Read berom Luka 21 Bible Online

Luka 21 - berom bible

Luka 21

¹Yɛsu a hwo bɛrɛng, ko a di bedaberey de ba tɛ̀sɛ nɔrɔ mɛn e ji kwɔ̂n tɛ́sɛ dyām e Gbɔng Duk Re Fongol.

²A to di kuma hwak de a sé pɛ́ng-pɛng, a tɛ̀ nedyam zwey neba.

³Ko Yɛsu a ye, “Tsak o mwin me ha a yin: Kuma womo de a sé pɛ́ng-pɛng a tɛ̀ pyɛ de ya dal ye bwang bemât mwa.

⁴Yaga mwa hɛn ba vɛ́sɛ yi e ji pyɛ̂ nedanerey mɛn, ba tɛ̀sɛ. Ko yɛ, mwa ano de a sé pɛ́ng-pɛng, a tɛ̀ mwa pyɛ de ê re mɛ̀ pyɛ́.”

⁵Bemat behak bá sè ha e ra Gbɔng Duk Re Fongol, bá sè tɛ̀sɛ kâ nerât wɛ de ba lɔk na beta berat tanga nenɔrɔ de bemat bá kana nɔngɔ̂s Dagwi. Ko Yɛsu a yang ɛn,

⁶“Jeng ya sé kyè vey de ba rɔda gangas mwa pyɛ́ yemo de yin a sé bɛrɛng. Vit a gwofwa gwohwak e ngamo de ba rɔda ba tik gwɛ e ra tɛ̂t mumwɛ.”

⁷Ko yɛn a hwo rangâl Yɛsu, yɛn a ye, “À Da, pyɛ́ yemo ye ba té nayu ɛ? Ko e sɛ́ de ye ba dura a wot, pyɛ́ yemo ya sé kyè wɔ̀ té arɛt?”

⁸Yɛsu a yang ɛn, “Tē in naka, mwat hwak a kwɛlɛng hin wɛt. Yaga bemat pyak ba rɔda ba vey e ji reza hom, ko kawɛ e ji mɛn ê ba ye, yɛ a sé me; ê ba to ye, ‘Jeng hom ya ga vey bagat.’ Yin kwon raa hɛn wɛt!

⁹Yin wok bengyip wɛt e jeng de yin e ba wok rehâ tô como na rehâ sogô nehywɛ. Gbing-gbing na pyɛ́ yane ye ba té, ko jeng ye yɛnɛ mo ya ga vey bagat e ngyen wɛt.”

¹⁰Yɛsu a to gwɛ̌ yang ɛn, “Yére bemat jey ya rɔda ba tó como na bemɛn, ko yere arɔng ya rɔda ba tó como na yere cak.

¹¹Vwel ha rɔda ba digis sizɔng, ko vyong na nerɔ neves na rɔda ba sè e nekwɔn detidetu. Ba rɔda ba di pyɛ́ de ya sé yê bengyip ding-ding na gbɔng pyɛ̂ dura de ye yi e lagwi.

¹²Ko gyam na pyɛ́ yemo mwa ye ba té kwong, ba rɔda ba vos in, ko bê ba tak a yin reyɔm. Ba rɔda ba wɔ́ na yin e beduk re fongol, na be ba ra a yin shɔt, na be ba tɛ̀ in e ngyang. Ba rɔda to ba wɔ́ na yin e nuyêl begbɔng begwɔ̀m na begwɔmna, yaga yin e raa me.

¹³Jeng a yane kwong de yin a rɔda ba nɔng nuha e ra Yɛgɛt Yat.

¹⁴Ko yóng in neyey min, yin kwon sap gyam e ra pyɛ de yin ê ba wɔ̀ ha, na yin a ba dul mɛ̀ bato min.

¹⁵Yaga me ma rɔda ba nɔng in neha tanga netsitsɛng yerê nemo de vit a mwât repugu min hwak de a rɔda ba tɔk ha há duk o, kɛ a kyɛ́ ɛ pyɛ́ de yin a rɔda ba ha.

¹⁶Beda tanga beneng min, na begwa min, na cáng min, tanga besa min ba rɔda ba nára hin e vɔ bemat o, ko yɛn a rɔda ba tɛ̀ be mɔbɔs behak e ji min.

¹⁷Kawɛ mwat a rɔda ba bɛɛ hin ves, yaga yin e raa me.

¹⁸Ko vit a setôt rato min sining de sa rɔda ba gaba!

¹⁹Niri hin, ko ano yin a rɔda ba sey bato min.”

²⁰“Jeng de yin a rɔda ba di bagyɛng bemât como ba gwɔrɔ Yɛrusalɛm, ko yin a rɔda ba tɔk, ba vey bagât wey na repomo mo.

²¹E jeng o, tik na bemat de be ba sè e sevwêl Yudiya be tele vɔk e beraku. Vemo de be ba sè e ji repomo mo kwong, bē tik rɛ; ko vemo de be ba sè sangal e nebapomo kwong, yɛn a wɔ̀ yel e ji repomo mo wɛt.

²²Yaga negasi nane na rɔda ba sè jeng de Dagwi a rɔda ba tabak bemat mɛ, na be sila pyɛ̂ mwa de bà kana jɛk e Bwok-basa Dagwi.

²³Yaa kukuuk! Gawey e ra beha de bê ba vɔk jim, mwa na vemo de bê ba ngas nèy e jeng o! Gbɔng reyɔm ra rɔda ba hwo e ra sevwel semo, ko Dagwi a rɔda ba tɛ̀ shom na bemat o.

²⁴Ba rɔda ba mɔbɔs behak na bewal, ko ba rɔda ba hashe behak e sesam vɔk e yére bemasî mwa, ko bemat beduk ba rɔda ba bɔrɔs Yɛrusalɛm sɛ̌ jeng mɛn ya sila.”

²⁵“Ba rɔda ba bɛrɛng pyɛ̂ langat cak e gwi, na e pwɛl, na e netangacɛn. E ngamo e jey kwong, a rɔda ba sè a yére bemasi kpɔrɔk sizɔng, ko yɛn a rɔda ba wok bengyip gworep de gwo lulum tanga nshi de ne paa bagung.

²⁶Jeng de bemat be ba sè gyeng pyɛ́ de ye kyè wɔ̀ té e ra jêy mwa, ba rɔda ba kushu sede bemât cushu yaga bengyip, yaga ba rɔda ba kàsa pyɛ́ de ya vɔk reto e gwi yi e begwông yɛ̄.

²⁷E jeng yane kwong, bemat ba rɔda ba di Me de ma tɛ́ me mwat me kyè vey e ji rele na reto tanga nedyɛt nerat sizɔng.

²⁸Jeng de pyɛ́ yemo ye ba hwo té, tumal hin na yin a yâng bato min garang, yaga ba ga vey bagât sey in.”

²⁹E bama mo, Yɛsu a hwo ha a yɛn gwɔrɔ-há hemo, a ye, “Bɛrɛng hin retîn regwi na bwang cɔ́gɔt mwa.

³⁰Jeng de yin a di berang mɛn ba ga hwo turuk, ko yin a tɔk, swigi gwa ga vey bagat.

³¹Tyɛng ano arɔng, jeng de yin a di pyɛ́ yemo ya ga hwo té, ko yin a tɔk, jeng ya ga vey bagat na Dagwi a hwo re negwɔm.

³²“Tsak o mwin me ha a yin: Bemat de ba sé beken a remo, mwa vɛ ba rɔda kushu wɛt, sɛ̌ pyɛ́ yemo mwa ya té.

³³Jey tanga lagwi ba rɔda ba tala hɛn, ko reha hom ra rɔda ba tala hɛ ko tyɔng wɛt.”

³⁴“Tē in naka! Yin kwon tɛ̀ bato min e ra nzem sɔ̂ pyɛ́ yemo de ye tɛ̀ yin a feng kɛ e ra báre pyɛ̂ jey yemo. Ka ano, ko tuk hane ha rɔda ba hwo e ra yin hák, sede pyɛ ya hwo e sòro.

³⁵Yaga ha rɔda ba hwo e ra kawɛ mwat de a sé e kahɛ kwɔn e jey.

³⁶Bɛrɛng hin nekanang kayɛ jeng, ko rá in won, yaga na yin a sɛ̀ gap, na yin a kyè tyang e ji pyɛ́ yemo de ya rɔda ba té, yaga na yin a bin ba tumal arɔng e nuyêl Me de ma tɛ́ me mwat.”

³⁷Kahɛ tuk Yɛsu a basa a bemat e Gbɔng Duk Re Fongol, ko kahɛ hywelek a nunus, ko a wɔ̀ pɔl e raku hwak de be tâng wɛ, à Raku Pàt.

³⁸Ko bop nagasi, bemât mwa ba kyese e Gbɔng Duk Re Fongol o na be wok ɛ.