Read berom Luka 5 Bible Online

Luka 5 - berom bible

Luka 5

¹Tuhak, Yɛsu á sè tumal e vwâ Rep Gɛnɛsarɛt, ko bemat bá sɛ̀ pyak, ba ngyɔ hɛn vey na yɛ, na yɛn a bin wok rehâ Dagwi.

²Ko a di bedwa-nshi beba e nû rep o; e bemât vôs betɔk de ba tik ɛ̀ vɛ, ko yɛn a sé kus bagun mɛn.

³Yɛsu a yel e hwak e ji bedwa-nshi mo womo de wá sè wo Simɔn, ko a yang ɛ, a gang wɛ vɔk e ji mo yi e rekwogom. Ko a sangal, a hwo basa a bemat yi e dwa mo.

⁴Jeng de a ga yɛnɛ basa, a yâng Simɔn, “Gwɛ̌ sek vɔk e kwɔn de ha sé ciwil, na yin a hàla bagun min e ji nshi mo, na yin a vo mɛ̀ betɔk.”

⁵Simɔn a toyo a yɛ, a ye, “À Da, wot a bûm ra fwom mwâ turuk, ko wot a vo pyɛ cak wɛt. Ko yaga hwà ye ano, ma rɔda to hàla bagun o.”

⁶Yɛn a ra ano, ko yɛn a vo betɔk tyɔng wɛt, bagun mɛn o ba hwo hama hɛn.

⁷Yaga ano, yɛn a yila besâ gafiri mɛn na vɔ, vemo de ba sé e ji dwa-nshi mo woro, yaga na yɛn a vey sɛlɛ hɛn. Yɛn a vey, ko ba sila bedwa mo mwa vɛ beba byɛf, ko ba hwo jāma na be ye pyɔp.

⁸Sede Simɔn Bitrus a di ano, a ye guduruk e nuyêl Yɛsu, a yang ɛ, “Kyè yi e ngamo na me, à Darwey! Ma sé mwât banɛn.”

⁹Yaga a yang ɛ tanga besâ fwom mɛ mwa yɔɔt na nepyak betɔk de yɛn a vo;

¹⁰ko besâ gafiri mɛ Yakɔp na Yohana, nèy Zɛbɛdayus, a yang ɛn yɔɔt arɔng. Ko Yɛsu a yâng Simɔn, “Hwo vɔk bengyip wɛt! Sede remo de hwó vos betɔk, ko e ngamo nuyel, hwà rɔda vɛ̀sɛ a me na bemat.”

¹¹Yɛn a hwɔlɔ bedwa-nshi mɛn o vɔk e rekwogom, ba hàla pyɛ̂ mwa, ko ba raa hɛ.

¹²Jeng de Yɛsu á sè e rehak e ji bapomô yɛnɛ̂ sevwel o, mwat hwak a vey womo de sekwa sa ga re ɛ tyɔng wɛt. Jeng de a di Yɛsu, a gaba e nuyel mɛ, ko a ra won na yɛ, a ye, “À Darwey, ka sede hwà simo, ko hwà vɔk reto na hwo tɛ̀ me tyang.”

¹³Yɛsu a nára vwɔ mɛ, a ra mɛ̀ mwat o, a yang ɛ, “Ey, me simo; tɛ̀ tyang!” Remo-remo, sekwa mo sa hàla hɛ.

¹⁴Ko Yɛsu a nɔng ɛ nu, a yang ɛ, “Hwo ha a mwat hwak pyɛ de ma ga ra a hwo wɛt. Ko nára hwo vɔk na piris na a bɛrɛng rebek mō. E bama mo, nára nɔrɔ̂ yas de be yɛt vɔk na Dagwi, hemo de Mose à kana nɔng nu be ra, yaga na he dura a kawɛ mwat, hwà ga tɛ̀ tyang.”

¹⁵Ko mwa ano, reha e ra Yɛsu ra gwɛ̌ shara hɛ, ko bagyɛng bemat ba vɛ̀sɛ na be wok ɛ, na be to tɛ̀ ɛn tyang yi e nerɔ mɛn.

¹⁶Ko Yɛsu a sǎ e de nunus vɔk e nekwɔn de bemat ba sé ɛ̀ wɛt na a ra won.

¹⁷Tuhak jeng de Yɛsu á sè basa, BeFarisi tanga bemât basâ Badu behak ba sé sangal e hwomo. Bá kana yi e kakɛ kerepomô sevwêl Galili, na yi e sevwêl Yudiya, tanga yi e gbɔng repomô Yɛrusalɛm. Ko retô Darwey ra sé na Yɛsu na a tɛ̀ mɛ̀ bemât serɔ tyang.

¹⁸Bemat behak ba wɔ́ e hwomo na mwat hwak de a vɔk serɔ̂ gbɛrɛ̂k nedem; ba jut ɛ dararing e ra gwocàre. Bemat o ba jāma gwong na be yel na yɛ wɔ e ji lɔ de Yɛsu a sé ɛ̀, yaga na be tik ɛ e nuyel mɛ.

¹⁹Ko yaga nepyak bemat ba tɔk sɛ̀ gwong na be yel ɛ̀ wɛt. Yaga ano, ba raa gwong vɔk e rak o, yɛn a kulu raduk, ko yɛn a nára mwat o wɔ̀ gyirik na rik, mwa na gwocàre de yɛ a dyɛng ɛ̀. Ba gyirik hɛ e tê bemat e nuyêl Yɛsu.

²⁰Yi ano, Yɛsu a di, yɛn a tɛ̀ gap mɛn e ra yɛ, ko a yâng mwât gbɛrɛ̂k nedem o, “À sa hom, ba ga hàla a hwo banɛn mō.”

²¹Jeng de bemât basâ Badu tanga BeFarisi de ba sé e hwomo ba wok há mo, ba hwo bare e ji neyey mɛn, “E wɛ̌ mwat a womo de e ha ano arɛt? A jut tó mɛ sede Dagwi! Vit a mwat de e tɔk hàla banɛn sɛ̌ Dagwi nju mɛ zɔng!”

²²Yɛsu a tɔk bare mɛn. Yaga ano, a yang ɛn, “Yaga sɛ́ de yin a sé bare yerê pyɛ́ yane e ji neyey min arɛt?

²³E hɛ̌ mo ha dal na be ye, ‘Ba ga hàla a hwo banɛn mō’, kɛ be ye, ‘Sogo, na hwo kyè!’ arɛt?

²⁴Ko ma rɔda dura a yin, na yin a tɔk, Me de ma tɛ́ me mwat ma vɔk reto e ngamo e jey na me hàla banɛn.” Ko a yâng mwât gbɛrɛ̂k nedem o, “Ma yang o, sogo, jut gwocàre mō, na hwo kyè vɔk e lɔ!”

²⁵E ji jeng o, mwat o a sogo e bayis mɛn mwa, a jut pyɛ de á kana dyɛng ɛ̀, ko a kyè vɔk e lɔ, a nɔ̂ng Dagwi nerey.

²⁶Mwa hɛn, a yang ɛn yɔɔt. Bengyip ba vo ɛn, ko ba nɔ̂ng Dagwi nerey, ba tē, “Kée! Yunung wot a ga di pyɛ̂ bes!”

²⁷E bama mo, Yɛsu a nusu, ko a di mwât seres dyâm yeles na pyɛ́ de ba tang ɛ, à Levi e sangal e duk fwom mɛ. A yang ɛ, “Raa me.”

²⁸Ko Levi a sogo, a hwo tik mwa pyɛ́ mɛ, ko a raa hɛ.

²⁹Ano Levi a ra a Yɛsu gbɔng nzem e lɔ mɛ, ko pyak e ji bemât serês dyâm yeles na pyɛ́ tanga bemat behak ba sé re pyɛ́ tanga yɛn.

³⁰BeFarisi behak tanga bemât basâ Badu de ba sé vê BeFarisi arɔng ba wɔ̀ dura a bemât masâ fwôm Yɛsu lashê yey mɛn, ba ye, “Yaga sɛ́ de yin e re na yin e sɔ na bemât serês dyâm yeles na pyɛ́ tanga bemât negwɔn neves behak arɔng arɛt?”

³¹Yɛsu a toyo a yɛn, a yang ɛn, “Bemat de ba sé tyang be wɔ e lɔ vwoshon wɛt sɛ̌ bemat de be ro ɛn.

³²Ma vey na me ba yila bemat berat wɛt na be doyo yi e banɛn mɛn, ko ma vey na me ba yila vê banɛn.”

³³Bemat behak ba yâng Yɛsu, “Bemât raà Yohana be tik rê pyɛ́ e jeng e jeng, ko be to ra won. Bemât masâ fwôm BeFarisi be ra ano arɔng, ko bemo be re, ko be sɔ.”

³⁴Yɛsu a toyo a yɛn, a yang ɛn, “Yin ê tɔk tɛ̀ besâ rwâs gwel be tik rê pyɛ́ e jeng de rwâs gwel a sé tanga yɛn arɛt? Kée wey!

³⁵Ko jeng ye kyè vey de ba rɔda ba jut rwâs gwel o yi na yɛn. E jeng yane kwong, yɛn a rɔda ba tik rê pyɛ́.”

³⁶Yɛsu a to hanat a yɛn na gwɔrɔ-há hemo, a ye, “Vit a mwat de ê hanta cɛ̌k rugu yi e rugu pwas, na a bang mɛ̀ revɔng rugu de gwa ga kwop. Ka sede a ra ano, ko a ga hanta rugu pwas o, ko cɛ̌k rugu pyas o mo ya rɔda man na rugu roso mo wɛt.

³⁷Ko vit a mwat de ê tɛ̀ nshî anap de na rɔngɔl nà sogo e ji betsung de ba ga taksal. Ka sede a ra ano, jeng de nshî anap o na sogo, nê mɔrɔ betsung o, nê tele e vwel, ko betsung o arɔng bê lashe hɛn.

³⁸Wey, bé shusha nshî anap de na rɔngɔl nà sogo e ji betsung de ba ga taksal wɛt.

³⁹Vit a mwat de ê simo na a sɔ nshî anap de na rɔngɔl nà sogo e bama de a ga sɔ nemo de na ga kana sogo. Yɛ mwat o ê ye, ‘Nshî anap de na ga kana sogo na dal na nerat.’ ”