Read berom Luka 3 Bible Online

Luka 3 - berom bible

Luka 3

¹E ji shey hê kuru na hɛ tungun hê negwɔm Tiberiyus de á sè Da vwel BeRoma, Pɔntyus Pilatus á sè gwɔmna sevwêl Yudiya, ko Herodes á sè re negwɔm sevwêl Galili; gwa mɛ Filip arɔng á sè re negwɔm e ra bavwêl Ituriya tanga Tarakonitis, ko Lisanyas kwong e Abilene.

²Hanas tanga Kayafas bá sè bedarwey bepiris. E jeng o, Yohana Zɛkarya á sè e hey, ko Dagwi a tɛ̀ ɛ, a wɔ̀ ha reha mɛ.

³A hwo kyě kyè e yɛnɛ̂ sevwêl mwa de sa gwɔrɔ Rɔt Yɔrdan, a shara a bemat reha wɔgɔ, “Doyo hin yi e banɛn min, na be tɛ̀ a yin batisma, yaga na Dagwi a hàla a yin banɛn min arɔng.”

⁴Sede remo de Yɛshaya, zarap Dagwi, à kana jɛk e bwok-basa mɛ pyɛ de Dagwi à ha wɔgɔ, “Be wok fwɔ̂ mwat hwak de gwo mok e hey, gwo tē, ‘Yóng in a Darwey gwong, tɛ̀ in gwɛ tas, na a bin kwey ɛ̀!

⁵Ba rɔda sila kawɛ nɛk, ko bê gangas kawɛ raku na rahwol. Gwòng de ba tē rɛ̌t, bê tɛ̀ vɛ cik, ko gwòng de ba sé ves, bê tɛ̀ vɛ, be tɛ́ ɛn tɛ́l.

⁶Ko mwa yére bemasi yê di gwong de Dagwi e sey nekên bemat.’ ”

⁷Regyɛng bemat ra wɔ na Yohana, na a tɛ̀ a yɛn batisma. Ko a yang ɛn, “À yin bègàbak. E wà de a ha a yin na yin a tele yi e shom de Dagwi a rɔda ra arɛt?

⁸Rá in yerê tomong de be dura, yin a ga doyo yi e banɛn min. Yin hwo tâng bemin wɛt wɔgɔ, ‘Abraham a sé dâ beda mot.’ Yaga ma sé ha a yin, Dagwi a vɔk reto na a tɛ̀ beta vemo be tɛ́ ɛn nèy Abraham!

⁹Ba ga kana tɛ̀ nû tyem e batîn cɔ́gɔt. Ko kayɛ cɔgɔt de ya tɔs nèy nerat wɛt, ba rɔda tow yɛ, na be bomo yɛ e ji kya.”

¹⁰Bemat o ba rangal hɛ, ba ye, “E sɛ́ kwong de wot ê ra ɛ?”

¹¹Ko Yohana a yang ɛn, “Mwa mwat de a vɔk berugu beba, tik na a nɔ̂ng mwat de a bidɛ gwohwak; ko womo de a vɔk pyɛ̂ re, tik na a ra ano arɔng.”

¹²Ko bemât seres dyâm yeles na pyɛ́ behak ba vey na be tɛ̀ a yɛn batisma, ba hwo rangal hɛ, ba ye, “À Mwat Basa, e sɛ́ de wot ê ra arɛt?”

¹³Ko a yang ɛn, “Yin kwon seres pyɛ de ya dal yemo de ba ga ha a yin wɛt.”

¹⁴Bemât como behak arɔng ba rangal hɛ, ba ye, “Ko wot arɔng, e sɛ́ de wot ê ra ɛ?” Yohana a yang ɛn, “Yin sey dyām yi na mwat hwak na gap wɛt, kɛ yin ha hâ bɔs e ra mwat hwak arɔng wɛt. Niri hin na dyām de yin e seres.”

¹⁵Sede remo de bemat ba sé gyeng pyɛ cak ryey o de ya sé kyè wɔ̀ té, yɛn mwa ba hwo bare e ra Yohana, ba tē kɛ gyeng yɛ wɛ a sé Mwat de Dagwi a kasa na a sey bemat.

¹⁶Ko Yohana a yang ɛn mwa, “Me, me tɛ̀sɛ a yin batisma na nshi, ko womo de e kyè vey a dal me na reto. Ma ka vey na me viri batsɛ̂p bekpatak mɛ wɛt. Ko yɛ a rɔda tɛ̀sɛ a yin batisma na Gabik Jɛrɛ tanga kya.

¹⁷A vɔk bworô bɛm e vwɔ mɛ, na a bɛm mɛ̀ pyɛ́ mo mwa, na a hashe yéneng o vɔk e gban mɛ; ko a rɔda tɛ̀ kya e ra byɛmɛ mo, yerê kya de he rimi hɛ ko tyɔng wɛt.”

¹⁸Yohana a vo a bemat redu e begwong detidetu, a to shara a yɛn Yɛgɛt Yat.

¹⁹Ko a dura a Gbɔng Gwɔ̀m Herodes buru mɛ e ra pyɛ de a ra na Herodyas, hwâ gwa mɛ, mwa na bwang pyɛ́ vyes de Herodes á kana ra.

²⁰Ko Herodes kwong a gwɛ̌ pyɛ vyes o cak e ra yane: A tɛ̀, be tɛ̀ Yohana e lɔ̂ ngyang.

²¹E jeng de bá sè tɛ̀sɛ a bemât mwa batisma, Yohana a tɛ̀ a Yɛsu batisma arɔng. Ko jeng de Yɛsu a sé ra won, lagwi wa wunta hɛ,

²²ko Gabik Jɛrɛ de ha jut rebek sede gwobɔp ha gyirik, ha hwo e ra yɛ. Ko fwɔ gwa yi e lagwi, gwa ye, “Hwà sé Hwêy yey hom, yey hom ya pɛngɛ na hwo sizɔng.”

²³Jeng de Yɛsu a hwo fwôm basa mɛ, a vɔk neshey sede kuru batat (30). Bemat ba jut ɛ, yɛ a sé hwêy Yɔsɛf. Yɔsɛf à sè hwêy Heli,

²⁴de à sè hwêy Matat, Matat à sè hwêy Levi, de à sè hwêy Mɛlki, Mɛlki à sè hwêy Yanai, de à sè hwêy Yɔsɛf,

²⁵Yɔsɛf à sè hwêy Matatya, de à sè hwêy Amɔs, Amɔs à sè hwêy Nahum, de à sè hwêy Esli, Esli à sè hwêy Nagai,

²⁶de à sè hwêy Mahat, Mahat à sè hwêy Matatya, de à sè hwêy Semeyin, Semeyin à sè hwêy Yosek, de à sè hwêy Yoda,

²⁷Yoda à sè hwêy Yohanan, de à sè hwêy Resa, Resa à sè hwêy Zɛrubabɛl, de à sè hwêy Sheyaltyel, Sheyaltyel à sè hwêy Neri,

²⁸de à sè hwêy Mɛlki, Mɛlki à sè hwêy Adi, de à sè hwêy Kosam, Kosam à sè hwêy Ɛlmadam, de à sè hwêy Ɛr,

²⁹Ɛr à sè hwêy Yɔshuwa, de à sè hwêy Ɛliyɛzɛr, Ɛliyɛzɛr à sè hwêy Yorim, de à sè hwêy Matat, Matat à sè hwêy Levi,

³⁰de à sè hwêy Simɛyɔn, Simɛyɔn à sè hwêy Yuda, de à sè hwêy Yɔsɛf, Yɔsɛf à sè hwêy Yonam, de à sè hwêy Ɛliyakim,

³¹Ɛliyakim à sè hwêy Mɛlɛya, de à sè hwêy Mɛna, Mɛna à sè hwêy Matata, de à sè hwêy Natan, Natan à sè hwêy Davit,

³²de à sè hwêy Yɛsɛ, Yɛsɛ à sè hwêy Obet, de à sè hwêy Bowas, Bowas à sè hwêy Salmon, de à sè hwêy Nashon,

³³Nashon à sè hwêy Aminadap, de à sè hwêy Ram, Ram à sè hwêy Hesron, de à sè hwêy Pɛrɛs, Pɛrɛs à sè hwêy Yuda,

³⁴de à sè hwêy Yakɔp, Yakɔp à sè hwêy Yishak, de à sè hwêy Abraham, Abraham à sè hwêy Tɛra, de à sè hwêy Nahor,

³⁵Nahor à sè hwêy Sɛruk, de à sè hwêy Rɛyu, Rɛyu à sè hwêy Pɛlɛk, de à sè hwêy Ɛbɛr, Ɛbɛr à sè hwêy Shela,

³⁶de à sè hwêy Kɛnan, Kɛnan à sè hwêy Arfaksat, de à sè hwêy Shɛm, Shɛm à sè hwêy Nowa, de à sè hwêy Lamɛk,

³⁷Lamɛk à sè hwêy Mɛtusɛla, de à sè hwêy Enok, Enok à sè hwêy Yarɛt, de à sè hwêy Mahalalel, Mahalalɛl à sè hwêy Kɛnan,

³⁸de à sè hwêy Enos, Enos à sè hwêy Shɛt, de à sè hwêy Adam, de à sè hwêy Dagwi.