Read berom Luka 17 Bible Online

Luka 17 - berom bible

Luka 17

¹Yɛsu a yâng bemât masâ fwom mɛ, “A sé gbing-gbing na pyɛ́ de yê tɛ̀sɛ bemat be ra banɛn ye té; ko gawey e ra womo de e tɛ̀ pyɛ́ mo ye té!

²Ka sede mwat hwak a tɛ̀ gwining e ji besɛl o a ra banɛn, ko ê dal a yɛ ka ba rɔgɔs a mwat o gwofwa hwongo e fwɔ mɛ, na be bomo hɛ mɛ̀ e ji gworep.

³Tē in naka na bato min! “Ka sede gwa mō a ra banɛn, gyong ɛ; ko ka sede a doyo yi e banɛn mɛ, hàla a yɛ.

⁴Ka sede a ra a hwo banɛn zang taama tuk hining, ko a to vey na hwo zang taama na a yang o, ‘Ma tosho gabɔk’, ko hwo hàla a yɛ.”

⁵Betom Yɛsu ba yâng Darwey, “Sɛlɛ hot, na wot a gwɛ̌ tɛ̀ gap mot e ra Dagwi.”

⁶Ko Darwey a yang ɛn, “Ka sede nepyak tɛ̂ gap min e ra Dagwi na sé sede keyenêng mastat zɔng, ko yin ê tɔk yâng retîn bwagam remo, ‘Lùt o yi e ngamo, na hwo wɔ̀ zep o e ji gworep!’ ko ra rɔda gyeng há min.”

⁷“Sede wot a ye, mwat hwak e ji min a vɔk sam de e how a yɛ cap, kɛ e gyeng a yɛ vyēl ayi. Jeng de sam o e vɛ̄ hɛ yi e hey, ko dalɔ ê yang ɛ, ‘Vey ziri, na hwo sangal, na hwo re pyɛ́!’ arɛt?

⁸Kée wey! Ê yang ɛ, ‘Yong a me pyɛ̂-pɔlɔ, na hwo tɛ̀ gworugu naka, na hwo nɔng me yɛ̄, na me re na me sɔ. E bama mo, hwô de tɔk re myo na hwo sɔ arɔng.’

⁹Dalɔ ê feng a sam o, yaga a ga ra pyɛ́ de ba yang ɛ, a ra arɛt? Kée wey!

¹⁰A sé ano na yin arɔng. Jeng de yin a ga ra pyɛ̂ mwa de ba ga ha a yin, yē in, ‘Wot a sé besam de be ba ka feng a wot wɛt. Wot a ga ra fwom mot zɔng.’ ”

¹¹Jeng de Yɛsu á sè e gwong vɔk e Yɛrusalɛm, a kwey e yɛnɛ̂ bavwêl Samariya na Galili.

¹²A sé yel e majey hwak, ko bekparong kuru ba man na yɛ. Ba tumal e jey,

¹³ko ba hwo tē ngyat, “À Yɛsu! À Da! Tosho reyɔm mot!”

¹⁴Yɛsu a di ɛn, ko a yang ɛn, “Ci in na bemat de ba sé bepiris, na be bɛrɛng hin.” Jeng de yɛn a sé e gwong vɔk e hwomo, yɛn a tɛ̀ tyang.

¹⁵Sede gwining e ji mɛn a di de ba ga tɛ̀ ɛ tyang, ko a to ɛ, a nɔ̂ng Dagwi nerey na gbɔng fwɔ.

¹⁶A pom, a gaba e nuyêl Yɛsu, ko a feng a yɛ. Mwat o a sé mwât Samariya.

¹⁷Ko Yɛsu a hanat, a ye, “Yin á ga sè kuru de ba tɛ̀ in tyang. Bwang shabetat o a vɛ arɛt?

¹⁸Ba sɛ̀ mwat hwak de a toyo na a nɔ̂ng Dagwi nerey wɛt sɛ̌ mwat duk womo arɛt?”

¹⁹Ko a yang ɛ, “Sogo, na hwo kyè. Ba ga tɛ̀ o tyang, yaga hwà tɛ̀ gap mō e ra me wɔgɔ, me tɔk tɛ̀ o tyang.”

²⁰BeFarisi behak ba hwo rangâl Yɛsu jeng de Dagwi ê ba re negwɔm e ra jey. Yɛsu a hanat, a yang ɛn, “Vit a pyɛ di de yê dura a yin jeng de Dagwi ê ba re negwɔm.

²¹Ko vit a mwat de a rɔda yang in, ‘Di, Segwɔm Dagwi á hemo!’ kɛ ‘Di, á here!’ yaga Dagwi a sé re negwɔm e tē min.”

²²E bama mo, Yɛsu a yâng bemât masâ fwom mɛ, “Jeng ya sé kyè vey de yin a rɔda wok cwey dî hining e ji negasi de Me de ma tɛ́ me mwat ma rɔda to ba sè tanga yin, ko yin a rɔda di wɛt.

²³Ba rɔda tang in, ‘Di, á woro e hworo!’ kɛ ‘Di, á womo e ngamo!’ Yin nusu, na yin a wɔ̀ raa hɛn wɛt.

²⁴Yaga Me de ma tɛ́ me mwat ma rɔda ba vey gobok, sede nedɛbɛt gbara de ne tɛ̀ lagwi wo sè wɛshɛrɛk yi e bak womo vɔk e bak woro.

²⁵Ko a sé gbing-gbing na me tānga di reyɔm pyak e ngyen, ko bemât jey yemo be kyɛ́ ɛn me.

²⁶Sede remo de à sè e jeng Nowa, a rɔda ba sè ano jeng de Me de ma tɛ́ me mwat ma rɔda ba vey arɔng:

²⁷Bemat o bà re, ko bà sɔ, beras bà vos beha, ko beha arɔng bà kyese neweneng sɛ̌ tuk de Nowa à yel e ji gbɔng dwa-nshi. E bama mo, tɛmɛ-nshi nà vey, ko nà wey na yɛn mwa.

²⁸A rɔda to ba sè sede jeng Lɔt: Bemat o bà re, ko bà sɔ, bà seres, ko bà rɛsɛl, bà tus pyɛ́, ko bà lɔk beduk.

²⁹Ko tuk de Lɔt à tik repomô Sɔdɔm, bà shusha kya na kyâ negang yi e lagwi, ko hà wey na yɛn mwa.

³⁰A rɔda ba sè ano tuk de Me de ma tɛ́ me mwat ma rɔda ba dura tó hom.

³¹“Tuk hane kwong, mwat de ê ba sè sangal e ji fwam, ko pyɛ́ mɛ ye sè e ji lɔ — a kwon yel e ji lɔ na a jut yɛ̄ wɛt. Ano arɔng, mwat de ê ba sè e hey a to ɛ vɔk e lɔ wɛt.

³²Bàre hin na pyɛ de ya té na hwâ Lɔt!

³³Mwa mwat de a tē ngyɛ́k na a gyeng neken mɛ a rɔda bidɛ nɛ; ko mwa mwat de a ye waa a neken mɛ a rɔda sɛ̀ nɛ.

³⁴Ma sé ha a yin, nabwalak tuk hane, bemat beba ba rɔda sè e dyɛngɛ e ra gwat gwining; ba rɔda jut gwining, ko be tik gwining.

³⁵Beha beba ba rɔda ba sè hwongo e kwɔn hining; ba rɔda jut gwining, ko be tik gwining. [

³⁶Bemat beba ba rɔda ba sè e de fwom e hey; ba rɔda jut gwining, ko be tik gwining.]”

³⁷Ko bemât masâ fwom mɛ ba hwo rangal hɛ, ba ye, “E gwa, à Darwey ɛ?” Yɛsu a hanat, a yang ɛn, “E kwɔn de revîn pyɛ ra sé ɛ̀, e hwomo de bejagawey be tula hɛn ɛ̀.”