Read berom Luka 24 Bible Online

Luka 24 - berom bible

Luka 24

¹Tûk mɛsɛng e ji sati mo, bop-bop nagasi, beha mo ba jut behal nesang nerat vemo de yɛn a ga kana yong, ko ba kyè mɛ̀ vɔk e sak o.

²Yɛn a wul, ko ba sɛ̀ ba ga kana biring gwofwa mo yi e nû sak o.

³Ko jeng de yɛn a yel e ji mo, yɛn a sɛ̀ revîn Darwey Yɛsu wɛt.

⁴A rɔngɔl a yɛn zii na pyɛ yane, ko gobok, bemat behak beba de ba tɛ̀ berugu de bà nɛp sizɔng ba tumal bagat na yɛn.

⁵Beha mo ba wok bengyip, yɛn a ye cěndet a bato mɛn vɔk e vwel, ko bemat o ba yang ɛn, “Yaga sɛ́ de yin a sé jāma womo de a vɔk neken e kwɔn de be lɛsɛ ɛ̀ bavin arɛt?

⁶A sé e ngamo wɛt! Ba ga sene hɛ yi e reku! Bàre hin na pyɛ de á ha a yin jeng de á sè tanga yin e sevwêl Galili wɔgɔ:

⁷‘A sé gbing-gbing na be ba nára Me de ma tɛ́ me mwat e vɔ bemât banɛn; yɛn a rɔda ba kak me e ra cɔ́gɔt, ko e tuk hê tat, ba rɔda ba sene me yi e reku.’ ”

⁸A remo kwong, beha mo ba bare na há mɛ mo.

⁹Yɛn a to ɛn yi e sak o, ko yɛn a ha a bemât masâ fwom mɛ kuru na wɛ gwining tanga bwang bemat mɛ mwa pyɛ́ yemo mwa.

¹⁰Beha de ba ha a bemât masâ fwôm Yɛsu há hane mo ba sé Marya wo Magdala, na Yowana, na Marya nêng Yakɔp, tanga bwang beha de ba sé na yɛn.

¹¹Ko bemât masâ fwom mɛ mo ba sey tsak o na há mɛn o wɛt, yaga yɛn a bare, há de beha mo ba ha a yɛn ha sé hâ neshɔngɔlɔng zɔng.

¹²Ko Bitrus a sogo, a kaba setele vɔk e sak o, a pom, a ye kwot, ko a di gworugu gwolwis de bá hanas hɛ mɛ̀ e hagat hining. E bama mo, a to ɛ vɔk e lɔ, a langat hɛ na pyɛ de ya ga té.

¹³Tuk hane mo, beba e ji bemât raà Yɛsu bá sè kyè vɔk e kerepomo kehak de be tâng kɛ, à Ɛmawus; ka sé sede lyōsho kuru na yɛ jining (11) yi e Yɛrusalɛm.

¹⁴Yɛn a sé ra berem na bemɛn e ra pyɛ̂ mwa de ya ga kana té.

¹⁵Jeng de ba sé kyě ha, be ra berem e ra pyɛ́ mo, ko Yɛsu pyɛ mɛ a vɛ̌ yi, a dop na yɛn.

¹⁶Ko mwa ano de yɛn a di ɛ, pyɛ cak ya dul ɛn nà tɔk ɛ.

¹⁷Ko Yɛsu a hwo yang ɛn, “Yin e ra berem e ra sɛ́ e gwong arɛt?” Yɛn a tumal, ko ba bɛrɛng na lashê yey.

¹⁸Gwining e ji mɛn de ba tang ɛ, à Keleyopas a rangal hɛ, a yang ɛ, “E hwo nju mo de hwà sé kwɛnɛt e Yɛrusalɛm de hwà dun pyɛ́ de ya té e hwomo e ji nepɔlɔ nane arɛt?”

¹⁹Yɛsu a to rangal hɛ, a ye, “E yɛ̌ pyɛ́ arɛt?” Ko yɛn a yang ɛ, “Pyɛ́ de ya té na Yɛsu wo Nazarɛt. Yɛ a womo de á sè zarap Dagwi, de há mɛ na fwom mɛ bá vɔk reto e nuyêl Dagwi tanga bemât mwa.

²⁰Ko begbɔng bepiris tanga bemât nuyel mot ba nára hɛ, na be gang ɛ na shɔt reku. E bama mo, ba kak ɛ e ra cɔ́gɔt.

²¹Ko wot, wot á kana sɛt yey, e yɛ wɛ de e ba viri BeIsrayɛl! Ko tik hane kwong, tuk hê tat a hemo de pyɛ́ yemo ya té.

²²Ko beha behak e ji mot ba ga nɔng ot pyɛ langat. Yɛn a wɔ́ e sak o bop nagasi,

²³ko yɛn a sɛ̀ revin mɛ wɛt. Yɛn a to ɛn, ko ba ha a wot, yɛn a di pyɛ cak sede e ji negwi-ywey, yɛn a di betom-lagwi de ba ha a yɛn, Yɛsu a sé na neken.

²⁴Ko behak e ji mot ba wɔ́ e sak o arɔng, yɛn a sɛ̀ tyɛng pyɛ de beha mo ba ha. Ko yɛ pyɛ mɛ, yɛn a di ɛ wɛt.”

²⁵Ko Yɛsu a yang ɛn, “À betɔn behak! Bato min ba sé dirik, ko yi ano, yin a sey tsak o na kayɛ pyɛ de bezarap Dagwi bà kana ha wɛt.

²⁶Yin a tɔk, a sé gbing-gbing na Mwat de Dagwi a kasa na a sey bemat a sɔ reyɔm rane, yaga na a tɔk wok netâ gbɔng nerey mɛ wɛt a?”

²⁷Ko Yɛsu a misang a yɛn neha de bà kana ha e ra yɛ e ji mwa Bwok-basa Dagwi, a hwo mɛ̀ yi e bebok-basa Mose vɔk e bebok-basa mwa bezarap Dagwi.

²⁸Jeng de yɛn a vey bagat na kerepomo de yɛn a kyè vɔk ɛ̀ mo, Yɛsu a ra sede é kyè wɔ̀ kwey.

²⁹Ko yɛn a shonong e ra yɛ, ba yang ɛ, “Sàngal e ngamo tanga wot, yaga gwi gwa ga kyè, ko nawiri na sé tɛ̀.” Ko Yɛsu a yel, na a bin sangal na yɛn.

³⁰Jeng de a sé re pyɛ́ tanga yɛn, a jut kpam-tuk, a feng a Dagwi, a kwɔrɔs wɛ, ko a gas a yɛn.

³¹E jeng o, bayis mɛn ba hwo wunta hɛn, yɛn a tɔk ɛ, ko a vɛ̌ ye bit e bayis mɛn.

³²Yɛn a tâng bemɛn, “Yɛ́t de neyey mot ná gà lolo na yey pyɛng jeng de á gà kyě há a wot e gwong, ko á ga misang a wot Bwok-basa Dagwi.”

³³Remo-remo, yɛn a sogo, ko ba to ɛn vɔk e Yɛrusalɛm. Ba pom, ba sɛ̀ bemât masâ fwom Yɛsu kuru na wɛ gwining de ba ga tula hɛn e dem hining tanga bemat de ba sé tanga yɛn,

³⁴ko yɛn a sé tē, “Mwin, Darwey a ga sene yi e reku! A ga dura a Simɔn tó mɛ!”

³⁵Ano kwong, bemat beba mo ba hwo ha a yɛn pyɛ́ de ya ga té e gwong, mwa na gwong de yɛn á tɔk Darwey jeng de á kwɔrɔs kpam-tuk.

³⁶Jeng de bá sè rɔ̌ ha a yɛn pyɛ́ yane, Yɛsu pyɛ mɛ a vɛ̌ tumal e ji mɛn, a yang ɛn, “Tik na neyey min ne dyɛng!”

³⁷Yɛn a ye lot, bengyip ba vo ɛn, ko a sé a yɛn sede yɛn a sé di wovuvwel.

³⁸Ko Yɛsu a yang ɛn, “Yaga sɛ́ de yin a ye bège arɛt? Yaga sɛ́ de yin e dasap e neyey min arɛt?

³⁹Di in vɔ hom tanga bol hom. A sé e me pyɛ hom! Rá in me, na yin a di: Wovuvwel a vɔk banama tanga bekup wɛt, sede remo de yin a di ma vɔk.”

⁴⁰Bama de a ha ano, a dura a yɛn vɔ mɛ tanga bol mɛ.

⁴¹Yɛn a rɔngɔl gbak sana sey tsak o, yaga yɛn a sila na yey pyɛng, ko ba sé langat hɛn pyɛ yemo. Yaga ano, a rangal hɛn, a ye, “Yin a vɔk pyɛ̂ re cak e ngamo a?”

⁴²Yɛn a nɔng ɛ cɛ̌k namâ tɔk de ba ga rangas,

⁴³a sey, ko a hwo re mo e nuyel mɛn.

⁴⁴Ko a to yang ɛn, “Pyɛ ma yemo de ma kyě ha a yin jeng de má rɔngɔl tanga yin wɔgɔ: A sé gbing-gbing na mwa pyɛ́ de bà kana jɛk e ra me e ji Badu Mose na e bebok-basa bezarap Dagwi, tanga yēmo de bà jɛk e Bwok-basa Lɛlɛ yē sila.”

⁴⁵Ano, a tɛ̀ neyey mɛn ne tɔk pyɛ́ de bà jɛk e Bwok-basa Dagwi.

⁴⁶A yang ɛn, “Bà jɛk ngan: Mwat de Dagwi a kasa na a sey bemat a rɔda di reyɔm, ko a rɔda to sene yi e reku e tuk hê tat.

⁴⁷Ba rɔda shara a mwa yére bemat jey e ji reza mɛ, ye doyo yi e banɛ̂n yɛ̄, yaga na Dagwi a hàla a yɛ̄ vɛ, ko ba rɔda susu shara mo e Yɛrusalɛm.

⁴⁸Yin vɛ yin a sé bemât nuha e ra pyɛ́ yemo.

⁴⁹Ko me ma rɔda wɔ̀ tomo a yin na pyɛ de Da hom a ye, ê nɔng in. Ko kā gyeng in e ji repomo mo e ngyen sɛ̌ jeng de ba nɔng in reto yi e lagwi.”

⁵⁰E bama mo, Yɛsu a kyè na yɛn wɔ bagat na Bet-Anya. A jut vɔ mɛ e rak o, ko a tɛ̀ nerat e ra yɛn.

⁵¹Sede a sé tɛ̀ a yɛn nerat ano, a gas ɛ na yɛn, ko ba jut ɛ vɔk e lagwi.

⁵²Yɛn kwong, yɛn a re a yɛ fongol, ko yɛn a to ɛn vɔk e Yɛrusalɛm na yey pyɛng sizɔng.

⁵³E hwomo, yɛn a wusal e Gbɔng Duk Re Fongol e de somô Dagwi.