Read berom Luka 2 Bible Online

Luka 2 - berom bible

Luka 2

¹E jeng yane mo, Da vwel BeRoma de bá tang ɛ, à Augustus á nɔng nu, be basa nepyak mwa bemât bavwel mɛ.

²Hane há sè basâ bemat hê susu mo, ko e jeng o, Kwirinyus á sè gwɔmna e sevwêl Sirya.

³Yaga basâ bemat hane mo, kawɛ mwat á kyè vɔk e repomô lɔ mɛ, na be jɛk reza mɛ e bwok-basa baza gwo basâ bemat o.

⁴Yɔsɛf arɔng a sogo yi e repomô Nazarɛt e sevwêl Galili, ko a kyè vɔk e sevwêl Yudiya vɔk e repomô Bet-Lɛhɛm; kwɔn a hane de bà kana tɔ Gbɔng Gwɔ̀m Davit. A kyè wɔ e hwomo, yaga yɛ a sé wo lɔ Davit o.

⁵A jut Marya de a sé hwono hɛ, ko ba kyè vɔk e Bet-Lɛhɛm, na be jɛk baza mɛn e bwok-basa baza gwo basâ nepyak bemat. Marya mo a vɔk jim,

⁶ko jeng de bá sè e hwomo, jim tɔ ya hwo kaba hɛ.

⁷A tɔ hwêy mɛsɛng mɛ, wen o; a gunung hɛ na cɛ̂k rugu, ko a lasha hɛ e ji pyɛ de ngyāma ye re ɛ̀ pyɛ́. A ra ano, yaga yɛn á kana sɛ̀ kwɔ̂n sangal e lɔ bekɛnɛt wɛt.

⁸E yɛnɛ̂ sevwel o, belêk vyēl behak bá sè pɔlɔs e hey, ba gyenges kwarâ tyimit mɛn e hwomo.

⁹Tom-lagwi hwak wo Darwey a wɔ́ na yɛn, ko nedyɛt Dagwi na gwɔrɔ hɛn. Yɛn a vo bengyip sizɔng,

¹⁰ko tom-lagwi o a yang ɛn, “Yin wok bengyip wɛt! Ma vey a yin na yɛgɛt yat de yê tɛ̀ bemat min mwa be vɔk yey pyɛng sedesi.

¹¹Yunung, e ji repomô Davit, ba ga tɔ Mwât Sey in. E yɛ, à Kristi, Darwey.

¹²Gwong de yin ê tɔk, pyɛ mo ya sé ano a gwot ngan: Yin a rɔda di hwey cereng de ba gunung hɛ na cɛ̂k rugu, ko ba lasha hɛ e ji pyɛ de ngyāma ye re ɛ̀ pyɛ́.”

¹³E ji jeng o, ba di gbɔng regyɛng betom-lagwi tanga tom wane mo, ba somo Dagwi, ba tē,

¹⁴“Tik na Dagwi a vɔk gbɔng nerey, yɛ de a sé e lagwi, ko e jey, tik na neyey bemat de be pɛngɛ a yɛ yey ne dyɛng!”

¹⁵Jeng de betom o ba hàla hɛn na be to ɛn vɔk e lagwi, belêk vyēl o ba yâng bemɛn, “Tik na wot wɔ́ e Bet-Lɛhɛm, na wot wɔ̀ di pyɛ de ya té mo, yemo de Darwey a ga ha a wot e ra yɛ.”

¹⁶Ano kwong, yɛn a kyè dey-dey vɔk e hwomo, ko yɛn a sɛ̀ Marya, na Yɔsɛf, tanga hwey cereng o de ha sé e dyɛngɛ e ji pyɛ de ngyāma ye re ɛ̀ pyɛ́.

¹⁷Jeng de belêk vyēl o ba di hɛ, ba ha a yɛn rehâ pyɛ́ de tom-lagwi a ga kana ha a yɛn e ra hwey o.

¹⁸Mwa bemat de ba wok ba langat hɛn pyɛ́ de belêk vyēl o ba ha.

¹⁹Ko Marya a vɔk pyɛ́ mo mwa, a kyě tɔrɔng na yɛ̄ e yey mɛ.

²⁰Belêk vyēl o ba toyo vɔk e kwɔn mɛn, ba sé nɔ̂ng Dagwi nerey, ba somo hɛ yaga pyɛ̂ mwa de yɛn a ga wok, ko yɛn a to di yɛ̄ arɔng. Pyɛ́ mo ya sé tyɛng na pyɛ de tom-lagwi o á kana ha a yɛn gyam.

²¹Tuk hê rwit, sede jeng ya vey na be wɔ́ a hwey o e cwɛl, ba vo a hɛ rezâ Yɛsu. Reza ma rane de tom-lagwi á kana nɔ̂ng hɛ gyam na be vɔk jîm hɛ.

²²Jeng ya vey de be ra negwɔn tɛ́ ɛn jɛrɛ, tyɛng na pyɛ de bà jɛk e ji Badu Mose. E bama mo, Yɔsɛf tanga Marya yɛn a jut hwey o vɔk e Yɛrusalɛm na be wɔ̀ nára hɛ e nuyêl Darwey,

²³sede remo de bà jɛk e Bwok-basa Badu wɔgɔ, “Kahɛ hwey wen hê mɛsɛng de ba tɔ, ba rɔda nára a Darwey hɛ na he sè mɛ́.”

²⁴Ba to wɔ̀ nára nɔrɔ̂ yas de be yɛt vɔk na Dagwi na be bin sila mɛ̀ pyɛ de bà jɛk e Bwok-basa Badu wɔgɔ, “Bē nára begumurus beba kɛ nèy bebɔp neba.”

²⁵E jeng yane, mwat hwak de ba tang ɛ, à Simɛyɔn á sè e Yɛrusalɛm. Negwɔn mɛ ná sè cik e bayîs Dagwi, á to sap ɛ naka, ko á sè gyeng jeng de Dagwi a rɔda ba sɛlɛ BeIsrayɛl. Gabik Jɛrɛ há sè na yɛ,

²⁶ko há kana dura a yɛ dɛdɛɛt, yɛ a rɔda ku wɛt, sɛ̌ a tānga di Mwat de Darwey a kasa na a sey bemat.

²⁷Ko Gabik o ha tɛ̀ ɛ a kyè vɔk e Gbɔng Duk Re Fongol. Jeng de da na nêng Yɛsu ba vey na hwey o, na be ra a hɛ tyɛng na pyɛ de Badu Dagwi ba simo,

²⁸Simɛyɔn a wɔ̀ sey hɛ e vɔ mɛ, ko a feng a Dagwi, a ye,

²⁹“À Darwey, hwà ga ra pyɛ de hwà kana sira, hwô ra; yaga ano, tik na hwo tɛ̀ me, sam mō, e gwong, a remo de yey hom ya ga dyɛng.

³⁰Yaga ma ga di na bayis hom womo de ê sey bemat;

³¹hwà yong ɛ, yaga na mwa yére bemat jey be di ɛ.

³²Yɛ a sé negbey de ne tɛ̀ bemât yére dyuk be tɔk pyɛ de hwó simo, ne to tɛ̀ bemat mō BeIsrayɛl be vɔk gbɔng nerey.”

³³Da na nêng hwey o yɛn a langat hɛn na pyɛ́ de Simɛyɔn a ha e ra hɛ.

³⁴Ano Simɛyɔn a tɛ̀ nerat e ra yɛn, ko a yâng Marya, nêng hwey o, “Dagwi a ga yong ɛ̀ gyam, na hwey hemo he tɛ̀ bemat pyak e ji BeIsrayɛl ba rɔda gabsa, ko behak arɔng ba rɔda toyo vey na yɛ. Hā rɔda to sè pyɛ dura yi na Dagwi de bemat pyak ba rɔda kyɛ́ ɛn yɛ.

³⁵Ko yi ano, bê dura wɛshɛrɛk barê neyey mɛn detidetu. Ko yey mō ya rɔda lashe hɛ sede ba kulu yɛ na wal.”

³⁶Hwā hwak de á sè zarap Dagwi á sè e hwomo arɔng. Bá tang ɛ, à Ana, á sè hwêy Fanuwel wo yere Ashɛr. Á kana kwop kpushuk. Á kana sangal tanga rwas mɛ neshey netaama e bamâ weneng mɛn.

³⁷E bama de rwas o á ku, á hàla hɛ kuma, ko á to sangal ano neshey kuru rwit na nɛ nenaas (84). Á hàla Gbɔng Duk Re Fongol wɛt, ko á sǎ e de re a Dagwi fongol nagwi na naturuk, á tik rê pyɛ́, na a ra won arɔng.

³⁸Ana mo a kyè vey pom na bedâ Yɛsu e jeng o. A hwo feng a Dagwi, ko a ha e ra hwey o vɔk na mwa vemo de ba sɛt bayis mɛn e ra jeng de Dagwi a rɔda to ba viri Yɛrusalɛm.

³⁹Jeng de Yɔsɛf na Marya ba ga ra kayɛ pyɛ de be simo na yɛn a ra na be sila mɛ̀ Badu Darwey, yɛn a to ɛn vɔk e sevwêl Galili, vɔk e repomo mɛn e Nazarɛt.

⁴⁰Hwey o ha ras, ko ha gwɛ̌ gap. Ha vɔk netsitsɛng pyak, ko Dagwi a nɔ̂ng hɛ nerat mɛ.

⁴¹Kahɛ shey, bedâ Yɛsu ba kyese e Yɛrusalɛm yaga Nzem Gyilsit Nelɔ BeIsrayɛl.

⁴²Jeng de Yɛsu a sila shey kuru na hɛ ba, yɛn a wɔ́ e hwomo yaga nzem o tyɛng na negwɔn mɛn.

⁴³Bama de ba ga yɛnɛ nzem o, beda mɛ ba sé to ɛn wɛrɛn e lɔ, ko wen o, Yɛsu, a nàra e Yɛrusalɛm sana tɔ̂k beda mɛ mo.

⁴⁴Yɛn a bare, a sé tanga yɛn e ji rwâng bemat. Yaga ano, yɛn a kyè kwɛngɛl tuk hining; ko e bama mo, yɛn a hwo jāma hɛ e tê cáng mɛn na besa mɛn.

⁴⁵Sede yɛn a sɛ̀ ɛ wɛt, yɛn a to ɛn vɔk e Yɛrusalɛm na be wɔ̀ jāma hɛ.

⁴⁶E bamâ nepɔlɔ netat, yɛn a sɛ̀ ɛ e Gbɔng Duk Re Fongol e sangal e tê bemât basa, a sé wokos há mɛn, ko a sé rangsal hɛn e ra pyɛ́ detidetu arɔng.

⁴⁷Kawɛ mwat de a wok ɛ, a langat hɛ pyɛ́ de a tɔk, na begwong de e toysa a yɛn na nerangsal mɛn.

⁴⁸Jeng de beda mɛ ba di ɛ, a yang ɛn kpɔrɔk. Neng mɛ a yang ɛ, “À hwey, yaga sɛ́ de hwà ra a wot ano arɛt? Me tanga da mō, neyey mot na ga beseng e de jāma hwo.”

⁴⁹Yɛsu a rangal neng-gwɔ mɛ mo, a yang ɛ, “Yaga sɛ́ de yin a kyě jāma me arɛt? Yin a tɔk, a sé gbing-gbing na me sè e duk Da hom wɛt arɛt?”

⁵⁰Ko yɛn a tɔk pyɛ de a ha a yɛn wɛt.

⁵¹Ano Yɛsu a kyè tanga yɛn vɔk e Nazarɛt, ko a gyenges há mɛn. Ko neng mɛ a vɔk pyɛ́ mo mwa e ji yey mɛ.

⁵²Yɛsu a gwɛ̌ ras e rebek na e netsitsɛng, ko pyɛ́ de a ra ya jam a Dagwi mwa na bemat.