin o. Ko ma sé ha a yin, yin a rɔda to di me wɛt sɛ̌ jeng de yin e ba ye, ‘Tik na Dagwi a tɛ̀ nerat e ra womo de e kyè vey e ji rezâ Darwey!’ ”