Read berom Luka 22 Bible Online

Luka 22 - berom bible

Luka 22

¹Nzem Kpam-tuk Sana Géy-sing de be tâng nɛ, à Nzem Gyilsit Nelɔ BeIsrayɛl na vey bagat.

²Begbɔng bepiris tanga bemât basâ Badu ba sé ra gwong na be vo Yɛsu, na yɛn a tɛ̀ be mɔrɔ hɛ. Ko yɛn a wok bengyip bemat.

³E bama mo, Shetan a yel e ji Yuda de ba tang ɛ, à Iskaryot. Yɛ á sè gwining e ji bemât masâ fwôm Yɛsu kuru na vɛ beba.

⁴Yuda mo a nusu, ko a wɔ̀ ha na begbɔng bepiris tanga begbɔng o vê bemât gyeng Gbɔng Duk Re Fongol e ra gwong de ê row a yɛn Yɛsu.

⁵Yɛn a vɔk yey pyɛng, ko yɛn a yang ɛ, yɛn ê tala hɛ dyām.

⁶Yuda a simo, ko a hwo jāma begwong de ê row Yɛsu sana tɔ̂k bemat.

⁷E jeng Nzem Kpam-tuk Sana Géy-sing, tuk de ba yɛt beturuk besɛl yaga yông pyɛ̂ Nzem Gyilsit Nelɔ BeIsrayɛl ha vey.

⁸Ko Yɛsu a hwo pat Bitrus tanga Yohana, a yang ɛn, “Ci wɔ̀ yong a wot hin pyɛ̂ nzem, na wot a bin re.”

⁹Yɛn a rangal hɛ, ba ye, “Hwó simo wot a wɔ̀ yong yɛ̄ e gwa arɛt?”

¹⁰A yang ɛn, “Sede yin a sé yel e ji repomo, ko yin a rɔda man na mwat de a tos nshi. Raa hin hɛ vɔk e lɔ de yɛ a rɔda yel ɛ̀,

¹¹ko yang in dâ lɔ mo ngan: ‘Da mot a rangal hwo: Duk a wɛ de me tanga bemât masâ fwom hom wot a rɔda re ɛ̀ pyɛ̂ nzem o arɛt?’

¹²Ko dâ lɔ mo a rɔda dura a yin gbɔng duk hwak e lɔ̂ rak o de ba ga tɔrɔ wɛ na pyɛ́. Yóng a wot hin kayɛ pyɛ e hwomo.”

¹³Yɛn a kyè, ko ba sɛ̀ kayɛ pyɛ tyɛng na pyɛ de Yɛsu a ha a yɛn; ko yɛn a yong pyɛ̂ nzem o.

¹⁴Sede jeng o ya vey, Yɛsu a kaba kwɔ̂n sangal, na a hwo re pyɛ́ na bemât masâ fwom mɛ.

¹⁵Ko a yang ɛn, “Ma kana tɛ̀ e yey sizɔng, na me re pyɛ̂ Nzem Gyilsit Nelɔ BeIsrayɛl yemo tanga yin gyam na me sɔ reyɔm!

¹⁶Yaga ma sé ha a yin, ma rɔda to ba re yɛ̄ wɛt, sɛ̌ há de ba ga ha e ra yɛ̄ ha sila jeng de Dagwi a rɔda ba re negwɔm e ra jey.”

¹⁷Ano kwong, Yɛsu a jut keshi, a feng a Dagwi, ko a ye, “Ná in, na yin a gas a bato min.

¹⁸Yaga ma sé ha a yin, yi e ngamo nuyel ma rɔda to ba sɔ nshî anap wɛt sɛ̌ jeng de Dagwi a rɔda hwo re negwɔm e ra jey.”

¹⁹Ano mo, a jut kpam-tuk, a feng a Dagwi, a kwɔrɔs wɛ, ko a nɔ̂ng bemât masâ fwom mɛ, a ye, “Rebek hom a remo de ba nɔng yaga yin. Rá in ano, na yin a bin bare mɛ̀ na me.”

²⁰Ano arɔng, e bamâ rê pyɛ́, a jut keshi, a ye, “Keshi kemo ka sé wuna-na-sira pas de Dagwi a man na nemi hom de ba rɔda shushu yaga yin.

²¹“Ko di in! Womo de a rɔda row me a sé tɛ̀ vwɔ mɛ e shǐ pyɛ́ tanga me!

²²Me de ma tɛ́ me mwat ma rɔda jut bol, sede remo de Dagwi à ga kana yong ɛ̀. Ko gawey e ra womo de a rɔda row me!”

²³Ko yɛn a hwo rangsâl bemɛn kɛ e wɛ̌ e ji mɛn de e kyè wɔ̀ ra ano.

²⁴Ko nenan na sogo e ji bemât masâ fwôm Yɛsu, kɛ e wà e ji mɛn de ba jut, a dal na nerey arɛt.

²⁵Ko Yɛsu a hwo yang ɛn, “Begbɔng begwɔ̀m yére dyuk be re negwɔm e ra bemat mɛn na retek, ko vemo de ba vɔk reto arɔng be simo be tang ɛn, à bemât sɛlɛ̂ bemat.

²⁶A sé ano na yin wɛt. Ko mwat de a dal in na nerey, tik na a tɛ́ ɛ sede swɛl o e negya, ko mwât nuyel a tɛ́ ɛ sede mwât fwom.

²⁷E wà de a dal na nerey ɛ? Womo de e sangal na a re pyɛ́, kɛ womo de a sé mwât fwom de e nɔngɔs hɛ pyɛ́ mo arɛt? A sé e womo de e sangal na a re pyɛ́ mo. Ko me ma sé e ji min sede mwât fwom.

²⁸“E yin vɛ de yin a nàra tanga me yi e jeng de ma sɔ negbang detidetu.

²⁹Tyɛng sede remo de Da hom a nɔng me reto na me re negwɔm, ano arɔng me ma sé nɔng in reto mo.

³⁰Yin a rɔda ba re, ko yin ê ba sɔ tanga me e ji segwɔm hom, ko yin a rɔda to ba sangal e ra beta negwɔm, na yin a ra a yére kuru na yɛ bya (12) yê Israyɛl shɔt.”

³¹“À Simɔn, à Simɔn! Shetan a ga jāma reto na a bin masa hin, na a gas vemo de ba sé berat yi e beves o, sede remo de be wolom byɛmɛ yi e yéneng pyɛ́.

³²Ko ma ga ra won yaga hwo, na hwo tik nà sêy tsak o na me wɛt. Ko jeng de hwó to ba doyo vey na me, tik na hwo gwɛ̌ a begwa mō gap.”

³³Bitrus a yang ɛ, “À Darwey, ma ga yong me na me kyè vɔk e ngyang tanga hwo, na me to ku tanga hwo arɔng!”

³⁴Ko Yɛsu a toyo a yɛ, a yang ɛ, “À Bitrus, ma sé ha a hwo, gyam na rungat wo ba dak segwɔm yunung, hwà ga kana tono tɔ́k hom zang tat.”

³⁵E bama mo, Yɛsu a yang ɛn, “Jeng de ma kana tomo hin sana jut rabâk dyām, kɛ malâ won, kɛ bekpatak, yin á kana bidɛ pyɛ cak arɛt?” Yɛn a yang ɛ, “Wey, wot a bidɛ pyɛ wɛt.”

³⁶Yɛsu a yang ɛn, “Ko a remo, kawɛ mwat de a vɔk rabâk dyām kɛ malâ won, tik na a jut wɛ. Ko womo de a vɔk wal wɛt, tik na a row pyɛ banga mɛ, na a sey mɛ̀ wɛ.

³⁷Yaga bà jɛk e Bwok-basa Dagwi wɔgɔ, ‘Ba ga bɛrɛng hɛ sede hwak e ji bemat de be gyenges badu wɛt.’ Ko ma sé ha a yin, a sé gbing-gbing na há mo he sila hɛ e ra me. Mwin, mwa pyɛ́ de bà jɛk e ra me ya sé kyè wɔ̀ sila hɛ.”

³⁸Ko bemât masâ fwom mɛ ba hwo yang ɛ, “À Darwey, ko sɛ́ sede bewal beba a vemo kɛk ɛ̀!” Ko Yɛsu a yang ɛn, “Hā ga vey ano!”

³⁹Yɛsu a nu ɛ yi e repomo mo, ko a kyè vɔk e Raku Pàt, sede remo de a ga tɔ́k ɛ mɛ̀; ko bemât masâ fwom mɛ ba raa hɛ.

⁴⁰Jeng de a pom e kwɔn o, a yang ɛn, “Rá in won, yaga na yin a gaba wɛt jeng de yin a yel e mara.”

⁴¹E bama mo, yɛ nju mɛ a gwɛ̌ kyè tyɔng sede nelîs barâk gwofwa, a pom, a ye guduruk e vwel, ko a ra won.

⁴²A ye, “À Da, ka sede hwà simo, jut keshi reyɔm kemo yi na me. Ko mwa ano, rá pyɛ de hwó simo zɔng, ko pyɛ de me simo wɛt.” [

⁴³Ko tom-lagwi a vey na yɛ, a gwɛ̌ a yɛ gap.

⁴⁴Ko sede a sé sɔ reyɔm sizɔng, a gwɛ̌ ra won na yey mɛ mwa, ko selong mɛ sa sé sede bāgat nemi de ba gabsa e vwel.]

⁴⁵Jeng de a sogo yi e de won, a to ɛ vɔk e dem bemât masâ fwom mɛ, a pom, ko a sɛ̀ ɛn e de nevwa, yaga yey mɛn ya lashe hɛ ding-ding.

⁴⁶A yang ɛn, “Yaga sɛ́ de yin a sê nevwa arɛt? Sogo hin, na yin a ra won, yaga na yin a gaba wɛt jeng de yin a yel e mara.”

⁴⁷Jeng de Yɛsu á sè rɔ̌ ha, regyɛng bemat ra yi. Ko Yuda, yɛ gwining e ji bemât masâ fwom mɛ kuru na vɛ beba, a sey a yɛn yel, ko a kyè vɔk na Yɛsu na a wɔ̀ man ranang na yɛ, na a yang ɛ mɛ̀ show.

⁴⁸Ko Yɛsu a yang ɛ, “Káa! À Yuda! A sé yi na mân ranang de hwô row mɛ̀ Me de ma tɛ́ me mwat arɛt?”

⁴⁹Jeng de bemat de ba sé tanga Yɛsu ba di pyɛ de ye kyè wɔ̀ té, yɛn a ye, “À Darwey, wot tow ɛn na bewal mot arɛt?”

⁵⁰Ko hwak e ji mɛn a tara sam darwêy bepiris, a tùt a yɛ fwông vwɔ yege.

⁵¹Ko Yɛsu a yang ɛn, “Tík in ano!” A ra fwông mwat o, ko a tɛ̀ ɛ tyang.

⁵²Ano a yâng begbɔng bepiris, na begbɔng o vê bemât gyeng Gbɔng Duk Re Fongol, tanga bemakuk, de ba wɔ́ e hwomo na be wɔ̀ vo ɛ, “Ko sɛ̌ yin a nusu na bewal tanga bekpurûng begele sede ma sé gbik arɛt?

⁵³Kahɛ tuk ma sè tanga yin e Gbɔng Duk, ko yin a nára vɔ min na yin a vo me wɛt. Ko a remo, jeng min à yemo tanga jeng gwɔ̀m cēng de e re negwɔm e lwīl.”

⁵⁴Bemat o ba vo Yɛsu, ba kyè na yɛ vɔk e lɔ darwêy bepiris. Ko Bitrus a raa e bama yikyik tyɔng.

⁵⁵Ba ga pɛl kya e tê lala mo, ko Bitrus a pom, a wuna hɛ na vemo de ba sé sangal e hwomo.

⁵⁶Ko gwining e ji behwông fwôm lɔ mo a di ɛ e negbêy kya mo e sangal, a hwo bɛrɛng hɛ yɛɛlɛl, a ye, “Mwat womo á sè tanga yɛ!”

⁵⁷Ko Bitrus a tono, a ye, “À hwong, ma ka tɔk ɛ wɛt!”

⁵⁸E bamâ jeng tyɔng, mwat hwak a di ɛ, a ye, “Hwo arɔng hwà sé gwining e ji mɛn!” Ko Bitrus a toyo a yɛ, a yang ɛ, “À sa, ma sé wɛt!”

⁵⁹Sede ba to sangal sede dyam-gwi jining, mwat o hwak a to tɛ̀ kaashash e ra yɛ, a ye, “Vit à cuna cak! Mwat womo á sè tanga yɛ, yaga yɛ arɔng a sé mwât Galili.”

⁶⁰Ko Bitrus a toyo a yɛ, a yang ɛ, “À sa, ma ka tɔk pyɛ de hwó ha e ra tɛt o wɛt!” E ji jeng de a sé rɔɔ ha, rungat wa vɛ̌ dak segwɔm.

⁶¹Darwey a doyo, a bɛrɛng Bitrus gbir, ko Bitrus a pere bare na há de Darwey á kana ha a yɛ wɔgɔ, “Gyam na rungat wo ba dak segwɔm yunung, hwà ga kana tono tɔ́k hom zang tat.”

⁶²Ko Bitrus a nusu e jey, a wɔ̀ tosho tyɔng wɛt.

⁶³Bemat de ba gyeng Yɛsu ba hwo shɛgɛsh hɛ, ko ba dak ɛ.

⁶⁴Yɛn a bang a yɛ bayis, ko ba rangal hɛ, ba ye, “Kɛ hwô tɔk ha a wot mwat de a ga rusu hwo arɛt?”

⁶⁵Ko yɛn a gwɛ̌ tabas a yɛ nengyas.

⁶⁶Jeng de gasi ha ye gbey, bemakûk BeYuda, na begbɔng bepiris, tanga bemât basâ Badu ba man, ko ba wɔ́ na Yɛsu e nuyel mɛn.

⁶⁷Ko yɛn a yang ɛ, “Hā a wot, hwà sé Mwat de Dagwi a kasa na a sey bemat arɛt?” Yɛsu a hanat, a yang ɛn, “Ka ma ka ha a yin, ko yin a rɔda sey tsak o na há hom wɛt;

⁶⁸ko ka sede ma ka rangal hin pyɛ cak, yin a rɔda toyo a me wɛt.

⁶⁹Ko e ngamo nuyel, Me de ma tɛ́ me mwat ma rɔda sangal e vwɔ yegê Dagwi Wo Reto Mwa.”

⁷⁰Yɛn mwa hɛn ba ye, “Ko sɛ̌ hwà sé Hwey Dagwi arɛt?” Yɛsu a toyo a yɛn, a ye, “Yin a ha tyɛng, e me wɛ.”

⁷¹Ko ba ye, “Wot e to simo vɛ̌ bemât nuha arɛt? Wot pyɛ mot, wot a ga wok há mo e nu mɛ!”