Read berom Luka 4 Bible Online

Luka 4 - berom bible

Luka 4

¹Yɛsu a vɛ̄ hɛ yi e Rɔt Yɔrdan, ko Gabik Jɛrɛ ha vɔk reto e ra yɛ mwa, ha tɛ̀ ɛ a kyè vɔk e hey.

²A sangal e hwomo nepɔlɔ kuru banaas (40), ko gwɔ̀m cēng a tɔgɔs hɛ na a ra banɛn. E jeng o, Yɛsu a re pyɛ cak wɛt; ko sede setɔgɔs o sa ga kwey, a wok vyong.

³Gwɔ̀m cēng a hwo yang ɛ, “Ka sede hwà sé Hwey Dagwi, ko yâng gwofwa gwomo gwo tɛ́ ɛ kpam-tuk!”

⁴Ko Yɛsu a yang ɛ, “Bà jɛk e Bwok-basa Dagwi, ‘A sé e kpam-tuk zɔng wɛt de wô tɛ̀ mwat a sè kwen.’ ”

⁵Ano, gwɔ̀m cēng a jut ɛ vɔk e kwɔn hak e rak o, ko e ji kejeng kehyet o a vɛ̌ dura a yɛ mwa neyɛnɛ̂ segwɔm detidetu e jey.

⁶A yang ɛ, “Di, mê nɔng o retô mwa e ra neyɛnɛ̂ segwɔm o tanga gbɔng nerât nɛ. Ba ga gang a me reto tanga gbɔng nerat o mwa e vɔ hom, ko mê tɔk nɔ̂ng kawɛ mwat de me simo.

⁷Ka sede hwô re a me fongol kwong, ko pyɛ́ yemo mwa ya rɔda tɛ́ ɛ myo.”

⁸Yɛsu a toyo a yɛ, a yang ɛ, “Bà jɛk e Bwok-basa Dagwi wɔgɔ, ‘Rē a Darwey Dagwi mō fongol, ko e yɛ nju mɛ zɔng de hwô ra a yɛ fwom.’ ”

⁹Ko gwɔ̀m cēng a to kyè na yɛ vɔk e Yɛrusalɛm, a tɛ̀ ɛ e ra tɛ̂t raduk Gbɔng Duk Re Fongol, a yang ɛ, “Ka sede hwà sé Hwey Dagwi, ko gyili yi e ngamo vɔk e vwel.

¹⁰Yaga bà jɛk e Bwok-basa Dagwi wɔgɔ, ‘Dagwi a rɔda nɔ̂ng betom-lagwi mɛ nu na be gyeng o.’

¹¹Bà to jɛk wɔgɔ, ‘Yɛn a rɔda vɔk o e ra vɔ mɛn, yaga na hwo kwon tiri bwol mō e ra gwofwa wɛt.’ ”

¹²Yɛsu a to toyo a yɛ, a yang ɛ, “Ko bà jɛk arɔng, ‘Hwo kwon mara Darwey Dagwi mō wɛt.’ ”

¹³Jeng de gwɔ̀m cēng a ga yɛnɛ tɔgɔ̂s Yɛsu e kagwɛ gwong, a tik ɛ yaga kejeng tyɔng.

¹⁴E bama mo, Yɛsu a vɛ̄ hɛ e sevwêl Galili, ko retô Gabik Jɛrɛ ra sé na yɛ. Ko há mɛ ha shara hɛ mwa e sevwel o.

¹⁵A kyě basa e beduk re fongol o, ko bemât mwa ba nɔng ɛ nerey.

¹⁶Yɛsu a kyè vɔk e repomô Nazarɛt e kwɔn de a ras ɛ̀. Sede Tuk Shábat ha vey, a wɔ̀ yel e duk re fongol, sede remo de a ga tɔ́k ɛ mɛ̀. A tumal na a basa Bwok-basa Dagwi,

¹⁷ko ba nára a yɛ bwok-basa Yɛshaya, zarap Dagwi. A wunta gwɛ e kwɔn de bà jɛk ɛ̀ wɔgɔ:

¹⁸“Gabik Darwey ha sé tanga me, yaga ha ga kasa me na me basa a bepɛng Yɛgɛt Yat. Hā tomo me, na me ha a bemat de bá kana rɔgɔs hɛn, ba rɔda vibis hɛn; na me to ha a bebók, yɛn a rɔda to bɛɛ jey. Hā to tomo me, na me vibis vemo de ba sé washak wɛt,

¹⁹na me to ha shey de Darwey a rɔda dura nerat mɛ vɔk na bemat.”

²⁰Jeng de Yɛsu a tala basa mo, a bang bwok-basa mo, a nɔ̂ng mwât sɛlɛ e duk re fongol, ko a sangal. Bemât mwa de ba sé e hwomo ba shusha bayis e ra yɛ.

²¹Ko a hwo ha a yɛn, a yang ɛn, “Hâ Dagwi hemo ha ga sila hɛ yunung, sede remo de yin a ga wok e jeng basâ hɛ.”

²²Yɛn mwa ba ha há rat e ra yɛ, ko yɛn a langat hɛn yaga netâ há de a ha, yɛn a tē, “À besa! E hwêy Yɔsɛf a hemo wɛt a?”

²³Ko Yɛsu a hwo yang ɛn, “Ma tɔk, yin a rɔda yi a me na cinat há hemo wɔgɔ, ‘À vwoshon, tɛ̀ tó mo tyang.’ Ko yin ê to yang me, ‘Wot a ga wok hâ pyɛ̂ mwa de hwà ga ra e Kafarnahum. Rá pyɛ jining o e ngamo e repomô lɔ mō arɔng!’

²⁴Ko tsak o mwin me ha a yin: Be simo zarap Dagwi e repomô lɔ mɛ wɛt.

²⁵“Me ha a yin há de ha sé tsak o: E jeng Eliya, zarap Dagwi, bekuma bà sè pyak e sevwêl BeIsrayɛl. E jeng o, Dagwi à ro na rwak neshey netat na bit o, ko vyong vyes yà hwo e sevwel o mwa.

²⁶Ko mwa ano, Dagwi à tomo Eliya vɔk na gwining e ji mɛn wɛt sɛ̌ vɔk na kuma hwak e Zarɛpat e ji yɛnɛ̂ sevwêl Sidɔn.

²⁷E jeng Elisha, zarap Dagwi arɔng, bekparong bà sè pyak e sevwêl BeIsrayɛl. Ko mwa ano, bà tɛ̀ ko gwining e ji mɛn tyang wɛt sɛ̌ Naaman, mwât sevwêl Sirya nju mɛ.”

²⁸Jeng de mwa bemat de ba sé e duk re fongol o ba wok ano, ba hwo tɛ̀ shom sizɔng.

²⁹Yɛn a sogo, ko ba vo ɛ vɔk e bamâ repomo, ba hwɔlɔ hɛ vɔk e ra tɛ̂t raku de repomo mɛn o ra sé ɛ̀, na be bomo hɛ e vwak.

³⁰Ko Yɛsu a kweres e tê bemat, a vɛ̌ nára hɛ.

³¹E bama mo, Yɛsu a kyè vɔk e Kafarnahum de ra sé repomo rehak e ji sevwêl Galili; ko Tuk Shábat, a hwo basa a bemat rehâ Dagwi.

³²Bemat o ba langat hɛn e ra gwong de a basa, yaga a ha sede mwat de a vɔk reto.

³³Ko mwat hwak a sé e ji duk re fongol o de a vɔk ceng vyes o. Mwat o a hwo gbɔ na gbɔng fwɔ, a ye,

³⁴“Hàa! À Yɛsu wo Nazarɛt, e sɛ́ de hwó simo hwo ra na wot arɛt? Hwà vey na hwo ba wey na wot a? Ma tɔk yerê mwat de hwà sé: Hwà sé mwât Dagwi de yɛ a tomo hɛ!”

³⁵Ko Yɛsu a pat bayis e ra ceng o, a yâng yɛ, “Sǎ yuu! Nusu yi e ji mwat womo!” Ceng o ya bomo mwat o e vwel e nuyel mɛn, ko ya nusu sana mǎ hɛ.

³⁶Bemat o mwa a vɛ̌ yang ɛn kpɔrɔk, ba hwo tâng bemɛn, “E hɛ̌ há a hemo ɛ? Mwat womo e nɔngɔ̂s cēng nu yi na reto tanga gap, ko ye nunus yi e bemat!”

³⁷Ko há de ba ha e ra Yɛsu ha shara hɛ e kahɛ kwɔn e yɛnɛ̂ sevwel o.

³⁸Yɛsu a nusu yi e duk re fongol o, a kyè vɔk e lɔ Simɔn. Gùna Simɔn o á sè e dyɛngɛ pep-pep na bêk fes, ko bemat ba ha a Yɛsu, ba rangal sɛ́lɛ mɛ.

³⁹Yɛsu a wɔ́, a ye ngyuk e ra yɛ, a gyong bêk fes o, ko ha hàla hɛ. E ji jeng o, a sogo, ko a yong a yɛn pyɛ́.

⁴⁰Jeng de gwi gwa kyè wɔ̀ gaba, mwa vemo de ba vɔk bemat de ba vɔk nezap nerɔ detidetu ba vey na yɛn na Yɛsu. A tɛ̀ vɔ mɛ e ra kawɛ mwât serɔ, ko a tɛ̀ ɛn mwa tyang.

⁴¹Cēng arɔng ya nunus yi e ji bemat pyak, ya gbɔ, ya tē, “Hwà sé Hwey Dagwi!” Ko Yɛsu a gyong cēng o, a tik yɛ̄ ye ha wɛt, yaga ya tɔk, yɛ a sé Mwat de Dagwi a kasa na a sey bemat.

⁴²Jeng de gasi ha ye gbey, Yɛsu a tik repomo mo, ko a vɔk e dem de vit a mwat. Bemat ba hwo jāma hɛ, ko jeng de ba sɛ̀ ɛ, yɛn a simo be ro ɛ nà kyè.

⁴³Ko a yang ɛn, “A sé gbing-gbing na me wɔ̀ basa Yɛgɛt Yat e ji bwang bapomo wɔgɔ, Dagwi a rɔda re negwɔm e ra jey. Pyɛ ma yane de Dagwi a tomo me yaga yɛ.”

⁴⁴Ko a kyě basa e ji beduk re fongôl sevwêl Yudiya.