Read berom Luka 23 Bible Online

Luka 23 - berom bible

Luka 23

¹Bemat o mwa ba sogo, ba kyè na Yɛsu wɔ e nuyêl Gwɔmna Pilatus.

²Ko yɛn a hwo tɛ̀sɛ kun mɛ wɔgɔ, “Wot a vo mwat womo a sé rigim bemat mot. A sé tang ɛn, yɛn a tala dyâm vwel vɔk na Da vwel BeRoma wɛt, ko a to tē, yɛ a sé Mwat de Dagwi a kasa na a sey bemat wɔgɔ, yɛ à gbɔng gwɔ̀m.”

³Pilatus a hwo rangal hɛ, a ye, “Hwo wɛ hwà sé Gbɔng Gwɔ̀m BeYuda arɛt?” Yɛsu a toyo a yɛ, a yang ɛ, “Ey, hwà ha yɛt.”

⁴Ko Pilatus a yâng begbɔng bepiris tanga regyɛng bemat o, “Ma sɛ̀ mwat womo na pyɛ de mê gang ɛ mɛ̀ wɛt.”

⁵Ko bemat o ba shonong e ra Pilatus wɔgɔ, “A ga luk bemat e sevwêl Yudiya mwa na basa mɛ. Á hwo mɛ̀ e Galili, ko á womo, a ga vɛ̄ hɛ mɛ̀ e ngamo.”

⁶Jeng de Pilatus a wok ano, a hwo rangal hɛn, a ye, “Mwat womo a sé mwât Galili arɛt?”

⁷Sede a wok, Yɛsu a yi e sevwel de Herodes e re ɛ̀ negwɔm, a tomo hɛ vɔk na yɛ, yaga e jeng o Herodes arɔng á sè e Yɛrusalɛm.

⁸Jeng de Herodes a di Yɛsu, a vɔk yey pyɛng sizɔng. Yimo á sè gyeng na a di ɛ, yaga a ga kana wokos há e ra yɛ, ko a simo na a di pyɛ bes de Yɛsu e ra.

⁹A hwo rangsâl Yɛsu nerangsal pyak, ko Yɛsu a toyo a yɛ na pyɛ cak wɛt.

¹⁰Begbɔng bepiris tanga bemât basâ Badu ba sé e tumal e hwomo, ko ba sé bûm tɛ́sɛ kûn Yɛsu.

¹¹Herodes tanga bemât como mɛ ba hwo haras a yɛ, ko yɛn a shɛgɛsh hɛ. E bama mo, yɛn a tɛ̀ a yɛ gwogbɔng gworugu gworwat, ko yɛn a to tomo hɛ vɔk na Pilatus.

¹²Yimo, Herodes na Pilatus bá kana sè bemât repugu, ko e tuk hane mo, ba vo nesa na bemɛn.

¹³Pilatus a hwo yila begbɔng bepiris, na bemât nuyel, tanga regyɛng bemat,

¹⁴a yang ɛn, “Yin a vey na mwat womo na me, ko yin a ye, a ga luk bemat. Ma ga kyè e yɛ ngyɛ̄k-ngyɛk e nuyel min, ko ma ka sɛ̀ ɛ na pyɛ de mê gang ɛ mɛ̀ wɛt e ji pyɛ́ de yin a tɛ̀sɛ kun mɛ e ra yɛ.

¹⁵Herodes arɔng a ka sɛ̀ ɛ na pyɛ cak wɛt, yaga ano de a to tomo hɛ vey na wot. Mwin, vit a pyɛ de mwat womo a ga ra, yemo de yê tɛ̀ be mɔrɔ hɛ.

¹⁶Yaga ano, ma rɔda tɛ̀ be dak ɛ na zining; e bama mo, mê hàla hɛ na a kyè.” [

¹⁷E jeng kanɛ Nzem Gyilsit Nelɔ BeIsrayɛl e sè gbing-gbing na Pilatus a viri a bemat mwât ngyang gwining.]

¹⁸Bemat o mwa ba shusha gwolwɛlɛ, ba tē, “Bē wey na mwat womo! Viri a wot Barabas!”

¹⁹Barabas á sè mwat de bá tɛ̀ ɛ e ngyang, yaga bá kana ye be ye gup a negwɔm e repomo mo, ko yaga mɔrɔ̂ mwat arɔng.

²⁰Pilatus a to shonong e ra bemat o, yaga a simo na a hàla Yɛsu.

²¹Ko yɛn a gwɛ̌ ta gwolwɛlɛ, ba tē, “Bē kak ɛ e ra cɔ́gɔt! Bē kak ɛ e ra cɔ́gɔt!”

²²Pilatus a to yang ɛn hê netat, “Ko e yɛ̌ pyɛ vyes de mwat womo a ga ra arɛt? Ma ka sɛ̀ pyɛ cak de ya tɛ̀ be mɔrɔ hɛ wɛt! Ma rɔda tɛ̀, be dak ɛ na zining, na be hàla hɛ, a kyè.”

²³Ko yɛn a sangal e de tâ gwolwɛlɛ, yɛn a tē ngyat wɔgɔ, sɛ̌ be wɔ̀ kak Yɛsu e ra cɔ́gɔt. E yɛnɛ mo, tɔ̀ mɛn ba shǎl.

²⁴Ko Pilatus a gang Yɛsu na shɔt, yaga na a ra a yɛn pyɛ de ba simo.

²⁵A viri a yɛn mwat de yɛn a simo, womo de bá kana tɛ̀ e ngyang yaga yé gup à negwɔm tanga mɔrɔ̂ mwat, ko a gang a yɛn Yɛsu, na be wɔ̀ ra a yɛ pyɛ de yɛn a simo.

²⁶Sede bemât como bá sè kyè na Yɛsu, yɛn a man na mwat hwak de ba tang ɛ, à Simɔn wo Kirene. A ga yi e nebapomô hey, ko a se kyè wɔ e ji repomo. Yɛn a vo ɛ, ko ba tɛ̀ ɛ, a wut cɔ́gɔt-kak, na a raa mɛ̀ Yɛsu.

²⁷Regyɛng bemat pyak ra raa hɛ. Ko beha behak ba sé tanga yɛn vemo de ba tosho hɛ, ko ba lashe yey mɛn sizɔng.

²⁸Yɛsu a doyo, a yang ɛn, “À behâ Yɛrusalɛm! Yin tosho me wɛt; tosho hin bato min tanga nèy min arɔng.

²⁹Yaga jeng ya sé kyè vey de bemat ba rɔda ba ye, ‘Yin a sé vê yey pyɛng, à yin besang-gwon, yin vemo de yin a ga tɔs nèy wɛt, yin a ga ngas nèy arɔng wɛt!’

³⁰Jeng á yane de bemat ba rɔda ba hwo tâng beraku, ‘Gaba hin e ra wot!’ ko bê ba tâng berahwol, ‘Báng in hot!’

³¹Ka sede bemat be ra pyɛ́ yemo na me de ma sé sede cɔgɔt de ya rɔngɔl lya, e yɛ̌ pyɛ de ya rɔda té na yin de yin a sé sede cɔgɔt de ya hworok arɛt?”

³²Ba jut bemat beba arɔng vemo de bá kana gyilsit badu, ba kyè na yɛn, na be wɔ̀ mɔrɔ hɛn tanga Yɛsu.

³³Jeng de yɛn a pom e dem de be tâng hɛ, à Gwokup Ratô Mwat, ko yɛn a kak ɛ e ra cɔ́gɔt tanga bemât gyilsît badu beba vane mo, gwining e vwɔ yege mɛ ko hwak e vwɔ mwɛlɛng mɛ.

³⁴Ko Yɛsu a hwo ye, “À Da, hàla a yɛn banɛn mɛn, yaga yɛn a tɔk pyɛ de ba sé ra wɛt.” Bemât como ba ra cáca na be gas mɛ̀ berugu mɛ e bato mɛn.

³⁵Bemat ba tumal e hwomo, ba bɛrɛng pyɛ́ de ya té, ko bemakûk BeYuda kwong ba haras a yɛ, ba tē, “Á seres bemat behak; ka sede yɛ a sé Mwat de Dagwi a kasa na a sey bemat, ko tik na a sey tó mɛ!”

³⁶Bemât como arɔng ba haras a yɛ, ba vey bagat na yɛ, ko ba nára a yɛ nshî jwaatat,

³⁷ba ye, “Sēy tó mo, ka sede hwo wɛ hwà sé Gbɔng Gwɔ̀m BeYuda!”

³⁸Ba jɛk pyɛ de ya tɛ̀ ba kak ɛ, ko ba tɛ̀ e rak o wɔgɔ, GBƆNG GWƆM BEYUDA A WOMO.

³⁹Ko gwining e ji bemât gyilsît badu de ba kak ɛ a hwo tabas a yɛ nengyas, a ye, “Hwo wɛ hwà sé Mwat de Dagwi a kasa na a sey bemat wɛt arɛt? Sēy tó mo tanga wot!”

⁴⁰Ko hwak kwong a hwo gyong ɛ, a yang ɛ, “Hwó tele hwo Dagwi wɛt arɛt? Hwo de ba gang o na shɔt sede yɛ.

⁴¹Ko gang na shɔt o mot ha sé tyɛng, yaga wot a sé sey tyɛng na pyɛ́ de wot a ga kana ra. Ko mwat womo a ga ra pyɛ cak vyes wɛt.”

⁴²Ko a ye, “À Yɛsu, bàre na me jeng de hwó ba hwo re negwɔm mō!”

⁴³Yɛsu a yang ɛ, “Tsak o mwin me ha a hwo: Yunung, hwà rɔda sè tanga me e Kwɔ̂n Pɔngɔ.”

⁴⁴Sede gwi gwa vey e tē, sevwel o mwa sa ye mwangalang, ko sa sangal ano sɛ̌ dyām tyat nahywegelek,

⁴⁵yaga gwi gwa tik nà ta. Ko gworugû bâng duk e Gbɔng Duk Re Fongol gwa vugu hɛ bebak o beba.

⁴⁶Yɛsu a gbɔ na gbɔng fwɔ, a ye, “À Da, ma sé tik gabik hom e ji vɔ mō!” Bama de a ha ano, a hàla neken mɛ.

⁴⁷Jeng de gbɔng o wo bemât como a di pyɛ de ya té, a nɔ̂ng Dagwi nerey, a ye, “Mwin, mwat womo a vɔk pyɛ vyes cak wɛt.”

⁴⁸Jeng de bemât mwa vemo de ba tula hɛn na be bɛrɛng pyɛ de ya té ba di ano, ba hwo tòros hɛn vɔk e nelɔ, ko ba tɛ̀ vɔ e bato mɛn yaga lashê yey.

⁴⁹Ko mwa vemo de ba tɔk Yɛsu kwong tanga beha de bá kana raa hɛ yi e sevwêl Galili ba tumal e jey, ba bɛrɛng pyɛ́ mo.

⁵⁰Mwat hwak á sɛ̀ de ba tang ɛ, à Yɔsɛf. Á yi e Arimatiya, repomô BeYuda rehak. Á sè mwat rwat, ko á sè cik e begwong mɛ. Á sè gyeng jeng de Dagwi ê re negwɔm e ra jey. Ko mwa ano de yɛ á sè gwining e ji bemakûk badu, á simo hâ bemɛn wɛt mwa na pyɛ de yɛn á ra.

⁵¹

⁵²Yɛ wɛ kwong á wɔ́ na Pilatus, á rangal hɛ na be nɔng ɛ revîn Yɛsu, na a wɔ̀ lɛrɛ.

⁵³Ano, a gyirik rɛ e vwel, a hanas rɛ na gworugu gwopwɛng gworwat o, ko a wɔ̀ lɛrɛ rɛ e ji sak de bá kana ta e ji gwofwa, vemo de bá kana lɛrɛ ɛ̀ mwat wɛt.

⁵⁴Tuk hane ha sé tuk yông pyɛ́, ko ba vey bagât yel e Tuk Shábat.

⁵⁵Beha de bá kana vey tanga Yɛsu yi e sevwêl Galili ba raa Yɔsɛf, ko yɛn a di sak o na gwong de ba lɛrɛ ɛ̀ revîn Yɛsu e ji vɛ.

⁵⁶E bama mo, yɛn a to ɛn vɔk e lɔ, ba wɔ̀ yong behal nesang nerat tanga něy mɔmɔ ne nesang hyɔɔlɔl. Ko Tuk Shábat, yɛn a pɔng tyɛng sede remo de Badu mɛn ba ha.